ಬೆಲೆ ಏರಿಕೆ ನಡುವೆ ಬಂದ ದೀಪಾವಳಿ: ಸಶಕ್ತರಾಗಿಲ್ಲದಿದ್ದರೂ ಸಿದ್ಧತೆ ನಡೆಸಿರುವ ಜನತೆ!

ಬಾಲವೆಂಕಟೇಶ್‌ ಕೆಜಿಎಫ್‌ ಕೊರೊನಾ ಮತ್ತು ನಡುವೆ ಬಡವರು ಮತ್ತು ಮಧ್ಯಮ ವರ್ಗದ ಜನರು ಬದುಕು ತತ್ತರಗೊಂಡಿದೆ. ಹಾಗಾಗಿ ಹಿಂದಿನಂತೆ ಈಗ ಹಬ್ಬಗಳನ್ನು ಆಚರಿಸುವಷ್ಟು ಅವರು ಸಶಕ್ತರಾಗಿಲ್ಲ. ಆದರೂ, ಸಾಂಪ್ರದಾಯಿಕವಾಗಿ ಆಚರಿಸಿಕೊಂಡು ಬರುತ್ತಿರುವ ಹಬ್ಬಗಳನ್ನು ದುಬಾರಿಯಾದರೂ ಆಚರಣೆ ಮಾಡಲು ಸಿದ್ಧತೆಗಳನ್ನು ನಡೆಸುತ್ತಿದ್ದಾರೆ. ಅಗತ್ಯ ವಸ್ತುಗಳ ಬೆಲೆ ಗಗನಕ್ಕೆ: ಡೀಸೆಲ್‌-ಪೆಟ್ರೋಲ್‌ ಬೆಲೆ ಏರಿಕೆಯಿಂದ ಅಗತ್ಯ ವಸ್ತುಗಳ ಸಾಗಣೆ ವೆಚ್ಚ ಶೇ.25ರಿಂದ 30ರಷ್ಟು ಹೆಚ್ಚಳಗೊಂಡಿದೆ. ಹೊರ ರಾಜ್ಯಗಳಿಂದ ಅಕ್ಕಿ ಮಾತ್ರವೇ ಅಲ್ಲ ನೆರೆಯ ಆಂಧ್ರಪ್ರದೇಶದಿಂದ ಮೋಸಂಬಿ, ಹೂವು, ಅಗತ್ಯ ಇರುವಷ್ಟು ಬಂದಿಲ್ಲ. ಪ್ರಮುಖವಾಗಿ ಮಳೆಯೂ ಒಂದು ಕಾರಣ. ಹೀಗಾಗಿ ಬೆಲೆಯಲ್ಲಿ ಹೆಚ್ಚಳವಾಗಿದೆ. ಹಣತೆಗಳ ಮೆರುಗು: ಹಬ್ಬದ ಸಂದರ್ಭದಲ್ಲಿ ಹಣತೆಗಳಿಗೆ ಮಹತ್ವ. ಮನೆ ಮನೆಯಲ್ಲೂ ಪ್ರತಿ ದಿನ ರಾತ್ರಿ ಮಹಿಳೆಯರು ಹಣತೆಗಳನ್ನು ಬೆಳಗಿಸಿ ಹಬ್ಬವನ್ನು ಆಚರಿಸುತ್ತಾರೆ. ಹಾಗಾಗಿ ದೀಪಾವಳಿ ಸಮಯದಲ್ಲಿ ಹಣತೆಗಳಿಗೆ ಹೆಚ್ಚಿನ ಬೇಡಿಕೆ. ಹಬ್ಬ ಆರಂಭಕ್ಕೂ ಮುನ್ನಾ ದಿನ ಮಣ್ಣಿನಿಂದ ಮಾಡಿದ ಹಣತೆ, ಪಿಂಗಾಣಿ ಹಣತೆಗಳು ಮಾರುಕಟ್ಟೆಗೆ ಲಗ್ಗೆ ಇಡುತ್ತವೆ. ಇತ್ತೀಚಿನ ವರ್ಷಗಳಲ್ಲಿ ಮಣ್ಣಿನಿಂದ ಮಾಡಿದ ಹಣತೆಗಳ ಭರಾಟೆಯೇ ಜೋರಾಗಿದೆ. ಹಸಿರು ಪಟಾಕಿಗೆ ಮಳೆಯ ಅತಂಕ: ಈ ಮಧ್ಯೆ ನಗರಸಭೆ ಮೈದಾನದ ಬಳಿ ಪಟಾಕಿ ಮಳಿಗೆಗಳನ್ನು ಹಾಕಲು ನಗರಸಭೆ ಅನುಮತಿ ನೀಡಿದ್ದು, ಸದ್ಯ 7 ಮಳಿಗೆಗಳು ಇವೆ. ಈ ಬಾರಿಯೂ ಹಸಿರು ಪಟಾಕಿಗಳ ಮಾರಾಟಕ್ಕೆ ಮಾತ್ರ ಅವಕಾಶ ನೀಡಲಾಗಿದ್ದು, ವ್ಯಾಪಾರಿಗಳು ಹಸಿರು ಪಟಾಕಿಗಳ ಸಂಗ್ರಹವನ್ನೇ ಇಟ್ಟುಕೊಂಡಿದ್ದಾರೆ. ಪಟಾಕಿ ಬೆಲೆಯೂ ದುಬಾರಿಯಾಗಿದ್ದು, ಗ್ರಾಹಕರ ಜೇಬಿಗೆ ಕತ್ತರಿ ಬೀಳಲಿದೆ. ಕಳೆದ ವರ್ಷಕ್ಕೆ ಹೋಲಿಸಿದರೆ, ಈ ಬಾರಿ ಪಟಾಕಿ ದರ ಶೇ.30ರಷ್ಟು ಹೆಚ್ಚಾಗಿದೆ ಎಂದು ಪಟಾಕಿ ವ್ಯಾಪಾರಿ ಮುರಳಿ ಹೇಳಿದರು. ಹಸಿರು ಪಟಾಕಿ ಬಳಕೆಗಷ್ಟೇ ಅವಕಾಶ ನೀಡಲಾಗಿದೆ. ನಮ್ಮಲ್ಲಿ ಪರಿಸರ ಸ್ನೇಹಿ ಪಟಾಕಿ ತಯಾರಿಸುವ ಶಿವಕಾಶಿಯಲ್ಲಿ ಹಸಿರು ಪಟಾಕಿ ಮಾತ್ರ ತಯಾರಿಸಲಾಗುತ್ತಿದೆ. ಎಲ್ಲ ರೀತಿಯ ಪಟಾಕಿಗಳೂ ಲಭ್ಯವಿದೆ. ಬೆಲೆ ಸ್ವಲ್ಪ ಹೆಚ್ಚಾಗಿದೆ ಎಂದು ಪಟಾಕಿ ವ್ಯಾಪಾರಿ ಸುರೇಶ್‌ ತಿಳಿಸಿದರು. ಹೂವಿನ ದರ ಗಗನಕ್ಕೆ: ಮಲ್ಲಿಗೆ ಕೆಜಿಗೆ ₹1200, ಕನಕಾಂಬರ ಕೆಜಿಗೆ ₹1200ರಿಂದ ₹1400, ಕಾಕಡ ₹400 ರಿಂದ ₹500, ಗುಲಾಬಿ ₹150 ರಿಂದ ₹200, ಸೇವಂತಿಗೆ ₹80 ರಿಂದ ₹100, ಸುಂಗಧರಾಜ ₹80ರಿಂದ ₹100, ಚೆಂಡು ಹೂ, ₹40 ರಿಂದ ₹50. ಹಣ್ಣುಗಳ ದರ: ಸೇಬು ₹120ರಿಂದ ₹140 ರೂ., ದಾಳಿಂಬೆ ₹150ರಿಂದ ₹180 ರೂ., ಕಿತ್ತಳೆ ₹50ರಿಂದ ₹60ರೂ., ದ್ರಾಕ್ಷಿ ₹50ರಿಂದ ₹60 ರೂ., ಸಪೋಟ ₹30ರಿಂದ ₹40 ರೂ., ಮೂಸಂಬಿ ₹70ರಿಂದ ₹80 ರೂ., ಏಲಕ್ಕಿ ಬಾಳೆ ₹45ರಿಂದ ₹60 ರೂ., ತರಕಾರಿ ಬೆಲೆಗಳು: ಬಟಾಣಿ ₹180ರಿಂದ ₹220, ಟೊಮೇಟೊ ₹50ರಿಂದ ₹70, ಕ್ಯಾರೆಟ್‌ ₹50ರಿಂದ ₹65, ಶುಂಠಿ ₹60ರಿಂದ ₹70, ಬೀನ್ಸ್‌ ₹40ರಿಂದ ₹50, ಈರುಳ್ಳಿ ₹40ರಿಂದ ₹50, ಬದನೆ ₹40ರಿಂದ ₹50, ಮೆಣಸಿನಕಾಯಿ ₹40ರಿಂದ ₹60, ಬೆಂಡೆಕಾಯಿ ₹30ರಿಂದ ₹40, ಹೂಕೋಸು ₹50ರಿಂದ ₹65, ಆಲೂಗಡ್ಡೆ ₹30ರಿಂದ ₹45, ಮೂಲಂಗಿ ₹30ರಿಂದ ₹35, ಎಲೆಕೋಸು ₹20ರಿಂದ ₹30. ಸೊಪ್ಪು ದುಬಾರಿ: ಮೆಂತ್ಯೆ ಒಂದು ಕಟ್ಟಿಗೆ 35-40, ಕೊತ್ತಂಬರಿ 40ರಿಂದ 50, ಸಬ್ಬಕ್ಕಿ 30, ಪಾಲಕ್‌ 25ರಿಂದ 30, ದಂಟು 20ರಿಂದ 25ಕ್ಕೆ ನಗರದ ಎಂ.ಜಿ.ಮಾರುಕಟ್ಟೆಯಲ್ಲಿ ಮಾರಾಟವಾಗುತ್ತಿತ್ತು.