ನೆಹರು ಮತ್ತು ವಾಜಪೇಯಿ ಇಬ್ಬರೂ ಪ್ರಜಾಪ್ರಭುತ್ವದ ಆದರ್ಶಪ್ರಾಯರು: ನಿತಿನ್ ಗಡ್ಕರಿ
ಜವಹರಲಾಲ್ ನೆಹರು ಮತ್ತು ಅಟಲ್ ಬಿಹಾರಿ ವಾಜಪೇಯಿ ಇಬ್ಬರೂ ಭಾರತೀಯ ಪ್ರಜಾಪ್ರಭುತ್ವದ ಅನುಕರಣೀಯ ನಾಯಕರು. ಪ್ರಜಾಸತ್ತಾತ್ಮಕ ಘನತೆಯೊಂದಿಗೆ ನಾವು ವರ್ತಿಸಬೇಕು ಎಂದು ಅವರು ಹೇಳುತ್ತಿದ್ದರು ಎಂದು ನಿತಿನ್ ಗಡ್ಕರಿ ತಿಳಿಸಿದ್ದಾರೆ.
Admin
0
4
ಹೊಸದಿಲ್ಲಿ: ಮಾಜಿ ಪ್ರಧಾನಿಗಳಾದ ಮತ್ತು ಅಟಲ್ ಬಿಹಾರಿ ಇಬ್ಬರೂ ಭಾರತದ ಪ್ರಜಾಪ್ರಭುತ್ವದ ಆದರ್ಶಪ್ರಾಯ ನಾಯಕರು. ಆಡಳಿತಪಕ್ಷ ಹಾಗೂ ವಿರೋಧಪಕ್ಷಗಳಲ್ಲಿರುವ ನಾಯಕರು ಈ ಬಗ್ಗೆ ಆತ್ಮಾವಲೋಕನ ಮಾಡಿಕೊಳ್ಳಬೇಕು ಹಾಗೂ ಘನತೆಯಿಂದ ವರ್ತಿಸಬೇಕು ಎಂದು ಕೇಂದ್ರ ಸಚಿವ ಹೇಳಿದ್ದಾರೆ.
ಸುದ್ದಿವಾಹಿನಿಯೊಂದು ಆಯೋಜಿಸಿದ್ದ ಕಾರ್ಯಕ್ರಮದಲ್ಲಿ ಮಾತನಾಡಿದ ಗಡ್ಕರಿ, 'ವಾಜಪೇಯಿ ಹಾಗೂ ನೆಹರು ಇಬ್ಬರೂ ಭಾರತದ ಪ್ರಜಾಪ್ರಭುತ್ವದ ಆದರ್ಶಪ್ರಾಯ ನಾಯಕರು. ತಾವು ಪ್ರಜಾಪ್ರಭುತ್ವದ ಘನತೆಗೆ ಅನುಗುಣವಾಗಿ ನಡೆದುಕೊಳ್ಳುತ್ತೇವೆ ಎಂದು ಇಬ್ಬರೂ ಹೇಳುತ್ತಿದ್ದರು' ಎಂದಿದ್ದಾರೆ.
'ಅಟಲ್ ಅವರ ಪರಂಪರೆ ನಮ್ಮ ಸ್ಪೂರ್ತಿ ಮತ್ತು ಪಂಡಿತ್ ಜವಹರಲಾಲ್ ನೆಹರು ಕೂಡ ಭಾರತೀಯ ಪ್ರಜಾಪ್ರಭುತ್ವಕ್ಕೆ ಬಹುದೊಡ್ಡ ಕೊಡುಗೆ ನೀಡಿದ್ದಾರೆ' ಎಂದು ಹೇಳಿದ್ದಾರೆ.
'ನಾನು ಮಹಾರಾಷ್ಟ್ರ ವಿಧಾನಸಭೆ ವಿರೋಧಪಕ್ಷದ ನಾಯಕನಾಗಿದ್ದಾಗ ಒಮ್ಮೆ ಅಟಲ್ ಅವರನ್ನು ಭೇಟಿ ಮಾಡಿದ್ದೆ. ಸದನಕ್ಕೆ ಅಡ್ಡಿಪಡಿಸುವ ನಮ್ಮ ಕ್ರಮಕ್ಕೆ ಆಕ್ಷೇಪ ವ್ಯಕ್ತಪಡಿಸಿದ್ದ ಅವರು, ಇದು ಪ್ರಜಾಪ್ರಭುತ್ವದಲ್ಲಿ ನಡೆದುಕೊಳ್ಳುವ ರೀತಿಯಲ್ಲ. ನಿಮ್ಮ ಸಂದೇಶವನ್ನು ಜನರಿಗೆ ತಲುಪಿಸುವುದು ಬಹಳ ಮುಖ್ಯ ಎಂದಿದ್ದರು' ಎಂಬುದನ್ನು ನೆನಪಿಸಿಕೊಂಡಿದ್ದಾರೆ.
'ಎಲ್ಲ ಪಕ್ಷಗಳೂ ಆತ್ಮಾವಲೋಕನ ಮಾಡಿಕೊಳ್ಳಬೇಕು. ಇಂದು ವಿರೋಧಪಕ್ಷದಲ್ಲಿ ಇರುವವರು ನಾಳೆ ಅಧಿಕಾರಕ್ಕೆ ಬರುತ್ತಾರೆ. ಇಂದು ಅಧಿಕಾರದಲ್ಲಿ ಇರುವವರು ನಾಳೆ ವಿರೋಧಪಕ್ಷದಲ್ಲಿ ಇರುತ್ತಾರೆ. ನಮ್ಮ ಪಾತ್ರಗಳು ಬದಲಾಗುತ್ತಲೇ ಇರುತ್ತದೆ' ಎಂದು ಸಂಸತ್ ಕಲಾಪಕ್ಕೆ ಅಡ್ಡಿಪಡಿಸುವುದನ್ನು ವಿರೋಧಿಸಿದ್ದಾರೆ.
ಇಂದಿರಾ ಕ್ಯಾಂಟೀನ್ ಹೆಸರು ಬದಲಾವಣೆ ವಿಚಾರದಲ್ಲಿ ಕರ್ನಾಟಕದಲ್ಲಿ ಬಿಜೆಪಿ ಮತ್ತು ಕಾಂಗ್ರೆಸ್ ನಾಯಕರು ನೆಹರು ಹಾಗೂ ವಾಜಪೇಯಿ ಅವರ ಹೆಸರನ್ನು ಬಳಸಿ ಕಿತ್ತಾಡಿದ್ದು ತೀವ್ರ ಟೀಕೆಗೆ ಒಳಗಾಗಿತ್ತು.
