ಕೆಆರ್‌ ಪುರದಲ್ಲಿ ರಾತ್ರೋರಾತ್ರಿ ಬಸ್‌ ನಿಲ್ದಾಣವನ್ನೇ ಕದ್ದೊಯ್ದ ಕಳ್ಳರು..!

(): ಸಾರ್ವಜನಿಕರ ಅನುಕೂಲಕ್ಕಾಗಿ ನಿರ್ಮಾಣ ಮಾಡಿದ್ದ ಬಸ್‌ ಶೆಲ್ಟರ್‌ ರಾತ್ರೋರಾತ್ರಿ ಮಾಯವಾಗಿರುವ ಘಟನೆ ಕೆಆರ್‌ ಪುರದ ಟಿಸಿ ಪಾಳ್ಯ ಮುಖ್ಯರಸ್ತೆಯ ಮಂಜುನಾಥ್‌ ಬಡಾವಣೆಯಲ್ಲಿ ನಡೆದಿದೆ. ಘಟನೆಯ ಹಿಂದೆ ಬಸ್‌ ನಿಲ್ದಾಣದ ಹಿಂದೆ ನಿರ್ಮಾಣವಾಗಿದ್ದ ಕಾಂಪ್ಲೆಕ್ಸ್‌ ಮಾಲೀಕರ ಕೈವಾಡ ಇದೆ ಎನ್ನಲಾಗಿದೆ. ಪಾಲಿಕೆಯು ಐದು ವರ್ಷಗಳ ಹಿಂದೆ ಕಬ್ಬಿಣದ ಬಸ್‌ ಶೆಲ್ಟರ್‌ ಅನ್ನು ಇಲ್ಲಿ ನಿರ್ಮಿಸಿತ್ತು. ಶುಕ್ರವಾರ ತಡರಾತ್ರಿ ಕಿಡಿಗೇಡಿಗಳು ವೆಲ್ಡಿಂಗ್‌ ಮಿಷನ್‌ ಮೂಲಕ ಶೆಲ್ಟರ್‌ನ ಪಿಲ್ಲರ್‌ ಕತ್ತರಿಸಿ, ಕದ್ದೊಯ್ದಿದ್ದಾರೆ. ಶೆಲ್ಟರ್‌ನ ಕಬ್ಬಿಣದ ಪಿಲ್ಲರ್‌ ನಿಲ್ಲಿಸಿರುವ ಕುರುಹು ಮಾತ್ರ ಉಳಿದುಕೊಂಡಿದೆ, ಉಳಿದೆಲ್ಲ ಭಾಗಗಳನ್ನು ಕಿಡಿಗೇಡಿಗಳು ಹೊತ್ತೊಯ್ದಿದ್ದಾರೆ. ನಿರ್ಮಾಣದ ಬಳಿಕ ಇದರ ಹಿಂದೆ ಇದ್ದ ನಿವೇಶನದಲ್ಲಿ ಆರ್‌ಎನ್‌ಎಸ್‌ ಕಾಂಪ್ಲೆಕ್ಸ್‌ ಕಟ್ಟಡ ನಿರ್ಮಾಣ ಮಾಡಿದ್ದು, ಕಟ್ಟಡದಲ್ಲಿ ರೂಟ್‌ ಅಂಡ್‌ ಶೂಟ್ಸ್‌ ಫ್ರೂಟ್ಸ್‌ ಮಳಿಗೆ ಹಾಗೂ ಮಂಜುನಾಥ ನೇತ್ರಾಲಯ ಆಸ್ಪತ್ರೆಗೆ ಬಾಡಿಗೆ ನೀಡಲಾಗಿತ್ತು. ಆನಂದಪುರ ಮುಖ್ಯರಸ್ತೆಯಲ್ಲಿನ ಈ ಕಾಂಪ್ಲೆಕ್ಸ್‌ಗೆ ಬಸ್‌ ನಿಲ್ದಾಣ ಅಡ್ಡಲಾಗಿತ್ತು. ಇದರಿಂದ ಬ್ಯುಸಿನೆಸ್‌ ಸಹ ಕಡಿಮೆ ಆಗಿತ್ತು. ಈ ಬಸ್‌ ನಿಲ್ದಾಣವನ್ನು ಹೇಗಾದರೂ ತೆರವು ಮಾಡಬೇಕೆಂದು ಹಲವು ವರ್ಷಗಳಿಂದ ಕಾಯುತ್ತಿದ್ದು, ಶುಕ್ರವಾರ ರಾತ್ರಿ ವೆಲ್ಡಿಂಗ್‌ ಕಟ್ಟರ್‌ ಮೂಲಕ ರಾತ್ರೋ ರಾತ್ರಿ ಮಾಯ ಮಾಡಿದ್ದಾರೆ ಎಂದು ಸ್ಥಳೀಯರು ಸಂಶಯ ವ್ಯಕ್ತಪಡಿಸಿದ್ದಾರೆ. ಸಿಸಿ ಕ್ಯಾಮೆರಾ ವಶ ಬಸ್‌ ನಿಲ್ದಾಣ ಮಾಯವಾಗಿರುವ ಕುರಿತು ಮಾಹಿತಿ ತಿಳಿದು ಬಿಬಿಎಂಪಿ ಅಧಿಕಾರಿಗಳು ಸ್ಥಳಕ್ಕೆ ಭೇಟಿ ನೀಡಿ ಪರಿಶೀಲನೆ ನಡೆಸಿ ಕೆಆರ್‌ ಪುರ ಪೊಲೀಸ್‌ ಠಾಣೆಗೆ ದೂರು ನೀಡಿದ್ದಾರೆ. ಪೊಲೀಸರು ಸ್ಥಳಕ್ಕಾಗಮಿಸಿ ಪರಿಶೀಲನೆ ನಡೆಸಿ ಈ ಕಾಂಪ್ಲೆಕ್ಸ್‌ನಲ್ಲಿದ್ದ ಸಿಸಿ ಕ್ಯಾಮೆರಾದ ಡಿವಿಆರ್‌ ವಶಕ್ಕೆ ಪಡೆದು ಪ್ರಕರಣ ದಾಖಲಿಸಿಕೊಂಡಿದ್ದಾರೆ. ಸಾರ್ವಜನಿಕ ಆಸ್ತಿಯನ್ನು ರಾತ್ರೋರಾತ್ರಿ ಕದ್ದೊಯ್ಯೊದವರ ವಿರುದ್ಧ ಕಾನೂನು ಕ್ರಮ ಕೈಗೊಳ್ಳಲು ಸ್ಥಳೀಯರು ಆಗ್ರಹಿಸಿದ್ದಾರೆ. ಒಟ್ಟಿನಲ್ಲಿ, ಕಾಂಪ್ಲೆಕ್ಸ್‌ಗೆ ಅಡ್ಡ ಬರುತ್ತದೆ ಎಂದು ಬಸ್‌ ನಿಲ್ದಾಣವನ್ನು ರಾತ್ರೋ ರಾತ್ರಿ ಮಾಯ ಮಾಡಿದರೋ ಅಥವಾ ಕಿಡಿಗೇಡಿಗಳೇ ಬಸ್‌ ನಿಲ್ದಾಣವನ್ನು ಕದ್ದೊಯ್ದರೋ ಎಂಬುದು ಪೊಲೀಸರ ತನಿಖೆಯಿಂದ ಗೊತ್ತಾಗಬೇಕಿದೆ. ಸರ್ಕಾರದ ಆಸ್ತಿಯನ್ನು ರಾತ್ರೋರಾತ್ರಿ ತೆರವುಗೊಳಿಸಿದವರ ವಿರುದ್ಧ ಸೂಕ್ತ ಕ್ರಮ ಕೈಗೊಳ್ಳಬೇಕು ಎಂಬುದು ಅಲ್ಲಿನ ಜನರ ಒತ್ತಾಯವಾಗಿದೆ.