ಗಾಲಿಕುರ್ಚಿಯಲ್ಲಿದ್ದ ಸಂಸದೆ ಪ್ರಗ್ಯಾ ಠಾಕೂರ್ ನರ್ತಿಸುವ ವಿಡಿಯೋ ವೈರಲ್: 'ನೋಡಿ ಖುಷಿಯಾಗುತ್ತಿದೆ' ಎಂದ ಕಾಂಗ್ರೆಸ್!

ಭೋಪಾಲ್: ಬಾಸ್ಕೆಟ್ ಬಾಲ್ ಕೋರ್ಟ್‌ನಲ್ಲಿ ಆಟವಾಡುತ್ತಿದ್ದ ಸಂಸದೆ ಅವರ ವಿಡಿಯೋ ವೈರಲ್ ಆದ ಕೆಲವು ದಿನಗಳ ಬಳಿಕ ಅವರು ಮದುವೆ ಸಮಾರಂಭವೊಂದರಲ್ಲಿ ನರ್ತಿಸುವ ದೃಶ್ಯ ಸಾಮಾಜಿಕ ಜಾಲತಾಣದಲ್ಲಿ ಹಡಿದಾಡುತ್ತಿದೆ. ಅನಾರೋಗ್ಯದ ನೆಪವೊಡ್ಡಿ ನ್ಯಾಯಾಲಯಕ್ಕೆ ಹಾಜರಾಗುವುದರಿಂದ ತಪ್ಪಿಸಿಕೊಂಡಿದ್ದ ಪ್ರಕರಣದ ಆರೋಪಿ ಪ್ರಗ್ಯಾ ವಿರುದ್ಧ ವಾಗ್ದಾಳಿ ನಡೆಸಲು ಈ ವಿಡಿಯೋವನ್ನು ಬಳಸಿಕೊಂಡಿದೆ. ಭೋಪಾಲದಲ್ಲಿರುವ ತಮ್ಮ ನಿವಾಸದಲ್ಲಿ ಆಯೋಜಿಸಿದ್ದ ಬಡ ಕುಟುಂಬಗಳ ಯುವತಿಯರ ಜೋಡಿ ಮದುವೆ ಸಮಾರಂಭದಲ್ಲಿ 51 ವರ್ಷದ ಪ್ರಗ್ಯಾ, ಸಂಭ್ರಮಾಚರಣೆ ನಡುವೆ ನರ್ತಿಸಿದ್ದಾರೆ. ಜತೆಗೆ ಉಳಿದವರನ್ನೂ ನರ್ತಿಸಲು ಕರೆದಿದ್ದಾರೆ. ದಿನಗೂಲಿ ಕಾರ್ಮಿಕರ ಮಕ್ಕಳ ಮದುವೆಯನ್ನು ತಮ್ಮ ನಿವಾಸದಲ್ಲಿಯೇ ಪ್ರಗ್ಯಾ ನೆರವೇರಿಸಿದ್ದರು. ಆದರೆ ಸಮಾರಂಭದಲ್ಲಿ ಅವರು ನರ್ತಿಸಿದ್ದು, ಅನೇಕ ಪ್ರಶ್ನೆಗಳನ್ನು ಹುಟ್ಟುಹಾಕಿದೆ. 'ಭೋಪಾಲ್ ಸಂಸದೆ, ಸಹೋದರಿ ಪ್ರಗ್ಯಾ ಠಾಕೂರ್ ಅವರು ಬಾಸ್ಕೆಟ್‌ಬಾಲ್ ಮತ್ತು ನೆರವಿಲ್ಲದೆ ನಡೆಯುವುದು ಅಥವಾ ಈ ರೀತಿ ಸಂತೋಷದಿಂದ ನರ್ತಿಸುವುದನ್ನು ನಾವು ನೋಡಿದಾಗ, ಅದು ನಮಗೆ ಖುಷಿ ನೀಡುತ್ತದೆಯೇ...?' ಎಂದು ಮಧ್ಯಪ್ರದೇಶ ಕಾಂಗ್ರೆಸ್ ವಕ್ತಾರ ನರೇಂದ್ರ ಸಲುಜಾ ವ್ಯಂಗ್ಯವಾಗಿ ಟ್ವೀಟ್ ಮಾಡಿದ್ದಾರೆ. ಜುಲೈ 1ರಂದು ಬಾಸ್ಕೆಟ್ ಬಾಲ್ ಆಡುವ ಸಂಸದೆ ಪ್ರಗ್ಯಾ ಠಾಕೂರ್ ಅವರು ಬಾಸ್ಕೆಟ್ ಬಾಲ್ ಆಡುವ ವಿಡಿಯೋ ಹಂಚಿಕೊಂಡಿದ್ದ ಸಲುಜಾ, 'ಭೋಪಾಲ್ ಸಂಸದೆ ಪ್ರಗ್ಯಾ ಠಾಕೂರ್ ಅವರನ್ನು ನಾವು ಗಾಲಿಕುರ್ಚಿ ಮೇಲೆ ಮಾತ್ರವೇ ನೋಡಿದ್ದೆವು. ಈಗ ಅವರು ಭೋಪಾಲ್ ಕ್ರೀಡಾಂಗಣದಲ್ಲಿ ಕೈಯಲ್ಲಿ ಬಾಸ್ಕೆಟ್ ಬಾಲ್ ಹಿಡಿಯಲು ಪ್ರಯತ್ನಿಸುವುದನ್ನು ಕಂಡು ನಮಗೆ ಬಹಳ ಖುಷಿಯಾಗುತ್ತಿದೆ. ಇದುವರೆಗೂ ಅವರು ಗಾಯದಿಂದಾಗಿ ನಡೆಯಲು ಅಥವಾ ಸರಿಯಾಗಿ ನಿಲ್ಲಲು ಕೂಡ ಸಾಧ್ಯವಿಲ್ಲ ಎಂದುಕೊಂಡಿದ್ದೆವಲ್ಲವೇ? ಆಕೆಯನ್ನು ದೇವರು ಸದಾ ಆರೋಗ್ಯದಿಂದ ಇರಿಸಲಿ' ಎಂದು ಹೇಳಿದ್ದರು. ಸಾಧ್ವಿ ಪ್ರಗ್ಯಾ ಅವರು ಮಾಲೆಗಾಂವ್ ಬಾಂಬ್ ಸ್ಫೋಟದ ಆರೋಪಿಯಾಗಿದ್ದು, ಅನಾರೋಗ್ಯದ ಕಾರಣದಿಂದ ತಮಗೆ ಓಡಾಡಲು ಸಾಧ್ಯವಾಗುತ್ತಿಲ್ಲ ಎಂದು ಕಾರಣ ನೀಡಿ, ವಿಚಾರಣೆಗೆ ಹಾಜರಾಗುವುದರಿಂದ ತಪ್ಪಿಸಿಕೊಳ್ಳುತ್ತಿದ್ದರು. ಈಗ ಅವರು ನರ್ತಿಸುವ ಹಾಗೂ ಆಟವಾಡುವ ವಿಡಿಯೋ ವಿರೋಧಪಕ್ಷಗಳ ಟೀಕೆಗೆ ಗುರಿಯಾಗಿದೆ.