ಶತಕದ ಬಳಿಕವೂ ವಿರಮಿಸದ ಪೆಟ್ರೋಲ್!: ದೇಶಾದ್ಯಂತ ಮತ್ತೆ ತೈಲ ಬೆಲೆ ತುಟ್ಟಿ
ಶನಿವಾರದ ವಿರಾಮದ ಬಳಿಕ ದೇಶಾದ್ಯಂತ ಪೆಟ್ರೋಲ್ ಮತ್ತು ಡೀಸೆಲ್ ದರದಲ್ಲಿ ಭಾನುವಾರ ಮತ್ತೆ ಏರಿಕೆಯಾಗಿದೆ. ರಾಜಧಾನಿ ದಿಲ್ಲಿಯಲ್ಲಿ ಪೆಟ್ರೋಲ್ ದರ ಲೀಟರ್‌ಗೆ 97 ರೂ ಗಡಿ ದಾಟಿದೆ.
Admin
0
8
ಹೊಸದಿಲ್ಲಿ: ಒಂದು ದಿನದ ವಿರಾಮದ ಬಳಿಕ ದೇಶಾದ್ಯಂತ ಪೆಟ್ರೋಲ್ ಮತ್ತು ಡೀಸೆಲ್ ದರದಲ್ಲಿ ಭಾನುವಾರ ಮತ್ತೆ ಏರಿಕೆಯಾಗಿದೆ. ಕಂಪೆನಿಗಳು ಇಂಧನ ದರದಲ್ಲಿ ಹೆಚ್ಚಳ ಮಾಡಿವೆ. ರಾಜಧಾನಿ ದಿಲ್ಲಿಯಲ್ಲಿ ಲೀಟರ್‌ಗೆ 29 ಪೈಸೆ ಮತ್ತು 28 ಪೈಸೆಯಷ್ಟು ಹೆಚ್ಚಳವಾಗಿದೆ. ದಿಲ್ಲಿಯಲ್ಲಿ ಭಾನುವಾರ ಬೆಳಿಗ್ಗೆ ಪೆಟ್ರೋಲ್ ದರ ಲೀಟರ್‌ಗೆ 97.22 ರೂ. ಇದ್ದರೆ, ಡೀಸೆಲ್‌ಗೆ 87.97 ರೂ ಇದೆ.
ಮುಂಬಯಿಯಲ್ಲಿ ಪೆಟ್ರೋಲ್ ದರ 28 ಪೈಸೆ ಹೆಚ್ಚಳದೊಂದಿಗೆ 103.36 ರೂಪಾಯಿಗೆ ತಲುಪಿದೆ. ಡೀಸೆಲ್ ದರ ಲೀಟರ್‌ಗೆ 95.44 ರೂ. ಇದೆ. ಬೆಂಗಳೂರಿನಲ್ಲಿ ಪೆಟ್ರೋಲ್ ದರ 30 ಪೈಸೆ ಏರಿಕೆಯೊಂದಿಗೆ ಲೀಟರ್‌ಗೆ 100.47 ರೂಪಾಯಿಗೆ ತಲುಪಿದೆ. ಡೀಸೆಲ್ ದರ ಕೂಡ 29 ಪೈಸೆಯಷ್ಟು ತುಟ್ಟಿಯಾಗಿದ್ದು, ಲೀಟರ್‌ಗೆ 93.26 ರೂಪಾಯಿ ಇದೆ.
ಚೆನ್ನೈನಲ್ಲಿ ಪೆಟ್ರೋಲ್ ದರ ಲೀಟರ್‌ಗೆ 98.40 ರೂ ಮತ್ತು ಡೀಸೆಲ್ 92.58 ರೂ ದರವಿದೆ. ಕೋಲ್ಕತಾದಲ್ಲಿ ಪೆಟ್ರೋಲ್ 97.12 ರೂ ಮತ್ತು ಡೀಸೆಲ್ 90.82 ರೂಪಾಯಿಗೆ ಏರಿಕೆಯಾಗಿವೆ. ರಾಜಸ್ಥಾನದ ಶ್ರೀ ಗಂಗಾನಗರ ಜಿಲ್ಲೆಯಲ್ಲಿ ದೇಶದಲ್ಲೇ ಅತ್ಯಧಿಕ ಇದೆ. ಗಂಗಾನಗರದಲ್ಲಿ ಪೆಟ್ರೋಲ್ ಬೆಲೆ ಲೀಟರ್‌ಗೆ 108.37 ರೂ ಇದ್ದರೆ, ಡೀಸೆಲ್ ಬೆಲೆ ಲೀಟರ್‌ಗೆ 101.12 ರೂಪಾಯಿಗೆ ಮುಟ್ಟಿದೆ.
ಮಧ್ಯಪ್ರದೇಶದ ಅನುಪ್ಪುರ್‌ನಲ್ಲಿ ಪೆಟ್ರೋಲ್ ದರ ಲೀಟರ್‌ಗೆ 108.10 ರೂಪಾಯಿ ಹಾಗೂ ಡೀಸೆಲ್ 99.04 ರೂಪಾಯಿ ಇದೆ. ರೇವಾ ಜಿಲ್ಲೆಯಲ್ಲಿ ಪೆಟ್ರೋಲ್ ದರ 107.64 ರೂ. ಹಾಗೂ ಡೀಸೆಲ್ ದರ 98.70 ರೂ ಇದೆ. ರಾಜಧಾನಿ ಭೋಪಾಲ್‌ನಲ್ಲಿ ಲೀಟರ್ ಪೆಟ್ರೋಲ್ ದರ 105.43 ರೂಪಾಯಿಗೆ ತಲುಪಿದೆ. ಡೀಸೆಲ್ ದರ ಪ್ರತಿ ಲೀಟರ್‌ಗೆ 96.65 ರೂ ಇದೆ.
ಮಹಾರಾಷ್ಟ್ರದ ಪರ್ಭಾನಿ ಜಿಲ್ಲೆಯಲ್ಲಿ ಪೆಟ್ರೋಲ್ ದರ ಲೀಟರ್‌ಗೆ 105.70 ರೂ ಹಾಗೂ ಡೀಸೆಲ್ ಬೆಲೆ 96.22 ರೂಪಾಯಿ ಇದೆ.
ಕರ್ನಾಟಕ, ರಾಜಸ್ಥಾನ, ಮಧ್ಯಪ್ರದೇಶ, ಮಹಾರಾಷ್ಟ್ರ, ಆಂಧ್ರಪ್ರದೇಶ, ತೆಲಂಗಾಣ ಹಾಗೂ ಲಡಾಖ್‌ಗಳಲ್ಲಿ ಈಗಾಗಲೇ ಪೆಟ್ರೋಲ್ ದರ ಶತಕ ದಾಟಿದೆ. ಇನ್ನು ಕೆಲವು ರಾಜ್ಯಗಳು ಶತಕದಂಚಿನಲ್ಲಿದ್ದು, ಡೀಸೆಲ್ ಕೂಡ ನೂರರ ಗಡಿಯತ್ತ ತಲುಪುತ್ತಿದೆ.
