Salaga Vs Kotigobba 3 : ಬಾಕ್ಸ್ ಆಫೀಸ್‌ನಲ್ಲಿ 'ಕಿಚ್ಚ' ಸುದೀಪ್ & 'ದುನಿಯಾ' ವಿಜಯ್ ಮುಖಾಮುಖಿ!

ಕೊರೊನಾ ಲಾಕ್‌ಡೌನ್‌ನಿಂದಾಗಿ ಕನ್ನಡ ಚಿತ್ರರಂಗಕ್ಕೆ ದೊಡ್ಡ ಹೊಡೆತ ಬಿದ್ದಿದೆ. ಸರಿಯಾದ ಸಮಯಕ್ಕೆ ಚಿತ್ರಮಂದಿರಗಳನ್ನು ತೆರೆಯಲು ಸಾಧ್ಯವಾಗದೇ, ನಿರ್ಮಾಪಕರು ಸಂಕಷ್ಟಕ್ಕೆ ಸಿಲುಕಿದ್ದಾರೆ. ಅನೇಕ ತಿಂಗಳ ಬಳಿಕ ಈಗ ಪುನಃ ಚಿತ್ರಮಂದಿರಗಳು ತೆರೆದುಕೊಳ್ಳುತ್ತಿವೆ. ಅಕ್ಟೋಬರ್ 1ರಿಂದ ಶೇ.100 ಆಸನ ಭರ್ತಿಗೆ ರಾಜ್ಯ ಸರ್ಕಾರ ಅನುಮತಿ ನೀಡಿದೆ. ಈ ಹಿನ್ನೆಲೆಯಲ್ಲಿ ಸ್ಯಾಂಡಲ್‌ವುಡ್‌ನಲ್ಲಿ ಪುನಃ ಚಿತ್ರರಂಗದ ಚಟುವಟಿಕೆಗಳು ಶುರುವಾಗಿವೆ. ದೊಡ್ಡ ದೊಡ್ಡ ಸಿನಿಮಾಗಳ ರಿಲೀಸ್ ಡೇಟ್ ಘೋಷಣೆ ಆಗುತ್ತಿವೆ. ಈ ಮಧ್ಯೆ ಚಂದನವನದಲ್ಲಿ ಒಂದೇ ದಿನ ಎರಡು ದೊಡ್ಡ ಸಿನಿಮಾಗಳು ರಿಲೀಸ್ ಆಗುವ ಸಾಧ್ಯತೆ ಕೂಡ ಇದೆ. ಹೌದು, ಸದ್ಯದ ಮಾಹಿತಿ ಪ್ರಕಾರ, ಅಕ್ಟೋಬರ್ 14ರಂದು ದಸರಾ ಹಬ್ಬದ ಪ್ರಯುಕ್ತ ಸ್ಯಾಂಡಲ್‌ವುಡ್‌ನ ಎರಡು ಬಿಗ್ ಬಜೆಟ್ ಸಿನಿಮಾಗಳು ತೆರೆಗೆ ಬರಲು ಸಜ್ಜಾಗಿವೆ. 'ದುನಿಯಾ' ವಿಜಯ್ ಮೊದಲ ಬಾರಿಗೆ ನಿರ್ದೇಶನ ಮಾಡಿರುವ '' ಮತ್ತು ಸುದೀಪ್‌ ನಟನೆಯ '' ಸಿನಿಮಾಗಳು ಒಂದೇ ದಿನ ತೆರೆಗೆ ಬರುತ್ತಿವೆ. ಒಂದೇ ದಿನ ಈ ರೀತಿ ಎರಡು ಬಹುನಿರೀಕ್ಷಿತ ಬಿಗ್ ಬಜೆಟ್ ಸಿನಿಮಾಗಳು ತೆರೆಗೆ ಬಂದರೆ, ಬಾಕ್ಸ್‌ ಆಫೀಸ್‌ ಕಲೆಕ್ಷನ್‌ ಮೇಲೆ ಹೊಡೆತ ಬೀಳುವುದು ಖಚಿತ ಎಂಬುದು ಸಿನಿಪಂಡಿತರ ಲೆಕ್ಕಾಚಾರ! ಈ ಬಗ್ಗೆ ದುನಿಯಾ ಏನಂದ್ರು? ಈ ಬಗ್ಗೆ ಪ್ರೆಸ್‌ಮೀಟ್ ಮಾಡಿರುವ 'ಸಲಗ' ಚಿತ್ರದ ನಿರ್ದೇಶಕ, ನಟ 'ದುನಿಯಾ' ವಿಜಯ್, 'ಕಿಚ್ಚ ಹಾಗೂ ನನ್ನ ನಡುವೆ ಒಳ್ಳೆಯ ಸ್ಪರ್ಧೆ ಇದೆ. ಇದನ್ನು ಸ್ಟಾರ್ ವಾರ್ ಎಂದು ಭಾವಿಸುವುದು ಬೇಡ. ನಾವು ಮತ್ತು 'ಕೋಟಿಗೊಬ್ಬ 3' ನಿರ್ಮಾಪಕ ಸೂರಪ್ಪಬಾಬು ಚೆನ್ನಾಗಿಯೇ ಇದ್ದೇವೆ. ಮತ್ತೊಮ್ಮೆ ಸಭೆ ಮಾಡಿ ಚರ್ಚೆ ಮಾಡುತ್ತೇವೆ. ಒಬ್ಬ ನಿರ್ಮಾಪಕನನ್ನು ಕಾಪಾಡುವುದು ನಮ್ಮೆಲ್ಲರ ಜವಾಬ್ದಾರಿ. ಅಕ್ಟೋಬರ್ 14ರಂದು ನಮ್ಮ ಚಿತ್ರ ಬಿಡುಗಡೆಯಾಗುವುದು ಖಚಿತ. ಆ ನಮ್ಮ ನಿಲುವಿನಲ್ಲಿ ಯಾವುದೇ ಬದಲಾವಣೆ ಇಲ್ಲ. ನಾನು ನಮ್ಮ ನಿರ್ಮಾಪಕರ ಪರ ನಿಲ್ಲುತ್ತೇನೆ' ಎಂದು ಹೇಳಿದ್ದಾರೆ. 'ಅಭಿಮಾನಿಗಳು ಯಾರೂ ಆ ರೀತಿ ಭಾವಿಸಬೇಡಿ. ಸಿಂಗಲ್ ಡೋಸ್ ಲಸಿಕೆ ಪಡೆದವರು ದಯವಿಟ್ಟು ಬರಬೇಡಿ. ಎರಡು ಡೋಸ್ ಲಸಿಕೆ ಪಡೆದವರು ಮಾತ್ರ ಚಿತ್ರಮಂದಿರಕ್ಕೆ ಬನ್ನಿ. ಕಷ್ಟಪಟ್ಟು ನಾನು ಈ 'ಸಲಗ' ಚಿತ್ರವನ್ನು ಮಾಡಿದ್ದೇನೆ. ಈ ಚಿತ್ರದ ಬಗ್ಗೆ ಮೊದಲಿಂದಲೂ ಒಳ್ಳೆಯ ಪ್ರತಿಕ್ರಿಯೆ ಇದೆ' ಎಂದು 'ದುನಿಯಾ' ವಿಜಯ್ ಹೇಳಿದ್ದಾರೆ. ಇನ್ನು, ಸಲಗ ನಿರ್ಮಾಪಕ ಶ್ರೀಕಾಂತ್, 'ಇದು ಸ್ಟಾರ್ವಾರ್ ಅಲ್ಲ. ನಿರ್ಮಾಪಕ ಸೂರಪ್ಪಬಾಬು ಅವರ ನಿರ್ಧಾರ ತಡವಾಗಿದೆ. ಕಳೆದ ಒಂದೂವರೆ ವರ್ಷದಿಂದ ನಾವು ಕಾಯುತ್ತಿದ್ದೆವು. ಮೂರು ಸಿನಿಮಾಗಳ (ಭಜರಂಗಿ 2, ಸಲಗ, ಕೋಟಿಗೊಬ್ಬ 3) ನಿರ್ಮಾಪಕರು ಮಾತುಕತೆ ನಡೆಸಿದ್ದೆವು. ಸರ್ಕಾರ ಅನುಮತಿ ನೀಡಿದ ನಂತರ 'ಸಲಗ' ಬಿಡುಗಡೆ ಮೊದಲು ಬಿಡುಗಡೆ ಮಾಡುವ ಬಗ್ಗೆ ಚರ್ಚೆಯಾಗಿತ್ತು. ಮೊದಲೇ ಮಾತುಕತೆ ನಡೆಸಿರುವಂತೆ ಅಕ್ಟೋಬರ್ 14ರಂದು ದಸರಾ ಹಬ್ಬ ಹಿನ್ನೆಲೆಯಲ್ಲಿ 'ಸಲಗ' ಚಿತ್ರವನ್ನು ರಿಲೀಸ್ ಮಾಡುತ್ತಿದ್ದೇವೆ. 'ಸಲಗ' ಚಿತ್ರಕ್ಕೆ ನಟ ಸುದೀಪ್ ಟ್ವೀಟ್ ಮಾಡಿ ಹಾರೈಸಿದ್ದಾರೆ. ಅವರು ಮೊದಲಿನಿಂದಲೂ 'ಸಲಗ' ಜೊತೆಗಿದ್ದಾರೆ. ಪರಭಾಷಾ ಚಿತ್ರಗಳು ಬಂದಾಗ ಚಿತ್ರಮಂದಿರದ ಸಮಸ್ಯೆಯಾಗುತ್ತೆ. ಕನ್ನಡದ ಎರಡು ಸಿನಿಮಾಗಳು ಒಟ್ಟಿಗೆ ಬರುತ್ತಿರುವುದರಿಂದ ಸಂತಸವಿದೆ. ಕನ್ನಡ ಚಿತ್ರರಂಗದ ನಾವೆಲ್ಲರೂ ಒಂದಾಗಿದ್ದೇವೆ' ಎಂದು ಅವರು ಹೇಳಿದ್ದಾರೆ.