ಸಿಹಿ ಸುದ್ದಿ ಕೊಟ್ಟ ಕಿರುತೆರೆ ನಟಿ: ಎರಡನೇ ಮಗುವಿನ ನಿರೀಕ್ಷೆಯಲ್ಲಿ ದಿಶಾ ಮದನ್
ಕಿರುತೆರೆ ನಟಿ, ಸೋಷಿಯಲ್ ಮೀಡಿಯಾ ಸೆನ್ಸೇಷನ್ ದಿಶಾ ಮದನ್ ಗುಡ್ ನ್ಯೂಸ್ ಕೊಟ್ಟಿದ್ದಾರೆ. ನಟಿ ದಿಶಾ ಮದನ್ - ಶಶಾಂಕ್ ವಾಸುಕಿ ಗೋಪಾಲ್ ದಂಪತಿ ಮತ್ತೊಂದು ಮಗುವಿನ ನಿರೀಕ್ಷೆಯಲ್ಲಿದ್ದಾರೆ.
Admin
0
7
ಕಿರುತೆರೆ ನಟಿ, ಸೋಷಿಯಲ್ ಮೀಡಿಯಾ ಸೆನ್ಸೇಷನ್ ಗುಡ್ ನ್ಯೂಸ್ ಕೊಟ್ಟಿದ್ದಾರೆ. ನಟಿ ದಿಶಾ ಮದನ್ - ಶಶಾಂಕ್ ವಾಸುಕಿ ಗೋಪಾಲ್ ದಂಪತಿ ಮತ್ತೊಂದು ಮಗುವಿನ ನಿರೀಕ್ಷೆಯಲ್ಲಿದ್ದಾರೆ. ಮುಂದಿನ ವರ್ಷದ ಮಾರ್ಚ್ ಹೊತ್ತಿಗೆ ಎರಡನೇ ಮಗುವಿಗೆ ನಟಿ ದಿಶಾ ಮದನ್ ಜನ್ಮ ನೀಡಲಿದ್ದಾರೆ.
ಇನ್ಸ್ಟಾಗ್ರಾಮ್‌ನಲ್ಲಿ ಸಂತಸ ಹಂಚಿಕೊಂಡ ದಿಶಾ ಮದನ್
''ನಿಮ್ಮೊಂದಿಗೆ ಹಂಚಿಕೊಳ್ಳಲು ಒಂದು ಸಂತಸದ ವಿಚಾರವಿದೆ. ಕೆಲವು ದಿನಗಳಿಂದ ನಾನು ಕಾಣಿಸದೇ ಇರುವುದಕ್ಕೆ ಕಾರಣ ಇಲ್ಲಿದೆ. ಮಾರ್ಚ್ 2022ಕ್ಕಾಗಿ ನಾವು ಕಾಯುತ್ತಿದ್ದೇವೆ. ನಾವು ಮೂವರಿಂದ ನಾಲ್ವರಾಗುತ್ತಿದ್ದೇವೆ'' ಎಂದು ಸೋಷಿಯಲ್ ಮೀಡಿಯಾದಲ್ಲಿ ನಟಿ ದಿಶಾ ಮದನ್ ಬರೆದುಕೊಂಡಿದ್ದಾರೆ.
ಹಾಗೇ ತಮ್ಮ ಲವ್ ಜರ್ನಿ ಕುರಿತಾಗಿ ಒಂದು ವಿಡಿಯೋವನ್ನೂ ಇನ್ಸ್ಟಾಗ್ರಾಮ್‌ನಲ್ಲಿ ನಟಿ ದಿಶಾ ಮದನ್ ಹಂಚಿಕೊಂಡಿದ್ದಾರೆ. ''ಇದು ನಮ್ಮ ಕಥೆ.. ನಾವಿಬ್ಬರು (ದಿಶಾ ಮದನ್ - ಶಶಾಂಕ್ ವಾಸುಕಿ ಗೋಪಾಲ್) ಭೇಟಿಯಾಗಿದ್ದು 2016ರಲ್ಲಿ. 2017ರಲ್ಲಿ ನಮ್ಮ ಪ್ರೀತಿ ಅಧಿಕೃತವಾಯಿತು. ವೈವಾಹಿಕ ಬದುಕಿಗೆ ಕಾಲಿಟ್ವಿ. 2018ರಲ್ಲಿ ಮೊದಲ ಮಗುವಿನ ನಿರೀಕ್ಷೆಯಲ್ಲಿದ್ವಿ. 2019ರಲ್ಲಿ ಗಂಡು ಮಗು ಜನಿಸಿತು. 2022ರಲ್ಲಿ ನಮ್ಮ ಮೊದಲನೇ ಮಗ ಅಣ್ಣನಾಗಲಿದ್ದಾನೆ. 2022ರಲ್ಲಿ ನಾವು ಮೂವರಿಂದ ನಾಲ್ವರಾಗುತ್ತೇವೆ'' ಎಂದು ವಿಡಿಯೋ ಮೂಲಕ ನಟಿ ದಿಶಾ ಮದನ್ ಹಾಗೂ ಶಶಾಂಕ್ ವಾಸುಕಿ ಗೋಪಾಲ್ ದಂಪತಿ ತಿಳಿಸಿದ್ದಾರೆ.
'ಕುಲವಧು' ಧಾರಾವಾಹಿಯಲ್ಲಿ ಅಭಿನಯಿಸಿದ್ದ ದಿಶಾ ಮದನ್
ನಟಿ ದಿಶಾ ಮದನ್ ಮೊದಲು ಕಿರುತೆರೆ ಲೋಕಕ್ಕೆ ಕಾಲಿಟ್ಟಿದ್ದು 'ಡ್ಯಾನ್ಸಿಂಗ್ ಸ್ಟಾರ್' ರಿಯಾಲಿಟಿ ಶೋ ಮೂಲಕ. 'ಡ್ಯಾನ್ಸಿಂಗ್ ಸ್ಟಾರ್'ನಲ್ಲಿ ಸ್ಪರ್ಧಿಯಾಗಿ ದಿಶಾ ಮದನ್ ಭಾಗವಹಿಸಿದ್ದರು. ಸುನಾಮಿ ಕಿಟ್ಟಿ ಜೊತೆ ಜೋಡಿಯಾಗಿದ್ದ ದಿಶಾ ಮದನ್ 'ಡ್ಯಾನ್ಸಿಂಗ್ ಸ್ಟಾರ್' ರಿಯಾಲಿಟಿ ಶೋನಲ್ಲಿ ವಿಜೇತರಾಗಿ ಹೊರಹೊಮ್ಮಿದರು.
ಬಳಿಕ ಕಲರ್ಸ್ ಕನ್ನಡ ವಾಹಿನಿಯಲ್ಲಿ ಪ್ರಸಾರವಾಗುತ್ತಿದ್ದ 'ಕುಲವಧು' ಧಾರಾವಾಹಿಯಲ್ಲಿ ವಚನಾ ಪಾತ್ರಕ್ಕೆ ಮೊದಲು ಬಣ್ಣ ಹಚ್ಚಿದ್ದವರು ಇದೇ ದಿಶಾ ಮದನ್. ಬಳಿಕ ಕಾರಣಾಂತರಗಳಿಂದ 'ಕುಲವಧು' ಧಾರಾವಾಹಿಯಿಂದ ನಟಿ ದಿಶಾ ಮದನ್ ಹೊರಬಂದರು. 2020ರಲ್ಲಿ ತೆರೆಗೆ ಬಂದ 'ಫ್ರೆಂಚ್ ಬಿರಿಯಾನಿ' ಚಿತ್ರದಲ್ಲಿ ನಟಿ ದಿಶಾ ಮದನ್ ಅಭಿನಯಿಸಿದ್ದರು.
ದಿಶಾ ಮದನ್-ಶಶಾಂಕ್‌ರದ್ದು ಲವ್ ಕಮ್ ಅರೇಂಜ್ಡ್ ಮ್ಯಾರೇಜ್
2016ರಲ್ಲಿ ಶಶಾಂಕ್ ವಾಸುಕಿ ಗೋಪಾಲ್‌ರನ್ನು ನಟಿ ದಿಶಾ ಮದನ್ ಭೇಟಿ ಮಾಡಿದರು. ಬಳಿಕ ಪರಿಚಯ ಸ್ನೇಹವಾಗಿ, ಸ್ನೇಹ ಪ್ರೀತಿಗೆ ತಿರುಗಿತು. ಇಬ್ಬರ ಪ್ರೀತಿಗೆ ಕುಟುಂಬಸ್ಥರು ಸಮ್ಮತಿ ನೀಡಿದ ಬಳಿಕ ನಟಿ ದಿಶಾ ಮದನ್ - ಶಶಾಂಕ್ ವಾಸುಕಿ ಗೋಪಾಲ್ ವೈವಾಹಿಕ ಬದುಕಿಗೆ ನಾಂದಿ ಹಾಡಿದರು. 2019ರಲ್ಲಿ ಗಂಡು ಮಗುವಿಗೆ ತಂದೆ - ತಾಯಿಯಾದ ಈ ದಂಪತಿ ಇದೀಗ ಎರಡನೇ ಮಗುವಿನ ನಿರೀಕ್ಷೆಯಲ್ಲಿದ್ದಾರೆ. ಸಂತಸದ ಸುದ್ದಿ ಹಂಚಿಕೊಂಡ ದಿಶಾ ಮದನ್ - ಶಶಾಂಕ್ ವಾಸುಕಿ ಗೋಪಾಲ್ ದಂಪತಿಗಳಿಗೆ ಶುಭಾಶಯಗಳ ಮಹಾಪೂರವೇ ಹರಿದುಬರುತ್ತಿದೆ.
