ಸತತ 3ನೇ ದಿನ ಅದಾನಿ ಗ್ರೂಪ್ ಷೇರು ದರ ಕುಸಿತ, ಪತರಗುಟ್ಟಿದ ಗೌತಮ್‌ ಅದಾನಿ ಸಾಮ್ರಾಜ್ಯ

ಹೊಸದಿಲ್ಲಿ: ಅದಾನಿ ಗ್ರೂಪ್‌ನ ಕಂಪನಿಗಳಲ್ಲಿ ಭಾರಿ ಹೂಡಿಕೆ ಮಾಡಿದ್ದ ಮೂರು ವಿದೇಶಿ ಫಂಡ್‌ಗಳ ವಿರುದ್ಧ ನ್ಯಾಷನಲ್‌ ಸೆಕ್ಯುರಿಟೀಸ್‌ ಡೆಪಾಸಿಟರಿ ಲಿಮಿಟೆಡ್‌ () ಕ್ರಮ ಕೈಗೊಂಡ ನಂತರ, ಕಂಪನಿಯ ಷೇರು ದರಗಳು ಕಳೆದ ಮೂರು ದಿನಗಳಿಂದ ಸತತವಾಗಿ ಕುಸಿಯುತ್ತಿದ್ದು, ಹೂಡಿಕೆದಾರರನ್ನು ತಲ್ಲಣಗೊಳಿಸಿದೆ. ಅದಾನಿ ಗ್ರೂಪ್‌ನ 4 ಕಂಪನಿಗಳ ಷೇರುಗಳಲ್ಲಿ ಹೂಡಿಕೆ ಮಾಡಿರುವ 3 ವಿದೇಶಿ ಬಂಡವಾಳ ಹೂಡಿಕೆದಾರರ (ಫಾರಿನ್‌ ಪೋರ್ಟ್‌ಫೊಲಿಯೊ ಇನ್ವೆಸ್ಟರ್‌-ಎಫ್‌ಪಿಐ) ಡಿಮ್ಯಾಟ್‌ ಖಾತೆಗಳನ್ನು ಎನ್‌ಎಸ್‌ಡಿಎಲ್‌ ಕಳೆದ ಜೂನ್‌ 14ರಂದು ಸ್ಥಗಿತಗೊಳಿಸಿದ ವರದಿಗಳ ಬೆನ್ನಲ್ಲೇ, ಷೇರುಗಳ ದರ ಕುಸಿತ ಉಂಟಾಯಿತು. ಅಲ್ಬುಲಾ ಇನ್ವೆಸ್ಟ್‌ಮೆಂಟ್‌, ಕ್ರೆಸ್ಟಾ ಫಂಡ್‌ ಮತ್ತು ಎಪಿಎಂಎಸ್‌ ಇನ್ವೆಸ್ಟ್‌ಮೆಂಟ್‌ ಫಂಡ್‌ನ ಡಿಮ್ಯಾಟ್‌ ಖಾತೆಗಳನ್ನು ಎನ್‌ಎಸ್‌ಡಿಎಲ್‌ ಸ್ಥಗಿತಗೊಳಿಸಿದೆ ಎಂದು ಸೋಮವಾರ ಎಕನಾಮಿಕ್‌ ಟೈಮ್ಸ್‌ ವರದಿ ಮಾಡಿತ್ತು. ಈ ಮೂರು ವಿದೇಶಿ ಹೂಡಿಕೆದಾರ ಕಂಪನಿಗಳು ಅದಾನಿ ಕಂಪನಿಗಳಲ್ಲಿ ಒಟ್ಟು 43,500 ಕೋಟಿ ರೂ. ಬೆಲೆಯ ಷೇರುಗಳನ್ನು ಹೊಂದಿವೆ. ಎನ್‌ಎಸ್‌ಡಿಎಲ್‌, ಡಿಮ್ಯಾಟ್‌ ಖಾತೆಗಳನ್ನು ಸ್ಥಗಿತಗೊಳಿಸಿಲ್ಲ ಎಂದು ಸ್ಪಷ್ಟನೆ ನೀಡಿದ್ದರೂ, ಅದಾನಿ ಗ್ರೂಪ್‌ನ ಷೇರು ವ್ಯವಹಾರಗಳ ಪಾರದರ್ಶಕತೆ ಬಗ್ಗೆ ಅನುಮಾನ ಸೃಷ್ಟಿಯಾಗಿದೆ. ಹೀಗಾಗಿ ಷೇರುಗಳ ದರ ಕುಸಿತ ಬುಧವಾರವೂ ಮುಂದುವರಿಯಿತು. ಅದಾನಿ ಟ್ರಾನ್ಸ್‌ಮಿಶನ್‌, ಅದಾನಿ ಟೋಟಲ್‌ ಗ್ಯಾಸ್‌, ಅದಾನಿ ಪವರ್‌ ಷೇರುಗಳು ಬುಧವಾರ ಶೇ.5ರಷ್ಟು ಕುಸಿಯಿತು. ಕಳೆದ ಮೂರು ದಿನಗಳಲ್ಲಿ ಈ ಷೇರುಗಳ ದರ ಶೇ.16ರಷ್ಟು ಪತನವಾಗಿರುವುದು ಗಮನಾರ್ಹ. ಮಾರುಕಟ್ಟೆಯಲ್ಲಿ ನೋಂದಣಿಯಾಗಿರುವ ಅದಾನಿ ಗ್ರೂಪ್‌ನ 6 ಕಂಪನಿಗಳ ಪೈಕಿ ಮೂರು ಕಂಪನಿಗಳ ಷೇರು ದರ ಸತತ ಮೂರನೇ ದಿನ ಲೋವರ್‌ ಸರ್ಕ್ಯೂಟ್‌ ಮಿತಿಗೆ ಕುಸಿಯಿತು. ಅದಾನಿ ಪೋರ್ಟ್ಸ್, ಅದಾನಿ ಗ್ರೀನ್‌ ಎನರ್ಜಿ, ಅದಾನಿ ಎಂಟರ್‌ಪ್ರೈಸಸ್‌ ಷೇರು ದರ ಶೇ.4ರ ತನಕ ಕುಸಿಯಿತು. ಎನ್‌ಎಸ್‌ಡಿಎಲ್‌ ವಿದೇಶಿ ಬಂಡವಾಳ ಹೂಡಿಕೆದಾರರ () ಖಾತೆಗಳನ್ನು ಸ್ಥಗಿತಗೊಳಿಸಿಲ್ಲ, ಇಂಥ ವರದಿಗಳು ಸಮೂಹದಲ್ಲಿ ಹೂಡಿಕೆ ಮಾಡಿರುವವರಿಗೆ ತೀವ್ರ ನಷ್ಟ ಉಂಟು ಮಾಡುತ್ತವೆ ಎಂದು ಹೇಳಿಕೆ ನೀಡಿದೆ. ಈ ನಡುವೆ ಫಿಚ್‌ ರೇಟಿಂಗ್ಸ್‌ ಅದಾನಿ ಪೋರ್ಟ್ಸ್‌ ಕ್ರೆಡಿಟ್‌ ರೇಟಿಂಗ್‌ ಅನ್ನು 'ಬಿಬಿಬಿ-'ಕ್ಕೆ ಕಡಿತಗೊಳಿಸಿದೆ. ಮುನ್ನೋಟವನ್ನು ಋುಣಾತ್ಮಕವಾಗಿಸಿದೆ. ಏನಿದು ಎಫ್‌ಪಿಐ? ವಿದೇಶಿ ಪೋರ್ಟ್‌ಫೋಲಿಯೊ ಇನ್ವೆಸ್ಟ್‌ಮೆಂಟ್‌ ಎಂದರೆ ವಿದೇಶದಲ್ಲಿರುವ ಹೂಡಿಕೆದಾರರು ಮತ್ತೊಂದು ದೇಶದಲ್ಲಿನ ಕಂಪನಿಗಳಲ್ಲಿ ಮಾಡುವ ಹೂಡಿಕೆ. ಈ ಎಫ್‌ಪಿಐ ಅಡಿಯಲ್ಲಿ ಹೂಡಿಕೆದಾರರು ಕಂಪನಿಯ ಷೇರು, ಬಾಂಡ್‌ಗಳಲ್ಲಿ ಹೂಡಿಕೆ ಮಾಡುತ್ತಾರೆ. ಇವರು ನೇರವಾಗಿ ಕಂಪನಿಯ ಆಡಳಿತವನ್ನು ನಿಯಂತ್ರಿಸುವುದಿಲ್ಲ. ಆದರೆ ಅವರಿಗೆ ಷೇರುಗಳನ್ನು ಯಾವಾಗ ಬೇಕಾದರೂ ಮಾರಾಟ ಮಾಡುವ ಅನುಕೂಲ ಹೆಚ್ಚು. ವಿದೇಶಿ ನೇರ ಹೂಡಿಕೆಯಲ್ಲಿ ಹೂಡಿಕೆದಾರರು ನೇರವಾಗಿ ಕಂಪನಿಯಲ್ಲಿ ಹೂಡಿಕೆ ಮಾಡುತ್ತಾರೆ ಮತ್ತು ಹೂಡಿಕೆಯನ್ನು ಹೆಚ್ಚಿಸಿ ಕಂಪನಿಯ ಆಡಳಿತದ ನಿಯಂತ್ರಣವನ್ನು ಹೊಂದಲೂ ಅವಕಾಶ ಇದೆ. ಹೀಗಾಗಿ ಯಾವ ಕಂಪನಿಯಲ್ಲಿ ಎಫ್‌ಪಿಐ ಅತಿ ಹೆಚ್ಚು ಇರುತ್ತದೆಯೋ, ಅಲ್ಲಿ ಹೂಡಿಕೆ ಹಿಂತೆಗೆತದ ರಿಸ್ಕ್‌ ಕೂಡ ಹೆಚ್ಚು ಇರುತ್ತದೆ. ಅದಾನಿ ಗ್ರೂಪ್‌ ಷೇರು ಕುಸಿತ ಏಕೆ? ನ್ಯಾಷನಲ್‌ ಸೆಕ್ಯುರಿಟೇಸ್‌ ಡೆಪಾಸಿಟರಿ ಲಿಮಿಟೆಡ್‌, ಅದಾನಿ ಗ್ರೂಪ್‌ನ 4 ಕಂಪನಿಗಳಲ್ಲಿ ಒಟ್ಟು 43,500 ಕೋಟಿ ರೂ.ಗಳನ್ನು ಹೂಡಿದ್ದ ಮೂರು ವಿದೇಶಿ ಫಂಡ್‌ಗಳ ಡಿಮ್ಯಾಟ್‌ ಖಾತೆಗಳನ್ನು ಸ್ಥಗಿತಗೊಳಿಸಿದೆ ಎಂದು ವರದಿಯಾಗಿತ್ತು. ಎನ್‌ಎಸ್‌ಡಿಎಲ್‌ ವೆಬ್‌ಸೈಟ್‌ ಪ್ರಕಾರ ಮೇ 31 ಅಥವಾ ಅದಕ್ಕೂ ಮೊದಲೇ ಸ್ಥಗಿತವಾಗಿತ್ತು. ಈ ಮೂರೂ ವಿದೇಶಿ ಫಂಡ್‌ಗಳು ವ್ಯಾವಹಾರಿಕ ಮಾಲಿಕತ್ವದ ಬಗ್ಗೆ ಅಕ್ರಮ ಹಣಕಾಸು ವರ್ಗವಣೆ ತಡೆ ಕಾಯಿದೆಯ ಅಡಿಯಲ್ಲಿ(ಪಿಎಂಎಲ್‌ಎ) ಕೊಡಬೇಕಿದ್ದ ವಿವರಗಳನ್ನು ನೀಡಿರಲಿಲ್ಲ. ಎನ್‌ಎಸ್‌ಡಿಎಲ್‌ ಇಂಥ ಪ್ರಕರಣಗಳ ಬಗ್ಗೆ ತನಿಖೆ ನಡೆಸುತ್ತದೆ. ಡಿಮ್ಯಾಟ್‌ ಖಾತೆಗಳು ಸಕ್ರಿಯವಾಗಿವೆ ಎಂದು ಎನ್‌ಎಸ್‌ಡಿಎಲ್‌ ಹೇಳಿದ್ದರೂ, ಕಂಪನಿಯ ವ್ಯವಹಾರದಲ್ಲಿನ ಪಾರದರ್ಶಕತೆ ಬಗ್ಗೆ ಅನುಮಾನ ಉಂಟಾಗಿದ್ದು, ಷೇರುಗಳ ದರ ಕುಸಿಯುತ್ತಿವೆ. 1 ವರ್ಷದಲ್ಲಿ ಷೇರುಗಳ ಭಾರಿ ದರ ಜಿಗಿತ! ಅದಾನಿ ಗ್ರೂಪ್‌ ಷೇರು ಮಾರುಕಟ್ಟೆಯಲ್ಲಿ ಒಟ್ಟು 6 ಕಂಪನಿಗಳನ್ನು ನೋಂದಣಿ ಮಾಡಿಸಿದೆ. ಅವುಗಳೆಂದರೆ ಅದಾನಿ ಎಂಟರ್‌ಪ್ರೈಸಸ್‌, ಅದಾನಿ ಗ್ರೀನ್‌ ಎನರ್ಜಿ, ಅದಾನಿ ಟ್ರಾನ್ಸ್‌ಮಿಶನ್‌, ಅದಾನಿ ಟೋಟಲ್‌ ಗ್ಯಾಸ್‌, ಅದಾನಿ ಪೋರ್ಟ್ಸ್ ಮತ್ತು ಅದಾನಿ ಪವರ್‌. ಕಳೆದೊಂದು ವರ್ಷದಲ್ಲಿ ಗ್ರೂಪ್‌ನ ಕಂಪನಿಗಳ ಷೇರುಗಳ ದರದಲ್ಲಿ ಶೇ.200ರಿಂದ ಶೇ.1000 ತನಕ ಭಾರಿ ಏರಿಕೆಯಾಗಿತ್ತು. ಇದರ ಹಿಂದೆ ಯಾವುದಾದರೂ ಕೈವಾಡ ಇದೆಯೇ ಎಂದು ಸೆಬಿ ತನಿಖೆ ಮಾಡುತ್ತಿದೆ ಎಂದೂ ವರದಿಯಾಗಿದೆ. ಮೂಲಗಳ ಪ್ರಕಾರ 2020ರಲ್ಲಿ ಸೆಬಿ ಈ ಬಗ್ಗೆ ತನಿಖೆ ಆರಂಭಿಸಿದೆ. 1 ವರ್ಷದಲ್ಲಿಅದಾನಿ ಕಂಪನಿಗಳ ಷೇರು ಜಿಗಿತ ಅದಾನಿ ಟ್ರಾನ್ಸ್‌ಮಿಷನ್‌ - ಶೇ.669 ಅದಾನಿ ಎಂಟರ್‌ಪ್ರೈಸಸ್‌ - ಶೇ.972 ಅದಾನಿ ಟೋಟಲ್‌ ಗ್ಯಾಸ್‌ - ಶೇ.349 ಅದಾನಿ ಗ್ರೀನ್‌ ಎನರ್ಜಿ - ಶೇ.254 ಅದಾನಿ ಪವರ್‌ - ಶೇ.295 ಅದಾನಿ ಪೋರ್ಟ್ಸ್ - ಶೇ.147