Puneeth Rajkumar: ಪುನೀತ್ ರಾಜ್ಕುಮಾರ್ 'ದ್ವಿತ್ವ' ಸಿನಿಮಾದಲ್ಲಿ ನಟಿ ತ್ರಿಶಾರನ್ನು ಆಯ್ಕೆ ಮಾಡಿಕೊಂಡಿದ್ದೇಕೆ?
ಪುನೀತ್ ರಾಜ್ಕುಮಾರ್ ನಟನೆಯ 'ದ್ವಿತ್ವ' ಸಿನಿಮಾದಲ್ಲಿ ನಾಯಕಿಯಾಗಿರುವ ದಕ್ಷಿಣ ಭಾರತದ ಖ್ಯಾತ ನಟಿ ತ್ರಿಶಾ ಅವರ ಪಾತ್ರದ ಕುರಿತು ನಿರ್ದೇಶಕ ಪವನ್‌ಕುಮಾರ್‌ ಲವಲವಿಕೆ ಜೊತೆ ಮಾತನಾಡಿದ್ದಾರೆ.
Admin
0
6
(ಹರೀಶ್‌ ಬಸವರಾಜ್‌)
ನಿರ್ದೇಶಕ ಪವನ್‌ ಕುಮಾರ್‌ ಅವರು ಸ್ಯಾಂಡಲ್‌ವುಡ್‌ನ 'ಪವರ್‌ ಸ್ಟಾರ್' ಪುನೀತ್ ರಾಜ್‌ಕುಮಾರ್‌ಗೆ ಸಿನಿಮಾ ನಿರ್ದೇಶನ ಮಾಡುತ್ತಾರೆ ಎಂದಾಗಲೇ ಚಿತ್ರರಂಗದಲ್ಲಿ ಒಂದು ಹೊಸ ನಿರೀಕ್ಷೆ ಹುಟ್ಟಿತ್ತು. ಆ ಸಿನಿಮಾದ ವಿಶಿಷ್ಟ ಟೈಟಲ್‌ 'ದ್ವಿತ್ವ' ಕೂಡ ಸಾಕಷ್ಟು ಸದ್ದು ಮಾಡಿತು. ದಕ್ಷಿಣ ಭಾರತದ ಖ್ಯಾತ ನಟಿ ತ್ರಿಶಾ ಕೃಷ್ಣನ್‌ ಅವರು ಈ ಸಿನಿಮಾಗೆ ನಾಯಕಿಯಾಗುವ ಮೂಲಕ ಈ ಸಿನಿಮಾ ಇನ್ನಷ್ಟು ಕುತೂಹಲ ಕೆರಳಿಸಿತು. ಇದರಲ್ಲಿ ಪವರ್‌ ಸ್ಟಾರ್‌ಗೆ ಜೋಡಿಯಾಗುತ್ತಿರುವ ತ್ರಿಶಾ ಅವರು ಕಾರ್ಪೊರೇಟ್‌ ಕಂಪನಿಯೊಂದರ ಉದ್ಯೋಗಿಯ ಪಾತ್ರದಲ್ಲಿ ಕಾಣಿಸಿಕೊಳ್ಳುತ್ತಿದ್ದಾರೆ.
ಈ ಬಗ್ಗೆ ವಿವರಿಸಿರುವ ನಿರ್ದೇಶಕ ಪವನ್‌ ಕುಮಾರ್‌, 'ದ್ವಿತ್ವ ಸಿನಿಮಾದ ಕಥೆ ಯಂಗ್‌ ಲವ್‌ ಸ್ಟೋರಿಯಲ್ಲ. ಇದರ ಕಂಟೆಂಟ್‌ ಕೊಂಚ ಪ್ರಬುದ್ಧವಾಗಿದೆ. ಅಂತಹ ಕಥೆಗೆ ಅಷ್ಟೇ ಪ್ರಬುದ್ಧವಾಗಿ ನಟಿಸುವ ಕಲಾವಿದರ ಅಗತ್ಯವಿರುತ್ತದೆ. ಈ ನಿಟ್ಟಿನಲ್ಲಿ ನಟಿ ತ್ರಿಶಾ ಉತ್ತಮ ಎಂದು ನನಗೆ ಅನಿಸಿತು. ಅವರು ಬಹಳ ವರ್ಷಗಳಿಂದ ಹಲವು ಪಾತ್ರಗಳಲ್ಲಿ ನಟಿಸಿ ಅನುಭವಿಯಾಗಿದ್ದಾರೆ. ಪುನೀತ್ ರಾಜ್‌ಕುಮಾರ್‌ಗೂ ಮ್ಯಾಚ್‌ ಆಗುತ್ತಾರೆ. ಹಾಗಾಗಿ ಅವರೇ ನಾಯಕಿಯಾದದರು' ಎಂದಿದ್ದಾರೆ.
'ತ್ರಿಶಾರನ್ನು ನಾನು ನೇರವಾಗಿ ಭೇಟಿಯಾಗಿಲ್ಲ. ವರ್ಚುವಲ್‌ ಆಗಿ ಅವರ ಬಳಿ ಮಾತನಾಡಿ, ಸ್ಕ್ರಿಪ್ಟ್‌ ಕಳಿಸಿದ್ದೆ. ಅದನ್ನು ಓದಿ ಅವರು ಖುಷಿಯಾದರು. ಮೊನ್ನೆಯಷ್ಟೇ ಡೈಲಾಗ್‌ ವರ್ಷನ್‌ ಮತ್ತು ಸಂಪೂರ್ಣ ಚಿತ್ರಕಥೆ ಬರೆದಿದ್ದೇನೆ. ಎಲ್ಲಾ ಸಂಭಾಷಣೆಗಳನ್ನು ತ್ರಿಶಾಗೆ ಕಳಿಸಿದ್ದೆ. ಪ್ರತಿದಿನ ಅವರೊಂದಿಗೆ ಫೋನ್‌ನಲ್ಲಿ ಚರ್ಚೆ ಮಾಡುತ್ತಿದ್ದೇವೆ. ಅವರು ತಮ್ಮ ಪಾತ್ರಕ್ಕೆ ರೆಡಿಯಾಗುತ್ತಿದ್ದಾರೆ' ಎಂದು ಪವನ್‌ ಕುಮಾರ್‌ ಹೇಳಿದ್ದಾರೆ.
ಪುನೀತ್ ರಾಜ್ಕುಮಾರ್ ಮತ್ತು ತ್ರಿಶಾ ಈ ಹಿಂದೆ 'ಪವರ್‌' ಸಿನಿಮಾದಲ್ಲಿಒಟ್ಟಿಗೆ ನಟಿಸಿದ್ದರು. ಈಗ 'ದ್ವಿತ್ವ' ಸಿನಿಮಾದ ಮೂಲಕ ಎರಡನೇ ಬಾರಿಗೆ ಜೊತೆಯಾತ್ತಿದ್ದಾರೆ. ಪವನ್‌ ಕುಮಾರ್‌ ಅವರು ಸೆಪ್ಟೆಂಬರ್‌ನಿಂದ ಈ ಸಿನಿಮಾದ ಚಿತ್ರೀಕರಣ ಆರಂಭಿಸಲು ಪ್ಲಾನ್‌ ಮಾಡಿದ್ದಾರೆ. ಇದಕ್ಕೆ ಪೂರ್ಣಚಂದ್ರ ತೇಜಸ್ವಿ ಸಂಗೀತ ಸಂಯೋಜನೆ ಮಾಡುತ್ತಿದ್ದು, ಪ್ರೀತಾ ಜಯರಾಮ್‌ ಸಿನಿಮಾಟೋಗ್ರಫಿ ಇದೆ.
ನಾನು ಬರೆದ ಪಾತ್ರಕ್ಕೆ ಪ್ರಬುದ್ಧ ನಟಿಯೊಬ್ಬರು ಬೇಕಿತ್ತು. ತ್ರಿಶಾ ಅವರು ಲುಕ್‌ ಮತ್ತು ನಟನೆಯ ವಿಚಾರಲ್ಲಿ ಪ್ರಬುದ್ಧವಾಗಿದ್ದಾರೆ. ಅವರಿಗೆ ಕಥೆಯೂ ಇಷ್ಟವಾಯಿತು. ನನ್ನ ಸಿನಿಮಾದಲ್ಲಿ ನಾಯಕನಷ್ಟೇ, ನಾಯಕಿಯ ಪಾತ್ರಗಳೂ ಪವರ್‌ಫುಲ್‌ ಆಗಿರುತ್ತವೆ. ಪರ್ಫಾಮೆನ್ಸ್‌ ಚೆನ್ನಾಗಿರುವವರೇ ನಾಯಕಿಯರಾಗುತ್ತಾರೆ ಎಂದು ಹೇಳಿದ್ದಾರೆ ನಿರ್ದೆಶಕ ಪವನ್‌ ಕುಮಾರ್‌
ಪುನೀತ್ ರಾಜ್ಕುಮಾರ್ ಅವರ ಜತೆಗೆ ಎರಡನೇ ಬಾರಿಗೆ ನಟಿಸುತ್ತಿರುವುದು ಖುಷಿಯ ವಿಚಾರ. ಅದರಲ್ಲೂ ವಿಭಿನ್ನ ಕಥೆ ಮತ್ತು ಮೇಕಿಂಗ್‌ನಿಂದ ಗಮನ ಸೆಳೆಯುವ ಪವನ್‌ ಕುಮಾರ್‌ರಂಥ ನಿರ್ದೇಶಕರು ಈ ಸಿನಿಮಾದ ನಿರ್ದೇಶಕರಾಗಿದ್ದಾರೆ. ಇದರಲ್ಲಿನಟಿಸಲು ನಾನು ತುಂಬಾ ಎಕ್ಸೈಟ್‌ ಆಗಿದ್ದೇನೆ ಎಂದಿದ್ದಾರೆ ನಟಿ ತ್ರಿಶಾ ಕೃಷ್ಣನ್‌
