'ಸಲಗ'ದಲ್ಲಿ ನಡೆಯಲಿದೆ ಡಾಲಿ ಧನಂಜಯ್, ದುನಿಯಾ ವಿಜಯ್ ಜಿದ್ದಾ ಜಿದ್ದಿ ಜುಗಲ್‌ಬಂಧಿ
ನಟ ದುನಿಯಾ ವಿಜಯ್ ಹಾಗೂ ಡಾಲಿ ಧನಂಜಯ್ ಅವರ 'ಸಲಗ' ಸಿನಿಮಾ ರಿಲೀಸ್‌ಗೆ ರೆಡಿಯಿದೆ. ಈ ಚಿತ್ರದಲ್ಲಿ ವಿಜಯ್-ಧನಂಜಯ ಜುಗಲ್‌ಬಂಧಿಯ ದೃಶ್ಯವಿದೆ. ಅವರಿಬ್ಬರ ದೃಶ್ಯ ಬಂದಾಗ ವಿಷಲ್‌ ಹೊಡೆಯುವಂತಹ ಸನ್ನಿವೇಶ ಸೃಷ್ಟಿಯಾಗುತ್ತದೆ.
Admin
0
5
(ಹರೀಶ್ ಬಸವರಾಜ್)
ಸರ್ಕಾರ ಚಿತ್ರಮಂದಿರದಲ್ಲಿ ಶೇ.100 ಸೀಟು ಭರ್ತಿಗೆ ಅನುಮತಿ ನೀಡಿದ್ದೇ ತಡ, ನಟ ದುನಿಯಾ ವಿಜಯ್ ಅವರ ‘ಸಲಗ’ ಸಿನಿಮಾವನ್ನು ಅಕ್ಟೋಬರ್‌ 14ಕ್ಕೆ ಬಿಡುಗಡೆ ಮಾಡುವುದಾಗಿ ಚಿತ್ರತಂಡ ಅನೌನ್ಸ್‌ ಮಾಡಿದೆ. ಈ ಸಿನಿಮಾದಲ್ಲಿ ದುನಿಯಾ ವಿಜಯ್ ನಾಯಕರಾಗಿದ್ದಾರೆ. ಇದರಲ್ಲಿ ಡಾಲಿ ಧನಂಜಯ ಕೂಡ ಪ್ರಮುಖ ಪಾತ್ರವನ್ನು ಪೋಷಿಸಿದ್ದು, ಸಿನಿಮಾದಲ್ಲಿ ಇವರಿಬ್ಬರ ಜಿದ್ದಾಜಿದ್ದಿ ಪ್ರೇಕ್ಷಕರಿಗೆ ಹಬ್ಬದೂಟವನ್ನು ನೀಡಲಿದೆ. ವ್ಯವಸ್ಥೆ ವಿರುದ್ಧ ಕೆಲ ವ್ಯಕ್ತಿಗಳು ತಿರುಗಿ ಬಿದ್ದಾಗ ಅಂಥವರ ಬದುಕು ಹೇಗಿರುತ್ತದೆ, ಅದಕ್ಕೆ ವ್ಯವಸ್ಥೆ ಹೇಗೆ ಕಾರಣೀಭೂತವಾಗುತ್ತದೆ ಎಂಬಂತಹ ನೈಜ ಘಟನೆಗಳನ್ನು ಇಟ್ಟುಕೊಂಡು ನಿರ್ದೇಶಕ ವಿಜಯ್ ರೋಚಕವಾಗಿ ಚಿತ್ರೀಕರಿಸಿದ್ದಾರೆ.
‘ದುನಿಯಾ ವಿಜಯ್ ‘ಸಲಗ’ ಹೆಸರಿನ ವ್ಯಕ್ತಿಯ ಪಾತ್ರ ಪೋಷಿಸಿದ್ದು, ಧನಂಜಯ ‘ಸಾಮ್ರಾಟ್‌’ ಎಂಬ ಖಡಕ್‌ ಪೊಲೀಸ್‌ ಅಧಿಕಾರಿಯಾಗಿದ್ದಾರೆ. ಧನಂಜಯ ಇದೇ ಮೊದಲ ಬಾರಿಗೆ ಪೊಲೀಸ್‌ ಅಧಿಕಾರಿಯಾಗಿದ್ದು, ಅದಕ್ಕೆ ಕರ್ನಾಟಕದ ಹಲವು ಪೊಲೀಸ್‌ ಅಧಿಕಾರಿಗಳೇ ಸ್ಫೂರ್ತಿ ಎಂದು ನಿರ್ದೇಶಕ ದುನಿಯಾ ವಿಜಯ್ ತಿಳಿಸಿದ್ದಾರೆ.
‘ನಾನು ಮತ್ತು ನನ್ನ ತಂಡ ಈ ಕಥೆಯನ್ನು ಚರ್ಚೆ ಮಾಡುವಾಗ ಸಾಮ್ರಾಟ್‌ ಪಾತ್ರಕ್ಕೆ ಧನಂಜಯ ಅವರನ್ನು ಹಾಕಿದರೆ ಹೇಗೆ ಎಂಬ ಮಾತು ಬಂತು. ಧನು ಈ ಪಾತ್ರಕ್ಕೆ ಪಕ್ಕಾ ಸೂಟ್‌ ಆಗುತ್ತಾರೆ ಎಂದು ನನಗೂ ಎನಿಸಿತು. ಸೆಟ್‌ನಲ್ಲಿಯೂ ಯುನಿಫಾರ್ಮ್ ಧರಿಸಿ ಧನಂಜಯ ಬಂದಾಗ ಒಂದು ಕ್ಷಣ ಅವಾಕ್ಕಾದೆ. ಪಕ್ಕಾ ಎನ್‌ಕೌಂಟರ್‌ ಸ್ಪೆಷಲಿಸ್ಟ್‌ ಥರ ಧನಂಜಯ ಕಾಣುತ್ತಿದ್ದರು. ಜತೆಗೆ ಪ್ರಾಮಾಣಿಕತೆಯೇ ಯೂನಿಫಾರ್ಮ್ ಧರಿಸಿ ಬಂದಿತೇನೋ ಎಂಬ ಭಾವನೆ ನನಗೆ ಮೂಡಿತು. ನನ್ನ ಮತ್ತು ಧನಂಜಯ ನಡುವಿನ ಸಂಭಾಷಣೆ, ದೃಶ್ಯಗಳು ಪ್ರೇಕ್ಷಕರಿಗೆ ಖಂಡಿತ ಇಷ್ಟವಾಗುತ್ತವೆ. ಮಾಸ್‌ ಪ್ರೇಕ್ಷಕರಿಗೆ ಇದು ಹಬ್ಬದೂಟ ಎನ್ನಬಹುದು’ ಎಂದು ಹೇಳುತ್ತಾರೆ ದುನಿಯಾ ವಿಜಯ್.
‘ಸಲಗ' ಎಂಬ ಹೆಸರು ಕೇಳಿದ ತಕ್ಷಣ ಇದೊಂದು ಮಾಸ್‌ ಸಿನಿಮಾ ಎನ್ನುತ್ತಾರೆ. ಹೌದು, ಇದು ಮಾಸ್‌ ಸಿನಿಮಾ. ಆದರೆ ಅದರೊಳಗೆ ಒಂದು ಮಾನವೀಯ ಮೌಲ್ಯವಿದೆ, ಭಾವನಾತ್ಮಕ ಕಥೆಯಿದೆ. ಹಲವು ದೃಶ್ಯಗಳು ಪ್ರೇಕ್ಷಕನಿಗೆ ಸಿಕ್ಕಾಪಟ್ಟೆ ಕನೆಕ್ಟ್ ಆಗುತ್ತವೆ. ‘ದುನಿಯಾ’ ಸಿನಿಮಾ ಬಗ್ಗೆ ಕೂಡ ಆರಂಭದಲ್ಲಿ ಇದೊಂದು ರೌಡಿಸಂ ಸಿನಿಮಾ, ಇದರಲ್ಲಿ ಫ್ಯಾಮಿಲಿ ಆಡಿಯನ್ಸ್‌ ನೋಡುವಂತಹದ್ದು ಏನಿರುತ್ತದೆ ಎಂದಿದ್ದರು. ಆದರೆ ಬಿಡುಗಡೆಯಾದ ನಂತರ ಜನ ಕನೆಕ್ಟ್ ಆದ ರೀತಿಯೇ ಅನನ್ಯ. ಈ ಸಿನಿಮಾದಲ್ಲಿಯೂ ಅದೇ ಆಗುತ್ತದೆ’ ಎನ್ನುತ್ತಾರೆ ನಟ ದುನಿಯಾ ವಿಜಯ್.
ವಿಜಯ್-ಧನಂಜಯ ಜುಗಲ್‌ಬಂಧಿಯ ದೃಶ್ಯಗಳಲ್ಲಿ ಹಿನ್ನೆಲೆ ಸಂಗೀತ ಕೂಡ ಪ್ರಮುಖ ಪಾತ್ರ ವಹಿಸಿದೆಯಂತೆ. ತೆರೆಮೇಲೆ ಇಬ್ಬರೂ ಒಟ್ಟಿಗೆ ಬಂದಾಗಲೆಲ್ಲಾ ವಿಷಲ್‌ ಹೊಡೆಯುವಂತಹ ಸನ್ನಿವೇಶ ಸೃಷ್ಟಿಯಾಗುತ್ತದೆ. ಕೆಲ ಬಾರಿ ಡಾಲಿ ಧನಂಜಯ ಖಡಕ್‌ ಡೈಲಾಗ್‌ಗಳನ್ನು ಹೊಡೆದರೆ, ದುನಿಯಾ ವಿಜಯ್ ಅದಕ್ಕೆ ನೀಡುವ ಮಾತಿನ ತಿರುಗೇಟು ರೋಚಕವಾಗಿದೆ ಎಂದು ಸಿನಿಮಾದ ತಾಂತ್ರಿಕ ವರ್ಗದ ಮೂಲಗಳು ತಿಳಿಸಿವೆ.
