'ಪ್ಯಾನ್ ಇಂಡಿಯಾ ಸ್ಟಾರ್‌' ಪ್ರಭಾಸ್‌ ಹೊಸ ಸಿನಿಮಾಗೆ ಆಯ್ಕೆಯಾದ ಬಾಲಿವುಡ್‌ ಬ್ಯೂಟಿ!

ಟಾಲಿವುಡ್ ನಟ , ಈಗ ಪ್ಯಾನ್ ಇಂಡಿಯಾ ಸ್ಟಾರ್ ಆಗಿದ್ದಾರೆ. ಬರೀ ಟಾಲಿವುಡ್ ಮಾತ್ರವಲ್ಲ, ದೇಶದ ಬೇರೆ ಬೇರೆ ಭಾಷೆಗಳ ಸಿನಿಪ್ರಿಯರನ್ನೂ ಗಮನದಲ್ಲಿಟ್ಟುಕೊಂಡು, ಅವರಿಗೆ ಸಿನಿಮಾ ಮಾಡಲಾಗುತ್ತಿದೆ. ಬಜೆಟ್ ಕೂಡ ದುಬಾರಿ ಆಗಿರುತ್ತದೆ. ಪ್ರಭಾಸ್‌ ಅವರ ಒಂದು ಸಿನಿಮಾಕ್ಕೆ ಏನಿಲ್ಲವೆಂದರೂ 300 ಕೋಟಿ ರೂ. ಮೇಲೆ ಬಂಡವಾಳ ಹೂಡಿಕೆ ಆಗುತ್ತದೆ. ಸದ್ಯ ಇಂಥ ಸ್ಟಾರ್ ನಟ ಸಿನಿಮಾವೊಂದಕ್ಕೆ ಬಾಲಿವುಡ್‌ನ ಸ್ಟಾರ್ ನಟಿಯೊಬ್ಬರು ಆಯ್ಕೆಯಾಗುವ ಸಾಧ್ಯತೆ ಇದೆ ಎಂಬ ಮಾತುಗಳು ಕೇಳಿಬಂದಿವೆ! ಅಷ್ಟಕ್ಕೂ ಆ ನಟಿ ಯಾರು? ಕತ್ರಿನಾ ಕೈಫ್‌! ಪ್ರಭಾಸ್ ಜೊತೆಗೆ ಕತ್ರಿನಾ ಟಾಲಿವುಡ್‌ನ ಸ್ಟಾರ್‌ ನಟರ ಸಿನಿಮಾಗಳಲ್ಲಿ ಬಾಲಿವುಡ್‌ನ ಸ್ಟಾರ್‌ ನಟಿಯರು ಕಾಣಿಸಿಕೊಳ್ಳುವ ಟ್ರೆಂಡ್‌ ಹೆಚ್ಚುತ್ತಿದೆ. ಈಗಾಗಲೇ ದೀಪಿಕಾ ಪಡುಕೋಣೆ, ಅಲಿಯಾ ಭಟ್‌ ಮುಂತಾದವರು ತೆಲುಗಿನ ಸ್ಟಾರ್‌ ನಟರಿಗೆ ನಾಯಕಿಯಾಗಿರುವ ಸಿನಿಮಾಗಳು ಸೆಟ್ಟೇರಿವೆ. ಇಂಥ ನಟಿಯರ ಲಿಸ್ಟ್‌ಗೆ ಈಗ ಹೊಸ ಸೇರ್ಪಡೆ ಕತ್ರಿನಾ ಕೈಫ್‌. ನಟ ಪ್ರಭಾಸ್‌ ಅವರ ಹೊಸ ಸಿನಿಮಾದಲ್ಲಿನಾಯಕಿಯಾಗಿ ಕಾಣಿಸಿಕೊಳ್ಳುವ ಸಾಧ್ಯತೆ ಇದೆ ಎನ್ನಲಾಗುತ್ತಿದೆ. ಪ್ರಭಾಸ್‌ಗೆ ಸಿದ್ದಾರ್ಥ್‌ ಆನಂದ್ ಡೈರೆಕ್ಷನ್‌! 'ಬ್ಯಾಂಗ್‌ ಬ್ಯಾಂಗ್‌', 'ವಾರ್‌'ನಂತಹ ಆ್ಯಕ್ಷನ್‌ ಸಿನಿಮಾಗಳನ್ನು ನಿರ್ದೇಶಿಸಿದ್ದ ಸಿದ್ಧಾರ್ಥ್‌ ಆನಂದ್‌ ಅವರ ಈ ಮೆಗಾ ಬಜೆಟ್‌ ಸಿನಿಮಾದಲ್ಲಿ ಪ್ರಭಾಸ್‌ ನಾಯಕರಾಗಿರುವುದು ಖಚಿತವಾಗಿದೆ. ಇದೀಗ ಅವರ ಜೊತೆಗೆ ರೊಮ್ಯಾನ್ಸ್‌ ಮಾಡಲು ಕತ್ರಿನಾ ಕೈಫ್‌ರನ್ನು ಕರೆ ತರಲು ನಿರ್ಧರಿಸಲಾಗಿದೆ. ಈ ಆ್ಯಕ್ಷನ್‌ ಥ್ರಿಲ್ಲರ್‌ ಸಿನಿಮಾದಲ್ಲಿ ಪ್ರಭಾಸ್‌ಗೆ ಜೋಡಿಯಾಗಲು ಕತ್ರಿನಾ ಕೂಡ ಒಪ್ಪಿದ್ದಾರೆ ಎಂದು ಹೇಳಲಾಗುತ್ತಿದೆ. ಈ ಬಗ್ಗೆ ಅಧಿಕೃತ ಹೇಳಿಕೆ ಹೊರಬೀಳಬೇಕಾಗಿದೆ. ಪ್ರಭಾಸ್‌ ಮತ್ತು ಕತ್ರಿನಾ ಕೈಫ್‌ ಜೋಡಿಯನ್ನು ತೆರೆಯ ಮೇಲೆ ನೋಡಲು ಸಿನಿಪ್ರಿಯರು ಕಾತರರಾಗಿದ್ದಾರೆ. ಪ್ರಭಾಸ್ ಕೈಯಲ್ಲಿವೆ ಸಿಕ್ಕಾಪಟ್ಟೆ ಸಿನಿಮಾಗಳು 'ಬಾಹುಬಲಿ' ನಂತರ 'ಸಾಹೋ' ಚಿತ್ರದಲ್ಲಿ ಪ್ರಭಾಸ್ ನಟಿಸಿದ್ದರು. ಆ ಸಿನಿಮಾ ಹೇಳಿಕೊಳ್ಳುವಂತಹ ಯಶಸ್ಸು ಪಡೆಯಲಿಲ್ಲ. ನಂತರ ಶುರು ಮಾಡಿದ 'ರಾಧೆ ಶ್ಯಾಮ್‌' ಕೆಲಸಗಳು ಇನ್ನೂ ಕೂಡ ಮುಗಿದಿಲ್ಲ. ಮೂರು ವರ್ಷದಿಂದ ಆ ಸಿನಿಮಾದ ಕೆಲಸಗಳು ನಡೆಯುತ್ತಲೇ ಇವೆ. ಆದ್ದರಿಂದ ಪ್ರಭಾಸ್ ಈಗ ಸಾಲು ಸಾಲು ಸಿನಿಮಾ ಒಪ್ಪಿಕೊಂಡಿದ್ದಾರೆ. ಪ್ರಶಾಂತ್ ನೀಲ್ ಜೊತೆಗೆ 'ಸಲಾರ್' ಶುರು ಮಾಡಿದ್ದು, ಒಂದು ಹಂತದ ಶೂಟಿಂಗ್ ಕೂಡ ಮುಕ್ತಾಯಗೊಂಡಿದೆ. ಶ್ರುತಿ ಹಾಸನ್ ಈ ಸಿನಿಮಾದ ನಾಯಕಿ. ನಂತರ ನಾಗ್ ಅಶ್ವಿನ್ ನಿರ್ದೇಶನದ ಹೊಸ ಸಿನಿಮಾದಲ್ಲಿ ಅಮಿತಾಭ್ ಬಚ್ಚನ್, ದೀಪಿಕಾ ಪಡುಕೋಣೆ ಜೊತೆಗೆ ಪ್ರಭಾಸ್ ನಟಿಸಲಿದ್ದಾರೆ. ಸೈಫ್ ಅಲಿ ಖಾನ್, ಕೃತಿ ಸನೋನ್ ಜೊತೆಗೆ 'ಆದಿಪುರುಷ್' ಸಿನಿಮಾ ಕೂಡ ಪ್ರಭಾಸ್ ಮಾಡಲಿದ್ದಾರೆ!