580 ವರ್ಷಗಳ ಬಳಿಕ ನ. 19ರಂದು ಅತಿ ದೀರ್ಘಾವಧಿ ಚಂದ್ರಗ್ರಹಣ

ಕೋಲ್ಕೊತಾ: ಕಳೆದ 580 ವರ್ಷಗಳಲ್ಲೇ ಸಂಭವಿಸಿರದ ಅತ್ಯಂತ ದೀರ್ಘಾವಧಿಯ ಭಾಗಶಃ ಚಂದ್ರಗ್ರಹಣವು ನವೆಂಬರ್ 19 ರಂದು ಸಂಭವಿಸಲಿದೆ. ಈಶಾನ್ಯ ಭಾರತದ ಕೆಲವು ರಾಜ್ಯಗಳಲ್ಲಿ ಮಾತ್ರ ಇದು ಗೋಚರವಾಗಲಿದೆ. ಕಾರ್ತಿಕ ಹುಣ್ಣಿಮೆಯಂದು ವೃಷಭ ರಾಶಿಯಲ್ಲಿ ಈ ಉಂಟಾಗಲಿದೆ. ಗ್ರಹಣದ ದಿನ ಚಂದ್ರನು ಕೃತಿಕ ನಕ್ಷತ್ರದಲ್ಲಿ ಇರಲಿದೆ. ''ನ. 19ರಂದು ಮಧ್ಯಾಹ್ನ 12.48 ರಿಂದ ಆರಂಭಗೊಳ್ಳುವ ಗ್ರಹಣ ಕಾಲವು ಸಂಜೆ 4.17 ರವರೆಗೆ ಇರಲಿದೆ. ಭಾರತದಲ್ಲಿ ಅರುಣಾಚಲ ಪ್ರದೇಶ ಮತ್ತು ಅಸ್ಸಾಂನಲ್ಲಿ ಮಾತ್ರವೇ ಗ್ರಹಣದ ಅಲ್ಪ-ಸ್ವಲ್ಪ ಸ್ಪರ್ಶ ಕಾಲವು ಕಾಣಸಿಗಲಿದೆ. ಅದು ಕೂಡ ಚಂದ್ರೋದಯ ಆದ ನಂತರ ಮಾತ್ರ. ಒಟ್ಟಾರೆ ಗ್ರಹಣ ಕಾಲವು ಮೂರು ಗಂಟೆ 28 ನಿಮಿಷ 24 ಸೆಕೆಂಡ್‌ ಇರಲಿದೆ. ಮಧ್ಯಾಹ್ನ 2.34ರ ವೇಳೆಗೆ ಶೇ. 97ರಷ್ಟು ಚಂದ್ರನ ಭಾಗವನ್ನು ಭೂಮಿಯ ನೆರಳು ಆವರಿಸಲಿದೆ,'' ಎಂದು ಎಂ.ಪಿ. ಬಿರ್ಲಾ ಪ್ಲ್ಯಾನೆಟೇರಿಯಂ ನಿರ್ದೇಶಕ ದೇಬಿಪ್ರಸಾದ್‌ ದುವಾರಿ ಅವರು ತಿಳಿಸಿದ್ದಾರೆ. 2018ರ ಜು. 27ರಂದು ಕಳೆದ ಬಾರಿ ಚಂದ್ರಗ್ರಹಣಕ್ಕೆ ದೇಶ ಸಾಕ್ಷಿಯಾಗಿತ್ತು. 2022ರ ಮೇ 16ರಂದು ಮುಂದಿನ ಸಂಭವಿಸಿದರೂ ಕೂಡ ಭಾರತದಲ್ಲಿ ಗೋಚರಿಸುವುದಿಲ್ಲ. ಮುಂದಿನ ವರ್ಷ ನ. 8 ರಂದು ಸಂಭವಿಸುವ ಚಂದ್ರಗ್ರಹಣ ಮಾತ್ರವೇ ಭಾರತದಲ್ಲಿ ಗೋಚರವಾಗಲಿದೆ. ಬ್ಲಡ್‌ ಮೂನ್‌ ಪ್ರತ್ಯಕ್ಷ ಸೂರ್ಯನ ಬೆಳಕಿನಲ್ಲಿನ ಕೆಂಪು ಬಣ್ಣದ ಕಿರಣಗಳು ಭೂಮಿಯ ವಾತಾವರಣ ಪ್ರವೇಶಿಸಿ, ಬಳಿಕ ಅಲ್ಪ ಪ್ರಮಾಣದಲ್ಲಿ ಬಾಗುತ್ತಾ ಚಂದ್ರನ ಮೇಲೆ ಬೀಳಲಿದೆ. ಇದರ ಪರಿಣಾಮವಾಗಿ ಗ್ರಹಣ ಸಮಯದಲ್ಲಿ ಚಂದ್ರನು ರಕ್ತಕೆಂಪು ಬಣ್ಣದಲ್ಲಿ ಗೋಚರವಾಗಲಿದ್ದಾನೆ. ಈಗ ಸಂಭವಿಸಲಿರುವುದು ಕೂಡ ಇದೇ ರೀತಿಯ ಗ್ರಹಣವಾಗಿದ್ದು, ಅಂದು 'ಬ್ಲಡ್‌ ಮೂನ್‌' ಕೌತುಕವನ್ನು ಕಣ್ಣುತುಂಬಿಕೊಳ್ಳಲು ಉತ್ತರ ಅಮೆರಿಕ, ಪೂರ್ವ ಏಷ್ಯಾ, ಆಸ್ಪ್ರೇಲಿಯಾ ಹಾಗೂ ಪೆಸಿಫಿಕ್‌ ಪ್ರಾಂತ್ಯದ ಜನರು ಕಾತುರತೆಯಿಂದಿದ್ದಾರೆ. 1440ನೇ ಇಸವಿಯ ಫೆ. 18 ರಂದು ಇದೇ ಮಾದರಿಯ ಅತ್ಯಂತ ದೀರ್ಘಾವಧಿಯ ಭಾಗಶಃ ಚಂದ್ರಗ್ರಹಣ ಸಂಭವಿಸಿತ್ತು. ಅದರ ಬಳಿಕ ಈಗ ಚಂದ್ರಗ್ರಹಣ ಉಂಟಾಗುತ್ತಿದೆ. ನ. 19ರ ಬಳಿಕ ಮತ್ತೆ ಇಷ್ಟು ದೀರ್ಘಾವಧಿಯ ಚಂದ್ರಗ್ರಹಣ ಉಂಟಾಗಲು 600ಕ್ಕೂ ಹೆಚ್ಚು ವರ್ಷಗಳನ್ನು ಕಾಯಬೇಕು! 2669ನೇ ಇಸವಿಯ ಫೆ. 8 ರಂದು ಪುನಃ ಇಂಥದ್ದೇ ಚಂದ್ರಗ್ರಹಣವು ಸಂಭವಿಸಲಿದೆ.