ಹುಟ್ಟುಹಬ್ಬದ ದಿನವೇ ಫ್ಯಾನ್ಸ್‌ಗೆ ಗುಡ್‌ ನ್ಯೂಸ್ ನೀಡಿದ 'ಕರಾವಳಿ ಚೆಲುವೆ' ಅನುಷ್ಕಾ ಶೆಟ್ಟಿ

ದಕ್ಷಿಣ ಭಾರತದ ಖ್ಯಾತ ನಟಿ ಅವರಿಗೆ ಇಂದು (ನ.7) 40ನೇ ವರ್ಷದ ಹುಟ್ಟುಹಬ್ಬದ ಸಂಭ್ರಮ. ಈ ಖುಷಿಯ ಸಂದರ್ಭದಲ್ಲೇ ಒಂದು ಗುಡ್‌ನ್ಯೂಸ್ ಕೂಡ ನೀಡಿದ್ದಾರೆ ಅನುಷ್ಕಾ. ಹೌದು, ಈ ಕರಾವಳಿ ಚೆಲುವೆ ಸಿನಿಮಾಗಳಿಂದ ಕೊಂಚ ಅಂತರ ಕಾಯ್ದುಕೊಂಡೇ ಇದ್ದಾರೆ. 'ಬಾಹುಬಲಿ' ಸರಣಿಯ ಸಿನಿಮಾಗಳಿಂದ ಭಾರಿ ಜನಪ್ರಿಯತೆ ಪಡೆದುಕೊಂಡಿರುವ ಅನುಷ್ಕಾ, ಆನಂತರ ಮಾಡಿದ್ದು ಬರೀ ಎರಡೇ ಸಿನಿಮಾ. ಇದು ಫ್ಯಾನ್ಸ್‌ಗೆ ಬೇಸರ ಉಂಟುಮಾಡಿತ್ತು. ಇದೀಗ ಆ ಬಗ್ಗೆ ಒಂದು ನ್ಯೂಸ್ ನೀಡಿರುವ ಅನುಷ್ಕಾ, ತಮ್ಮ ಹುಟ್ಟುಹಬ್ಬದ ದಿನವೇ ಹೊಸ ಸಿನಿಮಾ ಘೋಷಣೆ ಮಾಡಿದ್ದಾರೆ. ಯುವಿ ಕ್ರಿಯೇಷನ್ಸ್ ಜೊತೆ ಸ್ವೀಟಿ ಸಿನಿಮಾಪ್ರಭಾಸ್‌ ಅವರ ಫ್ಯಾಮಿಲಿ ಸದಸ್ಯರ ಹಾಗೂ ಸ್ನೇಹಿತರ ಒಡೆತನದ 'ಯುವಿ ಕ್ರಿಯೇಷನ್ಸ್' ಬ್ಯಾನರ್‌ನಲ್ಲಿ ಅನುಷ್ಕಾ ಶೆಟ್ಟಿಯ ಹೊಸ ಸಿನಿಮಾ ಘೋಷಣೆ ಆಗಿದೆ. ಇದು ಅನುಷ್ಕಾ ನಟಿಸಲಿರುವ 48ನೇ ಸಿನಿಮಾ ಅನ್ನೋದು ವಿಶೇಷ. ಅಲ್ಲದೆ, ಯುವಿ ಕ್ರಿಯೇಷನ್ಸ್ ಜೊತೆಗೆ ಇದು ಅನುಷ್ಕಾ ಅವರ 3ನೇ ಸಿನಿಮಾ ಅನ್ನೋದು ಮತ್ತೊಂದು ವಿಶೇಷ. ಯುವಿ ಕ್ರಿಯೇಷನ್ಸ್ ಮೊದಲ ಬಾರಿಗೆ ನಿರ್ಮಾಣ ಮಾಡಿದ್ದ 'ಮಿರ್ಚಿ' ಅನುಷ್ಕಾ ನಾಯಕಿಯಾಗಿದ್ದರು. ನಂತರ 'ಭಾಗಮತಿ'ಯಲ್ಲೂ ನಾಯಕಿಯಾಗಿದ್ದರು. ಇದೀಗ ಆ ಬ್ಯಾನರ್‌ ಜೊತೆಗೆ ಮೂರನೇ ಸಿನಿಮಾ ಒಪ್ಪಿಕೊಂಡಿದ್ದಾರೆ. ಟೈಟಲ್ ಇನ್ನೂ ಫಿಕ್ಸ್ ಆಗಿಲ್ಲ!ಅನುಷ್ಕಾ ನಟನೆಯ ಈ ಹೊಸ ಸಿನಿಮಾಗೆ ಇನ್ನೂ ಟೈಟಲ್ ಫಿಕ್ಸ್ ಆಗಿಲ್ಲ. ಪಿ. ಮೆಹೇಶ್‌ ಬಾಬು ಎಂಬುವವರು ಇದರ ನಿರ್ದೇಶಕರು. ಮಿಕ್ಕಂತೆ ಯಾವುದೇ ಮಾಹಿತಿಯನ್ನು ಚಿತ್ರತಂಡ ಬಿಟ್ಟುಕೊಟ್ಟಿಲ್ಲ. ಶೀಘ್ರದಲ್ಲೇ ಶೂಟಿಂಗ್ ಶುರುವಾಗಲಿದೆ. 2022ರ ಮಧ್ಯಭಾಗದಲ್ಲಿ ಸಿನಿಮಾ ತೆರೆಕಾಣುವ ಸಾಧ್ಯತೆ ಇದೆ. ಅಂತೂ ಕೊನೆಗೂ ಹೊಸ ಸಿನಿಮಾಕ್ಕೆ ಅನುಷ್ಕಾ ಗ್ರೀನ್‌ ಸಿಗ್ನಲ್ ನೀಡಿದ್ದು ಫ್ಯಾನ್ಸ್‌ಗೆ ಖುಷಿ ನೀಡಿದೆ. ಇನ್ನು, ಈ ಹಿಂದೆಯೇ ಒಂದು ಸುದ್ದಿ ಕೇಳಿಬಂದಿತ್ತು. ಅದೇನೆಂದರೆ, 'ಏಜೆಂಟ್ ಸಾಯಿ ಶ್ರೀನಿವಾಸ್ ಆತ್ರೇಯ', 'ಜಾತಿ ರತ್ನಾಲು' ಖ್ಯಾತಿಯ ನವೀನ್ ಪೊಲಿಶೆಟ್ಟಿ ಅವರು ಅನುಷ್ಕಾ ಶೆಟ್ಟಿ ಜೊತೆ ನಟಿಸುವ ಸಾಧ್ಯತೆ ಇದೆ ಎನ್ನಲಾಗಿತ್ತು. ಡಿಫರೆಂಟ್ ಲವ್ ಸ್ಟೋರಿ ಇರುವ ಆ ಸಿನಿಮಾದಲ್ಲಿ 40ರ ಹರೆಯದ ಹುಡುಗಿ ಮತ್ತು 25ರ ಹರೆಯದ ಹುಡುಗನ ನಡುವಿನ ಪ್ರೀತಿಯನ್ನು ತೋರಿಸಲಾಗುತ್ತದೆ ಎನ್ನಲಾಗಿತ್ತು. ಅಂದು ಕೂಡ ಈ ಸಿನಿಮಾವನ್ನು ಪಿ. ಮಹೇಶ್ ಬಾಬು ನಿರ್ದೇಶಿಸಿ, ಯುವಿ ಕ್ರಿಯೇಷನ್ಸ್‌ ಬ್ಯಾನರ್‌ ನಿರ್ಮಾಣ ಮಾಡಲಿದೆ ಎಂದೇ ಸುದ್ದಿ ಆಗಿತ್ತು. ಈಗಲೂ ಅದೇ ನಿರ್ದೇಶಕ/ನಿರ್ಮಾಪಕರ ಹೆಸರು ಅನುಷ್ಕಾ ಸಿನಿಮಾದ ಜೊತೆಗೆ ಕೇಳಿಬಂದಿರುವುದರಿಂದ, ಬಹುಶಃ ಇದು ಅದೇ ಕಥೆ ಇರುವ ಸಿನಿಮಾ ಇರಬಹುದಾ ಎಂಬ ಚರ್ಚೆ ಆರಂಭವಾಗಿದೆ.