ಅಪ್ಪು ಜೊತೆ ಮಾಡಬೇಕಿದ್ದ ಚಿತ್ರವನ್ನ ಯುವರಾಜ್‌ ಕುಮಾರ್ ಜೊತೆ ಮಾಡಿ: ನಿರ್ದೇಶಕರಿಗೆ ಪುನೀತ್ ಫ್ಯಾನ್ಸ್ ಬೇಡಿಕೆ

ಸ್ಯಾಂಡಲ್‌ವುಡ್‌ನ ಪವರ್ ಸ್ಟಾರ್ ಕೊನೆಯುಸಿರೆಳೆದಿದ್ದಾರೆ. ಅಕ್ಟೋಬರ್ 29 ರಂದು ತೀವ್ರ ಹೃದಯಾಘಾತ ಮತ್ತು ಹೃದಯ ಸ್ತಂಭನದಿಂದ ಪುನೀತ್ ರಾಜ್‌ಕುಮಾರ್ ವಿಧಿವಶರಾದರು. 46ನೇ ವಯಸ್ಸಿಗೆ ಪುನೀತ್ ರಾಜ್‌ಕುಮಾರ್ ಇಹಲೋಕ ತ್ಯಜಿಸಿಬಿಟ್ಟರು. ಪುನೀತ್ ರಾಜ್‌ಕುಮಾರ್ ಅವರ ಹಠಾತ್ ನಿಧನದಿಂದ ಹಲವರಿಗೆ ದಿಗ್ಭ್ರಮೆಯಾಗಿದೆ. ಪುನೀತ್ ರಾಜ್‌ಕುಮಾರ್ ಅವರ ಅಕಾಲಿಕ ಮರಣದಿಂದಾಗಿ ಅವರ ಸಿನಿಮಾಗಳು ಅರ್ಧಕ್ಕೆ ನಿಂತು ಹೋಗಿದೆ. ‘ಜೇಮ್ಸ್’ ಚಿತ್ರದ ಹಾಡುಗಳ ಚಿತ್ರೀಕರಣ ಬಾಕಿ ಇತ್ತು. ‘ದ್ವಿತ್ವ’ ಸಿನಿಮಾ ಸೆಟ್ಟೇರಬೇಕಿತ್ತು. ಮತ್ತು ಕೃಷ್ಣ ನಿರ್ದೇಶನದ ಚಿತ್ರಗಳಲ್ಲಿ ಅಪ್ಪು ನಟಿಸಬೇಕಿತ್ತು. ಇದೆಲ್ಲ ಆಗುವ ಮುನ್ನವೇ ಪುನೀತ್ ರಾಜ್‌ಕುಮಾರ್ ಚಿರನಿದ್ರೆಗೆ ಜಾರಿಬಿಟ್ಟರು. ಹೀಗಾಗಿ, ಅಪ್ಪುಗಾಗಿ ರೆಡಿ ಮಾಡಿದ್ದ ಚಿತ್ರಕಥೆಗಳು ಇದೀಗ ಹೀರೋ ಇಲ್ಲದೆ ಅನಾಥವಾಗಿದೆ. ಜೊತೆ ಸಿನಿಮಾ ಮಾಡಿ ಪುನೀತ್ ರಾಜ್‌ಕುಮಾರ್ ಜೊತೆ ಮಾಡಬೇಕಿದ್ದ ಸಿನಿಮಾಗಳನ್ನ ಯುವರಾಜ್ ಕುಮಾರ್ ಜೊತೆ ಮಾಡಿ ಎಂದು ನಿರ್ದೇಶಕರಿಗೆ ಅಭಿಮಾನಿಗಳು ಟ್ವಿಟ್ಟರ್ ಮೂಲಕ ಮನವಿ ಮಾಡುತ್ತಿದ್ದಾರೆ. ‘’ಅಪ್ಪು ಜೊತೆಗೆ ನೀವು ಅನೌನ್ಸ್ ಮಾಡಿರುವ ಚಿತ್ರಗಳನ್ನು ದಯವಿಟ್ಟು ಯುವರಾಜ್ ಕುಮಾರ್ ಅಥವಾ ವಿನಯ್ ರಾಜ್‌ಕುಮಾರ್ ಜೊತೆ ಮಾಡಿ’’ ಎಂದು ಅಭಿಮಾನಿಗಳು ನಿರ್ದೇಶಕ ಸಂತೋಷ್ ಆನಂದ್‌ರಾಮ್‌ಗೆ ಟ್ವೀಟ್ ಮಾಡುತ್ತಿದ್ದಾರೆ. ‘ಯುವರತ್ನ’ ಡಿಲೀಟೆಡ್ ಸೀನ್ಸ್ ರಿಲೀಸ್ ಮಾಡಿ ಪುನೀತ್ ರಾಜ್‌ಕುಮಾರ್ ಮತ್ತು ಸಂತೋಷ್ ಆನಂದ್‌ರಾಮ್ ಕಾಂಬಿನೇಶನ್‌ನಲ್ಲಿ ‘ರಾಜಕುಮಾರ’ ಮತ್ತು ‘ಯುವರತ್ನ’ ಸಿನಿಮಾಗಳು ತೆರೆಗೆ ಬಂದಿತ್ತು. ‘ಯುವರತ್ನ’ ಚಿತ್ರದ ಡಿಲೀಟೆಡ್ ಸೀನ್‌ಗಳನ್ನು ರಿಲೀಸ್ ಮಾಡಿ ಎಂದು ಅಭಿಮಾನಿಗಳು ಸಂತೋಷ್ ಆನಂದ್‌ರಾಮ್‌ಗೆ ಟ್ವೀಟ್ ಮಾಡುತ್ತಿದ್ದಾರೆ. ಇದಕ್ಕೆ ಪ್ರತಿಕ್ರಿಯೆ ನೀಡಿರುವ ಸಂತೋಷ್ ಆನಂದ್‌ರಾಮ್ ‘’ಆದಷ್ಟು ಬೇಗ ಈ ಬಗ್ಗೆ ಮಾಹಿತಿ ನೀಡುವೆ’’ ಎಂದು ಟ್ವೀಟಿಸಿದ್ದಾರೆ. ಪವನ್ ಕುಮಾರ್‌ಗೂ ಅಭಿಮಾನಿಗಳ ಮನವಿ ಪುನೀತ್ ರಾಜ್‌ಕುಮಾರ್ ಹಾಗೂ ನಿರ್ದೇಶಕ ಪವನ್ ಕುಮಾರ್ ಕಾಂಬಿನೇಶನ್‌ನಲ್ಲಿ ‘ದ್ವಿತ್ವ’ ಸಿನಿಮಾ ಅನೌನ್ಸ್ ಆಗಿತ್ತು. ‘ದ್ವಿತ್ವ’ ಸಿನಿಮಾ ಸೆಟ್ಟೇರುವ ಮುನ್ನವೇ ಪುನೀತ್ ರಾಜ್‌ಕುಮಾರ್ ಕೊನೆಯುಸಿರೆಳೆದರು. ಹೀಗಾಗಿ, ‘’ದ್ವಿತ್ವ’ ಚಿತ್ರವನ್ನ ಡ್ರಾಪ್ ಮಾಡಬೇಡಿ. ‘ದ್ವಿತ್ವ’ ಚಿತ್ರವನ್ನು ಯುವರಾಜ್‌ಕುಮಾರ್ ಜೊತೆ ಮಾಡಿ’’ ಎಂದು ನಿರ್ದೇಶಕ ಪವನ್ ಕುಮಾರ್‌ಗೆ ಅಭಿಮಾನಿಗಳು ಟ್ವೀಟ್ ಮಾಡುತ್ತಿದ್ದಾರೆ. ಸಿನಿಮಾ ಕೈಬಿಟ್ಟಿದ್ದೇನೆ ಎಂದ ಜೇಕಬ್ ವರ್ಗೀಸ್ ‘ಪೃಥ್ವಿ’ ಚಿತ್ರದ ನಿರ್ದೇಶಕ ಜೇಕಬ್ ವರ್ಗೀಸ್ ಜೊತೆಗೂ ಪುನೀತ್ ರಾಜ್‌ಕುಮಾರ್ ಒಂದು ಫ್ಯಾಮಿಲಿ ಸಿನಿಮಾ ಮಾಡಲು ಗ್ರೀನ್ ಸಿಗ್ನಲ್ ಕೊಟ್ಟಿದ್ದರು. ಈ ತಿಂಗಳಿನಿಂದ ಶೂಟಿಂಗ್ ಶುರುವಾಗಬೇಕಿತ್ತು. ಅಷ್ಟರಲ್ಲೇ ದುರ್ಘಟನೆ ಸಂಭವಿಸಿರೋದ್ರಿಂದ ಚಿತ್ರವನ್ನ ಜೇಕಬ್ ವರ್ಗೀಸ್ ಡ್ರಾಪ್ ಮಾಡಿದ್ದಾರೆ. ‘’ಫ್ಯಾಮಿಲಿ ಕಥೆ ಇರುವ ಸಿನಿಮಾವನ್ನು ಮನರಂಜನಾತ್ಮಕವಾಗಿ ಮಾಡಬೇಕು ಎಂದು ಹಿಂದಿನ ದಿನ ಕೂಡ ಫೋನ್‌ನಲ್ಲಿ ಹೇಳಿದ್ದರು. ಅವರದೇ ಪ್ರೊಡಕ್ಷನ್‌ ಆಗಿದ್ದರಿಂದ ಇಬ್ಬರೂ ಆಗಾಗ್ಗೆ ಕುಳಿತು ಸ್ಕ್ರಿಪ್ಟ್ ಬಗ್ಗೆ ಡಿಸ್ಕಸ್‌ ಮಾಡುತ್ತಿದ್ದೆವು. ಆತುರ ಇರಲಿಲ್ಲ. ಜಾಲಿಯಾಗಿ ಮಾಡೋಣ ಅಂತಿದ್ದೆವು. ನವೆಂಬರ್‌ನಲ್ಲಿ ಶೂಟ್‌ ಶುರು ಮಾಡಬೇಕಿತ್ತು. ಪ್ಯಾನ್‌ ಇಂಡಿಯಾ ಲೆವೆಲ್‌ನಲ್ಲಿ ಇರಬೇಕು ಎಂದಿದ್ದರು. ಬಹಳ ನಿರೀಕ್ಷೆ ಇತ್ತು. ಅವರಿಲ್ಲದೆ ಸಿನಿಮಾವನ್ನು ಕಲ್ಪನೆ ಮಾಡಿಕೊಳ್ಳಲು ಆಗುವುದಿಲ್ಲ. ಅವರಿಗಾಗೇ ಮಾಡಿದ ಕಥೆಯಾಗಿತ್ತು. ಹಾಗಾಗಿ ಸಿನಿಮಾ ಕೈ ಬಿಟ್ಟಿದ್ದೇನೆ’’ ಎಂದಿದ್ದಾರೆ ಜೇಕಬ್‌ ವರ್ಗೀಸ್‌.