ಪ್ರಧಾನಿ ಮೋದಿ ಭೇಟಿಗಾಗಿ 815 ಕಿಮೀ ಪಾದಯಾತ್ರೆ..! ಕಾಶ್ಮೀರದ ಯುವಕನ ಕನಸು ನನಸಾಗುತ್ತಾ..?

ದೇಶದ ಪ್ರಧಾನಿಯನ್ನು ಭೇಟಿಯಾಗಿ ಅವರ ಜೊತೆ ಒಂದಾದ್ರೂ ಫೋಟೋ ತೆಗೆಸಿಕೊಳ್ಳಬೇಕು ಎಂದು ಪ್ರತಿ ದೇಶವಾಸಿಯ ಕನಸಾಗಿರುತ್ತದೆ. ಅದರಂತೆ ಪ್ರಸ್ತುತ ಪ್ರಧಾನ ಮಂತ್ರಿ ಅವರನ್ನು ಭೇಟಿಯಾಗಲು ಯುವಕನೋರ್ವ ಬರೋಬ್ಬರಿ 815 ಕಿಮೀ ಪ್ರಾರಂಭಿಸಿದ್ದಾನೆ. ಜಮ್ಮು ಕಾಶ್ಮೀರದ 28 ವರ್ಷದ ಫಾಹಿಮ್‌ ನಾಜೀರ್‌ ಶಾ ಎಂಬ ಯುವಕನೇ ಪ್ರಧಾನಿ ನರೇಂದ್ರ ಮೋದಿ ಅವರ ಭೇಟಿಗಾಗಿ ಪಾದಯಾತ್ರೆ ಪ್ರಾರಂಭಿಸಿದಾತ. ಮೋದಿ ಅವರ ದೊಡ್ಡ ಅಭಿಮಾನಿಯಾಗಿರುವ ನಾಜೀರ್‌ ಶಾ ಎರಡು ದಿನಗಳ ಹಿಂದೆ ಶ್ರೀನಗರದಿಂದ ʼನಮೋʼ ಪಾದಯಾತ್ರೆ ಆರಂಭಿಸಿದ್ದು, ಭಾನುವಾರ ಉದಮ್‌ಪುರಕ್ಕೆ ಬಂದು ತಲುಪಿದ್ದ. ವೃತ್ತಿಯಲ್ಲಿ ಎಲೆಕ್ಟ್ರಿಷಿಯನ್‌ ಆಗಿರುವ ಯುವಕ ಶ್ರೀನಗರದ ಶಾಲಿಮಾರ್‌ ಪ್ರದೇಶದ ನಿವಾಸಿ. ಈ ಕಷ್ಟಕರವಾದ ಪಯಣದ ಅಂತ್ಯದ ವೇಳೆ ಪ್ರಧಾನಿ ಮೋದಿ ಅವರನ್ನು ಭೇಟಿಯಾಗುವ ಕನಸು ನನಸಾಗುತ್ತದೆ ಎಂದು ನಾಜೀರ್‌ ಶಾ ನಂಬಿದ್ದು, ಮೋದಿ ಯುವಕನನ್ನು ಭೇಟಿಯಾಗ್ತಾರಾ ಎಂದು ಕಾದು ನೋಡಬೇಕಿದೆ. ಈಗಾಗಲೇ ಎರಡು ಮೂರು ಸಾರಿ ನರೇಂದ್ರ ಮೋದಿ ಅವರನ್ನು ಭೇಟಿಯಾಗಲು ಪ್ರಯತ್ನಪಟ್ಟಿದ್ದ ನಾಜೀರ್‌ ಶಾ ಯಶಸ್ವಿಯಾಗಿದ್ದಿಲ್ಲ. ಕಳೆದ ಬಾರಿ ಮೋದಿ ಭೇಟಿಗೆ ಬಂದಾಗ ಪ್ರಧಾನಿಯನ್ನು ಭೇಟಿಯಾಗಲು ಭದ್ರತಾ ಸಿಬ್ಬಂದಿ ಅನುಮತಿ ನೀಡಿದ್ದಿಲ್ಲ. ಇದರಿಂದ ನಾಜೀರ್‌ ಶಾಗೆ ಬಹಳಷ್ಟು ನಿರಾಸೆಯಾಗಿತ್ತು. ಈ ಹಿನ್ನೆಲೆ ಶತಾಯಗತಾಯ ಪ್ರಧಾನಿಯನ್ನು ಭೇಟಿಯಾಗಬೇಕೆಂದು ಪಾದಯಾತ್ರೆ ಆರಂಭಿಸಿದ್ದಾನೆ. ಪ್ರಧಾನಿ ನರೇಂದ್ರ ಮೋದಿ ಹಾಗೂ ಅಮಿತ್‌ ಶಾ ಭೇಟಿ ವೇಳೆ ಕೇಂದ್ರಾಡಳಿತ ಪ್ರದೇಶ ಕಾಶ್ಮೀರದ ಸಮಸ್ಯೆಗಳು, ವಿದ್ಯಾವಂತ ಯುವಕರಿಗೆ ಕಾಡುತ್ತಿರುವ ನಿರುದ್ಯೋಗ, ಕೈಗಾರಿಕಾ ಕ್ಷೇತ್ರದ ಅಭಿವೃದ್ಧಿ ಬಗ್ಗೆ ಮಾತನಾಡುವುದಾಗಿ ನಾಜೀರ್‌ ಶಾ ಹೇಳಿದ್ದಾನೆ.