ಸತತ ಮೂರನೇ ದಿನ ಪೆಟ್ರೋಲ್‌, ಡೀಸೆಲ್‌ ಬೆಲೆ ಏರಿಕೆ; ಭೋಪಾಲ್‌ನಲ್ಲಿ ಸೆಂಚುರಿ ದಾಟಿದ ದರ
ಸತತ ಮೂರನೇ ದಿನ ತೈಲ ಬೆಲೆ ಏರಿಕೆಯಾಗುವುದರೊಂದಿಗೆ ಮೇ ತಿಂಗಳಿನಲ್ಲಿ 7ನೇ ಬಾರಿಗೆ ಪೆಟ್ರೋಲ್‌ ಮತ್ತು ಡೀಸೆಲ್‌ ದರಗಳು ಹೆಚ್ಚಳವಾಗಿವೆ. ಪರಿಣಾಮ ಮಧ್ಯ ಪ್ರದೇಶದ ರಾಜಧಾನಿ ಭೋಪಾಲ್‌ನಲ್ಲಿ ಲೀಟರ್‌ ಪೆಟ್ರೋಲ್‌ ದರ 100 ರೂ. ಗಡಿ ದಾಟಿದೆ.
Admin
0
8
ಹೊಸದಿಲ್ಲಿ: ದೇಶದಲ್ಲಿ ಸತತ ಮೂರನೇ ದಿನ ತೈಲ ಬೆಲೆ ಏರಿಕೆಯಾಗಿದೆ. ಈ ಮೂಲಕ ಈ ತಿಂಗಳಲ್ಲಿ 7ನೇ ಬಾರಿಗೆ ಪೆಟ್ರೋಲ್‌, ಡೀಸೆಲ್‌ ದರಗಳು ಹೆಚ್ಚಳವಾದಂತಾಗಿದೆ. ರಾಷ್ಟ್ರ ರಾಜಧಾನಿ ದಿಲ್ಲಿಯಲ್ಲಿ ಪೆಟ್ರೋಲ್‌ ಮತ್ತು ತಲಾ 25 ಪೈಸೆ ಹೆಚ್ಚಳವಾಗಿವೆ. ಈ ಮೂಲಕ ಲೀಟರ್‌ 92.05 ರೂ. ಹಾಗೂ ಡೀಸೆಲ್‌ ದರ 82.61 ರೂ.ಗೆ ತಲುಪಿದೆ.
ಮಧ್ಯ ಪ್ರದೇಶದ ರಾಜಧಾನಿ ಭೋಪಾಲ್‌ನಲ್ಲಿ ಲೀಟರ್‌ ಪೆಟ್ರೋಲ್‌ ದರ 100 ರೂ. ಗಡಿ ದಾಟಿದೆ. ಭೋಪಾಲ್‌ನಲ್ಲಿ ಲೀಟರ್‌ ಪೆಟ್ರೋಲ್‌ 100.08 ರೂ.ಗೆ ಮಾರಾಟವಾಗುತ್ತಿದೆ. ಈ ಮೂಲಕ ರಾಜ್ಯವೊಂದರಲ್ಲಿ ರಾಜಧಾನಿಯಲ್ಲಿ ಇದೇ ಮೊದಲ ಬಾರಿಗೆ ಪೆಟ್ರೋಲ್‌ ದರ ಶತಕ ದಾಟಿದೆ.
ಈಗಾಗಲೇ ಮಹಾರಾಷ್ಟ್ರ, ರಾಜಸ್ಥಾನದ ಮತ್ತು ಮಧ್ಯಪ್ರದೇಶದ ಹಲವೆಡೆ ಪೆಟ್ರೋಲ್‌ ದರ 100ರ ಗಡಿ ದಾಟಿ ಮುನ್ನುಗ್ಗುತ್ತಿದೆ. ಮುಂಬಯಿ, ಬೆಂಗಳೂರು ಸೇರಿದಂತೆ ಹಲವು ಪ್ರಮುಖ ನಗರಗಳಲ್ಲಿ ತೈಲ ದರ ಸೆಂಚುರಿಯತ್ತ ಮುಖ ಮಾಡಿದೆ.
ಅಂತಾರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಕಚ್ಚಾ ತೈಲ ದರ ಹಾಗೂ ವಿದೇಶಿ ವಿನಿಮಯ ದರವನ್ನು ನೋಡಿಕೊಂಡು ಸರಕಾರಿ ಸ್ವಾಮ್ಯದ ಭಾರತ್‌ ಪೆಟ್ರೋಲಿಯಂ ಕಾರ್ಪೊರೇಷನ್‌ ಲಿ. (ಬಿಪಿಸಿಎಲ್‌), ಇಂಡಿಯನ್ ಆಯಿಲ್‌ ಕಾರ್ಪೊರೇಷನ್‌ ಲಿ. (ಐಒಸಿಎಲ್‌), ಹಿಂದೂಸ್ಥಾನ್‌ ಪೆಟ್ರೋಲಿಯಂ ಕಾರ್ಪೊರೇಷನ್‌ ಲಿ. (ಎಚ್‌ಪಿಸಿಎಲ್‌) ಪ್ರತಿ ದಿನ ಪೆಟ್ರೋಲ್‌ ಮತ್ತು ಡೀಸೆಲ್‌ ದರಗಳನ್ನು ನಿಗದಿ ಮಾಡುತ್ತವೆ.
ಬುಧವಾರ ದೇಶದೆಲ್ಲೆಡೆ ತೈಲ ಬೆಲೆ ಏರಿಕೆ ಮಾಡಲಾಗಿದ್ದು, ದರಗಳು ಸ್ಥಳೀಯ ತೆರಿಗೆಯನ್ನು ಅವಲಂಬಿಸಿ ರಾಜ್ಯಗಳಿಂದ ರಾಜ್ಯಗಳಿಗೆ ಬದಲಾಗುತ್ತವೆ.
ವಿವಿಧ ನಗರಗಳಲ್ಲಿ ಪೆಟ್ರೋಲ್‌ ಡೀಸೆಲ್‌ ದರಗಳು ಹೀಗಿವೆ.
| ನಗರ | ಪೆಟ್ರೋಲ್‌ ದರ (ರೂ.ಗಳಲ್ಲಿ) | ಡೀಸೆಲ್‌ ದರ (ರೂ.ಗಳಲ್ಲಿ) |
| ಮುಂಬಯಿ | 98.36 | 89.75 |
| ಚೆನ್ನೈ | 93.84 | 87.49 |
| ಕೋಲ್ಕೊತ್ತಾ | 92.16 | 85.45 |
| ಬೆಂಗಳೂರು | 95.11 | 88.03 |
