ಹೊಸ ಐಟಿ ನಿಯಮದಡಿ 30 ಮಿಲಿಯನ್ ಪೋಸ್ಟ್‌ಗಳನ್ನು ತೆಗೆದುಹಾಕಿದ ಫೇಸ್‌ಬುಕ್
ನೂತನ ಐಟಿ ನಿಯಮಗಳು ಜಾರಿಗೆ ಬಂದ ಬಳಿಕ ನಿಯಮದಂತೆ ತನ್ನ ಮೊದಲ ಅನುಸರಣೆ ವರದಿಯನ್ನು ಫೇಸ್‌ಬುಕ್ ಸಲ್ಲಿಸಿದೆ. ಮೇ 15- ಜೂನ್ 15ರ ಅವಧಿಯಲ್ಲಿ 30 ಮಿಲಿಯನ್‌ಗೂ ಅಧಿಕ ಪೋಸ್ಟ್‌ಗಳನ್ನು ತೆಗೆದುಹಾಕಿರುವುದಾಗಿ ಅದು ತಿಳಿಸಿದೆ.
Admin
0
7
ಹೊಸದಿಲ್ಲಿ: ಭಾರತದಲ್ಲಿ ಜಾರಿಗೆ ಬಂದ ಬಳಿಕ ತನ್ನ ಮೊದಲ ಮಾಸಿಕ ಅನುಸರಣೆ ವರದಿ ಸಲ್ಲಿಸಿರುವ ಸಾಮಾಜಿಕ ಜಾಲತಾಣದ ದಿಗ್ಗಜ , ಮೇ 15 ರಿಂದ ಜೂನ್ 15ರ ಅವಧಿಯಲ್ಲಿ ದೇಶ 10 ಉಲ್ಲಂಘನಾ ವಿಭಾಗಗಳಿಂದ 30 ಮಿಲಿಯನ್‌ಗೂ ಅಧಿಕ ಕಂಟೆಂಟ್‌ಗಳನ್ನು ತೆಗದುಹಾಕಿರುವುದಾಗಿ ತಿಳಿಸಿದೆ.
ಫೇಸ್‌ಬುಕ್ ಒಡೆತನದ ಕೂಡ 9 ವಿಭಾಗಗಳಲ್ಲಿನ ಪೋಸ್ಟ್‌ಗಳನ್ನು ಪರಿಶೀಲಿಸಿದ್ದು, ಅವುಗಳಲ್ಲಿ 20 ಮಿಲಿಯನ್‌ಗೂ ಅಧಿಕ ಅಂಶಗಳ ವಿರುದ್ಧ ಕ್ರಮ ತೆಗೆದುಕೊಂಡಿದೆ.
5 ಮಿಲಿಯನ್‌ಗೂ ಅಧಿಕ ಬಳಕೆದಾರರನ್ನು ಹೊಂದಿರುವ ಬೃಹತ್ ಡಿಜಿಟಲ್ ವೇದಿಕೆಗಳು ( ಸಂಸ್ಥೆಗಳು) ಪ್ರತಿ ತಿಂಗಳೂ ಅವಧಿಗನುಗುಣವಾಗಿ ಅನುಸರಣೆ ವರದಿಯನ್ನು ಸಲ್ಲಿಸಬೇಕು. ಇದರಲ್ಲಿ ತಮಗೆ ಬಂದ ದೂರುಗಳು ಹಾಗೂ ಅವುಗಳ ಕುರಿತು ತೆಗೆದುಕೊಂಡ ಕ್ರಮಗಳನ್ನು ಸಹ ಉಲ್ಲೇಖಿಸಬೇಕು ಎಂದು ನೂತನ ಐಟಿ ನಿಯಮಗಳು ಸೂಚಿಸಿವೆ.
ಹಲವು ವರ್ಷಗಳಿಂದಲೂ ಬಳಕೆದಾರರ ಸುರಕ್ಷತೆ ಮತ್ತು ಆನ್‌ಲೈನ್ ಸುರಕ್ಷತೆ ಹಾಗೂ ಅವರು ತನ್ನ ವೇದಿಕೆಯಲ್ಲಿ ಮುಕ್ತವಾಗಿ ಅಭಿವ್ಯಕ್ತಿಸಿಕೊಳ್ಳಲು ಅವಕಾಶ ನೀಡುವಂತೆ ಫೇಸ್‌ಬುಕ್ ನಿರಂತರವಾಗಿ ತಂತ್ರಜ್ಞಾನ, ಜನರು ಮತ್ತು ಪ್ರಕ್ರಿಯೆಗಳ ಮೇಲೆ ಹೂಡಿಕೆ ಮಾಡುತ್ತಿದೆ ಎಂದು ಫೇಸ್‌ಬುಕ್ ವಕ್ತಾರರು ತಿಳಿಸಿದ್ದಾರೆ.
'ನಾವು ಕೃತಕ ಬುದ್ಧಿಮತ್ತೆ, ನಮ್ಮ ಸಮುದಾಯದಿಂದ ಬರುವ ವರದಿಗಳು ಹಾಗೂ ನಮ್ಮ ನೀತಿಗಳ ವಿರುದ್ಧವಿರುವ ವಿಷಯಗಳನ್ನು ಗುರುತಿಸುವ ಹಾಗೂ ಪರಾಮರ್ಶಿಸುವ ನಮ್ಮ ತಂಡಗಳು ನಡೆಸುವ ಪರಿಶೀಲನೆಗಳ ಸಂಯೋಜನೆಯನ್ನು ಬಳಸುತ್ತಿದ್ದೇವೆ. ಈ ವರದಿಯಲ್ಲಿ ನೀಡಿರುವಂತೆ ಪಾರದರ್ಶಕತೆ ಹೆಚ್ಚಿಸುವ ಪ್ರಯತ್ನ ನಿರ್ಮಾಣ ಮತ್ತು ಹೆಚ್ಚಿನ ಮಾಹಿತಿಗಳನ್ನು ಒದಗಿಸುವುದನ್ನು ಮುಂದುವರಿಸಲಿದ್ದೇವೆ' ಎಂದಿದ್ದಾರೆ.
ಜುಲೈ 15ರಂದು ಸಲ್ಲಿಸಲಾಗುವ ತನ್ನ ಎರಡನೆಯ ವರದಿಯಲ್ಲಿ ಬಳಕೆದಾರರಿಂದ ಬಂದ ದೂರುಗಳು ಹಾಗೂ ತೆಗೆದುಕೊಂಡ ಕ್ರಮಗಳ ಕುರಿತು ವಿವರ ನೀಡುವುದಾಗಿ ಫೇಸ್‌ಬುಕ್ ತಿಳಿಸಿದೆ.
ಗೂಗಲ್, ತಾನು ಗೂಗಲ್ ಹಾಗೂ ಯೂಟ್ಯೂಬ್ ವೇದಿಕೆಗಳಿಂದ 26,762 ದೂರುಗಳನ್ನು ಸ್ವೀಕರಿಸಿದ್ದು, ಒಟ್ಟು 59,350 ವಿಷಯಗಳನ್ನು ತೆಗೆದುಹಾಕಿದ್ದಾಗಿ ತಿಳಿಸಿದೆ. ಕೂ ಆಪ್‌ನಲ್ಲಿ ಜೂನ್ ತಿಂಗಳಲ್ಲಿ 5,502 ಪೋಸ್ಟ್‌ಗಳ ವಿರುದ್ಧ ಬಳಕೆದಾರರು ರಿಪೋರ್ಟ್ ಮಾಡಿದ್ದು, ಇನ್ನು 54,235 ವಿಷಯಗಳನ್ನು ಮಾರ್ಪಾಡು ಮಾಡಲಾಗಿದೆ ಎಂದು ತಿಳಿಸಿದೆ.
ಸಚಿವರ ಶ್ಲಾಘನೆ
ಸಾಮಾಜಿಕ ಮಾಧ್ಯಮಗಳು ನಿಂದನಾತ್ಮಕ ಹಾಗೂ ಅನುಚಿತ ಪೋಸ್ಟ್‌ಗಳನ್ನು ತೆಗೆದುಹಾಕಿರುವ ಕ್ರಮವನ್ನು ಐಟಿ ಸಚಿವ ರವಿಶಂಕರ್ ಪ್ರಸಾದ್ ಶ್ಲಾಘಿಸಿದ್ದಾರೆ. ಇದು ಪಾರದರ್ಶಕತೆ ಕಡೆಗಿನ ದೊಡ್ಡ ಹೆಜ್ಜೆ ಎಂದು ಅವರು ಹೇಳಿದ್ದಾರೆ.
'ಗೂಗಲ್, ಫೇಸ್‌ಬುಕ್ ಮತ್ತು ಇನ್‌ಸ್ಟಾಗ್ರಾಂನಂತಹ ಪ್ರಮುಖ ಸಾಮಾಜಿಕ ಮಾಧ್ಯಮ ವೇದಿಕೆಗಳು ಹೊಸ ಐಟಿ ನಿಯಮಗಳನ್ನು ಅನುಸರಿಸುತ್ತಿರುವುದು ಉತ್ತಮ ಸಂಗತಿ. ಐಟಿ ನಿಯಮಗಳಿಗೆ ಅನುಸಾರವಾಗಿ ಕೆಟ್ಟ ಪೋಸ್ಟ್‌ಗಳನ್ನು ಸ್ವಯಂ ಪ್ರೇರಣೆಯಿಂದ ತೆಗೆದುಹಾಕಿರುವ ಮೊದಲ ಅನುಸರಣಾ ವರದಿಯು ಪಾರದರ್ಶಕತೆ ಕಡೆಗಿನ ದೊಡ್ಡ ಹೆಜ್ಜೆ' ಎಂದು ಅವರು ಟ್ವೀಟ್ ಮಾಡಿದ್ದಾರೆ.
