ಟಾಟಾ ಸ್ಟೀಲ್‌ನಿಂದ ಕ್ರಾಂತಿಕಾರಿ ನಿರ್ಧಾರ, ಕೊರೊನಾಗೆ ಬಲಿಯಾದ ನೌಕರನ ಕುಟುಂಬಸ್ಥರಿಗೆ ನಿವೃತ್ತಿವರೆಗೆ ವೇತನ!

ಬೆಂಗಳೂರು: ಕೊರೊನಾದಿಂದ ತೊಂದರೆಗೆ ಒಳಗಾಗಿರುವ ತನ್ನ ನೌಕರರ ಕುಟುಂಬಗಳಿಗೆ ಸಾಮಾಜಿಕ ಭದ್ರತೆ ಯೋಜನೆಯನ್ನು ಘೋಷಣೆ ಮಾಡಿದೆ. ಇದರ ಅನ್ವಯ, ಒಂದೊಮ್ಮೆ ಯಾವುದೇ ಉದ್ಯೋಗಿ ಕೊರೊನಾದಿಂದ ಅಸುನೀಗಿದಲ್ಲಿ, ಆತ ಪಡೆಯುತ್ತಿದ್ದ ಕೊನೆಯ ಸಂಬಳದ ಮೊತ್ತವನ್ನು ಆತನ ನಿವೃತ್ತಿಯ ಅವಧಿಯವರೆಗೆ ಕುಟುಂಬಸ್ಥರಿಗೆ ನೀಡಲಿದೆ. ಜತೆಗೆ ವೈದ್ಯಕೀಯ ವಿಮೆ ಸೇರಿದಂತೆ ಇತರ ಸವಲತ್ತುಗಳನ್ನೂ ನೀಡಲಿದೆ. ಟಾಟಾ ಸ್ಟೀಲ್‌ನಲ್ಲಿ ನಿವೃತ್ತಿಯ ವಯಸ್ಸು 60 ವರ್ಷಗಳಾಗಿವೆ. "ಟಾಟಾ ಸ್ಟೀಲ್‌ ತನ್ನ ಅತ್ಯುತ್ತಮ ದರ್ಜೆಯ ಸಾಮಾಜಿಕ ಭದ್ರತಾ ಯೋಜನೆಗಳಿಂದ ಕುಟುಂಬಗಳಿಗೆ ಗೌರವಾನ್ವಿತ ಜೀವನ ಮಟ್ಟವನ್ನು ಸಾಗಿಸಲು ಸಹಾಯ ಮಾಡುತ್ತದೆ. ಮೃತ ನೌಕರನ ಕುಟುಂಬ ಅಥವಾ ನಾಮಿನಿ, ಆ ನೌಕರನ ನಿವೃತ್ತಿ ವಯಸ್ಸಿನವರೆಗೆ ಕೊನೆಯ ಡ್ರಾ ವೇತನವನ್ನು ಪಡೆಯುತ್ತದೆ" ಎಂದು ಕಂಪನಿ ತಿಳಿಸಿದೆ. ಕಂಪನಿಯು ತನ್ನ ನಿರ್ಧಾರವನ್ನು ಸಾಮಾಜಿಕ ಜಾಲತಾಣದಲ್ಲಿ ಬಿಡುಗಡೆ ಮಾಡಿದೆ. ಇದರ ಜತೆಗೆ ವೈದ್ಯಕೀಯ ಸೌಲಭ್ಯಗಳು ಮತ್ತು ವಸತಿ ಸೌಲಭ್ಯಗಳನ್ನು ಸಹ ನೀಡಲಿದ್ದೇವೆ ಎಂದು ಕಂಪನಿ ಹೇಳಿಕೆಯಲ್ಲಿ ತಿಳಿಸಿದೆ. ಇದಲ್ಲದೆ, ಮುಂಚೂಣಿ ಉದ್ಯೋಗಿಯೊಬ್ಬರು ಉದ್ಯೋಗದಲ್ಲಿದ್ದಾಗ ಸೋಂಕಿಗೆ ಒಳಗಾಗಿದ್ದರೆ ಮತ್ತು ಸತ್ತರೆ, ಅವರ ಮಕ್ಕಳು ಪದವಿ ಪಡೆಯುವವರೆಗಿನ ಶಿಕ್ಷಣದ ಎಲ್ಲಾ ವೆಚ್ಚಗಳನ್ನು ಕಂಪನಿಯೇ ಭರಿಸುತ್ತದೆ ಎಂದೂ ಸಂಸ್ಥೆ ಘೋಷಿಸಿದೆ. ಟಾಟಾ ಸ್ಟೀಲ್ ಕೋವಿಡ್‌-19ನಿಂದ ಪೀಡಿತ ನೌಕರರ ಕುಟುಂಬ ಸದಸ್ಯರಿಗೆ ಸಾಮಾಜಿಕ ಭದ್ರತಾ ಯೋಜನೆಗಳನ್ನು ವಿಸ್ತರಿಸಿದೆ. ನಾವು ನಮ್ಮ ಪಾಲಿನ ಸಣ್ಣ ಕೆಲಸವನ್ನು ಮಾಡುತ್ತಿದ್ದು, ಈ ಕಠಿಣ ಪರಿಸ್ಥಿತಿಯನ್ನು ಎದುರಿಸಲು ನಿಮಗೆ ಸಾಧ್ಯವಿರುವ ಯಾವುದೇ ಸ್ವರೂಪದಲ್ಲಿ, ನಿಮ್ಮ ನೆರೆಹೊರೆಯವರಿಗೆ ಸಹಾಯ ಮಾಡುವಂತೆ ನಾವು ಪ್ರತಿಯೊಬ್ಬರನ್ನು ಕೋರುತ್ತೇವೆ ಎಂದು ಕಂಪನಿ ತನ್ನ ಹೇಳಿಕೆಯಲ್ಲಿ ಹೇಳಿದೆ. ಟಾಟಾ ಸ್ಟೀಲ್‌ನ ಈ ನಿರ್ಧಾರಕ್ಕೆ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ಮೆಚ್ಚುಗೆ ವ್ಯಕ್ತವಾಗಿದೆ. ಕೊರೊನಾ ಬಿಕ್ಕಟ್ಟಿನ ವೇಳೆ ವೇತನ ಕಡಿತ, ಕೆಲಸದಿಂದ ತೆಗೆದು ಹಾಕುವ ಪ್ರಕ್ರಿಯೆಗಳ ನಡುವೆ ಸಂಸ್ಥೆಯ ಈ ನಡೆ ಅನುಕರಣೀಯ ಎಂದರೆ ತಪ್ಪಲ್ಲ.