25 ಲಕ್ಷ ರೂಪಾಯಿ ಮೋಸ: ಇಬ್ಬರು ಉದ್ಯಮಿಗಳ ವಿರುದ್ಧ ದೂರು ದಾಖಲಿಸಿದ ನಟಿ ಸ್ನೇಹಾ
25 ಲಕ್ಷ ರೂಪಾಯಿ ವಂಚಿಸಿದ ಇಬ್ಬರು ಉದ್ಯಮಿಗಳ ವಿರುದ್ಧ ನಟಿ ಸ್ನೇಹಾ ಹಾಗೂ ಪ್ರಸನ್ನ ದಂಪತಿ ಪೊಲೀಸ್ ಠಾಣೆಗೆ ದೂರು ನೀಡಿದ್ದಾರೆ.
Admin
0
6
ಕಾಲಿವುಡ್ ನಟಿ ಸ್ನೇಹಾ ಯಾರಿಗ್ತಾನೆ ಗೊತ್ತಿಲ್ಲ ಹೇಳಿ.. ತಮ್ಮ ನಗುವಿನ ಮೂಲಕವೇ ಹಲವರ ಹೃದಯ ಗೆದ್ದ ಬೆಡಗಿ ಸ್ನೇಹಾ. ಕಾಲಿವುಡ್‌ನಲ್ಲಿ ಅವರಿಗೆ ‘ಪುನ್ನಗೈ ಅರಸಿ’ ಅಂತಲೇ ಅಭಿಮಾನಿಗಳು ಪ್ರೀತಿಯಿಂದ ಕರೆಯುತ್ತಾರೆ. ಸಿನಿಮಾಗಳ ವಿಚಾರಕ್ಕೆ ಹೆಚ್ಚು ಸುದ್ದಿಯಾಗುತ್ತಿದ್ದ ನಟಿ ಸ್ನೇಹಾ ಗಾಸಿಪ್‌ಗಳಿಂದ, ವಿವಾದಗಳಿಂದ ಸದ್ದು ಮಾಡಿದ್ದು ತೀರಾ ಕಡಿಮೆ. ಇಂತಿಪ್ಪ ನಟಿ ಸ್ನೇಹಾ ಇದೀಗ ಪೊಲೀಸ್ ಠಾಣೆ ಮೆಟ್ಟಿಲೇರಿದ್ದಾರೆ.
ಇಬ್ಬರು ಉದ್ಯಮಿಗಳ ವಿರುದ್ಧ ದೂರು ನೀಡಿದ ನಟಿ ಸ್ನೇಹಾ
2012ರಲ್ಲಿ ನಟ ಅವರೊಂದಿಗೆ ನಟಿ ಸ್ನೇಹಾ ದಾಂಪತ್ಯ ಜೀವನಕ್ಕೆ ಕಾಲಿಟ್ಟರು. ನಟಿ ಸ್ನೇಹಾ ಹಾಗೂ ಪ್ರಸನ್ನ ದಂಪತಿಗೆ ಇಬ್ಬರು ಮಕ್ಕಳಿದ್ದಾರೆ. ಚೆನ್ನೈನಲ್ಲಿ ನೆಲೆಸಿರುವ ನಟಿ ಸ್ನೇಹಾ ಹಾಗೂ ಪ್ರಸನ್ನ ದಂಪತಿ ಇದೀಗ ಮೋಸ ಹೋಗಿದ್ದಾರೆ. ಅವರಿಗೆ 25 ಲಕ್ಷ ರೂಪಾಯಿ ನಷ್ಟ ಉಂಟಾಗಿದೆ.
ಸೀಮೆಂಟ್ ಕಂಪನಿಯೊಂದಕ್ಕೆ ಬಂಡವಾಳ ಹಾಕಲು ಸ್ನೇಹಿತ ಪ್ರಶಾಂತ್ ಎಂಬುವರು ಪ್ರಸನ್ನ ಅವರಿಗೆ ಸಲಹೆ ನೀಡಿದ್ದರಂತೆ. ಪ್ರಶಾಂತ್ ಕೊಟ್ಟಿದ್ದ ಸಲಹೆ ಮೇರೆಗೆ ಪ್ರತಿ ತಿಂಗಳು ಆದಾಯ ಬರುತ್ತದೆ ಎಂಬ ನಿರೀಕ್ಷೆಯಲ್ಲಿ ನಟಿ ಸ್ನೇಹಾ ಮತ್ತು ಪ್ರಸನ್ನ ದಂಪತಿ ಸೀಮೆಂಟ್ ಕಂಪನಿಯ ಮೇಲೆ 25 ಲಕ್ಷ ರೂಪಾಯಿ ಬಂಡವಾಳ ಹಾಕಿದ್ದರು. ಆದರೆ, ಅದರಿಂದ ಸ್ನೇಹಾ ದಂಪತಿ ಯಾವುದೇ ಆದಾಯ ಸಿಕ್ಕಿಲ್ಲ. ಹೀಗಾಗಿ, 25 ಲಕ್ಷ ರೂಪಾಯಿ ವಂಚಿಸಿದ ಇಬ್ಬರು ಉದ್ಯಮಿಗಳ ವಿರುದ್ಧ ನಟಿ ಸ್ನೇಹಾ ಹಾಗೂ ಪ್ರಸನ್ನ ದಂಪತಿ ಪೊಲೀಸ್ ಠಾಣೆಗೆ ದೂರು ನೀಡಿದ್ದಾರೆ.
ತನಿಖೆ ನಡೆಸುತ್ತಿರುವ ಪೊಲೀಸರು
ಇಬ್ಬರು ಉದ್ಯಮಿಗಳ ವಿರುದ್ಧ ಕಣತ್ತೂರು ಪೊಲೀಸ್ ಠಾಣೆಯಲ್ಲಿ ನಟಿ ಸ್ನೇಹಾ ಹಾಗೂ ಪ್ರಸನ್ನ ದೂರು ದಾಖಲಿಸಿದ್ದಾರೆ. ಸೀಮೆಂಟ್ ಕಂಪನಿಯೊಂದಕ್ಕೆ 25 ಲಕ್ಷ ರೂಪಾಯಿ ಬಂಡವಾಳ ಹೂಡಿದ್ದು, ತಮಗೆ ಮೋಸವಾಗಿದೆ ಎಂದು ನಟಿ ಸ್ನೇಹಾ ದೂರಿನಲ್ಲಿ ಉಲ್ಲೇಖಿಸಿದ್ದಾರೆ. ಕೂಡಲೆ ಕಠಿಣ ಕ್ರಮ ಕೈಗೊಳ್ಳುವಂತೆಯೂ ಪೊಲೀಸರಲ್ಲಿ ನಟಿ ಸ್ನೇಹಾ ಮನವಿ ಮಾಡಿದ್ದಾರೆ. ದೂರು ಸ್ವೀಕರಿಸಿರುವ ಪೊಲೀಸರು ಪ್ರಾಥಮಿಕ ತನಿಖೆ ಆರಂಭಿಸಿದ್ದಾರೆ. ಸೀಮೆಂಟ್ ಕಂಪನಿಯ ಇಬ್ಬರು ಉದ್ಯಮಿಗಳು ವಿಚಾರಣೆಗೆ ಹಾಜರಾಗುವಂತೆ ಪೊಲೀಸರು ಸಮನ್ಸ್ ಜಾರಿ ಮಾಡಿದ್ದಾರೆ.
ದಕ್ಷಿಣ ಭಾರತದ ಖ್ಯಾತ ನಟಿ ಸ್ನೇಹಾ
1981ರಲ್ಲಿ ತೆಲುಗು ಕುಟುಂಬದಲ್ಲಿ ಮುಂಬೈನಲ್ಲಿ ಜನಿಸಿದ ಸ್ನೇಹಾ ಬೆಳೆದಿದ್ದೆಲ್ಲಾ ದುಬೈನಲ್ಲಿ. ಮಲಯಾಳಂನ ಚಿತ್ರವೊಂದರ ಮೂಲಕ ಬಣ್ಣದ ಬದುಕಿಗೆ ಪದಾರ್ಪಣೆ ಮಾಡಿದ ಸ್ನೇಹಾ ತಮಿಳು, ತೆಲುಗು ಹಾಗೂ ಕನ್ನಡದಲ್ಲಿ ಅನೇಕ ಸಿನಿಮಾಗಳಲ್ಲಿ ಅಭಿನಯಿಸಿದ್ದಾರೆ. ‘ಆನಂದಂ’, ‘ಪ್ರಿಯಮೈನಾ ನೀಕು’, ‘ಹನುಮಾನ್ ಜಂಕ್ಷನ್’, ‘ಕಿಂಗ್’, ‘ವಸೀಗರ’, ‘ಬೋಸ್’, ‘ವಸೂಲ್ ರಾಜಾ ಎಂಬಿಬಿಎಸ್‌’, ‘ಆಟೋಗ್ರಾಫ್’, ‘ಪುದುಪೇಟೈ’, ‘ನಾನ್ ಅವನಿಲ್ಲೈ’, ‘ಪಾಂಡಿ’, ‘ಅಮರಾವತಿ’ ಮುಂತಾದ ಹಲವು ಸಿನಿಮಾಗಳಲ್ಲಿ ಸ್ನೇಹಾ ಅಭಿನಯಿಸಿದ್ದಾರೆ. ಕನ್ನಡದಲ್ಲಿ ‘ರವಿ ಶಾಸ್ತ್ರಿ’, ‘ಒಗ್ಗರಣೆ’, ‘ಕುರುಕ್ಷೇತ್ರ’ ಸಿನಿಮಾಗಳಲ್ಲಿ ಸ್ನೇಹಾ ನಟಿಸಿದ್ದಾರೆ.
2012ರಲ್ಲಿ ಪ್ರಸನ್ನ ಅವರನ್ನು ಪ್ರೀತಿಸಿ ಮದುವೆಯಾದ ಬಳಿಕ ಪೋಷಕ ಪಾತ್ರಗಳಲ್ಲಿ ಹಾಗೂ ವಿಶೇಷ ಪಾತ್ರಗಳಲ್ಲಿ ನಟಿ ಸ್ನೇಹಾ ಅಭಿನಯಿಸುತ್ತಿದ್ದಾರೆ. ಸದ್ಯ ‘ಶಾಟ್ ಭೂತ್ 3’ ಸಿನಿಮಾ ಸ್ನೇಹಾ ಕೈಯಲ್ಲಿದೆ.
