ಕುರುಬರ ಹಟ್ಟಿಯಲ್ಲಿ ಕುರಿಗಾಹಿಗಳ ಜೊತೆ ಅಪ್ಪು; ಪುನೀತ್ ಸರಳತೆ ಕಂಡು 'ಗ್ರೇಟ್' ಎಂದ ಫ್ಯಾನ್ಸ್

ಡಾ. ರಾಜ್‌ಕುಮಾರ್ ಅವರಂತೆಯೇ ಅವರ ಪುತ್ರ, 'ಪವರ್ ಸ್ಟಾರ್‌' ಕೂಡ ಸರಳತೆಗೆ ಫೇಮಸ್ ಆದವರು. ಸಿನಿಮಾ ಕೆಲಸಗಳಿಂದ ಬಿಡುವು ಸಿಕ್ಕಾಗೆಲ್ಲ ಅವರು ಪ್ರವಾಸ ಕೈಗೊಳ್ಳುತ್ತಾರೆ. ಈಚೆಗೆ ಅವರು ಕೊಪ್ಪಳಕ್ಕೆ ಭೇಟಿ ನೀಡಿದ್ದರು. ಗಂಗಾವತಿಯಲ್ಲಿರುವ ಅಂಜನಾದ್ರಿ ಪರ್ವತಕ್ಕೆ ಅವರು ಹೋಗಿದ್ದರು. ಅಲ್ಲಿ ಬೆಟ್ಟಕ್ಕೆ ಪ್ರವೇಶ ನಿಷೇಧ ಮಾಡಿರುವುದರಿಂದ ಅಲ್ಲಿಯೇ ಸ್ಥಳೀಯ ಹಳ್ಳಿಗಳಲ್ಲಿ ಸುತ್ತಾಟ ನಡೆಸಿದ್ದಾರೆ. ಈ ವೇಳೆ ಕುರುಬರ ಹಟ್ಟಿಯಲ್ಲಿ ಕುರಿಗಾಹಿಗಳ ಜೊತೆಗೆ ಊಟ ಮಾಡಿದ್ದಾರೆ. ಆ ಫೋಟೋಗಳು ಈಗ ಸೋಶಿಯಲ್ ಮೀಡಿಯಾದಲ್ಲಿ ಸಖತ್ ವೈರಲ್ ಆಗಿವೆ. ಪುನೀತ್ ರಾಜ್‌ಕುಮಾರ್ ಅವರ ಸರಳತೆ ಕಂಡು ಫಿದಾ ಆಗಿರುವ ಫ್ಯಾನ್ಸ್, 'ಪುನೀತ್ ಸರಳತೆಯ ಸಾಮ್ರಾಟ' ಎಂದು ಕರೆದಿದ್ದಾರೆ. ಪುನೀತ್ ಅವರು ಗಂಗಾವತಿ ಸುತ್ತಮುತ್ತಲಿನ ಋಷಿಮುಖ ಪರ್ವತ, ಸಣಾಪೂರ, ಬಂಡಿ ಹರ್ಲಾಪುರ, ನಾರಾಯಣ ಪೇಟೆಗಳಿಗೆ ಭೇಟಿ ನೀಡಿ, ವಿಜಯನಗರದತ್ತ ಹೋಗುತ್ತಿದ್ದರು. ಈ ವೇಳೆ ಅವರಿಗೆ ಜಮೀನೊಂದರಲ್ಲಿ ಕುರಿಗಾಹಿಗಳು ಹಾಕಿರುವ ಹಟ್ಟಿ ಕಂಡಿದೆ. ಅಲ್ಲಿಗೆ ತೆರಳಿದ ಅಪ್ಪು, ಅವರೊಂದಿಗೆ ಮಾತುಕತೆ ನಡೆಸಿದ್ದಾರೆ. ಅಲ್ಲಿಯೇ ಕೆಲಹೊತ್ತು ಸಮಯ ಕಳೆದು, ಅವರೊಂದಿಗೆ ಊಟ ಮಾಡಿದ್ದಾರೆ. ನೆಲದ ಮೇಲೆ ಕರಿಗಂಬಳಿ ಹಾಸಿ, ಅದರ ಮೇಲೆ ಕುರಿಗಾಹಿಗಳು ಊಟ ಮಾಡುವ ಸಂಗಟಿ, ಹಾಲನ್ನು ಸವಿದು, ಸರಳತೆ ಮೆರೆದಿದ್ದಾರೆ. ಅವರೊಂದಿಗೆ ಫೋಟೋ ಕ್ಲಿಕ್ಕಿಸಿಕೊಂಡರು.ಸದ್ಯ ಆ ಫೋಟೋಗಳು ಈಗ ಸಖತ್ ವೈರಲ್ ಆಗಿವೆ. ನಂತರ ಆನೆಗೊಂದಿ ಸಮೀಪದ ಸಣಾಪೂರ ಕೆರೆ, ಸಣಾಪೂರ ಪಾಲ್ಸ್, ಕಲ್ಲಿನ ಸೇತುವೆ ಸೇರಿದಂತೆ ಇತರ ಸ್ಥಳಗಳನ್ನು ವಿಕ್ಷಣೆಯನ್ನು ಮಾಡಿದರು. ಇನ್ನು, ಪುನೀತ್ ಅವರನ್ನು ಕಂಡ ಅಭಿಮಾನಿಗಳು ಅವರೊಂದಿಗೆ ಫೋಟೋ ಕ್ಲಿಕ್ಕಿಸಿಕೊಂಡು ಸಂಭ್ರಮಿಸಿದರು. ಜೊತೆಗೆ ತುಂಗಭದ್ರಾ ನದಿ ದಡದಲ್ಲಿರುವ ಲೀ ವುಡನ್ ರೆಸಾರ್ಟ್ನಲ್ಲಿ ಸ್ಥಳೀಯ ಕಲಾವಿದರು ನಡೆಸಿಕೊಡುವ ಸಂಗೀತ ಕಾರ್ಯಕ್ರಮವನ್ನು ಪುನೀತ್ ವೀಕ್ಷಿಸಿದರು. ಈಚೆಗಷ್ಟೇ ಪುನೀತ್ ರಾಜ್‌ಕುಮಾರ್ ಶಿವಮೊಗ್ಗಕ್ಕೆ ಭೇಟಿ ನೀಡಿದ್ದರು. ಶಿವಮೊಗ್ಗದ ಗಾಜನೂರು ಸಮೀಪದ ಸಕ್ರೆಬೈಲು ಆನೆಬಿಡಾರದ ಕ್ರಾಲ್‌ಗೆ ಆಗಮಿಸಿದ್ದರು. ಡಾಕ್ಯುಮೆಂಟರಿ ಚಿತ್ರೀಕರಣಕ್ಕಾಗಿ ಅವರು ಬಂದಿದ್ದರು. ಆನೆಗಳನ್ನು ಅಪ್ಪು ಮುದ್ದಾಡುವ ದೃಶ್ಯ ಹಾಗೂ ಅಲ್ಲಿರುವ ಕುಂತಿ ಮತ್ತು ಧನುಷ್ ಹೆಸರಿನ ಆನೆಗಳಿಗೆ ಆಹಾರ ನೀಡುವ ದೃಶ್ಯಗಳನ್ನು ಶೂಟ್ ಮಾಡಲಾಗಿತ್ತು. ಸದ್ಯ 'ಯು-ಟರ್ನ್‌' ಸಿನಿಮಾ ಖ್ಯಾತಿಯ ನಿರ್ದೇಶಕ ಪವನ್‌ ಕುಮಾರ್ ನಿರ್ದೇಶನದ 'ದ್ವಿತ್ವ' ಸಿನಿಮಾದಲ್ಲಿ ಪುನೀತ್ ನಟಿಸುತ್ತಿದ್ದಾರೆ. ಈ ಸಿನಿಮಾವನ್ನು ಹೊಂಬಾಳೆ ಸಂಸ್ಥೆ ನಿರ್ಮಾಣ ಮಾಡುತ್ತಿದೆ. ಇದೊಂದು ಸೈಕಲಾಜಿಕಲ್ ಥ್ರಿಲ್ಲರ್ ಸಿನಿಮಾ. ತ್ರಿಷಾ ಕೃಷ್ಣನ್ ಈ ಸಿನಿಮಾದ ನಾಯಕಿ. 2019ರಲ್ಲಿಯೇ ಈ ಸಿನಿಮಾದ ಸ್ಕ್ರಿಪ್ಟ್ ಕೆಲಸ ನಡೆದಿತ್ತು. ಆದರೆ ಈಗ ಅನುಷ್ಠಾನ ಹಂತಕ್ಕೆ ಬಂದಿದೆ. 'ದ್ವಿತ್ವ'ಗೆ ಪ್ರೀತಾ ಜಯರಾಮನ್ ಛಾಯಾಗ್ರಹಣ ಮಾಡಲಿದ್ದಾರೆ. ಪೂರ್ಣಚಂದ್ರ ತೇಜಸ್ವಿ ಸಂಗೀತ ನೀಡುತ್ತಿದ್ದಾರೆ. ಇದರ ಜೊತೆಗೆ ಚೇತನ್‌ಕುಮಾರ್ ನಿರ್ದೇಶನದ ''ನಲ್ಲೂ ಪುನೀತ್ ಬ್ಯುಸಿ ಆಗಿದ್ದಾರೆ.