ಚಿನ್ನ ಖರೀದಿಯಲ್ಲಿ ದಾಖಲೆಯ ಏರಿಕೆ! ವರ್ಷದಲ್ಲಿ 900 ಟನ್‌ ಬಂಗಾರ ಆಮದು!

ಹೊಸದಿಲ್ಲಿ: ಭಾರತದಲ್ಲಿ ಕೋವಿಡ್‌ ನಿರ್ಬಂಧಗಳನ್ನು ತೆರವುಗೊಳಿಸಿದ ಬೆನ್ನಲ್ಲೇ ಭಾರೀ ಪ್ರಮಾಣದಲ್ಲಿ ಸಮಾರಂಭಗಳು ನಡೆದಿವೆ. ನವೆಂಬರ್ ಮಧ್ಯದಿಂದ ಸುಮಾರು 2.5 ಮಿಲಿಯನ್ ಮದುವೆ ನಡೆದಿವೆ ಎಂದು ಅಂದಾಜಿಸಲಾಗಿದೆ. ಒಟ್ಟು ವರ್ಷದಲ್ಲಿ ನಿರೀಕ್ಷಿಸಲಾದ ಒಟ್ಟು ಸಮಾರಂಭಗಳ ಪೈಕಿ ಒಂದೇ ತಿಂಗಳಲ್ಲಿ ಕಾಲು ಭಾಗದಷ್ಟು ಸಮಾರಂಭಗಳು ನಡೆದಿದ್ದು, ಚಿನ್ನದ ಮಾರುಕಟ್ಟೆಯಲ್ಲಿ ಭಾರೀ ಸಂಚಲನ ಮೂಡಿಸಿದೆ. ಕಳೆದ ತಿಂಗಳಿನಿಂದ ಭಾರತದಲ್ಲಿನ ಸಾಮಾಜಿಕ ಮಾಧ್ಯಮಗಳಲ್ಲಿನ ಪೋಸ್ಟ್‌ಗಳನ್ನು ಗಮನಿಸಿದರೆ, ಈ ಅಂಶಗಳು ಬೆಳಕಿಗೆ ಬಂದಿವೆ. ಕಳೆದ ಎರಡು ವರ್ಷಗಳಿಂದ ಕೊರೊನಾವೈರಸ್‌ ನಿಂದಾಗಿ ಬಹುತೇಕ ಮದುವೆಗಳು ಮುಂದೂಡಿದ್ದವು. ಹೀಗಾಗಿ ಕಳೆದ ಎರಡು ವರ್ಷಗಳಿಂದಲೂ ಭಾರತದ ಆಭರಣ ಮಾರುಕಟ್ಟೆಯಲ್ಲಿ ಬೇಡಿಕೆ ಕುಸಿದಿತ್ತು. ಆದರೆ, ನಿರ್ಬಂಧಗಳನ್ನು ತೆರವುಗೊಳಿಸಿದ ಬೆನ್ನಲ್ಲೇ ಮದುವೆ ಸಮಾರಂಭಗಳ ಸಂಖ್ಯೆ ಹೆಚ್ಚಿದೆ. ಇದರಿಂದ ಆಭರಣ ಮಾರುಕಟ್ಟೆ ಮಹತ್ವದ ತಿರುವು ಪಡೆದಿದೆ. ಚಿನ್ನ-ಬೆಳ್ಳಿ ವ್ಯಾಪಾರಿಗಳಿಗಂತೂ ಭರ್ಜರಿ ಆದಾಯ ತರುತ್ತಿದೆ. ಚಿನ್ನದ ಖರೀದಿ ಮತ್ತು ಚಿನ್ನವನ್ನು ಉಡುಗೊರೆ ನೀಡುವುದು ಶುಭವೆಂದು ಪರಿಗಣಿಸುವ ಭಾರತದ ಸಂಪ್ರದಾಯವೇ ಚಿನ್ನದ ಖರೀದಿ ಹೆಚ್ಚಲು ಮೂಲ ಕಾರಣವಾಗಿದೆ. ಹಬ್ಬದ ಸೀಸನ್‌ ಕೂಡ ಚಿನಿವಾರ ಪೇಟೆಗೆ ಬಂಪರ್ ಕೊಡುಗೆ ನೀಡಿದೆ. ಇದರಿಂದ ಪ್ರಸ್ತುತ ವರ್ಷದಲ್ಲಿ ಭಾರತದ ಚಿನ್ನದ 900 ಟನ್‌ಗೆ ಏರಿಕೆಯಾಗಿದೆ. ಇದು ಆರು ವರ್ಷಗಳಲ್ಲೇ ಅತ್ಯಧಿಕವಾಗಿದೆ ಎಂದು ಮೆಟಲ್ಸ್ ಫೋಕಸ್ ಲಿಮಿಟೆಡ್ ಹೇಳಿದೆ. ವರ್ಲ್ಡ್ ಗೋಲ್ಡ್ ಕೌನ್ಸಿಲ್ ಅಂಕಿಅಂಶಗಳ ಪ್ರಕಾರ ಕಳೆದ ವರ್ಷ ಚಿನ್ನದ ಆಮದು ಸುಮಾರು 350 ಟನ್‌ಗಳಷ್ಟಿತ್ತು. "ಚಿನ್ನದ ಬೆಲೆಯಲ್ಲಿ ಇಳಿಕೆ (ಕಳೆದ ವರ್ಷಕ್ಕಿಂತ) ಮತ್ತು ಹೆಚ್ಚಿದ ಬೇಡಿಕೆಯು ಮಾರಾಟ ಹೆಚ್ಚಲು ಸಹಾಯವಾಯಿತು. ಆದರೆ, ಈ ವರ್ಷ ಅತಿ ಹೆಚ್ಚು ಸಂಖ್ಯೆಯಲ್ಲಿ ಮದುವೆಗಳಾಗುತ್ತಿವೆ. ಕೆಲವು ಅಂದಾಜಿನ ಪ್ರಕಾರ ಮಾರಾಟದಲ್ಲಿ ನಾವು ದಾಖಲೆಯ ಸಂಖ್ಯೆಯನ್ನು ಹೊಂದಬಹುದು" ಎಂದು ಮೆಟಲ್ಸ್ ಫೋಕಸ್‌ನ ಮುಂಬೈ ಮೂಲದ ಸಲಹೆಗಾರ ಚಿರಾಗ್ ಶೇಠ್‌ ಹೇಳಿದರು. "ಕಳೆದ ಒಂದೂವರೆ ವರ್ಷದಲ್ಲಿ ಸಂಭವಿಸಿದ ಘಟನೆಗಳು ಚಿನ್ನದ ಮೇಲಿನ ಜನರ ನಂಬಿಕೆಯನ್ನು ಪುನರುಜ್ಜೀವನಗೊಳಿಸಿದೆ." ಭಾರತವು ವಿಶ್ವದ ಎರಡನೇ ಅತಿದೊಡ್ಡ ಚಿನ್ನದ ಗ್ರಾಹಕವಾಗಿದೆ ಮತ್ತು ತಾನು ಬಳಸುವ ಎಲ್ಲ ಲೋಹವನ್ನು ಆಮದು ಮಾಡಿಕೊಳ್ಳುತ್ತಿದೆ. ಅಕ್ಟೋಬರ್‌ನಿಂದ ಡಿಸೆಂಬರ್‌ವರೆಗಿನ ಹಬ್ಬದ ತ್ರೈಮಾಸಿಕದಲ್ಲಿ ಖರೀದಿಗಳು ಸಾಮಾನ್ಯವಾಗಿ ಗರಿಷ್ಠ ಮಟ್ಟದಲ್ಲಿರುತ್ತವೆ. ಈ ಬಾರಿ ಅಕ್ಟೋಬರ್‌- ಡಿಸೆಂಬರ್‌ ತ್ರೈಮಾಸಿಕದಲ್ಲಿ ದಶಕದಲ್ಲೇ ಗರಿಷ್ಠ ಮಾರಾಟ ದಾಖಲಾಗುತ್ತದೆ ಎಂದು ವರ್ಲ್ಡ್ ಗೋಲ್ಡ್ ಕೌನ್ಸಿಲ್ ಈ ಹಿಂದೆಯೇ ಅಂದಾಜಿಸಿತ್ತು. ಕಳೆದ ಒಂದು ವರ್ಷದಿಂದ ಬಹಳಷ್ಟು ಮದುವೆಗಳು ಮುಂದೂಡಲ್ಪಟ್ಟಿದ್ದವು. ಈಗ ಮತ್ತೆ ಓಮಿಕ್ರಾನ್‌ ಭೀತಿ ಉಂಟಾಗುತ್ತಿರುವುದರಿಂದ ಶೀಘ್ರವೆ ಮದುವೆ ಸಮಾರಂಭಗಳಿಗೆ ಮುಂದಾದರು ಎಂದು ಲಕ್ನೋ ಮೂಲದ ಲಾಲಾ ಜುಗಲ್ ಕಿಶೋರ್ ಜ್ಯುವೆಲರ್ಸ್‌ನ ನಿರ್ದೇಶಕಿ ತಾನ್ಯಾ ರಸ್ತೋಗಿ ಹೇಳಿದ್ದಾರೆ. "ಈ ಬಾರಿ ಗ್ರಾಹಕರು ಪಚ್ಚೆ, ಕಲ್ಲು, ರತ್ನಗಳನ್ನು ಅಲಂಕರಿಸಿದ ಚಿನ್ನದ ಆಭರಣಗಳಿಗಿಂತಲೂ ಹೆಚ್ಚಾಗಿ, ಕೇವಲ ಚಿನ್ನದ ಆಭರಣಗಳನ್ನಷ್ಟೇ ಆಯ್ಕೆ ಮಾಡುತ್ತಿದ್ದಾರೆ. ಅಂದರೆ,ಚಿನ್ನದ ಆಭರಣಗಳನ್ನು ಹೂಡಿಕೆಯ ಸಾಧನವಾಗಿ ಪರಿಗಣಿಸಿಯೂ ಖರೀದಿಸುವ ಪ್ರವೃತ್ತಿ ಆರಂಭವಾಗಿದೆ. ಚಿನ್ನದ ಬೆಲೆಯಲ್ಲಿ ಕಳೆದ ವರ್ಷದ ಗರಿಷ್ಠ ಮಟ್ಟಕ್ಕಿಂತ ಇಳಿಕೆಯಾಗಿದೆ. ಇದರಿಂದ ಗ್ರಾಹಕರಲ್ಲಿ ವಿಶ್ವಾಸ ಮೂಡಿದ್ದು, ಖರೀದಿ ಮತ್ತಷ್ಟು ಹೆಚ್ಚುವ ಸಾಧ್ಯತೆ ಇದೆ. ತೀಕ್ಷ್ಣ ಒಳನೋಟ ಹಾಗೂ 20ಕ್ಕೂ ಹೆಚ್ಚು ವಲಯಗಳ ವಿಸ್ತೃತ ಮಾಹಿತಿ ಒಳಗೊಂಡ ವಿಶೇಷ ಲೇಖನಗಳಿಗಾಗಿ ಈಗಲೇ ಸಬ್‌ಸ್ಕ್ರೈಬ್ ಆಗಿ.