ಹಳ್ಳಿ ಸೊಗಡಿನ ಸಿನಿಮಾಕ್ಕಾಗಿ ಒಂದಾದ 'ಕ್ರೇಜಿ ಸ್ಟಾರ್' ರವಿಚಂದ್ರನ್‌ & ಎಸ್. ಮಹೇಂದರ್‌

ಹರೀಶ್‌ ಬಸವರಾಜ್‌ 'ಕ್ರೇಜಿ ಸ್ಟಾರ್‌' ಒಂದು ಕಾಲದಲ್ಲಿ ಅಣ್ಣಯ್ಯ, ಹಳ್ಳಿಮೇಷ್ಟ್ರು, ರಾಮಾಚಾರಿ, ರಸಿಕ, ಪುಟ್ನಂಜ, ಸಿಪಾಯಿ ಥರದ ಹಳ್ಳಿ ಸೊಡಗಿನ ಸಿನಿಮಾಗಳಲ್ಲಿ ಕಾಣಿಸಿಕೊಂಡು ರಂಜಿಸಿದ್ದರು. ಇದೀಗ ಅವರು ಮತ್ತೊಮ್ಮೆ ಅಂಥದ್ದೇ ಸಿನಿಮಾ ಮಾಡಲಿದ್ದಾರೆ. ಕನ್ನಡ ಚಿತ್ರರಂಗದಲ್ಲಿ ಕೌಟುಂಬಿಕ ಚಿತ್ರಗಳನ್ನು ನಿರ್ದೇಶನ ಮಾಡಿ ಯಶಸ್ವಿಯಾದವರ ಸಾಲಿನಲ್ಲಿ ಎಸ್‌. ಮಹೇಂದರ್‌ ಕೂಡ ಒಬ್ಬರು. ಅವರು ಚಿತ್ರರಂಗದಿಂದ ಕೊಂಚ ಬ್ರೇಕ್‌ ತೆಗೆದುಕೊಂಡು ಇತ್ತೀಚೆಗೆ 'ಪಂಪ' ಎನ್ನುವ ಸಿನಿಮಾ ಮಾಡಿದ್ದರು. ಈಗ ಮತ್ತೊಂದು ಸಿನಿಮಾವನ್ನು ರವಿಚಂದ್ರನ್‌ ಜತೆಗೆ ಮಾಡಲು ತಯಾರಿ ನಡೆಸಿದ್ದಾರೆ. ಎಸ್‌. ಮಹೇಂದರ್‌ ಹಳ್ಳಿ ಸೊಗಡಿನ ಸಿನಿಮಾ ಮಾಡುವುದರಲ್ಲಿ ಎತ್ತಿದ ಕೈ. ಈಗಾಗಲೇ ಸಾಕಷ್ಟು ಬಾರಿ ಆ ರೀತಿಯ ಕಥೆಗಳ ಸಿನಿಮಾ ಮಾಡಿ ಯಶಸ್ವಿಯೂ ಆಗಿದ್ದಾರೆ. ರವಿಚಂದ್ರನ್‌ ಸಹ ಹಳ್ಳಿ ಕಥೆಯ ಸಿನಿಮಾ ಮಾಡಿ ಬಹಳ ದಿನಗಳಾಗಿವೆ. ಆದ್ದರಿಂದ ಕ್ರೇಜಿಸ್ಟಾರ್‌ಗಾಗಿ ಮಹೇಂದರ್‌ ಹಳ್ಳಿ ಬ್ಯಾಕ್‌ಗ್ರೌಂಡ್‌ನ ಕಥೆಯನ್ನೇ ಹೆಣೆದಿದ್ದಾರೆ. 'ನಾನು ಮತ್ತು ರವಿಚಂದ್ರನ್‌ ಸಿನಿಮಾ ಮಾಡುವುದು ಪಕ್ಕಾ. ಅದಕ್ಕಾಗಿ ಈಗಾಗಲೇ ಕಥೆ ಕೂಡ ಸಿದ್ಧವಾಗಿದೆ. ಕೊರೊನಾ ಸಂಕಷ್ಟ ಕಡಿಮೆ ಆದ ಮೇಲೆ ಎಲ್ಲವನ್ನು ತಿಳಿಸುತ್ತೇವೆ. ಇಷ್ಟೊತ್ತಿಗೆ ಸಿನಿಮಾದ ಕೆಲಸಗಳು ಅಧಿಕೃತವಾಗಿ ಆರಂಭವಾಗಬೇಕಿದ್ದವು. ಕೊರೊನಾ ಎಲ್ಲವನ್ನು ಮುಂದಕ್ಕೆ ಹಾಕಿಸಿದೆ. ಸೋಂಕು ಕೊಂಚ ಕಡಿಮೆಯಾದ ತಕ್ಷಣ ಉಳಿದ ಮಾಹಿತಿ ನೀಡುತ್ತೇನೆ' ಎಂದು ಮಹೇಂದರ್‌ ಹೇಳಿದ್ದಾರೆ. ಎಲ್ಲವೂ ಅಂದುಕೊಂಡಂತೆ ಆಗಿದ್ದರೆ ಇಷ್ಟೊತ್ತಿಗೆ ಆ ಸಿನಿಮಾದ ಚಿತ್ರೀಕರಣ ಆರಂಭವಾಗಬೇಕಿತ್ತು. ಆದರೆ ಕೊರೊನಾದಿಂದಾಗಿ ಅದು ಮುಂದೂಡಲ್ಪಟ್ಟಿದೆ. ಸಿನಿಮಾಗೆ ಒಂದು ಹಂತದ ತಾಂತ್ರಿಕ ವರ್ಗದ ಆಯ್ಕೆ ನಡೆದಿದೆ. ಎಲ್ಲವನ್ನು ಫೈನಲ್‌ ಮಾಡಿಕೊಳ್ಳುವ ಹಂತದಲ್ಲಿ ಕೋವಿಡ್‌ನಿಂದಾಗಿ ಸಿನಿಮಾ ಕೆಲಸಗಳಿಗೆ ಬ್ರೇಕ್‌ ಬಿದ್ದಿದೆ. ಇದರಿಂದಾಗಿ ಮಹೇಂದರ್‌ ಅವರ 'ಪಂಪ' ಸಿನಿಮಾದ ರಿಲೀಸ್‌ ಡೇಟ್‌ ಕೂಡ ಮುಂದಕ್ಕೆ ಹೋಗಿದೆ. ರವಿಚಂದ್ರನ್‌ ಸದ್ಯಕ್ಕೆ 'ರವಿ ಬೋಪಣ್ಣ' ಸಿನಿಮಾದ ಕೆಲಸದಲ್ಲಿ ತೊಡಗಿಸಿಕೊಂಡಿದ್ದಾರೆ. ಜತೆಗೆ ಬಿ.ಎಂ. ಗಿರಿರಾಜ್‌ ಅವರ 'ಕನ್ನಡಿಗ' ಸಿನಿಮಾದ ಚಿತ್ರೀಕರಣ ಸಹ ಕಂಪ್ಲೀಟ್‌ ಮಾಡಿದ್ದಾರೆ. ಜತೆಗೆ 'ದೃಶ್ಯಂ-2' ಶೂಟಿಂಗ್‌ ಸಹ ಆರಂಭಿಸಬೇಕಿದೆ. 'ದೃಶ್ಯಂ-2' ಸಿನಿಮಾ ಮತ್ತು ಮಹೇಂದರ್‌ ಅವರ ಸಿನಿಮಾ ಒಟ್ಟಿಗೆ ನಡೆಯುತ್ತವೆ ಎಂಬ ಮಾಹಿತಿ ಸಿಕ್ಕಿದೆ.