ಸಾರ್ವಕಾಲಿಕ ದಾಖಲೆ ಮಟ್ಟಕ್ಕೆ ಷೇರು ಮಾರುಕಟ್ಟೆ, 60,000 ದತ್ತ ಸೆನ್ಸೆಕ್ಸ್‌

ಮುಂಬಯಿ: ಭಾರತೀಯ ಷೇರು ಪೇಟೆ ಕ್ಷಿಪ್ರಗತಿಯಲ್ಲಿ ತನ್ನದೇ ದಾಖಲೆಗಳನ್ನು ಮುರಿಯುತ್ತಿದ್ದು, ಗುರುವಾರ ಮೊಟ್ಟ ಮೊದಲ ಬಾರಿಗೆ 59 ಸಾವಿರ ಅಂಕಗಳ ಮೈಲುಗಲ್ಲನ್ನು ದಾಟಿತು. ಸೂಚ್ಯಂಕಗಳಾದ ಮತ್ತು ನಿಫ್ಟಿಗಳೆರಡೂ ಮಾರುಕಟ್ಟೆಯಲ್ಲಿ ಸತತ ಮೂರು ದಿನಗಳಿಂದ ನಾಗಾಲೋಟದಲ್ಲಿ ಮುಂದುವರಿದಿವೆ. ಸೆನ್ಸೆಕ್ಸ್‌ ಗುರುವಾರ 417 ಅಂಕ ಗಳಿಸಿ ಸಾರ್ವಕಾಲಿಕ ದಾಖಲೆ ಸೃಷ್ಟಿಸಿತು. ನೋಡ ನೋಡುತ್ತಿರುವಂತೆ ಚಾರಿತ್ರಿಕ 60 ಸಾವಿರ ಅಂಕಗಳ ಹೊಸ್ತಿಲಿಗೆ ಸಮೀಪಕ್ಕೆ ಜಿಗಿದಿದೆ. ಕೇಂದ್ರ ಸರಕಾರ ಟೆಲಿಕಾಂ, ಆಟೋಮೊಬೈಲ್‌ ವಲಯಗಳಿಗೆ ಬುಧವಾರ ನೆರವಿನ ಪ್ಯಾಕೇಜ್‌ ಘೋಷಿಸಿರುವುದನ್ನು ಷೇರು ಪೇಟೆ ಸ್ವಾಗತಿಸಿದೆ ಎಂದು ವಿಶ್ಲೇಷಕರು ಅಭಿಪ್ರಾಯಪಟ್ಟಿದ್ದಾರೆ. ಕೂಡ ದಿನದ ಅಂತ್ಯಕ್ಕೆ 17,519.45ಕ್ಕೆ ಏರಿಕೆಯಾಗಿದ್ದು, ಸಾರ್ವಕಾಲಿಕ ದಾಖಲೆ ಬರೆದಿದೆ. ಸೂಚ್ಯಂಕ ಶೇ.0.80ರಷ್ಟು ಏರಿಕೆಯಾಗಿದ್ದು, ಒಂದೇ ದಿನ 139.45ರಷ್ಟು ಹೆಚ್ಚಳ ಕಂಡಿದೆ. ಇದರೊಂದಿಗೆ 2021ರಲ್ಲಿ ಸೆನ್ಸೆಕ್ಸ್‌ ಮತ್ತು ನಿಫ್ಟಿ ಎರಡೂ ಕೂಡ ಉನ್ನತ ಮಟ್ಟಕ್ಕೆ ತಲುಪಲಿವೆ ಎಂಬ ಮಾರುಕಟ್ಟೆ ತಜ್ಞರ ಭವಿಷ್ಯ ನಿಜವಾಗುತ್ತಿದೆ. ಎನ್‌ಟಿಪಿಸಿ ಷೇರು ಶೇ.7ರಷ್ಟು ಗಳಿಕೆ ಯೊಂದಿಗೆ ಅತಿ ಹೆಚ್ಚು ಲಾಭಗಳಿಸಿತು. ಭಾರ್ತಿ ಏರ್‌ಟೆಲ್‌, ಎಚ್‌ಸಿಎಲ್‌ ಟೆಕ್‌, ಟೈಟಾನ್‌, ಪವರ್‌ ಗ್ರಿಡ್‌ ಕಾರ್ಪೊರೇಷನ್‌ ಆಫ್‌ ಇಂಡಿಯಾ, ಟಾಟಾ ಕನ್ಸಲ್ಟೆನ್ಸಿ ಸರ್ವೀಸಸ್‌ (ಟಿಸಿಎಸ್‌), ಇಂಡಸ್‌ಇಂಡ್‌ ಬ್ಯಾಂಕ್‌, ಇನ್ಫೋಸಿಸ್‌ ಕಂಪನಿಗಳ ಷೇರುಗಳೂ ಲಾಭ ಗಳಿಸಿವೆ. ಆದರೆ ಎಕ್ಸಿಸ್‌ ಬ್ಯಾಂಕ್‌, ಏಷ್ಯನ್‌ ಪೇಂಟ್ಸ್‌, ಅಲ್ಟ್ರಾಟೆಕ್‌ ಸಿಮೆಂಟ್‌, ನೆಸ್ಲೆಇಂಡಿಯಾ, ಸನ್‌ ಫಾರ್ಮಾ, ಎಚ್‌ಡಿಎಫ್‌ಸಿ ಬ್ಯಾಂಕ್‌ಗಳ ಷೇರು ದರಗಳು ಕುಸಿಯಿತು. ನಿಫ್ಟಿ 18 ಸಾವಿರ ದಾಟುವ ನಿರೀಕ್ಷೆ ರಾಷ್ಟ್ರೀಯ ಸಂವೇದಿ ಸೂಚ್ಯಂಕ ನಿಫ್ಟಿ ಶೀಘ್ರವೇ 18,000 ಅಂಕಗಳ ಮೈಲುಗಲ್ಲು ದಾಟುವ ನಿರೀಕ್ಷೆ ಇದೆ. ಸೂಚ್ಯಂಕ 17,080 ಕ್ಕೇರಿದ ನಂತರ ಧನಾತ್ಮಕವಾಗಿಯೇ ಇದೆ. ಆಟೋ ಮತ್ತು ಮಿಡ್‌-ಕ್ಯಾಪ್‌ ಬ್ಯಾಂಕಿಂಗ್‌ ಷೇರುಗಳಲ್ಲಿ ಹೆಚ್ಚಿನ ಮೌಲ್ಯ ಕಂಡುಬರುತ್ತಿದ್ದು, ಇಲ್ಲಿಉತ್ತಮ ಸಾಧನೆಯ ನಿರೀಕ್ಷೆ ಇದೆ ಎಂದು ಮಾರುಕಟ್ಟೆ ತಜ್ಞರು ತಿಳಿಸಿದ್ದಾರೆ. ವಿದೇಶಿ ಸಾಂಸ್ಥಿಕ ಹೂಡಿಕೆದಾರರು ಬುಧವಾರ 232 ಕೋಟಿ ರೂ.ಗಳ ಷೇರುಗಳನ್ನು ಖರೀದಿಸಿದ್ದರು. ವಿಶ್ವದ 6ನೇ ದೊಡ್ಡ ಷೇರು ಮಾರುಕಟ್ಟೆ ಭಾರತ ಭಾರತ ಇದೀಗ ಫ್ರಾನ್ಸ್‌ ಅನ್ನು ಹಿಂದಿಕ್ಕಿ ಜಗತ್ತಿನ 6ನೇ ಅತಿ ದೊಡ್ಡ ಷೇರು ಮಾರುಕಟ್ಟೆ ಎನ್ನಿಸಿದೆ. ಭಾರತೀಯ ಷೇರು ಮಾರುಕಟ್ಟೆ ಬಂಡವಾಳ 3.41 ಲಕ್ಷ ಕೋಟಿ ಡಾಲರ್‌ಗೆ ಏರಿಕೆಯಾಗಿದೆ. ಫ್ರಾನ್ಸ್‌ ಷೇರು ಮಾರುಕಟ್ಟೆ ಬಂಡವಾಳ ಮೌಲ್ಯ 3.40 ಲಕ್ಷ ಕೋಟಿ ಡಾಲರ್‌ಗಳಾಗಿದೆ. ಅಮೆರಿಕ (51 ಲಕ್ಷ ಕೋಟಿ ಡಾಲರ್‌), ಚೀನಾ (12 ಲಕ್ಷ ಕೋಟಿ ಡಾಲರ್‌), ಜಪಾನ್‌ (7.43 ಲಕ್ಷ ಕೋಟಿ ಡಾಲರ್‌), ಹಾಂಕಾಂಗ್‌ (6.52 ಲಕ್ಷ ಕೋಟಿ ಡಾಲರ್‌) ಬ್ರಿಟನ್‌ (3.6 ಲಕ್ಷ ಕೋಟಿ ಡಾಲರ್‌) ಮೊದಲ 5 ಸ್ಥಾನಗಳಲ್ಲಿವೆ. ಸೂಚ್ಯಂಕ ಜಿಗಿತಕ್ಕೆ ಕಾರಣ * ಕೇಂದ್ರ ಸರಕಾರದಿಂದ ಟೆಲಿಕಾಂ, ಆಟೋಮೊಬೈಲ್‌ ವಲಯಕ್ಕೆ ನೆರವು * ಮತ್ತಷ್ಟು ಆರ್ಥಿಕ ಸುಧಾರಣಾ ಕ್ರಮಗಳ ನಿರೀಕ್ಷೆ * ಬ್ಯಾಂಕಿಂಗ್‌ ವಲಯ ಲಾಭ ಗಳಿಸುವ ವಿಶ್ವಾಸ