ಸ್ಯಾಂಡಲ್‌ವುಡ್‌ಗೆ ಎಂಟ್ರಿ ಕೊಟ್ಟ ಅರ್ಗಸ್‌ ಎಂಟರ್‌ಟೈನ್‌ಮೆಂಟ್‌ಗೆ ಸಾಥ್‌ ನೀಡಿದ ಚಲನಚಿತ್ರ ವಾಣಿಜ್ಯ ಮಂಡಳಿ

ಸ್ಯಾಂಡಲ್‌ವುಡ್ ಸಿನಿಮಾಮಂದಿಗೆ ಅನುಕೂಲ ಮಾಡಿಕೊಡುವಂತಹ ನಿಟ್ಟಿನಲ್ಲಿ ಸಂಸ್ಥೆಯು ಕೆಲಸ ಶುರು ಮಾಡಿದೆ. ಒಂದು ಸಿನಿಮಾ ಅಂದ್ಮೇಲೆ ಅದಕ್ಕೆ ಸಾಕಷ್ಟು ಸವಲತ್ತುಗಳು ಬೇಕಾಗುತ್ತವೆ. ಮುಖ್ಯವಾಗಿ ಶೂಟಿಂಗ್ ಸಮಯದಲ್ಲೇ ಅನೇಕ ತೊಡರಗಳು ಇದ್ದೇ ಇರುತ್ತವೆ. ಅಂಥದ್ದನ್ನೆಲ್ಲ ಸರಳ ಮಾಡುವುದಕ್ಕಾಗಿ ಅರ್ಗಸ್ ಎಂಟರ್‌ಟೈನ್‌ಮೆಂಟ್ ಸಂಸ್ಥೆಯು ಸ್ಯಾಂಡಲ್‌ವುಡ್‌ಗೆ ಕಾಲಿಟ್ಟಿದೆ. ಸಿನಿಮಾ ಮೇಕಿಂಗ್ ಬೇಕಾಗುವ ಎಲ್ಲ ಅನುಕೂಲಗಳನ್ನು ಮಾಡಿಕೊಡುವ ಸಲುವಾಗಿ ಈ ಸಂಸ್ಥೆ ಕೆಲಸ ಮಾಡಲಿದೆ. ಈಚೆಗೆ ನಡೆದ ಸಂಸ್ಥೆಯ ಉದ್ಘಾಟನೆ ಸಮಾರಂಭಕ್ಕೆ ಸದಸ್ಯರು ಹಾಜರಿದ್ದು, ಸಾಥ್ ನೀಡಿದ್ದಾರೆ. ಕನ್ನಡ ಚಿತ್ರರಂಗದ ಹಿರಿಯ ನಿರ್ಮಾಪಕಕ ಮತ್ತು ಕರ್ನಾಟಕ ಚಲನಚಿತ್ರ ವಾಣಿಜ್ಯ ಮಂಡಳಿ ಮಾಜಿ ಅಧ್ಯಕ್ಷ , 'ಚಂದನವನ ಈಗ ತುಂಬಾ ಸಂಕಷ್ಟದಲ್ಲಿದೆ. ಅದರಲ್ಲೂ ವಿದೇಶದ ಲೋಕೇಷನ್‌ಗಳಲ್ಲಿ ಶೂಟಿಂಗ್ ಮಾಡುವಾಗ ಚಿತ್ರತಂಡಗಳು ಸಾಕಷ್ಟು ಅನ್ಯಾಯಕ್ಕೆ ಒಳಗಾಗುತ್ತವೆ. ಅರ್ಗಸ್ ಸಂಸ್ಥೆಯಿಂದ ಅಂಥ ಸಮಸ್ಯೆಗಳು ಸರಿಯಾಗುವುದಾದರೆ, ಆಗುವುದಾದರೆ ನಾವೆಲ್ಲ ಸೇರಿಕೊಂಡು ಚರ್ಚಿಸಬೇಕಿದೆ. ಒಂದೇ ಸೂರಿನಡಿ ಎಲ್ಲ ರೀತಿಯ ಅನುಕೂಲಗಳು ಕನ್ನಡ ಚಿತ್ರರಂಗಕ್ಕೆ ಸಿಗಲಿ ಎಂದು ನಾವು ರಾಜ್ಯ ಸರ್ಕಾರಕ್ಕೆ ಮನವಿ ಮಾಡಿದ್ದೇವೆ. ಆ ಬಗ್ಗೆ ನಮಗೆ ಇನ್ನೂ ಸಕರಾತ್ಮಕ ಸೂಚನೆ ಸಿಕ್ಕಿಲ್ಲ. ಸ್ಯಾಂಡಲ್‌ವುಡ್‌ನ ನಿರ್ಮಾಪಕರಿಗೆ ಅರ್ಗಸ್‌ನಿಂದ ಅನುಕೂಲವಾಗುವ ಹಾಗೆ ವ್ಯವಸ್ಥೆ ಮಾಡಿ. ಕನ್ನಡ ಚಿತ್ರರಂಗಕ್ಕೆ ನಿಮ್ಮ ತಂಡದಿಂದ ಒಳ್ಳೆಯದಾಗಲಿ' ಎಂದು ಹಾರೈಸಿದರು. ಮುಖ್ಯವಾಗಿ ವಿದೇಶದಲ್ಲಿ ಸಿನಿಮಾ ಶೂಟಿಂಗ್‌ಗೆ ಎದುರಾಗುವ ತೊಂದರೆಗಳನ್ನು ಬಗೆಹರಿಸುವಲ್ಲಿ ಅರ್ಗಸ್ ಮುಂದಾಗಿದೆ. ಫಾರೀನ್ ಶೂಟಿಂಗ್ ಮಾಡುವುದು ಈಗ ಅಷ್ಟು ಸುಲಭವಿಲ್ಲ. ಸ್ಟಾರ್ ನಟರ ಚಿತ್ರತಂಡ ಕೂಡ ವಿದೇಶಿ ನೆಲದಲ್ಲಿ ಶೂಟಿಂಗ್ ಮಾಡುವಾಗ ಕಿರಿಕಿರಿ ಅನುಭವಿಸಿರುವ ಘಟನೆಗಳು ಸಾಕಷ್ಟಿವೆ. ಆ ರೀತಿ ಯಾವುದೇ ಸಮಸ್ಯೆಗಳೂ ಬರದಂತೆ ಕನ್ನಡ ನಿರ್ಮಾಪಕರಿಗೆ ಸಹಾಯ ಮಾಡುವುದಾಗಿ, ಸಿನಿಮಾ ನಿರ್ಮಾಣಕ್ಕೆ ಬೇಕಾಗುವ ಎಲ್ಲ ಸೌಕರ್ಯಗಳನ್ನು ನಿರ್ಮಾಪಕರಿಗೆ ಒದಗಿಸಿಕೊಡಲು ಸಜ್ಜಾಗಿರುವುದಾಗಿ ಅರ್ಗಸ್ ಎಂಟರ್‌ಟೈನ್‌ಮೆಂಟ್ ಸಂಸ್ಥೆಯು ಹೇಳಿಕೊಂಡಿದೆ. ಉದ್ಘಾಟನಾ ಕಾರ್ಯಕ್ರಮದಲ್ಲಿ ಕರ್ನಾಟಕ‌ ಚಲನಚಿತ್ರ ವಾಣಿಜ್ಯ ಮಂಡಳಿ ಅಧ್ಯಕ್ಷ ಜೈರಾಜ್, ಹಿರಿಯ ನಿರ್ದೇಶಕ ನಾಗಣ್ಣ, ನಿರ್ಮಾಪಕರಾದ ಕೆ. ಮಂಜು, ಎನ್.ಎಂ. ಸುರೇಶ್ ಸೇರಿದಂತೆ ಕನ್ನಡ ಚಿತ್ರರಂಗದ ಅನೇಕರು ಹಾಜರಿದ್ದರು. ಇನ್ನು, ಅರ್ಗಸ್ ಎಂಟರ್‌ಟೈನ್‌ಮೆಂಟ್ ಸಂಸ್ಥೆಯನ್ನು ಸುದಿಪ್ತೋ ಚಟರ್ಜಿ ಪ್ರಾರಂಭಿಸಿದ್ದಾರೆ. ಸಹ ಸ್ಥಾಪಕರಾಗಿ ಜೈರಾಜ್ ಸಿಂಗ್ ಶೇಖಾವತ್ ಹಾಗೂ ವ್ಯವಸ್ಥಾಪಕರಾಗಿ ಖುಷಿರಾಜ್ ಸಿಂಗ್ ಶೇಖಾವತ್ ಕೆಲಸ ಮಾಡುತ್ತಿದ್ದಾರೆ.