ಬಿಟ್‌ಕಾಯಿನ್‌ ಚಿನ್ನಕ್ಕಿಂತಲೂ ಉತ್ತಮ ಆಸ್ತಿ ಹೇಗೆ? ಇಲ್ಲಿದೆ 4 ಅಂಶಗಳು!

ಹೊಸದಿಲ್ಲಿ: ಅಮೂಲ್ಯ ಲೋಹವಾದ ಹಾಗೂ ಕ್ರಿಪ್ಟೋ ವಲಯದಲ್ಲಿ ಭಾರಿ ಬೇಡಿಕೆ ಇರುವ ಬಿಟ್‌ಕಾಯಿನ್‌ಗಳೆರಡೂ ಸರಕಾರಿ ನಿಯಂತ್ರಣದ ವ್ಯಾಪ್ತಿಯಿಂದ ಹೊರಗಿವೆ. ಹಾಗೆಯೇ ಚಿನ್ನ ಮತ್ತು ಕ್ರಿಪ್ಟೋಕರೆನ್ಸಿಗಳೆರಡೂ ಸೀಮಿತ ಸ್ವತ್ತುಗಳಾಗಿವೆ. ಆದ್ದರಿಂದಲೇ ಈ ಎರಡೂ ಸ್ವತ್ತುಗಳ ಬೆಲೆಗಳು ಅತ್ಯಧಿಕ. ಹೀಗಾಗಿ ಬೇಡಿಕೆ ಮತ್ತು ಪೂರೈಕೆಯ ಆಧಾರದ ಮೇಲೆ ಇವುಗಳ ಬೆಲೆ ನಿರ್ಧಾರವಾಗುತ್ತದೆ. ಪ್ರಸ್ತುತ ಭಾರತದಲ್ಲಿ ಕ್ರಿಪ್ಟೋಕರೆನ್ಸಿಗಳಿಗೆ ಯಾವುದೇ ನಿಯಂತ್ರಣ ಇಲ್ಲ. ಅವುಗಳ ಬೆಲೆಯಲ್ಲಿ ಕೂಡ ಅನಿಶ್ಚಿತತೆ ಇದೆ. ಇದರ ಹೊರತಾಗಿಯೂ ಕ್ರಿಪ್ಟೋ ಕರೆನ್ಸಿಗಳು ಅತ್ಯಧಿಕ ಆದಾಯ ತಂದುಕೊಡುತ್ತಿವೆ. ಬಿಟ್‌ಕಾಯಿನ್‌ಗಳ ಮಿಂಚಿನ ಓಟದ ಎದುರು ಚಿನ್ನವು ತನ್ನ ಹೊಳಪನ್ನು ಕಳೆದುಕೊಳ್ಳಲಿದೆಯೇ ಎಂಬ ಚರ್ಚೆಯೂ ನಡೆಯುತ್ತಿದೆ. ಚಿನ್ನ ಮತ್ತು ಕ್ರಿಪ್ಟೋಕರೆನ್ಸಿಗಳ ನಡುವಿನ ಸಾಮ್ಯತೆಗಳ ಕುರಿತು ಮಾತನಾಡುತ್ತಾ; Proaasetz ಎಕ್ಸ್‌ಚೇಂಜ್‌ನ ಸಂಸ್ಥಾಪಕ ಮತ್ತು ನಿರ್ದೇಶಕ ಮನೋಜ್ ದಾಲ್ಮಿಯಾ ಮಾತನಾಡಿ, "ಚಿನ್ನದಂತೆಯೇ ಕೂಡ ಸೀಮಿತ ಲಭ್ಯವಿರುವ ಸಂಪತ್ತು. ಆದರೆ, ಕ್ರಿಪ್ಟೋಕರೆನ್ಸಿಗಳು ಡಿಜಿಟಲ್ ಆಸ್ತಿಯಾಗಿವೆ. ಏಕೆಂದರೆ, ನಿಗದಿತ ಮಿತಿಗಿಂತ ಎಂದಿಗೂ ಹೆಚ್ಚಿನ ಬಿಟ್‌ಕಾಯಿನ್ ಬಿಡುಗಡೆಯಾಗುವುದಿಲ್ಲ. ಹೀಗಾಗಿ ಕೊರತೆಯ ವಿಷಯದಲ್ಲಿ ಬಿಟ್‌ಕಾಯಿನ್‌ಗಳಿಗೆ ಚಿನ್ನದಷ್ಟೇ ಬೇಡಿಕೆ ಉಂಟಾಗುತ್ತದೆ. ಫಿಯಟ್ (ಭೌತಿಕ) ಹಣಕ್ಕಿಂತ ಚಿನ್ನ ಮತ್ತು ಕ್ರಿಪ್ಟೋಕರೆನ್ಸಿಗಳು ಭಿನ್ನವಾಗಿವೆ. ಭತಿಕ ಕರೆನ್ಸಿಯನ್ನು ಬ್ಯಾಂಕ್‌ಗಳಲ್ಲಿ ಠೇವಣಿ ಮಾಡಬಹುದು. ಆದರೆ, ಇದು ಸರ್ಕಾರದಿಂದ ನಿಯಂತ್ರಿಸಲ್ಪಡುತ್ತದೆ. ಹಣದುಬ್ಬರ ಸಂಭವಿಸಿದಾಗ ಹಣದ ಸವಕಳಿಯೂ ಆಗುತ್ತದೆ. ಆದರೆ, ಬಿಟ್‌ಕಾಯಿನ್‌ಗಳು ಮತ್ತು ಚಿನ್ನ ಎರಡೂ ಸರ್ಕಾರದಿಂದ ಸ್ವತಂತ್ರವಾಗಿವೆ." ಕ್ರಿಪ್ಟೋಕರೆನ್ಸಿಗಳು ಸ್ವತ್ತು ವಿಭಾಗದಲ್ಲಿ ಚಿನ್ನಕ್ಕೆ ಹೇಗೆ ಪರ್ಯಾಯವಾಗಬಹುದು ಎಂಬ ಕುರಿತು Nonceblox Blockchain Studio ಸಂಸ್ಥಾಪಕ ಮತ್ತು ನಿರ್ದೇಶಕ ವಿನ್ಶು ಗುಪ್ತಾ ವಿವರಣೆ ನೀಡಿದ್ದಾರೆ. "ದೀರ್ಘಕಾಲದಿಂದಲೂ ಹಣದುಬ್ಬರದ ಸಮಯದಲ್ಲಿ ಚಿನ್ನವು ಹೂಡಿಕೆಯ ಆಸ್ತಿಯಾಗಿದೆ. ಆದರೆ ಚಿನ್ನವನ್ನು ಕದಿಯಬಹುದು. ಹೀಗಾಗಿ ಇದನ್ನು ಭದ್ರತೆಯಿಂದ ಸಂಗ್ರಹಿಸುವ ಜತೆಗೆ ಉತ್ತಮ ನಿರ್ವಹಣೆಯ ಅಗತ್ಯವಿದೆ. ಆದರೆ, ಕೆಲವೇ ವಿಶ್ವಾಸಾರ್ಹ ಹೂಡಿಕೆಗಳಲ್ಲಿ ಚಿನ್ನ ಒಂದಾಗಿತ್ತು. ಆದರೆ ಇನ್ನು ಮುಂದೆ ಹೂಡಿಕೆದಾರರು ಬಿಟ್‌ಕಾಯಿನ್‌ಗಳನ್ನು ಭವಿಷ್ಯದ ಚಿನ್ನದಂತೆ ನೋಡಲು ಪ್ರಾರಂಭಿಸಿದ್ದಾರೆ. ಇದು ಸಂಪೂರ್ಣವಾಗಿ ವಿಕೇಂದ್ರೀಕೃತವಾಗಿದೆ, ಯಾವುದೇ ಸಂಗ್ರಹಣೆ ಅಥವಾ ನಿರ್ವಹಣೆ ಸಮಸ್ಯೆಗಳಿಲ್ಲ ಮತ್ತು ಕದಿಯಲು ಸಾಧ್ಯವಿಲ್ಲ. ಕ್ರಿಪ್ಟೋಕರೆನ್ಸಿಗಳು ಭೂಮಿ ಮತ್ತು ಮಂಗಳ ಗ್ರಹದಲ್ಲಿ ಅತ್ಯಂತ ಲಾಭದಾಯಕ ಆಸ್ತಿ ಎನಿಸಲಿವೆ" ಎಂದು ಹೇಳಿದ್ದಾರೆ. ವಿಶ್ಶು ಗುಪ್ತಾ ಅವರು ಹೇಳುವಂತೆ ಕ್ರಿಪ್ಟೋಕರೆನ್ಸಿಗಳು ಕಳೆದ ಒಂದು ವರ್ಷದಲ್ಲಿ ಹೂಡಿಕೆಯ ಸರಾಸರಿ ಶೇ408ರಷ್ಟು ಆದಾಯ ತಂಡುಕೊಟ್ಟಿವೆ. ಆದರೆ, ಸಾಂಪ್ರದಾಯಿಕ ಕರೆನ್ಸಿಗಳನ್ನು ಠೇವಣಿ ಇಟ್ಟರೆ ವಾರ್ಷಿಕ ಶೇ.5-7ರಷ್ಟು ಆದಾಯ ಬರುತ್ತದೆ. ಚಿನ್ನದ ಎದುರು ಬಿಟ್‌ಕಾಯಿನ್‌ ಹೇಗೆ ಹೆಚ್ಚು ಲಾಭದಾಯಕ ಎಂಬ ಕುರಿತು ಪ್ರೋಅಸೆಟ್ಜ್‌ ಎಕ್ಸ್‌ಚೇಂಜ್‌ನ ಮನೋಜ್‌ ದಾಲ್ಮಿಯಾ ಅವರು ನಾಲ್ಕು ಪ್ರಮುಖ ಅಂಶಗಳನ್ನು ಪಟ್ಟಿ ಮಾಡಿದ್ದಾರೆ. ಅಪರೂಪ: ಬಿಟ್‌ಕಾಯಿನ್ ಅಪರೂಪವಾದುದು. ಅಂದರೆ, ಇದನ್ನು ಮನಸಿಗೆ ಬಂದಂತೆ ರಚಿಸಲಾಗುವುದಿಲ್ಲ. ಕೇವಲ 21 ಮಿಲಿಯನ್ ಕ್ರಿಪ್ಟೋಕರೆನ್ಸಿಗಳು ಲಭ್ಯ ಇವೆ. ಇವನ್ನು ಯಾರಿಂದಲೂ ನಿಗದಿತ ಮಿತಿಂಗಿಂತ ಹೆಚ್ಚು ರಚಿಸಲು ಸಾಧ್ಯವಿಲ್ಲ. ಇದರರ್ಥ ಯಾವುದೇ ಸರ್ಕಾರವು ಅದನ್ನು ನಿಯಂತ್ರಿಸಲು ಅಥವಾ ನಕಲಿಸಲು ಸಾಧ್ಯವಿಲ್ಲ. ಹಾಗೆಯೇ ಚಿನ್ನವನ್ನು ಕೃತಕವಾಗಿ ತಯಾರಿಸಲು ಸಾಧ್ಯವಿಲ್ಲ. ಆದರೆ, ಚಿನ್ನದ ಕೊರತೆಯು ಬದಲಾಗುತ್ತಲೇ ಇರುತ್ತದೆ. ಚಿನ್ನದ ಲಭ್ಯತೆ ಮತ್ತು ಉತ್ಪಾದನೆಯ ಆಧಾರದ ಮೇಲೆ ಚಿನ್ನದ ಪೂರೈಕೆ ನಿರ್ಧಾರಿತವಾಗಿರುತ್ತದೆ. ಸುಧೀರ್ಘ ಬಾಳಿಕೆ: ಬಿಟ್‌ಕಾಯಿನ್‌ಗಳು ಮತ್ತು ಚಿನ್ನ ಎರಡೂ ಬಹುತೇಕ ಸಂಪೂರ್ಣವಾಗಿ ಬಾಳಿಕೆ ಬರುವಂಥವು. ಇಂಟರ್ನೆಟ್ ಕಾರ್ಯನಿರ್ವಹಿಸುವವರೆಗೆ, ಬಿಟ್‌ಕಾಯಿನ್‌ಗಳು ಬಳಕೆಯಲ್ಲಿರುತ್ತವೆ. ಬಹಳ ಹಿಂದೆಯೇ ಚಿನ್ನವನ್ನು ಆಭರಣ ತಯಾರಿಕೆ, ವ್ಯಾಪಾರ ಇತ್ಯಾದಿಗಳಿಗೆ ಬಳಸಲಾಗಿದೆ. ಇಂದಿಗೂ ಬಳಕೆಯಲ್ಲಿಯೇ ಇದೆ. ಹೀಗೆಯೇ ಕ್ರಿಪ್ಟೋಕರೆನ್ಸಿಗಳು ಕೂಡ ದೀರ್ಘಬಾಳಿಕೆಯವಾಗಿವೆ. ಅತಿ ಸಣ್ಣ ಘಟಕಗಳಾಗಿ ವಿಭಜಿಸಬಹುದು: ಬಿಟ್‌ಕಾಯಿನ್ ಅನ್ನು ಪ್ರತ್ಯೇಕ ಸತೋಶಿಗಳಾಗಿ ವಿಂಗಡಿಸಬಹುದು. 10 ಕೋಟಿ (100,000,000) ಸತೋಶಿಗಳು ಸೇರಿದರೆ, 1 ಬಿಟ್‌ಕಾಯಿನ್‌ ಆಗುತ್ತದೆ. ಚಿನ್ನವನ್ನು ಅಷ್ಟು ಸುಲಭವಾಗಿ ಅಥವಾ ನಿಖರವಾಗಿ ವಿಂಗಡಿಸಲಾಗುವುದಿಲ್ಲ. ಆದರೆ ಅದನ್ನು ಸಣ್ಣ ಕಾಯಿನ್‌ ರೂಪದಲ್ಲಿ ಮಿಂಟ್‌ ಮಾಡಬಹದು. ನಕಲು ಮಾಡುವುದು ಕಷ್ಟ: ಬಿಟ್‌ಕಾಯಿನ್ ಮತ್ತು ಚಿನ್ನವನ್ನು ನಕಲು ಮಾಡಲು ಸಾಧ್ಯವಿಲ್ಲ. ಬಿಟ್‌ಕಾಯಿನ್ ಅನ್ನು ಗುರುತಿಸುವುದು ಸುಲಭ ಮತ್ತು ನಕಲಿ ಮಾಡುವುದು ಅಸಾಧ್ಯ. ಚಿನ್ನವು ಸಾಕಷ್ಟು ಗುರುತಿಸಲ್ಪಡುತ್ತದೆ, ಆದರೂ ಕೆಲವು ಸಂದರ್ಭಗಳಲ್ಲಿ ಅದನ್ನು ಶುದ್ಧತೆಗಾಗಿ ಪರೀಕ್ಷಿಸಬೇಕು.