ಚಿರಂಜೀವಿ ಸರ್ಜಾ ಪುಣ್ಯಸ್ಮರಣೆ: ಪತಿಯ ಸವಿನೆನಪಿನಲ್ಲಿ ಮೇಘನಾ ರಾಜ್

ಕನ್ನಡ ಚಿತ್ರರಂಗದಲ್ಲಿ 'ಯುವ ಸಾಮ್ರಾಟ್' ಅಂತಲೇ ಗುರುತಿಸಿಕೊಂಡಿದ್ದ ನಟ ಚಿರಂಜೀವಿ ಸರ್ಜಾ. 'ವಾಯುಪುತ್ರ', 'ಚಿರು', 'ದಂಡಂ ದಶಗುಣಂ', 'ವರದನಾಯಕ', 'ಚಂದ್ರಲೇಖ', 'ಅಜಿತ್', 'ರುದ್ರತಾಂಡವ', 'ಸಂಹಾರ', 'ಐ ಲವ್ ಯು' ಮುಂತಾದ ಚಿತ್ರಗಳಲ್ಲಿ ಅಭಿನಯಿಸಿದ್ದ ಕಳೆದ ವರ್ಷದ ಜೂನ್ 7 ರಂದು ಇಹಲೋಕ ತ್ಯಜಿಸಿದರು. ಮೊದಲ ಮಗುವಿನ ನಿರೀಕ್ಷೆಯಲ್ಲಿ ಇರುವಾಗಲೇ ಚಿರಂಜೀವಿ ಸರ್ಜಾ ಬಾರದ ಲೋಕಕ್ಕೆ ತೆರಳಿಬಿಟ್ಟರು. ಕುಟುಂಬಸ್ಥರು ಹಾಗೂ ಅಭಿಮಾನಿಗಳನ್ನ ಚಿರಂಜೀವಿ ಸರ್ಜಾ ಅಗಲಿ ನಾಳೆಗೆ (ಜೂನ್ 7, 2021) ಸರಿಯಾಗಿ ಒಂದು ವರ್ಷ. ಮೊದಲನೇ ವರ್ಷದ ಚಿರು ಪುಣ್ಯಸ್ಮರಣೆ ಪ್ರಯುಕ್ತ ಪತ್ನಿ ಒಂದು ಸ್ಪೆಷಲ್ ಫೋಟೋವನ್ನು ಸೋಷಿಯಲ್ ಮೀಡಿಯಾದಲ್ಲಿ ಹಂಚಿಕೊಂಡಿದ್ದಾರೆ. ಪತಿ ಚಿರಂಜೀವಿ ಸರ್ಜಾ ಜೊತೆಗೆ ತಾವಿರುವ, ಚಿರು ಮನಸ್ಫೂರ್ತಿಯಾಗಿ ನಗುತ್ತಿರುವ ಫೋಟೋವನ್ನು ಪತ್ನಿ ಮೇಘನಾ ರಾಜ್ ಇನ್ಸ್ಟಾಗ್ರಾಮ್‌ನಲ್ಲಿ ಶೇರ್ ಮಾಡಿದ್ದಾರೆ. ಅದಕ್ಕೆ 'ನಾವು, ನಂದು' ಎಂದು ಮೇಘನಾ ರಾಜ್ ಕ್ಯಾಪ್ಷನ್ ಕೊಟ್ಟಿದ್ದಾರೆ. ಚಿರಂಜೀವಿ ಸರ್ಜಾ ಅವರ ಸವಿನೆನಪಿನಲ್ಲಿ ಮೇಘನಾ ರಾಜ್ ಹಂಚಿಕೊಂಡಿರುವ ಈ ಫೋಟೋಗೆ ಅಭಿಮಾನಿಗಳು ಹಾಗೂ ತಾರೆಯರು ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ. ''ಚಿರು ಅಣ್ಣ ಪ್ರೀತಿಯಲ್ಲಿ ಗುಣವಂತ. ನಗುವಿನಲ್ಲಿ ಶ್ರೀಮಂತ. ಅಭಿಮಾನಿಗಳ ಮನಸ್ಸಿನಲ್ಲಿ ಎಂದಿಗೂ ಜೀವಂತ. ಮಿಸ್ ಯೂ ಚಿರು ಅಣ್ಣ'' ಎಂದು ಅಭಿಮಾನಿಗಳು ಕಾಮೆಂಟ್ ಮಾಡಿದ್ದಾರೆ. ಜೂನ್ 7, 2020 ರಂದು ನಟ ಚಿರಂಜೀವಿ ಸರ್ಜಾ ಕೊನೆಯುಸಿರೆಳೆದರು. ಕಾರ್ಡಿಯಾಕ್ ಅರೆಸ್ಟ್‌ನಿಂದಾಗಿ ಚಿರಂಜೀವಿ ಸರ್ಜಾ ನಿಧನರಾದರು. ಆ ಸಮಯದಲ್ಲಿ ಮೇಘನಾ ರಾಜ್ ಐದು ತಿಂಗಳ ಗರ್ಭಿಣಿ ಆಗಿದ್ದರು. 2020 ರ ಅಕ್ಟೋಬರ್ ತಿಂಗಳಿನಲ್ಲಿ ಗಂಡು ಮಗುವಿಗೆ ಮೇಘನಾ ರಾಜ್ ಜನ್ಮ ನೀಡಿದ್ದರು. ಮಗುವಿನ ಮೂಲಕ ಚಿರು ವಾಪಸ್ ಬಂದಿದ್ದಾರೆ ಅಂತಲೇ ಕುಟುಂಬಸ್ಥರು ಮತ್ತು ಆಭಿಮಾನಿಗಳು ನಂಬಿದ್ದಾರೆ.