ವಿದೇಶಿ ಹೂಡಿಕೆ ನಿಧಿಗಳನ್ನು ಸ್ಥಗಿತಗೊಳಿಸಲಾಗಿದೆ ಎಂಬ ವರದಿಗಳು ಸಂಪೂರ್ಣ ತಪ್ಪು - ಅದಾನಿ ಗ್ರೂಪ್‌
ಆದರೆ, ಅದಾನಿ ಗ್ರೂಪ್‌ನ ಸ್ಪಷ್ಟನೆಯ ಹೊರತಾಗಿಯೂ, ಮೂರು ವಿದೇಶಿ ಬಂಡವಾಳ ಹೂಡಿಕೆ ನಿಧಿಗಳ ಖಾತೆಗಳನ್ನು ಸ್ಥಗಿತಗೊಳಿಸಲಾಗಿದೆ ಎಂದು 'ಎನ್ಎಸ್ಡಿಎಲ್'ನ ದಾಖಲೆಗಳು ತೋರಿಸುತ್ತಿವೆ. ಇವು ಅದಾನಿ ಸಮೂಹದ ಕಂಪನಿಗಳಲ್ಲಿ 43,500 ಕೋಟಿ ರೂ. ಹೂಡಿಕೆ ಹೊಂದಿವೆ.
Admin
0
8
ಹೊಸದಿಲ್ಲಿ: ಅದಾನಿ ಗ್ರೂಪ್‌ನಲ್ಲಿ ಭಾರಿ ಹೂಡಿಕೆ ಹೊಂದಿರುವ ಮೂರು ವಿದೇಶಿ ಹೂಡಿಕೆ ನಿಧಿಗಳನ್ನು ನ್ಯಾಷನಲ್‌ ಸೆಕ್ಯೂರಿಟೀಸ್‌ ಡೆಪಾಸಿಟರಿ ಲಿ. () ಸ್ಥಗಿತಗೊಳಿಸಿದೆ ಎಂಬ ವರದಿಗಳ ಸಂಪೂರ್ಣ ತಪ್ಪು ಎಂದು ಕಂಪನಿ ಸ್ಪಷ್ಟನೆ ನೀಡಿದೆ.
"ಈ ವರದಿಗಳು ಸ್ಪಷ್ಟವಾಗಿ ತಪ್ಪಾಗಿವೆ ಮತ್ತು ಹೂಡಿಕೆ ಸಮುದಾಯವನ್ನು ಉದ್ದೇಶಪೂರ್ವಕವಾಗಿ ದಾರಿ ತಪ್ಪಿಸಲು ಇದನ್ನು ಮಾಡಲಾಗಿದೆ,” ಎಂದು ಆರೋಪಿಸಿದೆ. ಈ ವರದಿಗಳಿಂದ ಹೂಡಿಕೆದಾರರಿಗೆ ಹಾಗೂ ಸಂಸ್ಥೆಗೆ ಸರಿಪಡಿಸಲಾಗದ ಆರ್ಥಿಕ ನಷ್ಟ ಉಂಟಾಗಲಿದೆ ಎಂದು ಕಂಪನಿ ವಿಷಾದಿಸಿದೆ.
ಆದರೆ ಕಂಪನಿಯ ಹೇಳಿಕೆಯ ಹೊರತಾಗಿಯೂ, ಮೂರು ವಿದೇಶಿ ಬಂಡವಾಳ ಹೂಡಿಕೆದಾರರ ಖಾತೆಗಳನ್ನು ಸ್ಥಗಿತಗೊಳಿಸಲಾಗಿದೆ ಎಂದು ಎನ್ಎಸ್ಡಿಎಲ್ ದಾಖಲೆಗಳು ತೋರಿಸುತ್ತಿವೆ. ಅಲ್ಬುಲ ಇನ್ವೆಸ್ಟ್‌ಮೆಂಟ್‌, ಕ್ರೆಸ್ಟಾ ಫಂಡ್‌, ಎಪಿಎಂಎಸ್‌ ಇನ್ವೆಸ್ಟ್‌ಮೆಂಟ್‌ ಫಂಡ್‌ಗಳು ಅದಾನಿ ಗ್ರೂಪ್‌ನ ಕಂಪನಿಗಳಲ್ಲಿ ಸುಮಾರು 43,500 ಕೋಟಿ ರೂ. ಹೂಡಿಕೆ ಹೊಂದಿದ್ದು, ಇವುಗಳನ್ನು ಎನ್ಎಸ್ಡಿಎಲ್ ಸ್ಥಗಿತಗೊಳಿಸಿದೆ.
ಮೂರು ಹೂಡಿಕೆ ಕಂಪನಿಗಳು ಅದಾನಿ ಗ್ರೂಪ್‌ನ ನಾಲ್ಕು ಕಂಪನಿಗಳಲ್ಲಿ ಹೂಡಿಕೆ ಹೊಂದಿವೆ. ಅದಾನಿ ಎಂಟರ್‌ಪ್ರೈಸಸ್‌, ಅದಾನಿ ಗ್ರೀನ್‌ ಎನರ್ಜಿ, ಅದಾನಿ ಟ್ರಾನ್ಸ್‌ಮಿಷನ್‌ ಹಾಗೂ ಅದಾನಿ ಟೋಟಲ್‌ ಗ್ಯಾಸ್‌ ಮೇಲೆ ಈ ಕಂಪನಿಗಳು ಹಣ ಹೂಡಿವೆ. ಎನ್‌ಎಸ್‌ಡಿಎಲ್‌ನ ಸುದ್ದಿ ಹೊರಬಿದ್ದ ಬಳಿಕ ಈ ಕಂಪನಿಗಳ ಷೇರುಗಳ ಬೆಲೆ ಭಾರಿ ಇಳಿಕೆ ಕಂಡಿದೆ.
ಎನ್ಎಸ್ಡಿಎಲ್ ಈ ಹೂಡಿಕೆ ನಿಧಿಗಳನ್ನು ಯಾಕೆ ಸ್ಥಗಿತಗೊಳಿಸಿದೆ ಎಂಬ ವಿವರಗಳನ್ನು ನೀಡಿಲ್ಲ.
ಇನ್ನೊಂದೆಡೆ ಅಲ್ಬುಲ ಇನ್ವೆಸ್ಟ್‌ಮೆಂಟ್‌ ಫಂಡ್‌ ಕೂಡ, ತಮ್ಮ ನಿಧಿಯನ್ನು ಯಾರೂ ತಡೆ ಹಿಡಿದಿಲ್ಲ ಎಂದು ಸ್ಪಷ್ಟಪಡಿಸಿದೆ. ಫಂಡ್‌ ಭಾರತವಷ್ಟೆ ಅಲ್ಲ ವಿಶ್ವಾದ್ಯಂತ ಸಾಮಾನ್ಯದಂತೆ ಕಾರ್ಯನಿರ್ವಹಿಸುತ್ತಿದೆ ಎಂದು ಹೇಳಿದೆ. “ಖಾತೆಗಳನ್ನು ಸ್ಥಗಿತಗೊಳಿಸಲಾಗಿದೆ ಎಂಬ ವರದಿಗಳು ಸುಳ್ಳು ಮತ್ತು ತಿರುಚುವಿಕೆಯಿಂದ ಕೂಡಿದೆ” ಎಂದು ಸಂಸ್ಥೆ ಹೇಳಿದೆ.
