ಬಫರ್‌ಝೋನ್‌ ಸೈಟ್‌ ಕಂಟಕ ನಿವಾರಣೆ; 2007ಕ್ಕೆ ಮುನ್ನ ಬಿಡಿಎ ನಿವೇಶನ ಖರೀದಿಸಿದವರಿಗೆ ವಿನಾಯಿತಿ?!
2007ಕ್ಕೂ ಮೊದಲು ಬಿಡಿಎಯಿಂದ ನಿವೇಶನ ಖರೀದಿಸಿದವರನ್ನು ಬಫರ್‌ ಝೋನ್‌ ವಲಯದಿಂದ ಹೊರತುಪಡಿಸಿ ಆದೇಶ ನೀಡುವಂತೆ ಸರಕಾರಕ್ಕೆ ಪತ್ರ ಬರೆಯಲಾಗಿದೆ. ಎನ್‌ಜಿಟಿ ರಚನೆಯಾಗಿದ್ದು, ಸುಪ್ರೀಂಕೋರ್ಟ್‌ ಆದೇಶ ನೀಡಿರುವುದು 2016-17ರಲ್ಲಿ. ಹೀಗಾಗಿ ಹಳೆಯ ನಿವೇಶನದಾರರನ್ನು ಇದರ ವ್ಯಾಪ್ತಿಗೆ ತರುವುದು ಬೇಡ. ಆರ್‌ಎಂಪಿ-2015 (ರಿವೈಸ್ಡ್‌ ಮಾಸ್ಟರ್‌ ಪ್ಲಾನ್‌ 2015)ರ ವಲಯ ನಿಯಮಾವಳಿಯಂತೆ ಅನುಮತಿ ನೀಡಬೇಕು ಎಂದು ಸರಕಾರಕ್ಕೆ ಪತ್ರ ಬರೆಯಲಾಗಿದೆ,'' ಎಂದು ಬಿಡಿಎ ಅಧ್ಯಕ್ಷ ಎಸ್‌.ಆರ್‌. ವಿಶ್ವನಾಥ್‌ ಹೇಳಿದ್ದಾರೆ.
Admin
0
7
ಎಚ್‌.ಪಿ. ಪುಣ್ಯವತಿ, ಬೆಂಗಳೂರು ಅಭಿವೃದ್ಧಿ ಪ್ರಾಧಿಕಾರ () ನಿರ್ಮಿಸಿರುವ ನಾನಾ ಬಡಾವಣೆಗಳಲ್ಲಿ ಕೆರೆ ಪಕ್ಕದಲ್ಲೋ ಅಥವಾ ರಾಜಕಾಲುವೆ ಪಕ್ಕದಲ್ಲಿ ನಿವೇಶನ ಖರೀದಿಸಿದ ಗ್ರಾಹಕರಿಗೆ ಒಂದು ಸಂತಸದ ಸುದ್ದಿಯಿದೆ!
2007ಕ್ಕೂ ಮೊದಲು ಬಿಡಿಎಯಿಂದ ನಿವೇಶನ ಖರೀದಿಸಿದವರನ್ನು ಬಫರ್‌ ಝೋನ್‌ ವಲಯದಿಂದ ಹೊರತುಪಡಿಸುವಂತೆ ಬೆಂಗಳೂರು ಅಭಿವೃದ್ಧಿ ಪ್ರಾಧಿಕಾರವು ಸರಕಾರಕ್ಕೆ ಪತ್ರ ಬರೆದಿದೆ. ಸರಕಾರ ಒಪ್ಪಿಗೆ ನೀಡಿದರೆ ಸಾವಿರಾರು ನಿವೇಶನದಾರರಿಗೆ ಕಟ್ಟಡ ಕಟ್ಟಲು ಅನುಕೂಲವಾಗಲಿದೆ.
ಬಿಡಿಎ ನಗರದಾದ್ಯಂತ 64 ಬಡಾವಣೆಗಳನ್ನು ನಿರ್ಮಿಸಿದೆ. ಈ ಬಡಾವಣೆಗಳಲ್ಲಿ ಹಾದು ಹೋಗಿರುವ ಕೆರೆ, ರಾಜಕಾಲುವೆಯ ಜಾಗದ ಬಫರ್‌ ಝೋನ್‌ ಮಿತಿಯನ್ನೂ ಮೀರಿ ಅದರಲ್ಲೂ ನಿವೇಶನಗಳನ್ನು ಮಾಡಿ ಗ್ರಾಹಕರಿಗೆ ಮಾರಾಟ ಮಾಡಲಾಗಿತ್ತು. ಇದನ್ನು ಪ್ರಶ್ನಿಸಿ 5 ವರ್ಷದ ಹಿಂದೆ ಸಲ್ಲಿಕೆಯಾದ ಅರ್ಜಿಯೊಂದರ ವಿಚಾರಣೆ ಬಳಿಕ ಈ ಜಾಗದಲ್ಲಿ ಕಟ್ಟಡ ನಿರ್ಮಾಣಕ್ಕೆ ಮಂಜೂರಾತಿ ನೀಡಬಾರದು ಎಂಬ ಆದೇಶ ನ್ಯಾಯಾಲಯದಿಂದ ಹೊರಬಿದ್ದಿತ್ತು.
ಹೀಗಾಗಿ ಬಿಬಿಎಂಪಿಯಿಂದ ಕಟ್ಟಡ ನಿರ್ಮಾಣಕ್ಕೆ ಅನುಮತಿ ಸಿಗುತ್ತಿರಲಿಲ್ಲ. ಈ ಹಿನ್ನೆಲೆಯಲ್ಲಿ ಬಿಡಿಎ, ನ್ಯಾಯಾಲಯದ ಆದೇಶಕ್ಕೂ ಮೊದಲೇ ಹಂಚಿಕೆ ಮಾಡಿರುವ ನಿವೇಶನಗಳಿಗೆ ಬಫರ್‌ ಝೋನ್‌ ಎಂದು ಪ್ರಸ್ತಾಪಿಸದೆ ವಲಯ ನಿಯಮಾವಳಿಯಂತೆ ಕಟ್ಟಡ ನಕ್ಷೆಗಳನ್ನು ಅನುಮೋದಿಸಿ ಕ್ರಮ ಕೈಗೊಳ್ಳುವಂತೆ ಆಡಳಿತ ಮಂಡಳಿಯಲ್ಲಿ ಚರ್ಚಿಸಿ, ಸರಕಾರಕ್ಕೆ ಪತ್ರ ಬರೆದಿದೆ.
ಬಫರ್‌ ಮಿತಿ ತಂದಿಟ್ಟ ಸಂಕಷ್ಟರಾಷ್ಟ್ರೀಯ ಹಸಿರು ನ್ಯಾಯಾಧೀಕರಣ(ಎನ್‌ಜಿಟಿ)ದ 2016ರ ಮೇ ತಿಂಗಳ ಆದೇಶದಂತೆ ಕೆರೆ ಅಂಚಿನಿಂದ ಬಫರ್‌ ವಲಯದ ಮಿತಿಯನ್ನು 30 ಮೀಟರ್‌ ಇದ್ದುದನ್ನು 70 ಮೀಟರ್‌ಗೆ ಹೆಚ್ಚಿಸಲಾಗಿದೆ. ಇದರಿಂದಾಗಿ ಹಳೆಯ ಬಫರ್‌ ಮಿತಿಯ ಆಚೆ ರಚಿಸಿದ್ದ ಸೈಟ್‌ಗಳಲ್ಲಿ ವಾಸದ ಕಟ್ಟಡಗಳನ್ನು ನಿರ್ಮಿಸುವ ಕುರಿತು ಸಾರ್ವಜನಿಕರು ಸಂದಿಗ್ಧತೆಯಲ್ಲಿ ಸಿಲುಕಿದ್ದಾರೆ. ಹೀಗಾಗಿ, ಖರೀದಿದಾರರು ಲಕ್ಷಾಂತರ ರೂ. ಹಣ ಕೊಟ್ಟು ಖರೀದಿಸಿದ ನಿವೇಶನದಲ್ಲಿ ಮನೆಯನ್ನೂ ಕಟ್ಟಲಾಗದೆ, ಇತರರಿಗೆ ಮಾರಲೂ ಆಗದೆ ಸಂಕಷ್ಟಕ್ಕೆ ಸಿಲುಕಿದ್ದಾರೆ.
ಬೆಂಗಳೂರಿನ ಕೆರೆಗಳ ಒತ್ತುವರಿ ತನಿಖೆಗೆ ರಚನೆಯಾಗಿದ್ದ ಕೆ.ಬಿ.ಕೋಳಿವಾಡ ನೇತೃತ್ವದ ಸದನ ಸಮಿತಿ ಕೂಡ ಬಫರ್‌ ವಲಯದೊಳಗೆ ಬರುವ ಜಾಗದಲ್ಲಿ ಯಾವುದೇ ಕಟ್ಟಡಗಳನ್ನು ನಿರ್ಮಿಸದಂತೆ ನಿಬಂರ್ಧಿಸಿತ್ತು. ಇದೀಗ ಸದನ ಸಮಿತಿಯು ತನ್ನ ಸೂಚನೆಯನ್ನು ಹಿಂದಕ್ಕೆ ಪಡೆದಿದ್ದರೂ, ನಿವೇಶನದದಾರರ ಗೊಂದಲ ಮುಂದುವರಿದಿತ್ತು.
25 ಸಾವಿರ ನಿವೇಶನದಾರರು ಅತಂತ್ರರಾಗುವ ಆತಂಕ
''2007ಕ್ಕೂ ಮೊದಲು ಬಿಡಿಎಯಿಂದ ನಿವೇಶನ ಖರೀದಿಸಿದವರು ಇದೀಗ ಮನೆ ಕೆಡವಿ ಹೊಸದಾಗಿ ನಿರ್ಮಿಸಬೇಕೆಂದರೆ ಅದಕ್ಕೆ ಬಿಬಿಎಂಪಿಯಿಂದ ಅನುಮತಿ ಸಿಗುತ್ತಿಲ್ಲ. ಇದೀಗ ಸದಾಶಿವನಗರದಲ್ಲಿ ಸ್ಯಾಂಕಿ ಟ್ಯಾಂಕ್‌ ಪಕ್ಕದಲ್ಲೇ ಮನೆಗಳು ನಿರ್ಮಾಣವಾಗಿವೆ. ಅವು ಕೂಡ ಬಫರ್‌ ಝೋನ್‌ಗೆ ಬರುತ್ತವೆ ಎಂದರೆ ಅದನ್ನು ಒಪ್ಪುವುದು ಹೇಗೆ ? ಬಿಡಿಎ, ಕೆಎಚ್‌ಬಿ ಮತ್ತಿತರ ಅನುಮೋದಿತ ಲೇಔಟ್‌ಗಳು ಬೆಂಗಳೂರಿನಲ್ಲಿ ಸಾಕಷ್ಟಿವೆ. ಇದೆಲ್ಲವನ್ನೂ ಇದರ ವ್ಯಾಪ್ತಿಗೆ ತಂದರೆ ಬೆಂಗಳೂರಿನಲ್ಲಿ ಸುಮಾರು 25 ಸಾವಿರ ನಿವೇಶನದಾರರು ಮನೆಗಳನ್ನು ನಿರ್ಮಿಸುವುದಕ್ಕೇ ಬರುವುದಿಲ್ಲ.
ಹೀಗಾಗಿ 2007ಕ್ಕೂ ಮೊದಲು ಬಿಡಿಎಯಿಂದ ನಿವೇಶನ ಖರೀದಿಸಿದವರನ್ನು ಬಫರ್‌ ಝೋನ್‌ ವಲಯದಿಂದ ಹೊರತುಪಡಿಸಿ ಆದೇಶ ನೀಡುವಂತೆ ಸರಕಾರಕ್ಕೆ ಪತ್ರ ಬರೆಯಲಾಗಿದೆ. ಎನ್‌ಜಿಟಿ ರಚನೆಯಾಗಿದ್ದು, ಸುಪ್ರೀಂಕೋರ್ಟ್‌ ಆದೇಶ ನೀಡಿರುವುದು 2016-17ರಲ್ಲಿ. ಹೀಗಾಗಿ ಹಳೆಯ ನಿವೇಶನದಾರರನ್ನು ಇದರ ವ್ಯಾಪ್ತಿಗೆ ತರುವುದು ಬೇಡ. ಆರ್‌ಎಂಪಿ-2015 (ರಿವೈಸ್ಡ್‌ ಮಾಸ್ಟರ್‌ ಪ್ಲಾನ್‌ 2015)ರ ವಲಯ ನಿಯಮಾವಳಿಯಂತೆ ಅನುಮತಿ ನೀಡಬೇಕು ಎಂದು ಸರಕಾರಕ್ಕೆ ಪತ್ರ ಬರೆಯಲಾಗಿದೆ,'' ಎಂದು ಬಿಡಿಎ ಅಧ್ಯಕ್ಷ ಎಸ್‌.ಆರ್‌. ವಿಶ್ವನಾಥ್‌ ತಿಳಿಸಿದರು.
2007ಕ್ಕೂ ಮೊದಲು ನಿವೇಶನ ಖರೀದಿಸಿದವರನ್ನು ಬಫರ್‌ ಝೋನ್‌ನಿಂದ ಹೊರತುಪಡಿಸುವುದು ಮಾತ್ರವಲ್ಲದೆ, ತದ ನಂತರ ಖರೀದಿಸಿದ ನಿವೇಶನದಾರರಿಗೂ ಇದು ಅನ್ವಯವಾಗುವಂತೆ ಸರಕಾರ ಆದೇಶ ನೀಡಬೇಕು. ಏಕೆಂದರೆ ಬಿಡಿಎಯಿಂದ ನಿವೇಶನ ಖರೀದಿಸುವುದು ಹಲವರ ಕನಸು. ಬಿಡಿಎಯಿಂದ ಖರೀದಿಸಿದರೆ ಯಾವುದೇ ಮೋಸ ಇರುವುದಿಲ್ಲ. ಎಲ್ಲಾ ಸೌಲಭ್ಯಗಳೂ ಸಿಗುತ್ತವೆ ಎಂಬ ಕಾರಣದಿಂದ ಖರೀದಿಸಿರುತ್ತಾರೆ. ಈಗಾಗಲೇ ಬಫರ್‌ ಝೋನ್‌ನಲ್ಲಿ ನಿವೇಶನ ಖರೀದಿಸಿರುವ ಎಲ್ಲರಿಗೂ ನಿಯಮಾವಳಿ ಪ್ರಕಾರ ಅನುಮೋದನೆ ನೀಡಬೇಕು.
ಸಾಯಿ ದತ್ತ, ಸಾಮಾಜಿಕ ಕಾರ್ಯಕರ್ತರು
