ಹೊಸ ಫೋಟೋ ಹಂಚಿಕೊಂಡ 'ನ್ಯಾಷನಲ್ ಕ್ರಶ್' ರಶ್ಮಿಕಾ ಮಂದಣ್ಣ; ಅದಕ್ಕೊಂದು ಕಾರಣ ಇದೆ!

'ನ್ಯಾಷನಲ್ ಕ್ರಶ್‌' ಈಗ ಸಖತ್ ಬ್ಯುಸಿ. ತಮಿಳು, ತೆಲುಗು, ಹಿಂದಿ ಅಂತ ಸಿನಿಮಾಗಳ ಮೇಲೆ ಸಿನಿಮಾ ಮಾಡ್ಕೊಂಡು ಮುಂಬೈ ಟು ಹೈದರಬಾದ್ ಅಂತ ಓಡಾಡ್ಕೊಂಡಿದ್ದಾರೆ. ಸಿನಿಮಾಗಳಲ್ಲಿ ದಾಖಲೆಗಳನ್ನು ಮಾಡುವುದು ಮಾತ್ರವಲ್ಲ, ಅದರಾಚೆಗೂ ರಶ್ಮಿಕಾ ಹೊಸ ಹೊಸ ದಾಖಲೆ ಬರೆಯುತ್ತಿದ್ದಾರೆ. ಸದ್ಯ ಇನ್‌ಸ್ಟಾಗ್ರಾಮ್‌ನಲ್ಲಿ ಒಂದು ಫೋಟೋವನ್ನು ರಶ್ಮಿಕಾ ಹಂಚಿಕೊಂಡಿದ್ದಾರೆ. ಆ ಬ್ಯೂಟಿಫುಲ್ ಫೋಟೋವನ್ನು ಹಂಚಿಕೊಳ್ಳುವುದರ ಜೊತೆಗೆ ಒಂದು ಹೊಸ ವಿಷಯವನ್ನು ಹೇಳಿದ್ದಾರೆ ರಶ್ಮಿಕಾ. ರಶ್ಮಿಕಾಗೆ 2 ಕೋಟಿ ಬೆಂಬಲಿಗರು ಹೌದು, ರಶ್ಮಿಕಾಗೆ ಇನ್‌ಸ್ಟಾಗ್ರಾಮ್‌ನಲ್ಲಿ ಬರೋಬ್ಬರಿ 2 ಕೋಟಿ ಬೆಂಬಲಿಗರು ಆಗಿದ್ದಾರೆ. ಈ ವಿಚಾರವನ್ನು ಹೊಸ ಫೋಟೋವೊಂದನ್ನು ಅಪ್ಲೋಡ್ ಮಾಡುವ ಮೂಲಕ ಹಂಚಿಕೊಂಡಿದ್ದಾರೆ ರಶ್ಮಿಕಾ. ಅಂದಹಾಗೆ, ಈ ಸಂಭ್ರಮಕ್ಕೆ ಸೆಲೆಬ್ರಿಟಿಗಳು ವಿಶ್ ಮಾಡಿದ್ದಾರೆ. ಕೀರ್ತಿ ಸುರೇಶ್, ಎಲೀ ಅವ್‌ರಾಮ್‌, ಆಶಿಕಾ ರಂಗನಾಥ್, ಸಂಯುಕ್ತಾ ಹೊರನಾಡು ಸೇರಿದಂತೆ ಅನೇಕರು ಅವರಿಗೆ ಶುಭಾಶಯ ತಿಳಿಸಿದ್ದಾರೆ. ದಕ್ಷಿಣ ಭಾರತದ ನಂಬರ್ 1 ತಾರೆ ರಶ್ಮಿಕಾ ಅಂದಹಾಗೆ, ಇನ್‌ಸ್ಟಾಗ್ರಾಮ್‌ನಲ್ಲಿ ಅತೀ ಹೆಚ್ಚು ಫಾಲೋವರ್ಸ್ ಹೊಂದಿರುವ ನಟಿಯರಲ್ಲಿ ರಶ್ಮಿಕಾ ಮೊದಲ ಸ್ಥಾನದಲ್ಲಿದ್ದಾರೆ. ನಂತರದ ಸ್ಥಾನ ಕಾಜಲ್ ಅಗರ್ವಾಲ್‌ಗೆ ಸಿಕ್ಕಿದೆ. ಅವರಿಗೆ 19.3 ಮಿಲಿಯನ್ ಫಾಲೋವರ್ಸ್ ಇದ್ದಾರೆ. ರಶ್ಮಿಕಾಗಿಂತ ಮೊದಲು, ನಂಬರ್ 1 ಪಟ್ಟದಲ್ಲಿ ಕಾಜಲ್‌ ಇದ್ದರು. ಕೆಲ ದಿನಗಳ ಹಿಂದಷ್ಟೇ ರಶ್ಮಿಕಾಗೆ 19.4 ಮಿಲಿಯನ್‌ ಫಾಲೋವರ್ಸ್ ಇದ್ದರು. ಈಗ ಅದು 20 ಮಿಲಿಯನ್ (2 ಕೋಟಿ) ಮುಟ್ಟಿದೆ. ಇನ್ನು, ನಟಿ ಸಮಂತಾ ಅಕ್ಕಿನೇನಿ ಇನ್‌ಸ್ಟಾಗ್ರಾಮ್‌ನಲ್ಲಿ 1.75 ಕೋಟಿ ಬೆಂಬಲಿಗರನ್ನು ಹೊಂದಿದ್ದಾರೆ. ಕಿಯಾರಾ ಅಡ್ವಾಣಿಗೆ 1.77 ಕೋಟಿ, ವಿಜಯ್‌ ದೇವರಕೊಂಡಗೆ 12.5 ಕೋಟಿ ಬೆಂಬಲಿಗರು ಇನ್‌ಸ್ಟಾಗ್ರಾಮ್‌ನಲ್ಲಿ ಇದ್ದಾರೆ. ಇನ್ನು, ಅಲ್ಲು ಅರ್ಜುನ್ ನಟನೆಯ 'ಪುಷ್ಪ' ಸಿನಿಮಾದಲ್ಲಿ ರಶ್ಮಿಕಾ ನಟಿಸುತ್ತಿದ್ದಾರೆ. ಲಾಕ್‌ಡೌನ್‌ನಿಂದಾಗಿ ಶೂಟಿಂಗ್ ನಿಂತುಹೋಗಿತ್ತು. ಇದೀಗ ಪುನಃ ಶೂಟಿಂಗ್ ಶುರುವಾಗಿದೆ. ಆಗಸ್ಟ್ 13ರಂದು ಈ ಸಿನಿಮಾದ ಮೊದಲ ಹಾಡು ರಿಲೀಸ್ ಆಗಲಿದೆ. ಜೊತೆಗೆ ಬಾಲಿವುಡ್‌ನ 'ಮಿಷನ್‌ ಮಜ್ನು' ಮತ್ತು ಅಮಿತಾಭ್ ಬಚ್ಚನ್ ಅವರ 'ಗುಡ್‌ಬೈ' ಸಿನಿಮಾಗಳಲ್ಲೂ ರಶ್ಮಿಕಾ ಮಂದಣ್ಣ ಬ್ಯುಸಿ ಆಗಿದ್ದಾರೆ. ಈಚೆಗಷ್ಟೇ ತೆಲುಗಿನಲ್ಲಿ ಅವರ 'ಆಡವಾಳ್ಳು ಮೀಕು ಜೋಹಾರ್ಲು' ಎಂಬ ಹೊಸ ಸಿನಿಮಾವನ್ನು ಒಪ್ಪಿಕೊಂಡಿದ್ದಾರೆ.