ಖಾನಾಪುರ ಅತ್ಯಾಚಾರ ಪ್ರಕರಣ: ಆರೋಪಿಗೆ ಮರಣದಂಡನೆ ಬದಲು ಜೀವಾವಧಿ ಶಿಕ್ಷೆ

ಹೊಸದಿಲ್ಲಿ: ಅಪ್ರಾಪ್ತ ವಯಸ್ಸಿನವರ ಮೇಲೆ ಅತ್ಯಾಚಾರ ಎಸಗಿದವರು ಮತ್ತು ಹತ್ಯೆಗೈದ ದೋಷಿಗಳಿಗೆ ಮರಣ ದಂಡನೆ ಶಿಕ್ಷೆ ವಿಧಿಸಲು ಸಂತ್ರಸ್ತರು 'ಕಡಿಮೆ ವಯಸ್ಸಿನವರು ಅಥವಾ ಬಾಲ್ಯಾವಸ್ಥೆಯವರು ಎನ್ನುವುದನ್ನೇ ಮುಖ್ಯವಾಗಿ ಪರಿಗಣಿಲು ಸಾಧ್ಯವಿಲ್ಲಎಂದು ಸುಪ್ರೀಂ ಕೋರ್ಟ್‌ ಹೇಳಿದೆ. ಇದೇ ಆಧಾರದ ಮೇಲೆ ಕರ್ನಾಟಕದ ಖಾನಾಪುರದಲ್ಲಿ ಐದು ವರ್ಷದ ಬಾಲಕಿಯನ್ನು ಅಪಹರಿಸಿ, ಅತ್ಯಾಚಾರ ಎಸಗಿ, ಹತ್ಯೆಗೈದಿದ್ದ ಅಪರಾಧಿ ಈರಪ್ಪ ಸಿದ್ದಪ್ಪ ಎಂಬಾತನ ಮರಣ ದಂಡನೆ ಶಿಕ್ಷೆಯನ್ನು 30 ವರ್ಷಗಳ ಜೀವಾವಧಿ ಶಿಕ್ಷೆಯನ್ನಾಗಿ ಸುಪ್ರೀಂ ಕೋರ್ಟ್‌ ಮಾರ್ಪಡಿಸಿ ಆದೇಶ ಹೊರಡಿಸಿದೆ. 2010ರಲ್ಲಿ ನಡೆದ ಪ್ರಕರಣ ಸಂಬಂಧ ಕರ್ನಾಟಕ ಹೈಕೋರ್ಟ್‌ 2017ರ ಮಾ. 6 ರಂದು ಅಧೀನ ನ್ಯಾಯಾಲಯದ ಮರಣ ದಂಡನೆ ತೀರ್ಪನ್ನು ಎತ್ತಿ ಹಿಡಿದಿತ್ತು. ಇದನ್ನು ಸುಪ್ರೀಂ ಕೋರ್ಟ್‌ನಲ್ಲಿ ಪ್ರಶ್ನಿಸಲಾಗಿತ್ತು. ಇದರ ವಿಚಾರಣೆ ನಡೆಸಿದ ನ್ಯಾ. ಎಲ್‌.ನಾಗೇಶ್ವರ ರಾವ್‌ ಅವರಿದ್ದ ತ್ರಿಸದಸ್ಯ ನ್ಯಾಯಪೀಠವು, ''ಕಳೆದ 40 ವರ್ಷಗಳಲ್ಲಿ ಅಪ್ರಾಪ್ತರ ಮೇಲೆ ಅತ್ಯಾಚಾರ, ಕೊಲೆಯಂಥ ಒಟ್ಟು 67 ಪ್ರಕರಣಗಳನ್ನು ಗಮನಿಸಿದ್ದೇವೆ. ಈ ಪೈಕಿ 15 ಪ್ರಕರಣಗಳಲ್ಲಿ ದೋಷಿಗೆ ಮರಣದಂಡನೆ ವಿಧಿಸಲು ಕೋರ್ಟ್‌ ಸಮ್ಮತಿಸಿದೆ. ಉಳಿದ ಮೂರರಲ್ಲಿ ಮರಣ ದಂಡನೆಯನ್ನು ಜೀವಾವಧಿ ಶಿಕ್ಷೆಯಾಗಿ ಮಾರ್ಪಡಿಸಲಾಗಿದೆ'' ಎಂದು ಹೇಳಿತು. ''16 ವರ್ಷಕ್ಕಿಂತ ಕಡಿಮೆ ವಯಸ್ಸಿನವರ ಮೇಲೆಯೇ ಅಪರಾಧ ಎಸಗಿರುವುದು ಈ ಪ್ರಕರಣಗಳ ಸಾಮ್ಯತೆಯಾಗಿದೆ. ಅತ್ಯಾಚಾರ ಹಾಗೂ ಹತ್ಯೆಯಂಥ ಘೋರ ಕೃತ್ಯವನ್ನು ಸಮಾಜದಿಂದ ಕಿತ್ತೊಗೆಯಲು ದೋಷಿಗೆ ಜೀವಾವಾಧಿ ಶಿಕ್ಷೆ ನೀಡಿದರೂ ಸಮಾಜಕ್ಕೆ ಖಡಕ್‌ ಎಚ್ಚರಿಕೆಯೇ ರವಾನೆ ಆಗಲಿದೆ. ಸಮಾಜ ಸುಧಾರಣೆಗೆ ನಾವು ಒತ್ತು ನೀಡಬೇಕು'' ಎಂದು ಅಭಿಪ್ರಾಯಪಟ್ಟಿದೆ. 2010ರಲ್ಲಿ ಖಾನಾಪುರದ ಗ್ರಾಮವೊಂದರಲ್ಲಿ ಐದು ವರ್ಷದ ಬಾಲಕಿಯನ್ನು ಅಪಹರಿಸಿ, ಅತ್ಯಾಚಾರ ಎಸಗಿ, ನಂತರ ಕೊಲೆಗೈದಿದ್ದ ಸಿದ್ಧಪ್ಪ ಬಳಿಕ ಶವವನ್ನು ಬ್ಯಾಗ್‌ವೊಂದರಲ್ಲಿ ತುಂಬಿ ಬೆಣ್ಣೆ ಹಳ್ಳ ನದಿಗೆ ಎಸೆದಿದ್ದ.