ಕೋವಿಡ್‌ ಬಿಕ್ಕಟ್ಟಿನಿಂದ ಕುಸಿದ ಮೋದಿ ಜನಪ್ರಿಯತೆ: ಅಮೆರಿಕದ ಸಂಸ್ಥೆಯ ಸಮೀಕ್ಷೆ

: ಕಳೆದ ಫೆಬ್ರುವರಿಯಿಂದ ಇಲ್ಲಿಯವರೆಗೆ ಕೋವಿಡ್‌ ಬಿಕ್ಕಟ್ಟು ನಿಭಾಯಿಸುವಲ್ಲಿ ಪ್ರಧಾನಿ ನರೇಂದ್ರ ಅವರ ನಾಯಕತ್ವ ವೈಫಲ್ಯ ಅನುಭವಿಸಿದ್ದು, ಇದರಿಂದ ಅವರ ಜನಪ್ರಿಯತೆಯ ಗ್ರಾಫ್‌ ಕುಸಿದಿದೆ ಎಂದು ಅಮೆರಿಕದ ಡೇಟಾ ಇಂಟಲಿಜನ್ಸಿ ಸಂಸ್ಥೆ ತಿಳಿಸಿದೆ. ಮೋದಿ ಅವರ ಪ್ರಚಂಡ ಭಾಷಣ ಮತ್ತು ಅಭಿವೃದ್ಧಿಯ ಕನಸುಗಳ ಮೂಲಕ 2014ರಲ್ಲಿ ಬಿಜೆಪಿ ಅಭೂತಪೂರ್ವ ಗೆಲುವು ಸಾಧಿಸಿ ಅಧಿಕಾರದ ಗೆದ್ದುಗೆ ಏರಿತ್ತು. ಪ್ರಧಾನಿಯಾಗಿ ಮೋದಿ ಅವರು ಅಭಿವೃದ್ಧಿ ಪೂರಕ ಹಲವು ದಿಟ್ಟ ನಿರ್ಧಾರಗಳನ್ನು ತೆಗೆದುಕೊಂಡಿದ್ದರು. ಇದರಿಂದ ಅವರ ಇನ್ನಷ್ಟು ಹೆಚ್ಚಿ, 2019ರಲ್ಲಿಯೂ ಭರ್ಜರಿ ಗೆಲುವು ಸಾಧಿಸಿದ್ದರು. ಅದಾಗಿ ಈ ವರ್ಷಾರಂಭದವರೆಗೆ ಎಲ್ಲವನ್ನೂ ಹಿಡಿತದಲ್ಲಿ ಇಟ್ಟುಕೊಂಡಿದ್ದ ಮೋದಿ ಅವರಿಗೆ ಕೊರೊನಾ ಕಠಿಣ ಸವಾಲೊಡ್ಡಿತು. ಎರಡನೇ ಅಲೆಯ ರೂಪದಲ್ಲಿ ಎರಗಿದ ಕೋವಿಡ್‌, ದೇಶದ ಆರ್ಥಿಕತೆ ಮತ್ತು ಜನ ಜೀವನದ ಮೇಲೆ ಮಾರಕ ಪರಿಣಾಮ ಉಂಟು ಮಾಡಿತು. ಶರವೇಗದಲ್ಲಿಏರಿದ ಸೋಂಕು, ಸಾವಿನ ಆಕ್ರಂದನ ಎಬ್ಬಿಸಿತು. ಈ ಬಿಕ್ಕಟ್ಟು ನಿಭಾಯಿಸುವಲ್ಲಿ ಮೋದಿ ಸರಕಾರ ವಿಫಲಗೊಂಡಿದೆ ಎನ್ನುವ ಅಸಮಾಧಾನ ದೇಶದ ಜನರಲ್ಲಿ ಮನೆ ಮಾಡಿದೆ. ಇದರಿಂದ ಅವರ ಬಗೆಗಿನ ಜನರ ಒಲವು ಗಣನೀಯವಾಗಿ ತಗ್ಗಿದೆ ಎಂದು ಸಮೀಕ್ಷಾ ವರದಿ ಹೇಳಿದೆ. 'ಈ ವಾರದಲ್ಲಿ ಮೋದಿ ಅವರ ಜನಪ್ರಿಯತೆ ರೇಟಿಂಗ್‌ ಶೇ.63ಕ್ಕೆ ಇಳಿದಿದೆ. 2019ರಿಂದ ಈವರೆಗೆ ಅವರ ರೇಟಿಂಗ್‌ ಪಾಯಿಂಟ್‌ ಇಷ್ಟೊಂದು ಕುಸಿತ ಕಂಡಿರುವುದು ಇದೇ ಮೊದಲು' ಎಂದು ಡೇಟಾ ಸಂಸ್ಥೆ ತಿಳಿಸಿದೆ. ಕಳೆದ ಏಪ್ರಿಲ್‌ ಒಂದೇ ತಿಂಗಳಲ್ಲಿ ಮೋದಿ ಅವರ ಜನಪ್ರಿಯತೆ 22 ಪಾಯಿಂಟ್‌ ಕುಸಿತ ಕಂಡಿದೆ. ಆರಂಭದಿಂದಲೂ ಸರಿಯಾದ ಸಿದ್ಧತೆ ಮಾಡಿಕೊಂಡಿದ್ದರೆ ಕೊರೊನಾ ಎರಡನೇ ಅಲೆಯ ಬಿಕ್ಕಟ್ಟನ್ನು ಸರಿಯಾದ ರೀತಿಯಲ್ಲಿ ಎದುರಿಸಬಹುದಾಗಿತ್ತು. ಆದರೆ ಮೋದಿ ಸರಕಾರ ಈ ವಿಷಯದಲ್ಲಿ ಮೈಮರೆವು ಪ್ರದರ್ಶಿಸಿತು. ಇದರಿಂದ ಸೋಂಕು ಮಿತಿಮೀರಿದ್ದು, ಸಾವು ಪ್ರಮಾಣ ಉಲ್ಬಣಿಸಿದೆ ಎನ್ನುವ ಅಭಿಪ್ರಾಯ ಬಹುಪಾಲು ಜನರಲ್ಲಿ ಇದೆ. ವಿಶೇಷವಾಗಿ ಮೋದಿ ಅವರ ಪ್ರಬಲ ಬೆಂಬಲ ವಲಯ ಇರುವ ನಗರ ಪ್ರದೇಶದಲ್ಲೂ ಈಗ ಇಂತಹ ಕುಸಿತ ಕಾಣಿಸಿದೆ. 'ಬಿಕ್ಕಟ್ಟು ನಿಭಾಯಿಸುವಲ್ಲಿ ಮೋದಿ ಸಾರಥ್ಯದ ಕೇಂದ್ರ ಸರ್ಕಾರ ಉತ್ತಮ ರೀತಿಯಲ್ಲಿ ಕೆಲಸ ಮಾಡಿದೆ ಎಂದು ಹೇಳುವ ನಗರ ವಾಸಿಗಳ ಸಂಖ್ಯೆ ಈಗ ಶೇ.59ರಷ್ಟಿದೆ. ಈ ವರ್ಷ ಆರಂಭದಲ್ಲಿ ಇವರ ಈ ಒಲವಿನ ಪ್ರಮಾಣ ಶೇ.89ರಷ್ಟಿತ್ತು' ಎಂದು ಸಮೀಕ್ಷೆ ತಿಳಿಸಿದೆ.