ಭಾರತೀಯ ಸಿನಿಮಾಗಳಲ್ಲಿಯೂ ಇದೆ ಹಾಕಿ ವೈಭವ, ಕಿಚ್ಚು! ಒಮ್ಮೆ ನೀವೂ ಆ ಚಿತ್ರಗಳನ್ನು ನೋಡಿ

ಟೋಕಿಯೋದಲ್ಲಿ ನಡೆಯುತ್ತಿರುವ ಒಲಿಂಪಿಕ್ಸ್‌ ಪಂದ್ಯದಲ್ಲಿ ಭಾರತದ ತಂಡ ಸೃಷ್ಟಿಸಿದ ಇತಿಹಾಸ ಅಂತಿಂಥದ್ದಲ್ಲ. ಪುರುಷರ ಹಾಕಿ ಟೀಮ್‌ ಮಾತ್ರವಲ್ಲದೆ, ಮಹಿಳೆಯರ ಹಾಕಿ ಟೀಮ್‌ ಕೂಡ ಈ ಕ್ರೀಡಾ ಹಬ್ಬದಲ್ಲಿ ಭಾರತೀಯರು ಹೆಮ್ಮೆ ಪಡುವಂಥ ಸಾಧನೆ ಮಾಡಿದ್ದಾರೆ. ಸದ್ಯಕ್ಕೆ ಎಲ್ಲೆಲ್ಲೂ ಹಾಕಿ ಇಂಡಿಯಾದ್ದೇ ಸದ್ದು. ಸತತ 41 ವರ್ಷಗಳ ನಂತರ ಹಾಕಿಯಲ್ಲಿ ಕಂಚಿನ ಪದಕ ಗೆದ್ದ ಭಾರತದ ಪುರುಷರ ತಂಡ, ಸೆಮಿಫೈನಲ್ಸ್‌ನಲ್ಲಿ ಅರ್ಜೆಂಟೀನಾ ವಿರುದ್ಧ ಸೋತರೂ ಎಲ್ಲರೂ ಗರ್ವ ಪಡುವಂಥ ಪ್ರದರ್ಶನ ತೋರಿದ ಭಾರತದ ಮಹಿಳಾ ಹಾಕಿ ಕ್ರೀಡಾಪಟುಗಳು ದೇಶಾದ್ಯಂತ ಈ ಕ್ರೀಡೆಯ ಕುರಿತಾದ ಅಪಾರ ಪ್ರೀತಿಯನ್ನು ಮತ್ತೆ ಜ್ವಲಂತಗೊಳಿಸಿದ್ದಾರೆ. ಹಾಕಿ ಕುರಿತಾದ ಸಿನಿಮಾಗಳು ಚಕ್‌ ದೇ ಇಂಡಿಯಾ: ಭಾರತೀಯ ಚಿತ್ರರಂಗದ ಐಕಾನಿಕ್‌ ಸಿನಿಮಾಗಳಲ್ಲಿಒಂದಾಗಿರುವ 'ಚಕ್‌ ದೇ ಇಂಡಿಯಾ' ಇಡೀ ದೇಶದಲ್ಲಿ ಹಾಕಿ ಕ್ರೀಡಾ ಸ್ಫೂರ್ತಿಯನ್ನು ಬಡಿದೆಬ್ಬಿಸಿತ್ತು. ಅದರಲ್ಲಿ ಹಾಕಿ ಸ್ಟಿಕ್‌ ಹಿಡಿದುಕೊಂಡು ಕ್ರೀಡಾಂಗಣ ತುಂಬಾ ಮಿಂಚಿನ ವೇಗದಲ್ಲಿಓಡಾಡುತ್ತಿದ್ದ ನವ ತರುಣಿಯರು, ಅವರ ಕ್ರೀಡಾ ಮನೋಭಾವ, ಅವರಲ್ಲಿ ಒಗ್ಗಟ್ಟು ಮೂಡಿಸಿ ಗೆಲುವಿಗೆ ಕಾರಣನಾಗುವ ಕೋಚ್‌ ಮುಂತಾದ ಅಂಶಗಳು ಈ ಸಿನಿಮಾವನ್ನು ಸೂಪರ್‌ಹಿಟ್‌ ಆಗಿಸಿದ್ದವು. 2017ರಲ್ಲಿ ಬಿಡುಗಡೆಯಾದ ಈ ಸಿನಿಮಾದಲ್ಲಿ ಶಾರುಖ್‌ ಖಾನ್‌ ಅವರು ಮಹಿಳಾ ಹಾಕಿ ಟೀಮ್‌ನ ಕೋಚ್‌ ಪಾತ್ರದಲ್ಲಿ ಹೃದಯಸ್ಪರ್ಶಿ ಅಭಿನಯ ನೀಡಿದರೆ, ಸಾಗರಿಕಾ ಘಾಟ್ಗೆ, ವಿದ್ಯಾ ಮಲ್ವಾಡೆ ಮುಂತಾದ ನವ ನಟಿಯರು ಆಮೇಲೆ ವಿವಿಧ ಸಿನಿಮಾಗಳಲ್ಲಿ ಅವಕಾಶ ಪಡೆದರು. ರಾಷ್ಟ್ರಪ್ರಶಸ್ತಿ ಸೇರಿದಂತೆ ಅನೇಕ ಪ್ರಶಸ್ತಿಗಳನ್ನು ತನ್ನದಾಗಿಸಿ ಕೊಂಡಿರುವ ಈ ಸಿನಿಮಾದ ಜನಪ್ರಿಯ 'ಚಕ್‌ ದೇ ಇಂಡಿಯಾ...' ಹಾಡು ಈಗಲೂ ದೇಶಪ್ರೇಮದ ಕಿಚ್ಚು ಹತ್ತಿಸುತ್ತದೆ. ಗೋಲ್ಡ್‌: ಬಾಲಿವುಡ್‌ನ ಅಕ್ಷಯ್‌ ಕುಮಾರ್‌ ನಟನೆಯ 'ಗೋಲ್ಡ್‌' ಸಿನಿಮಾದಲ್ಲಿ 1948ರಲ್ಲಿ ಭಾರತದ ಹಾಕಿ ತಂಡವು ಒಲಿಂಪಿಕ್ಸ್‌ನಲ್ಲಿ ಚಿನ್ನದ ಪದಕ ಗೆದ್ದ ಐತಿಹಾಸಿಕ ಕಥೆಯಿದೆ. ದೇಶದ ಪ್ರಥಮ ಹಾಕಿ ತಂಡವು ವಿಜಯದೆಡೆಗೆ ಬೆಳೆಸಿದ ದುರ್ಗಮ ಪಯಣ, ನಾಯಕ ತಪನ್‌ ದಾಸ್‌ ಅವರ ಸಮರ್ಥ ನಾಯಕತ್ವ ಇತ್ಯಾದಿಗಳನ್ನು ಈ ಸಿನಿಮಾ ಪರಿಣಾಮಕಾರಿಯಾಗಿ ತೆರೆದಿಟ್ಟಿತ್ತು. ಸೂರ್ಮ: ದಲ್ಜಿತ್‌ ದೊಸಾಂಜ್‌ ಅಭಿನಯದ ಈ ಬಾಲಿವುಡ್‌ ಸಿನಿಮಾದಲ್ಲಿಹಾಕಿ ಆಟಗಾರ ಸಂದೀಪ್‌ ಸಿಂಗ್‌ ಅವರ ಜೀವನ ಕಥೆಯಿದೆ. ಇದ್ದಕ್ಕಿದ್ದಂತೆ ಪಾಶ್ರ್ವ ವಾಯು ಪೀಡಿತರಾಗಿ ವೀಲ್‌ಚೇರ್‌ನಲ್ಲಿರುವ ಅವರು ಎಲ್ಲಾಸಂಕಷ್ಟಗಳನ್ನು ಎದುರಿಸಿ ಮತ್ತೆ ಹಾಕಿ ಆಡುವ ಮತ್ತು ತಮ್ಮ ನಾಯಕತ್ವದಲ್ಲಿಕೆಲವು ಪ್ರಮುಖ ಪಂದ್ಯಗಳನ್ನು ಜಯಿಸಿದ ಚಿತ್ರಣವಿದೆ. ಇದೇ ರೀತಿ ಕಾಲಿವುಡ್‌ನಲ್ಲಿ2017ರಲ್ಲಿ ಬಿಡುಗಡೆಯಾಗಿರುವ 'ಆಕ್ಕಿ' ಸಿನಿಮಾವೂ ಹಾಕಿ ಕ್ರೀಡೆ ಆಧರಿತವಾಗಿದೆ.