ವಿರಾಟ್ ಕೊಹ್ಲಿ, ಅನುಷ್ಕಾ ಶರ್ಮಾರ 9 ತಿಂಗಳ ಮಗಳಿಗೆ ರೇಪ್ ಬೆದರಿಕೆ; ಸ್ವಯಂ ಗಮನಹರಿಸಿದ ಮಹಿಳಾ ಆಯೋಗ
ನಟಿ ಅನುಷ್ಕಾ ಶರ್ಮಾ ಹಾಗೂ ಕ್ರಿಕೆಟರ್ ವಿರಾಟ್ ಕೊಹ್ಲಿ ದಂಪತಿಯ ಪುತ್ರಿ 9 ತಿಂಗಳ ವಮಿಕಾಗೆ ಅತ್ಯಾಚಾರದ ಬೆದರಿಕೆ ಕರೆಗಳು ಬರುತ್ತಿವೆಯಂತೆ. ಇದರ ಬಗ್ಗೆ ದೆಹಲಿ ಮಹಿಳಾ ಆಯೋಗ ಸ್ವಯಂ ಗಮನಹರಿಸಿದೆ.
Admin
0
6
ಭಾರತೀಯ ಕ್ರಿಕೆಟ್ ತಂಡದ ನಾಯಕ ವಿರಾಟ್ ಕೊಹ್ಲಿಗೆ ದೊಡ್ಡ ಮಟ್ಟದಲ್ಲಿ ಅಭಿಮಾನ ಬಳಗವಿದೆ, ಒಂದು ವೇಳೆ ಆಟ ಚೆನ್ನಾಗಿ ಆಡದೆ ಸೋತರೆ ಹಿಗ್ಗಾಮುಗ್ಗಾ ತರಾಟೆಗೆ ತೆಗೆದುಕೊಳ್ಳುವ ಜನರೂ ಇದ್ದಾರೆ. ಪಾಕಿಸ್ತಾನದ ವಿರುದ್ಧದ ಮ್ಯಾಚ್ ಸೋತಿದ್ದಕ್ಕೆ ಕೇವಲ ವಿರಾಟ್ ತಂಡವನ್ನು ಬೈಯ್ದಿಲ್ಲ, ಬದಲಾಗಿ ಅವರ 9 ತಿಂಗಳ ಮಗಳ ಮೇಲೆ ಅತ್ಯಾಚಾರ ಮಾಡುವುದಾಗಿ ಸೋಶಿಯಲ್ ಮೀಡಿಯಾದಲ್ಲಿ ಧಮ್ಕಿ ಹಾಕಲಾಗಿತ್ತು. ಆ ಬಗ್ಗೆ ದೆಹಲಿ ಮಹಿಳಾ ಆಯೋಗ ಸ್ವಯಂ ಗಮನಹರಿಸಿದೆ. ಅವರು ಕಳೆದ ಜನವರಿ 11ರಂದು ಹೆಣ್ಣು ಮಗುವಿಗೆ ಜನ್ಮ ನೀಡಿದ್ದರು.
ಯಾಕೆ ಈ ರೀತಿಯ ಬೆದರಿಕೆ?
ಪಾಕಿಸ್ತಾನ ಮತ್ತು ನ್ಯೂಜಿಲೆಂಡ್‌ ಎದುರು ಕ್ರಮವಾಗಿ 10 ಮತ್ತು 8 ವಿಕೆಟ್‌ಗಳಿಂದ ಸೋತ ಭಾರತ ತಂಡ, ಐಸಿಸಿ ಟಿ20 ಕ್ರಿಕೆಟ್ ವಿಶ್ವಕಪ್‌ ಟೂರ್ನಿಯ ಸೆಮಿಫೈನಲ್‌ ರೇಸ್‌ನಿಂದ ಹೊರಬೀಳುವ ಹೊಸ್ತಿಲಿಗೆ ಬಂದು ನಿಂತಿದೆ. ಹೀಗಾಗಿ ಕೆಲವರು ಸೋಶಿಯಲ್ ಮೀಡಿಯಾದಲ್ಲಿ ಅನುಷ್ಕಾ ಶರ್ಮಾ ಹಾಗೂ ದಂಪತಿಯ ಪುತ್ರಿ ಮೇಲೆ ಅತ್ಯಾಚಾರ ಮಾಡುವ ಬೆದರಿಕೆ ಹಾಕಿದ್ದಾರೆ. ವಿರುಷ್ಕಾ ಪುತ್ರಿ ಇನ್ನೂ 9 ತಿಂಗಳ ಹಸುಗೂಸು.
ಮಗಳು, ಪತಿ ಜೊತೆ ಅನುಷ್ಕಾ ಶರ್ಮಾ ಸಮಯ ಕಳೆಯುತ್ತಿದ್ದಾರೆ
ವಿರಾಟ್ ಕೊಹ್ಲಿ ಮದುವೆಯಾದ ನಂತರ ಅನುಷ್ಕಾ ಶರ್ಮಾ ನಟನೆಯಿಂದ ದೂರವುಳಿದರು, ಸಿನಿಮಾ ನಿರ್ಮಾಣದತ್ತ ಗಮನಹರಿಸಿದರು. ಸದ್ಯ ವಮಿಕಾ ತಾಯಿಯಾಗಿರುವ ಅವರು ಮಗಳ ಆರೈಕೆಯಲ್ಲಿ ಬ್ಯುಸಿಯಾಗಿದ್ದಾರೆ. ಪತಿ ಹಾಗೂ ಮಗಳ ಜೊತೆ ಅವರು ಸಾಕಷ್ಟು ಟ್ರಾವೆಲ್ ಕೂಡ ಮಾಡುತ್ತಿದ್ದಾರೆ. ಸೋಶಿಯಲ್ ಮೀಡಿಯಾದಲ್ಲಿಯೂ ಅವರು ಮಗಳ ಫೋಟೋಗಳನ್ನು ಹಂಚಿಕೊಳ್ಳುತ್ತಿರುತ್ತಾರೆ, ಆದರೆ ಮಗಳ ಮುಖವನ್ನು ಮಾತ್ರ ಇದುವರೆಗೂ ತೋರಿಸಿಲ್ಲ.
ಇನ್ನೂ ಮಗಳ ಮುಖವನ್ನು ಬಹಿರಂಗ ಮಾಡದ ವಿರುಷ್ಕಾ
ಈ ಹಿಂದೆಯೇ ಮಗಳನ್ನು ಸಾಮಾನ್ಯರಂತೆ, ಮೌಲ್ಯ, ಜೀವನ ಪಾಠಗಳನ್ನು ಕಲಿಸುತ್ತ ಬೆಳೆಸಬೇಕು ಎಂದು ಅನುಷ್ಕಾ ಮಾಧ್ಯಮದ ಮುಂದೆ ಹೇಳಿಕೊಂಡಿದ್ದರು. ಯಾವುದೇ ಕಾರಣಕ್ಕೂ ಮಗಳು ಸೆಲೆಬ್ರಿಟಿ ಜೀವನ ಮಾಡದೆ ಒಳ್ಳೆಯ ಪ್ರಜೆಯಾಗಬೇಕು ಎಂದು ಬಯಸಿದ್ದರು. ಹೀಗಾಗಿ ಅನುಷ್ಕಾ ದಂಪತಿ ಅವರ ಖ್ಯಾತಿಯನ್ನು ಮಗಳ ಬಳಿ ಸುಳಿದಾಡಲು ಕೂಡ ಬಿಡುತ್ತಿಲ್ಲ. ವಮಿಕಾ ಎಂಬುದು ದುರ್ಗೆಯ ಇನ್ನೊಂದು ಹೆಸರು.
ಬಾಣಂತನದ ಬಟ್ಟೆ ಹರಾಜಿಗೆ ಹಾಕಿದ್ದ ಅನುಷ್ಕಾ ಶರ್ಮಾ
ಸೋಶಿಯಲ್ ಮೀಡಿಯಾದಲ್ಲಿ ಸಕ್ರಿಯವಾಗಿರುವ ಅನುಷ್ಕಾ ಸಾಕಷ್ಟು ವಿಚಾರ ಹಂಚಿಕೊಳ್ಳುತ್ತಿರುತ್ತಾರೆ, ಸಾಮಾಜಿಕ ಕೆಲಸ ಕೂಡ ಮಾಡುತ್ತಾರೆ. ಬಾಣಂತನದ ಬಟ್ಟೆಗಳನ್ನು ಆನ್‌ಲೈನ್ ಮೂಲಕ ಹರಾಜಿಗೆ ಹಾಕಿದ್ದಾರೆ. "ದೇಶದಲ್ಲಿರುವ ಗರ್ಭಿಣಿಯರ ಪೈಕಿ ಶೇ 1ರಷ್ಟು ಮಹಿಳೆಯರು ಮಾತ್ರ ಮರು ಬಳಕೆ ಮಾಡಬಲ್ಲ ಬಾಣಂತನದ ಬಟ್ಟೆ ಖರೀದಿ ಮಾಡಿದರೆ ಎಲ್ಲರೂ ಸೇರಿಕೊಂಡು ವ್ಯಕ್ತಿಯೊಬ್ಬ 200 ವರ್ಷ ಬದುಕಿದರೆ ಆತನಿಗೆ ಬೇಕಾಗುವಷ್ಟು ನೀರಿನ ಉಳಿತಾಯ ಮಾಡಬಹುದು. ಈ ರೀತಿ ಮಾಡುವುದರಿಂದ ದೊಡ್ಡ ಬದಲಾವಣೆ ತರಬಹುದು" ಎಂದು ಅನುಷ್ಕಾ ಶರ್ಮಾ ಹೇಳಿದ್ದರು.
