ಆಗಸ್ಟ್‌ನಲ್ಲಿ ₹1.12 ಲಕ್ಷ ಕೋಟಿ ಜಿಎಸ್‌ಟಿ ಸಂಗ್ರಹ: ಇದು ಆರ್ಥಿಕ ಚೇತರಿಕೆಯ ಸಂಕೇತ ಎಂದ ವಿತ್ತ ಸಚಿವಾಲಯ
ಸರಕು ಮತ್ತು ಸೇವಾ ತೆರಿಗೆ (ಜಿಎಸ್‌ಟಿ) ಸಂಗ್ರಹದಲ್ಲಿ ಸತತ ಎರಡನೇ ತಿಂಗಳು ಒಂದು ಲಕ್ಷ ಕೋಟಿ ರೂ ದಾಟಿದೆ. ಆಗಸ್ಟ್‌ನಲ್ಲಿ ₹1.12 ಲಕ್ಷ ಕೋಟಿಯಷ್ಟು ಜಿಎಸ್‌ಟಿ ಸಂಗ್ರಹವಾಗಿದೆ. ಜುಲೈನಲ್ಲಿ 1.16 ಲಕ್ಷ ಕೋಟಿ ರೂ. ಜಿಎಸ್‌ಟಿ ಸಂಗ್ರಹವಾಗಿತ್ತು.
Admin
0
6
ಹೊಸದಿಲ್ಲಿ: (ಜಿಎಸ್‌ಟಿ) ಸಂಗ್ರಹದಲ್ಲಿ ಸತತ ಎರಡನೇ ತಿಂಗಳು ಒಂದು ಲಕ್ಷ ಕೋಟಿ ರೂ ದಾಟಿದೆ. ಆಗಸ್ಟ್‌ನಲ್ಲಿ ₹1.12 ಲಕ್ಷ ಕೋಟಿಯಷ್ಟು ಸಂಗ್ರಹವಾಗಿದೆ. ಜುಲೈನಲ್ಲಿ 1.16 ಲಕ್ಷ ಕೋಟಿ ರೂ. ಜಿಎಸ್‌ಟಿ ಸಂಗ್ರಹವಾಗಿತ್ತು. ಕಳೆದ ಜೂನ್‌ನಲ್ಲಿ ₹92,849 ಕೋಟಿ ರೂಪಾಯಿಯಷ್ಟು ಜಿಎಸ್‌ಟಿ ಸಂಗ್ರಹವಾಗಿತ್ತು.
ಮುಂಬರುವ ತಿಂಗಳಲ್ಲಿ ಕೂಡ ಜಿಎಸ್‌ಟಿ ಆದಾಯ ದೃಢವಾಗಿ ಮುಂದುವರಿಯುವ ಸಾಧ್ಯತೆಯಿದೆ ಎಂದು ಹಣಕಾಸು ಸಚಿವಾಲಯ ಬುಧವಾರ ತಿಳಿಸಿದೆ.
ಜಿಎಸ್‌ಟಿ ಸಂಗ್ರಹ, ಸತತ ಒಂಬತ್ತು ತಿಂಗಳ ಕಾಲ 1 ಲಕ್ಷ ಕೋಟಿಗಿಂತಲೂ ಹೆಚ್ಚೇ ಇತ್ತು. ಆದರೆ, ಕೋವಿಡ್‌ನ ಎರಡನೇ ಅಲೆಯಿಂದಾಗಿ ಕಳೆದ ಜೂನ್‌ನಲ್ಲಿ 1 ಲಕ್ಷ ಕೋಟಿ ರೂ.ಗಿಂತ ಕಡಿಮೆಯಾಯಿತು. "ಕೋವಿಡ್ ನಿರ್ಬಂಧಗಳನ್ನ ಸಡಿಲಗೊಳಿಸಿದ ನಂತರ ಮತ್ತೆ ಜಿಎಸ್‌ಟಿ ಸಂಗ್ರಹದಲ್ಲಿ ಚೇತರಿಕೆ ಕಂಡಿದೆ.
ಜುಲೈ ಮತ್ತು ಆಗಸ್ಟ್‌ನಲ್ಲಿ ಜಿಎಸ್‌ಟಿ ಸಂಗ್ರಹ ₹1ಲಕ್ಷ ಕೋಟಿ ದಾಟಿದೆ. ಇದು ದೇಶದ ಅರ್ಥವ್ಯವಸ್ಥೆ ವೇಗವಾಗಿ ಚೇತರಿಸಿಕೊಳ್ಳುತ್ತಿದೆ ಎಂಬುದರ ಸ್ಪಷ್ಟ ಸೂಚಕವಾಗಿದೆ. ಆರ್ಥಿಕ ಬೆಳವಣಿಗೆ, ತೆರಿಗೆಯಿಂದ ತಪ್ಪಿಸಿಕೊಳ್ಳುವವರ ವಿರುದ್ಧ ಕ್ರಮ, ವಿಶೇಷವಾಗಿ ನಕಲಿ ಬಿಲ್ ಮಾಡುವವರ ವಿರುದ್ಧ ಕ್ರಮ ಕೈಗೊಂಡಿದ್ದು ಕೂಡ ಜಿಎಸ್‌ಟಿ ಸಂಗ್ರಹಕ್ಕೆ ಕೊಡುಗೆ ನೀಡಿದೆ ಎಂದು ವಿತ್ತ ಸಚಿವಾಲಯ ಹೇಳಿದೆ.
ಕಳೆದ ವರ್ಷ (2020) ಆಗಸ್ಟ್ ತಿಂಗಳ ಜಿಎಸ್‌ಟಿ ಸಂಗ್ರಹಕ್ಕೆ ಹೋಲಿಸಿದರೆ, ಈ ಬಾರಿ (2021) ಆಗಸ್ಟ್‌ನಲ್ಲಿ ಜಿಎಸ್‌ಟಿ ಸಂಗ್ರಹದಲ್ಲಿ ಶೇ. 30ರಷ್ಟು ಏರಿಕೆಯಾಗಿದೆ.
ಆಗಸ್ಟ್ 2021 ತಿಂಗಳ ಆದಾಯವು ಕಳೆದ ವರ್ಷದ ಇದೇ ತಿಂಗಳಲ್ಲಿ ಜಿಎಸ್‌ಟಿ ಆದಾಯಕ್ಕಿಂತ 30% ಹೆಚ್ಚಾಗಿದೆ. ಇದೇ ಸಮಯದಲ್ಲಿ, ದೇಶೀಯ ವಹಿವಾಟಿನ ಆದಾಯ (ಸೇವೆಗಳ ಆಮದು ಸೇರಿದಂತೆ) ಕೂಡ ಶೇ.27ರಷ್ಟು ಹೆಚ್ಚಾಗಿದೆ. 2019-20ರ ಆಗಸ್ಟ್‌ನಲ್ಲಿ 98,202 ಕೋಟಿ ರೂ. ಸಂಗ್ರಹವಾಗಿತ್ತು. ಈ ಆದಾಯಕ್ಕೆ ಹೋಲಿಸಿದರೆ, ಪ್ರಸ್ತುತ ಶೇ.14ರಷ್ಟು ಬೆಳವಣಿಗೆ ಕಂಡಿದೆ.
ಒಟ್ಟು ಜಿಎಸ್‌ಟಿ ಆದಾಯದಲ್ಲಿ ಸಿಜಿಎಸ್‌ಟಿ ₹20,522 ಕೋಟಿ, ಎಸ್‌ಜಿಎಸ್‌ಟಿ ₹26,605 ಕೋಟಿ, ಐಜಿಎಸ್‌ಟಿ ₹56,247 ಕೋಟಿ (ಸರಕುಗಳ ಆಮದು ಮೇಲೆ ಸಂಗ್ರಹಿಸಿದ ಜಿಎಸ್‌ಟಿ ₹26,884 ಕೋಟಿ ಸೇರಿದಂತೆ) ಮತ್ತು ಸೆಸ್ ₹8,646 ಕೋಟಿ (ಸರಕುಗಳು ಆಮದಿನಲ್ಲಿ ಸಂಗ್ರಹಿಸಿದ ₹646ಕೋಟಿ ಸೇರಿದಂತೆ).
ಸರ್ಕಾರವು ಸಿಜಿಎಸ್‌ಟಿಗೆ ₹23,043 ಕೋಟಿ ಮತ್ತು ಎಸ್‌ಜಿಎಸ್‌ಟಿಗೆ ₹19,139 ಕೋಟಿಯನ್ನು ಐಜಿಎಸ್‌ಟಿಯಿಂದ ನಿಯಮಿತ ಪರಿಹಾರವಾಗಿ ನಿಗದಿಮಾಡಿದೆ. ಕೇಂದ್ರವು ₹24,000 ಕೋಟಿ ಐಜಿಎಸ್ಟಿಯನ್ನು ಕೇಂದ್ರ ಮತ್ತು ರಾಜ್ಯಗಳು/ಕೇಂದ್ರಾಡಳಿತ ಪ್ರದೇಶಗಳ ನಡುವೆ 50:50 ಅನುಪಾತದಲ್ಲಿ ತಾತ್ಕಾಲಿಕ ಪರಿಹಾರವಾಗಿ ನೀಡಿದೆ ಎಂದು ಸಚಿವಾಲಯ ತಿಳಿಸಿದೆ.
ಆಗಸ್ಟ್ 2021 ರ ನಿಯಮಿತ ಮತ್ತು ತಾತ್ಕಾಲಿಕ ಸೆಟ್ಲ್‌ಮೆಂಟ್‌ ನಂತರ ಕೇಂದ್ರ ಮತ್ತು ರಾಜ್ಯಗಳ ಒಟ್ಟು ಆದಾಯ CGST ₹55,565 ಕೋಟಿ ಮತ್ತು SGST ₹57,744 ಕೋಟಿ ಆಗಿದೆ.
ಕಳೆದ ಏಪ್ರಿಲ್‌ನಲ್ಲಿ ದಾಖಲೆಯ ಸಂಗ್ರಹ
ಕಳೆದ ಏಪ್ರಿಲ್‌ನಲ್ಲಿ ದಾಖಲೆಯ 1.41 ಲಕ್ಷ ಕೋಟಿ ರೂ. ಸರಕು ಮತ್ತು ಸೇವಾ (ಜಿಎಸ್‌ಟಿ) ಸಂಗ್ರಹವಾಗಿತ್ತು. ಇದು ಈವರೆಗೆ ತಿಂಗಳೊಂದರಲ್ಲಿ ಸಂಗ್ರಹವಾದ ಗರಿಷ್ಠ ಜಿಎಸ್‌ಟಿ ಮೊತ್ತವಾಗಿದೆ ಎಂದು ಹಣಕಾಸು ಇಲಾಖೆ ತಿಳಿಸಿತ್ತು.
1.41 ಲಕ್ಷ ಕೋಟಿ ರೂ.ಗಳಲ್ಲಿ ಕೇಂದ್ರ ಜಿಎಸ್‌ಟಿ 27,837 ಕೋಟಿ ರೂ., ರಾಜ್ಯ ಜಿಎಸ್‌ಟಿ 35,621 ಕೋಟಿ ರೂ. ಸೇರಿದೆ.
ಇದರಲ್ಲಿ ಐಜಿಎಸ್‌ಟಿ 68,481 ಕೋಟಿ ರೂ. (ಆಮದು ಸರಕುಗಳ ಮೇಲೆ ಸಂಗ್ರಹಿಸಿದ 29,599 ಕೋಟಿ ರೂ. ಸೇರಿ) ಮತ್ತು ಸೆಸ್ 9,445 ಕೋಟಿ ರೂ. ಸೇರಿದೆ.
