Puneeth: 'ರಾಜಕುಮಾರ'ನಿಲ್ಲದ ಅರಮನೆ; ವೈರಲ್‌ ಆಗುತ್ತಿದೆ ಅಪ್ಪು ಮನೆಯ ಈ ಫೋಟೋ!

ದೊಡ್ಮನೆ ಹುಡ್ಗ, ಕನ್ನಡಿಗರ ಪ್ರೀತಿಯ ಅಪ್ಪು ಇನ್ನಿಲ್ಲ ಅನ್ನೋ ಮಾತು ಕೇಳಿದಾಗಿನಿಂದ ಅವರ ಕುಟುಂಬದವರಿಗೆ, ಆಪ್ತರಿಗೆ, ಅಭಿಮಾನಿಗಳಿಗೆ, ಕನ್ನಡ ಸಿನಿಪ್ರಿಯರಿಗೆ ಆಗುತ್ತಿರುವ ದುಃಖವನ್ನು ಮಾತುಗಳಲ್ಲಿ ಹೇಳಲು ಸಾಧ್ಯವಿಲ್ಲ. ಅಪ್ಪು ಎಂಬ ಮಗುವಿನಂತಹ ನಗುವುಳ್ಳ, ಸರಳತೆಯ ಸಾಮ್ರಾಟ, ವಿನಯವಂತಿಕೆಗೆ ಹೆಸರಾದ ವ್ಯಕ್ತಿತ್ವ ಇನ್ನೂ ನೆನಪು ಮಾತ್ರ. ಅಕ್ಟೋಬರ್ 29ರಂದು ಜವರಾಯ ಅಟ್ಟಹಾಸ ಮೆರೆದ, ಕನ್ನಡಿಗರ ಪ್ರೀತಿಯ ಅವರನ್ನು ಬರಸೆಳೆದುಕೊಂಡು ಹೋದ. ಕನ್ನಡಿಗರ ಪಾಲಿಗೆ ಸದಾಶಿವನಗರದ ಡಾ. ರಾಜ್‌ಕುಮಾರ್ ಮನೆ, ದೊಡ್ಮನೆ ಎಂದೇ ಜನಪ್ರಿಯ. ಆ ಮನೆಗೆ ಕಳಶದಂತೆ ಅಪ್ಪು ಬದುಕುತ್ತಿದ್ದರು. ಆದರೆ, ಆ ಮನೆಯು ಇಂದು ಅವರಿಲ್ಲದೆ ಅನಾಥವಾಗಿದೆ. ವೈರಲ್‌ ಆಗುತ್ತಿದೆ ಅಪ್ಪು ಫೋಟೋಪುನೀತ್ ನಿಧನದ ನಂತರ ಅವರ ಮನೆಯಲ್ಲಿ ಒಂದು ಫೋಟೋ ಇರಿಸಲಾಗಿದೆ. ಹೂವಿನ ಮಾಲೆ ಹಾಕಿರುವ ಪುನೀತ್ ಅವರ ಈ ಫೋಟೋವನ್ನು ನೋಡಿದ ಯಾರಿಗಾದರೂ ದುಃಖ ಉಮ್ಮಳಿಸಿ ಬರುತ್ತದೆ. ಸಾಮಾಜಿಕ ಜಾಲತಾಣದಲ್ಲಿ ಆ ಫೋಟೋ ವೈರಲ್ ಆಗುತ್ತಿದೆ. 'ಅಪ್ಪು ಅವರ ಫೋಟೋವನ್ನು ಈ ರೀತಿ ನೋಡಲಾಗುತ್ತಿಲ್ಲ' ಎಂದು ಅಭಿಮಾನಿಗಳು ಭಾವುಕರಾಗುತ್ತಿದ್ದಾರೆ. ಮೂರು ದಿನಗಳ ಹಿಂದಷ್ಟೇ ರಾಜನಂತೆ ಆ ಮನೆಯಲ್ಲಿ ಓಡಾಡಿಕೊಂಡಿದ್ದ ಅಪ್ಪು, ಈಗಿಲ್ಲ ಅಂದರೆ, ನಂಬುವುದಾದರೂ ಹೇಗೆ? 'ಅಪ್ಪು ಸಾರ್.. ನಿಮ್ಮ ಕಟೌಟ್‌, ಫೋಸ್ಟರ್‌ಗಳಿಗೆ ಹಾರ ಹಾಕಿ, ಸಂಭ್ರಮಿಸುತ್ತೇವೆ. ಆದರೆ, ಈ ರೀತಿ ನಿಮ್ಮ ಫೋಟೋಗೆ ಹಾರ ಹಾಕಲು ಮನಸ್ಸು ಒಪ್ಪುತ್ತಿಲ್ಲ..' ಎಂದು ಕಣ್ಣೀರು ಹಾಕುತ್ತಿದ್ದಾರೆ ಫ್ಯಾನ್ಸ್. ಅಪ್ಪು ಸಿನಿಮಾಗಳೆಂದರೆ, ಫ್ಯಾನ್ಸ್‌ಗೆ ಹಬ್ಬವೇ ಸರಿ. 'ಯುವರತ್ನ' ನಂತರ 'ಜೇಮ್ಸ್' ಶೂಟಿಂಗ್‌ನಲ್ಲಿ ಪುನೀತ್ ಬ್ಯುಸಿ ಆಗಿದ್ದರು. ಅದರ ಕೆಲಸಗಳು ಸ್ವಲ್ಪ ಬಾಕಿ ಇವೆ. ಚೇತನ್‌ಕುಮಾರ್ ನಿರ್ದೇಶನದ ಈ ಸಿನಿಮಾವೇ ಅಪ್ಪು ಅವರ ಕೊನೇ ಸಿನಿಮಾ ಆಗುತ್ತೇ ಅಂತ ಯಾರೆಂದರೆ, ಯಾರೂ ಊಹಿಸಿರಲಿಲ್ಲ. ಕಾಕತಾಳೀಯವೆಂದರೆ, ತಮಿಳಿನ 'ಓಹ್ ಮೈ ಕಡವುಳೆ' ಸಿನಿಮಾವನ್ನು ಕನ್ನಡಕ್ಕೆ ರಿಮೇಕ್ ಮಾಡಲಾಗಿದೆ. ಅದರಲ್ಲಿ ಪುನೀತ್ ನಟಿಸಿದ್ದಾರೆ. ಆ ಚಿತ್ರದಲ್ಲಿ ಬರುವ ದೇವರ ಪಾತ್ರವನ್ನು ತಮಿಳಿನಲ್ಲಿ ವಿಜಯ್ ಸೇತುಪತಿ ಮಾಡಿದ್ದರು. ಕನ್ನಡದಲ್ಲಿ ಅದನ್ನು ಪುನೀತ್ ಮಾಡಿದ್ದಾರೆ. ದೇವರ ಪಾತ್ರ ಮಾಡಿದ ಪುನೀತ್, ಈಗ ನಮ್ಮನ್ನೆಲ್ಲ ಅಗಲಿ, ದೇವರ ಬಳಿಯೇ ಹೋಗಿದ್ದು ವಿಪರ್ಯಾಸ! ಮನನೊಂದು ಸಾವಿನ ದಾರಿ ಹಿಡಿದ ಫ್ಯಾನ್ಸ್ಇನ್ನು, ಅಪ್ಪು ಅವರನ್ನು ಅಭಿಮಾನಿಗಳು ಎಷ್ಟು ಹಚ್ಚಿಕೊಂಡಿದ್ದರೆಂದರೆ, ಅವರ ಸಾವಿನ ದುಃಖವನ್ನು ಕೆಲವರಿಗೆ ಅರಗಿಸಿಕೊಳ್ಳಲು ಸಾಧ್ಯವಾಗಿಲ್ಲ. ಬೆಳಗಾವಿಯ ಇಬ್ಬರು ಯುವಕರು ಆತ್ಮಹತ್ಯೆ ಮಾಡಿಕೊಂಡರೆ, ಮತ್ತೆ ಕೆಲವರು ಅಪ್ಪು ಸಾವಿನ ಸುದ್ದಿ ಕೇಳಿ ಹೃದಯಾಘಾತದಿಂದ ನಿಧನರಾಗಿದ್ದಾರೆ. ಒಟ್ಟು 7ಕ್ಕೂ ಅಧಿಕ ಮಂದಿ ಸಾವನ್ನಪ್ಪಿರುವುದು ಬೇಸರ ತಂದಿದೆ.