ಇದುವರೆಗಿನ ಕ್ರಮದಿಂದ ನಾವು ತೃಪ್ತರಾಗಿಲ್ಲ - ಉತ್ತರ ಪ್ರದೇಶ ಸರಕಾರಕ್ಕೆ ಸುಪ್ರೀಂ ಕೋರ್ಟ್‌ ತೀವ್ರ ತರಾಟೆ

ಹೊಸದಿಲ್ಲಿ: ಹಿಂಸಾಚಾರದ ಬಗ್ಗೆ ದೇಶಾದ್ಯಂತ ಆಕ್ರೋಶ ವ್ಯಕ್ತವಾಗಿರುವ ನಡುವೆಯೇ ಸರಕಾರವನ್ನು ತೀವ್ರವಾಗಿ ತರಾಟೆಗೆ ತೆಗೆದುಕೊಂಡಿರುವ , ಘಟನೆಯಲ್ಲಿ ಯಾರೇ ಭಾಗಿಯಾಗಿದ್ದರೂ ಕಾನೂನು ತನ್ನ ಕ್ರಮವನ್ನು ತೆಗೆದುಕೊಳ್ಳಬೇಕು ಎಂದು ಹೇಳಿದೆ. ಅಷ್ಟೇ ಅಲ್ಲದೆ, ‘ಇದುವರೆಗಿನ ಕ್ರಮದಿಂದ ನಾವು ತೃಪ್ತರಾಗಿಲ್ಲ’ ಎಂದು ಸರಕಾರಕ್ಕೆ ಬಲವಾಗಿ ಚಾಟಿ ಬೀಸಿದೆ. "ನೀವು ಕಳುಹಿಸುತ್ತಿರುವ ಸಂದೇಶವೇನು? ಸಾಮಾನ್ಯ ಸನ್ನಿವೇಶಗಳಲ್ಲಿ ಪೊಲೀಸರು ತಕ್ಷಣವೇ ಸ್ಥಳಕ್ಕೆ ಹೋಗದೆ, ಆರೋಪಿಗಳನ್ನು ಬಂಧಿಸದೇ ಇರುತ್ತಾರಾ? ಇಲ್ಲಿ ಸಾಮಾನ್ಯವಾಗಿ ತೆಗೆದುಕೊಳ್ಳಬೇಕಾದ ರೀತಿಯಲ್ಲಿ ಯಾಕೆ ಕ್ರಮ ತೆಗೆದುಕೊಂಡಿಲ್ಲ. ಇದು ಕೇವಲ ಪದಗಳಂತೆ ತೋರುತ್ತದೆ, ಯಾವುದೇ ಕ್ರಮ ತೆಗೆದುಕೊಂಡಿಲ್ಲ,” ಎಂದು ವಿಚಾರಣೆ ವೇಳೆ ಮಖ್ಯ ನ್ಯಾಯಮೂರ್ತಿ ಎನ್‌.ವಿ. ರಮಣ ಸರಕಾರಕ್ಕೆ ಬಿಸಿ ಮುಟ್ಟಿಸಿದರು. ಈ ವೇಳೆ ಉತ್ತರ ಪ್ರದೇಶ ಸರಕಾರದ ಪರವಾಗಿ ಹಾಜರಿದ್ದ ಹಿರಿಯ ವಕೀಲ ಹರೀಶ್‌ ಸಾಳ್ವೆ ಕೂಡ ಇದನ್ನು ಒಪ್ಪಿಕೊಂಡರು. "ಸಾಕಷ್ಟು ಕ್ರಮಗಳನ್ನು ತೆಗೆದುಕೊಳ್ಳಲಾಗಿಲ್ಲ ಎಂಬುದನ್ನು ನಾನೂ ಒಪ್ಪುತ್ತೇನೆ,” ಎಂದು ಅವರೂ ಹೇಳಿದರು. ಲಖೀಂಪುರ ಖೇರಿಯಲ್ಲಿ ಪ್ರತಿಭಟನಾಕಾರರ ಮೇಲೆ ಕಾರು ಹರಿಸಿದ ಪ್ರಕರಣದಲ್ಲಿ ಕೇಂದ್ರ ಗೃಹ ಖಾತೆ ಸಹಾಯಕ ಸಚಿವ ಅಜಯ್‌ ಮಿಶ್ರಾ ಪುತ್ರ ಆಶೀಷ್‌ ಮಿಶ್ರಾ ಪ್ರಮುಖ ಆರೋಪಿಯಾಗಿದ್ದಾರೆ. ಸ್ವತಃ ಅವರೇ ಪ್ರತಿಭಟನಾಕಾರರ ಮೇಲೆ ಕಾರು ಚಲಾಯಿಸಿದ್ದರು ಎಂದು ಎಫ್‌ಐಆರ್‌ನಲ್ಲಿ ಆರೋಪಿಸಿದ್ದಾರೆ. ಭಾನುವಾರ ನಡೆದ ಈ ಘಟನೆಯಲ್ಲಿ ನಾಲ್ವರು ರೈತರು ಸೇರಿ ಒಟ್ಟು 8 ಮಂದಿ ಅಸುನೀಗಿದ್ದರು. ಆಶೀಷ್‌ ಮಿಶ್ರಾ ಅವರನ್ನು ಇನ್ನೂ ಬಂಧಿಸಲಾಗಿಲ್ಲ ಮತ್ತು ಪ್ರಕರಣದ ವಿಚಾರಣೆಗೂ ಅವರು ಶುಕ್ರವಾರ ಗೈರು ಹಾಜರಾಗಿದ್ದಾರೆ. ಪ್ರಕರಣದಲ್ಲಿ ಆಶೀಷ್‌ರನ್ನು ರಕ್ಷಿಸಲಾಗುತ್ತಿದೆ ಎಂಬ ಆರೋಪದ ನಡುವೆಯೇ ಅವರಿಗೆ ಎರಡನೇ ಬಾರಿಗೆ ವಿಚಾರಣೆಗೆ ಹಾಜರಾಗಲು ಸಮನ್ಸ್‌ ನೀಡಲಾಗಿದೆ. "ಇತರ ಪ್ರಕರಣಗಳಲ್ಲಿ ನಾವು ಬೇರೆ ವ್ಯಕ್ತಿಗಳನ್ನು ಹೇಗೆ ನಡೆಸಿಕೊಳ್ಳುತ್ತೇವೆಯೋ ಅದೇ ರೀತಿ ಆರೋಪಿಗಳನ್ನು ನಡೆಸಿಕೊಳ್ಳಿ," ಎಂದು ಮುಖ್ಯ ನ್ಯಾಯಮೂರ್ತಿಗಳು ಸೂಚಿಸಿದರು. "ನ್ಯಾಯಾಲಯವು ಪುನಃ ತೆರೆದ ನಂತರ ಈ ಪ್ರಕರಣವನ್ನು ಆಲಿಸಿ. ಆಗವೂ ಪ್ರಕರಣದಲ್ಲಿ ಸಾಕಷ್ಟು ಪ್ರಗತಿ ಸಾಧ್ಯವಾಗದೇ ಇದ್ದಲ್ಲಿ ಇದನ್ನು ಸಿಬಿಐಗೆ ವರ್ಗಾಯಿಸಿ," ಎಂದು ಹರೀಶ್‌ ಸಾಳ್ವೆ ನ್ಯಾಯಾಲಯಕ್ಕೆ ಮನವಿ ಮಾಡಿಕೊಂಡರು. ಇದಕ್ಕೆ ಪ್ರತಿಕ್ರಿಯಿಸಿದ ನ್ಯಾಯಮೂರ್ತಿಗಳು, "ಸಾಳ್ವೆ ಅವರೇ ನಿಮ್ಮ ಬಗ್ಗೆ ನಮಗೆ ಗೌರವವಿದೆ. ರಾಜ್ಯವು ಅಗತ್ಯ ಕ್ರಮಗಳನ್ನು ತೆಗೆದುಕೊಳ್ಳುತ್ತದೆ ಎಂದು ನಾವು ಭಾವಿಸುತ್ತೇವೆ. ಸಮಸ್ಯೆಯ ಸೂಕ್ಷ್ಮತೆಯಿಂದಾಗಿ, ನಾವು ಯಾವುದೇ ಪ್ರತಿಕ್ರಿಯೆ ಕೊಡುತ್ತಿಲ್ಲ. ಸಿಬಿಐ ಒಂದು ಪರಿಹಾರವಲ್ಲ, ಯಾಕೆ ಎಂದು ನಿಮಗೇ ತಿಳಿದಿದೆ... ವ್ಯಕ್ತಿಗಳ ಕಾರಣದಿಂದಾಗಿ ... ಬೇರೆಯವರು (ಅಧಿಕಾರಿಗಳು) ಈ ಪ್ರಕರಣದ ಬಗ್ಗೆ ನೋಡುವುದು ಉತ್ತಮ. ನ್ಯಾಯಾಲಯಗಳು ಪುನರಾರಂಭವಾದ ನಂತರ (ದಸರಾ ನಂತರ) ನಾವು ಪ್ರಕರಣವನ್ನು ಕೈಗೆತ್ತಿಕೊಳ್ಳುತ್ತೇವೆ. ಅಧಿಕಾರಿಗಳು ಈ ಪ್ರಕರಣದಲ್ಲಿ ಕ್ರಮ ತೆಗೆದುಕೊಳ್ಳಲೇಬೇಕು," ಎಂದರು. ಇನ್ನು ಪ್ರಕರಣದಲ್ಲಿ ನಡೆದಿರುವ ಬಂಧನದ ಬಗ್ಗೆ ಪ್ರಸ್ತುತ ಸ್ಥಿತಿಗತಿಗಳ ವರದಿ ನೀಡುವಂತೆ ರಾಜ್ಯ ಸರಕಾರಕ್ಕೆ ಸುಪ್ರಿಂ ಕೋರ್ಟ್‌ ಗುರುವಾರ ಸೂಚಿಸಿತ್ತು. ಈ ಸಂಬಂಧ ಶುಕ್ರವಾರ ವರದಿ ಸಲ್ಲಿಸಿದ ಸರಕಾರ, ‘ಮುಕ್ತ ಮತ್ತು ನ್ಯಾಯಯುತ ತನಿಖೆಯನ್ನು ಖಚಿತಪಡಿಸಿಕೊಳ್ಳಲು ಎಲ್ಲಾ ಕ್ರಮಗಳನ್ನು ತೆಗೆದುಕೊಳ್ಳುತ್ತಿದ್ದೇವೆ’ ಎಂದು ಹೇಳಿದ್ದು, ಇಬ್ಬರನ್ನು ಬಂಧಿಸಿರುವುದಾಗಿಯೂ ಹೇಳಿದೆ. ಲಖಿಂಪುರ್ ಹಿಂಸಾಚಾರವನ್ನು 'ಅತ್ಯಂತ ದುರದೃಷ್ಟಕರ' ಎಂದು ಹೇಳಿರುವ ರಾಜ್ಯ ಸರಕಾರ, ಪ್ರತಿಭಟಿಸುತ್ತಿದ್ದ ಮತ್ತು ಗಲಭೆ ನಡೆಸುತ್ತಿದ್ದ ರೈತರು ನಾಲ್ಕು ಜನರನ್ನು ಕೊಂದ ಆರೋಪದ ಮೇಲೆ ಮತ್ತೊಂದು ಎಫ್ಐಆರ್ ದಾಖಲಿಸಲಾಗಿದೆ ಎಂದು ಹೇಳಿದೆ. ಮೃತಪಟ್ಟ ರೈತರ ಕುಟುಂಬಗಳಿಗೆ ರಾಜ್ಯ ಸರ್ಕಾರದಿಂದ 45 ಲಕ್ಷ ರೂ. ನೀಡಲಾಗಿದೆ ಎಂದೂ ವರದಿಯಲ್ಲಿ ತಿಳಿಸಿದೆ. "ನಾವು ಎಸ್‌ಐಟಿ (ವಿಶೇಷ ತನಿಖಾ ತಂಡ)ದ ವಿವರಗಳನ್ನು ನೋಡಿದ್ದೇವೆ. ನಿಮ್ಮಲ್ಲಿ ಡಿಐಜಿ, ಪೊಲೀಸ್ ವರಿಷ್ಠಾಧಿಕಾರಿ, ವೃತ್ತ ನಿರೀಕ್ಷಕರು ಇದ್ದಾರೆ. ಇವರೆಲ್ಲರೂ ಸ್ಥಳೀಯ ಅಧಿಕಾರಿಗಳು. ಎಲ್ಲರೂ ಸ್ಥಳೀಯ ಅಧಿಕಾರಿಗಳು ಆಗಿದ್ದಾಗ ಇದು ಸಂಭವಿಸುತ್ತದೆ" ಎಂದು ಮುಖ್ಯ ನ್ಯಾಯಾಧೀಶರು ಖಾರವಾಗಿ ಹೇಳಿದರು. ಹಿಂಸಾಚಾರದ ವೇಳೆ ಗುಂಡು ಹಾರಿಸಿ ರೈತರೊಬ್ಬರನ್ನು ಕೊಲೆ ಮಾಡಲಾಯಿತು ಎಂಬ ಪ್ರತಿಭಟನಾಕಾರರ ಆರೋಪದ ಕುರಿತು ನ್ಯಾಯಾಲಯಕ್ಕೆ ಪ್ರತಿಕ್ರಿಯೆ ನೀಡಿದ ಸಾಳ್ವೆ, "ಮರಣೋತ್ತರ ಪರೀಕ್ಷೆಯಲ್ಲಿ ಯಾವುದೇ ಗುಂಡಿನ ಗಾಯಗಳಿಲ್ಲ. ಬಹುಶಃ ಇದು 302 (ಕೊಲೆ ಪ್ರಕರಣ)," ಎಂದು ಹೇಳಿದರು. ಮುಖ್ಯ ನ್ಯಾಯಮೂರ್ತಿ ರಮಣ, "ನಾವು ಜವಾಬ್ದಾರಿಯುತ ಸರ್ಕಾರ ಮತ್ತು ಪೊಲೀಸರನ್ನು ನಿರೀಕ್ಷಿಸುತ್ತೇವೆ. ಗುಂಡಿನ ಗಾಯಗಳು ಸೇರಿದಂತೆ ಆರೋಪಗಳು ತುಂಬಾ ಗಂಭೀರವಾಗಿದೆ. ಸೆಕ್ಷನ್ 302 (ಕೊಲೆ ಆರೋಪ). ಆರೋಪಿಯನ್ನು ಅದೇ ರೀತಿ ಪರಿಗಣಿಸಲಾಗುವುದಿಲ್ಲವೇ?" ಎಂದು ಕೇಳಿದರು. ಇದಕ್ಕೆ ಹರೀಶ್‌ ಸಾಳ್ವೆ "ಬಹುಶಃ" ಎಂದಷ್ಟೇ ಹೇಳಿದರು. ನಂತರ "ಬಹುಶಃ ಎಂದು ಯಾಕೆ ಹೇಳಿದೆ ಎಂದರೆ, ನಾಳೆ ಆರೋಪಿಯೂ ನಾನು ಹಾಜರಾಗುವ ಮೊದಲೇ ಒಂದು ನಿರ್ಧಾರಕ್ಕೆ ಬಂದಿದ್ದೆ ಎನ್ನಬಾರದು. ಪುರಾವೆಗಳು ಪ್ರಬಲವಾಗಿವೆ. ಪುರಾವೆಗಳು ನಿಜವಾಗಿದ್ದರೆ ಇದು ಸೆಕ್ಷನ್ 302," ಎಂದರು.