ಬೆಂಗಳೂರು ಏರ್‌ಪೋರ್ಟ್‌ನಲ್ಲಿ ಹಲ್ಲೆಗೆ ಯತ್ನ; ಘಟನೆ ಬಗ್ಗೆ ನಟ ವಿಜಯ್ ಸೇತುಪತಿ ಹೇಳಿದ್ದೇನು?
ಖ್ಯಾತ ತಮಿಳು ನಟ ವಿಜಯ್ ಸೇತುಪತಿ ಅವರ ತಂಡದ ಮೇಲೆ ಬೆಂಗಳೂರಿನ ಕೆಂಪೇಗೌಡ ಅಂತರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ ವ್ಯಕ್ತಿಯೊಬ್ಬನಿಂದ ಹಲ್ಲೆಯಾಗಿತ್ತು. ಈ ಘಟನೆ ಬಗ್ಗೆ ವಿಜಯ್ ಸೇತುಪತಿ ಮಾತನಾಡಿದ್ದಾರೆ.
Admin
0
6
ನಟ ಅವರ ತಂಡದ ಮೇಲೆ ನವೆಂಬರ್ 2ರ ರಾತ್ರಿ 11 ಗಂಟೆಗೆ ವಿಮಾನ ನಿಲ್ದಾಣದಲ್ಲಿ ಹಲ್ಲೆ ಪ್ರಯತ್ನ ನಡೆದಿತ್ತು. ಇದು ದೊಡ್ಡ ಸುದ್ದಿಯಾಗಿತ್ತು. ನಿಧನದ ಹಿನ್ನೆಲೆಯಲ್ಲಿ ಅವರ ಕುಟುಂಬ ಸದಸ್ಯರಿಗೆ ಸಾಂತ್ವನ ಹೇಳಿ, ಪುನೀತ್ ಸಮಾಧಿಗೆ ಪುಷ್ಪನಮನ ಸಲ್ಲಿಸಲು ವಿಜಯ್ ಬರುವಾಗ ಏರ್‌ಪೋರ್ಟ್‌ನಲ್ಲಿ ಈ ಘಟನೆ ನಡೆದಿತ್ತು. ಆದರೆ, ಅಂದು ಈ ಬಗ್ಗೆ ವಿಜಯ್ ಪ್ರತಿಕ್ರಿಯೆ ನೀಡಿರಲಿಲ್ಲ. ಇದೀಗ ಆ ಘಟನೆ ಕುರಿತು ಮಾತನಾಡಿದ್ದಾರೆ.
'ಅದು ಅಂತಹ ದೊಡ್ಡ ಘಟನೆ ಏನಲ್ಲ. ಯಾರೋ ಒಬ್ಬರು ಅದನ್ನು ಮೊಬೈನಲ್ಲಿ ಚಿತ್ರೀಕರಿಸಿ, ಅದನ್ನು ವೈರಲ್ ಮಾಡಿದ್ದರಿಂದ ಅದು ದೊಡ್ಡದಾಗಿದೆ. ನಿಮಗೆ ಗೊತ್ತೇ ಇದೆ, ಮೊಬೈಲ್ ಇರುವ ಎಲ್ಲರೂ ಈಗ ಫಿಲ್ಮ್‌ಮೇಕರ್‌ಗಳಾಗಿದ್ದಾರೆ. ಅಂದು ಗಲಾಟೆ ಮಾಡಿದ ವ್ಯಕ್ತಿ ಕುಡಿದಿದ್ದ. ಪ್ರಜ್ಞೆ ಇಲ್ಲದೇ ಇದ್ದರೆ ಆ ರೀತಿ ವರ್ತಿಸುತ್ತಾರೆ. ಈಗ ಎಲ್ಲರೂ ಮಾಸ್ಕ್ ಹಾಕಿಕೊಳ್ಳುವುದರಿಂದ ಯಾರು ಕುಡಿದಿದ್ದಾರೋ, ಇಲ್ಲವೋ ಎಂಬುದು ಗೊತ್ತಾಗುವುದಿಲ್ಲ' ಎಂದು ವಿಜಯ್ ಸೇತುಪತಿ ಹೇಳಿದ್ದಾರೆ.
ಆತ ನನ್ನ ಫ್ಯಾನ್ ಅಲ್ಲ! 'ಗಲಾಟೆ ಮಾಡಿದ ವ್ಯಕ್ತಿ ನನ್ನ ಫ್ಯಾನ್ ಅಲ್ಲ. ಆತ ನಮ್ಮೊಂದಿಗೆ ವಾಗ್ವಾದ ಮಾಡುತ್ತಲೇ ಇದ್ದ, ವಿಮಾನದಿಂದ ಇಳಿದ ಮೇಲೂ ಅದನ್ನೂ ಮುಂದುವರಿಸಿದ್ದ ಕೂಡ' ಎನ್ನುವ ಅವರು ಫ್ಯಾನ್ಸ್‌ ಬಗ್ಗೆ ಪ್ರೀತಿಯ ಮಾತುಗಳನ್ನಾಡಿದ್ದಾರೆ. 'ನಾನು ಪ್ರೀತಿಯನ್ನು ತೋರಿದಾಗ, ಅವರು ಕೂಡ ನಮ್ಮತ್ತ ಪ್ರೀತಿ ತೋರುತ್ತಾರೆ. ಇನ್ನು, ಅಂದು ಗಲಾಟೆ ಮಾಡಿದ ವ್ಯಕ್ತಿಯನ್ನು ಪೊಲೀಸರು ವಶಕ್ಕೆ ಪಡೆದಿದ್ದಾರೆ. ಎಲ್ಲವೂ ಬಗೆಹರಿದಿದೆ. ಇದೇನು ದೊಡ್ಡ ಘಟನೆ ಅಲ್ಲ' ಎಂದಿದ್ದಾರೆ ವಿಜಯ್ ಸೇತುಪತಿ.
ನನ್ನೊಂದಿಗೆ ಸ್ನೇಹಿತ ಮಾತ್ರ ಇರುತ್ತಾನೆ!ವಿಜಯ್ ಸೇತುಪತಿ ಭದ್ರತೆಗೆ ಜಾಸ್ತಿ ಜನ ಇರುತ್ತಾರಾ? ಈ ಪ್ರಶ್ನೆಗೆ ಅವರೇ ಉತ್ತರ ನೀಡಿದ್ದಾರೆ. 'ನಾನು ಎಲ್ಲಿಗಾದರೂ ಪ್ರಯಾಣ ಮಾಡುವಾಗ ನನ್ನೊಂದಿಗೆ ನನ್ನ ಸ್ನೇಹಿತ ಮಾತ್ರ ಇರುತ್ತಾನೆ. ಆತ 30 ವರ್ಷಗಳಿಂದ ನನಗೆ ಸ್ನೇಹಿತ. ಅದೃಷ್ಟವೆಂದರೆ, ಈಗ ಆತನೇ ನನಗೆ ಮ್ಯಾನೇಜರ್ ಆಗಿದ್ದಾನೆ. ನನ್ನ ಸುತ್ತಮುತ್ತ ಭದ್ರತೆಗೆ ತುಂಬ ಜನ ಇರಬೇಕು ಎಂದು ನಾನು ಬಯಸುವುದಿಲ್ಲ' ಎಂದಿದ್ದಾರೆ.
ಘಟನೆ ನಡೆದಿದ್ದು ಹೇಗೆ?ವಿಜಯ್ ಸೇತುಪತಿ ಜೊತೆಗೆ ವಿಮಾನದಲ್ಲಿ ಪ್ರಯಾಣ ಮಾಡುತ್ತಿದ್ದ ಸಹ ಪ್ರಯಾಣಿಕ ಕುಡಿದ ಅಮಲಿನಲ್ಲಿ ವಿಮಾನದಲ್ಲಿಯೇ ವಿಜಯ್ ಸೇತುಪತಿ ಮ್ಯಾನೇಜರ್ ಜೊತೆಗೆ ಒಂದಷ್ಟು ಗಲಾಟೆ ಮಾಡಿಕೊಂಡಿದ್ದ. ಆ ವೇಳೆ ವಿಜಯ್ ಸೇತುಪತಿ ಅವರಿಬ್ಬರ ಗಲಾಟೆಯನ್ನು ಬಿಡಿಸಲು ಹೋಗಿ ಮಾತಿನ ಚಕಮಕಿ ನಡೆದಿತ್ತು. ಇನ್ನು ವಿಜಯ್ ಸೇತುಪತಿ ಅವರು ವಿಮಾನದಿಂದ ಇಳಿದು ಹೋಗುತ್ತಿರುವಾಗ ಆ ಸಹ ಪ್ರಯಾಣಿಕ ಏಕಾಏಕಿ ವಿಜಯ್ ಸೇತುಪತಿ ಮ್ಯಾನೇಜರ್ ಮೇಲೆ ಹಲ್ಲೆ ಮಾಡಿದ್ದ. ಆ ವಿಡಿಯೋ ವೈರಲ್ ಆಗಿತ್ತು. ಘಟನೆಯಲ್ಲಿ ವಿಜಯ್ ಮೇಲೆ ಯಾವುದೇ ಹಲ್ಲೆ ಆಗಿರಲಿಲ್ಲ.
