ಪಿಎಫ್‌ ಠೇವಣಿಗಳಿಗೆ 2020-21ರಲ್ಲಿ ಶೇ.8.5 ಬಡ್ಡಿಗೆ ಅನುಮೋದನೆ, 6 ಕೋಟಿ ಜನರಿಗೆ ಅನುಕೂಲ
ಹಣಕಾಸು ಸಚಿವಾಲಯವು 2020 - 21ರ ಸಾಲಿನಲ್ಲಿ ಉದ್ಯೋಗಿಗಳ ಭವಿಷ್ಯ ನಿಧಿ ಠೇವಣಿಗೆ ಶೇ. 8.5 ಬಡ್ಡಿ ನೀಡಲು ಅನುಮೋದಿಸಿದೆ. ಇದರಿಂದ ದೇಶದ 6 ಕೋಟಿಗೂ ಹೆಚ್ಚು ಉದ್ಯೋಗಿಗಳಿಗೆ ಅನುಕೂಲವಾಗಲಿದೆ.
Admin
0
8
ಹೊಸದಿಲ್ಲಿ: ಈ ಸಲದ ದೀಪಾವಳಿಗೆ ಕೋಟ್ಯಂತರ ಉದ್ಯೋಗಿಗಳಿಗೆ ಸಿಹಿ ಸುದ್ದಿಯಿದು. ಹಣಕಾಸು ಸಚಿವಾಲಯವು 2020 - 21ರ ಸಾಲಿನಲ್ಲಿ ಉದ್ಯೋಗಿಗಳ ಭವಿಷ್ಯ ನಿಧಿ ಠೇವಣಿಗೆ (ಇಪಿಎಫ್‌) ಶೇ. 8.5 ಬಡ್ಡಿ ನೀಡಲು ಅನುಮೋದಿಸಿದೆ. ಇದರಿಂದ 6 ಕೋಟಿಗೂ ಹೆಚ್ಚು ಉದ್ಯೋಗಿಗಳಿಗೆ ಅನುಕೂಲವಾಗಲಿದೆ.
ಕಾರ್ಮಿಕ ಇಲಾಖೆ ಕಾರ್ಯದರ್ಶಿ ಸುನಿಲ್‌ ಭರತ್‌ವಾಲೀ ಶುಕ್ರವಾರ ಈ ವಿಷಯವನ್ನು ದೃಢಪಡಿಸಿದ್ದಾರೆ. ಕಾರ್ಮಿಕ ಸಚಿವಾಲಯವು ಈ ಸಂಬಂಧ ಅಧಿಸೂಚನೆ ಪ್ರಕಟಿಸಲಿದೆ.
ಕಾರ್ಮಿಕ ಸಚಿವರ ನೇತೃತ್ವದಲ್ಲಿ ಉದ್ಯೋಗಿಗಳ ಭವಿಷ್ಯ ನಿಧಿ ಸಂಸ್ಥೆಯ ಟ್ರಸ್ಟಿಗಳ ಮಂಡಳಿ 2020 - 21ರ ಸಾಲಿಗೆ ಶೇ. 8.5 ಬಡ್ಡಿ ನೀಡಲು ಅನುಮೋದಿಸಿತ್ತು. ಕಳೆದ 2019 - 20ರಲ್ಲೂ ಇಷ್ಟೇ ಬಡ್ಡಿ ನೀಡಲಾಗಿತ್ತು. ಹೀಗಿದ್ದರೂ ಹಣಕಾಸು ಸಚಿವಾಲಯದ ಅನುಮೋದನೆ ಪಡೆಯುವುದು ಕಡ್ಡಾಯವಾಗಿದೆ.
ಉದ್ಯೋಗಿಗಳ ಭವಿಷ್ಯ ನಿಧಿ ಸಂಸ್ಥೆ ಕಳೆದ ಸಾಲಿನಲ್ಲಿ 70,300 ಕೋಟಿ ರೂ. ಆದಾಯ ಗಳಿಸಿತ್ತು. ಈಕ್ವಿಟಿ ಹೂಡಿಕೆಯಿಂದ 4,000 ಕೋಟಿ ರೂ. ಹಾಗೂ ಸಾಲ ಪತ್ರಗಳಿಂದ 65 ಸಾವಿರ ಕೋಟಿ ರೂ. ಗಳಿಸಿತ್ತು. ಇಪಿಎಫ್‌ಒ 6 ಕೋಟಿಗೂ ಹೆಚ್ಚು ಚಂದಾದಾರರ ನೆಲೆಯನ್ನು ಹೊಂದಿದೆ.
ಬಳಸಿದ ಕಾರು ಮಾರುಕಟ್ಟೆ ಶೇ. 12 ವಿಸ್ತರಣೆ
ಹೊಸದಿಲ್ಲಿ: ಭಾರತದಲ್ಲಿ ಬಳಸಿದ ಕಾರುಗಳ ಮಾರುಕಟ್ಟೆಯ ಗಾತ್ರ ಮುಂದಿನ ಕೆಲ ವರ್ಷಗಳಲ್ಲಿ ಶೇ. 12 - 14ರಷ್ಟು ವೃದ್ಧಿಸಲಿದೆ ಎಂದು ಒಎಲ್‌ಎಕ್ಸ ಆಟೋಸ್‌-ಕ್ರಿಸಿಲ್‌ನ ಇತ್ತೀಚಿನ ಅಧ್ಯಯನ ವರದಿ ತಿಳಿಸಿದೆ.
2020 - 21ರಲ್ಲಿ ವಾರ್ಷಿಕ 38 ಲಕ್ಷ ಹಳೆಯ ಕಾರುಗಳ ಮಾರಾಟವಾಗುತ್ತಿದ್ದರೆ, 2025ರ ವೇಳೆಗೆ ವಾರ್ಷಿಕ 70 ಲಕ್ಷಕ್ಕೆ ಏರಿಕೆಯಾಗಲಿದೆ. ವಾರ್ಷಿಕ ಶೇ. 12 - 14ರ ಪ್ರಮಾಣದಲ್ಲಿ ಬೆಳೆಯಲಿದೆ. ಕೋವಿಡ್‌ ಬಿಕ್ಕಟ್ಟು, ಬದಲಾಗುತ್ತಿರುವ ಜನತೆಯ ಅಭಿರುಚಿ, ಮೊದಲ ಸಲ ಖರೀದಿಸುವವರು, ಹಣಕಾಸು ಆಯ್ಕೆ ಇತ್ಯಾದಿಗಳು ಇದರ ಮೇಲೆ ಪ್ರಭಾವ ಬೀರಲಿದೆ ಎಂದು ವರದಿ ತಿಳಿಸಿದೆ.
ಕೋವಿಡ್‌ ಬಿಕ್ಕಟ್ಟಿನ ನಂತರ ಸಾಮಾಜಿಕ ಅಂತರ ಕಾಪಾಡುವ ನಿಟ್ಟಿನಲ್ಲಿ ಜನತೆ ವೈಯಕ್ತಿಕ ಸಾರಿಗೆ ಅನುಕೂಲಕ್ಕಾಗಿ ಕಾರು ಖರೀದಿಸುತ್ತಿದ್ದಾರೆ. ಈ ಟ್ರೆಂಡ್‌ ಮುಂದುವರಿಯಲಿದೆ ಎಂದು ವರದಿ ಹೇಳಿದೆ.
