ಚೆನ್ನೈನಲ್ಲಿ ಆರಂಭವಾದ ಈ ಕಂಪೆನಿಯ 500 ಉದ್ಯೋಗಿಗಳು ಈಗ ಕೋಟ್ಯಧಿಪತಿಗಳು
ಚೆನ್ನೈನಲ್ಲಿ ಆರಂಭವಾಗಿ ಪ್ರಸ್ತುತ ಅಮೆರಿಕದಲ್ಲಿ ಕೇಂದ್ರ ಕಚೇರಿ ಹೊಂದಿರುವ ಫ್ರೆಶ್‌ವರ್ಕ್ಸ್ ಕಂಪೆನಿಯ ಷೇರುಗಳು ಬುಧವಾರ ಅತ್ಯಧಿಕ ಮಟ್ಟಕ್ಕೆ ಏರಿದ್ದು, ಅದರ 500 ಉದ್ಯೋಗಿಗಳನ್ನು ಕೋಟ್ಯಧಿಪತಿಗಳನ್ನಾಗಿಸಿದೆ.
Admin
0
5
ಚೆನ್ನೈ: ಹತ್ತು ವರ್ಷಗಳ ಹಿಂದೆ ಚೆನ್ನೈನಲ್ಲಿ ಆರಂಭವಾಗಿ, ಈಗ ಕ್ಯಾಲಿಫೋರ್ನಿಯಾದಲ್ಲಿ ಕೇಂದ್ರ ಕಚೇರಿ ಹೊಂದಿರುವ ಗ್ರಾಹಕ ಸೇವೆಗಳ ತಯಾರಕ '' ಬುಧವಾರ ನಾಸ್ದಕ್ ಸ್ಟಾಕ್ ಎಕ್ಸ್‌ಚೇಂಜ್‌ನಲ್ಲಿ ಸ್ಥಾನ ಪಡೆದಿದೆ. ಸಾರ್ವಜನಿಕರಿಂದ 1 ಬಿಲಿಯನ್ ಡಾಲರ್‌ಗೂ ಅಧಿಕ ಸಂಗ್ರಹಣೆಯೊಂದಿಗೆ ಕಂಪೆನಿಯ ಮಾರುಕಟ್ಟೆ ಮೌಲ್ಯ 10 ಬಿಲಿಯನ್ ಡಾಲರ್‌ಗೂ ಅಧಿಕವಾಗಿದೆ. ಇದರೊಂದಿಗೆ ಕಂಪೆನಿಯ 500 ಉದ್ಯೋಗಿಗಳು ಕೋಟ್ಯಧಿಪತಿಗಳಾಗಿದ್ದಾರೆ.
ಬುಧವಾರ ಮಾರುಕಟ್ಟೆ ತೆರೆಯುತ್ತಿದ್ದಂತೆಯೇ ಪ್ರತಿ ಷೇರುಗಳು 46.67 ಡಾಲರ್‌ನಂತೆ ಮಾರಾಟ ಕಂಡಿವೆ. ಇದು ಲಿಸ್ಟಿಂಗ್ ದರವಾದ 36 ಡಾಲರ್‌ನ ಶೇ 30ರಷ್ಟು ಅಧಿಕವಾಗಿದೆ. ಫ್ರೆಶ್‌ವರ್ಕ್ ಐಪಿಒ 36 ಡಾಲರ್‌ನ ಪ್ರತಿ ಷೇರಿಗೆ 28.5 ಮಿಲಿಯನ್ ಷೇರುಗಳ ವಿತರಣೆಯನ್ನು ಹೊಂದಿದೆ. ಈ ಸಕಾರಾತ್ಮಕ ಬೆಳವಣಿಗೆಯೊಂದಿಗೆ ಐಪಿಒ ದರ ಬುಧವಾರ ಆರಂಭದಲ್ಲಿ ಪ್ರತಿ ಷೇರಿಗೆ 32 ಡಾಲರ್‌ನಿಂದ 34 ಡಾಲರ್ ಮಟ್ಟದ ಏರಿಕೆ ನಿರೀಕ್ಷಿಸಲಾಗಿತ್ತು.
ಇದರ ಜತೆಗೆ ಫ್ರೆಶ್‌ವರ್ಕ್ಸ್, ಐಪಿಒ ದರವನ್ನು ವಿನಾಯಿತಿ ಮತ್ತು ಕಮಿಷನ್‌ಗಳಾಚೆ ಕ್ಲಾಸ್ ಎ ಸಾಮಾನ್ಯ ಸ್ಟಾಕ್‌ಗಳ ಹೆಚ್ಚುವರಿ 2.85 ಮಿಲಿಯನ್ ಷೇರುಗಳನ್ನು ಖರೀದಿ ಮಾಡಲು ಒಪ್ಪಂದದಾರರಿಗೆ 30 ದಿನಗಳ ಆಯ್ಕೆಯನ್ನು ನೀಡಿದೆ.
'2011ರಲ್ಲಿ ಚೆನ್ನೈನಲ್ಲಿ ನಾವು ಕಂಪೆನಿ ಆರಂಭಿಸುವಾಗ ಈ ಕನಸು ಖಂಡಿತಾ ಕಂಡಿರಲಿಲ್ಲ. ಕಾಲಕ್ರಮೇಣ ನಮ್ಮ ಕನಸನ್ನು ವಿಸ್ತರಿಸತೊಡಗಿದ್ದೆವು. ಭಾರತದ ಸಾಫ್ಟ್‌ವೇರ್ ಸೇವೆಗೆ (ಎಸ್‌ಎಎಎಸ್) ಇದು ಎಷ್ಟು ಮುಖ್ಯವಾಗಲಿದೆ ಎನ್ನುವುದು ನನಗೆ ಕಾತರ ಮೂಡಿಸಿದೆ. ಇದರ ಬಳಿಕ ನಾವು ಭಾರತದಿಂದ ಇನ್ನಷ್ಟು ಜಾಗತಿಕ ಉತ್ಪನ್ನ ಕಂಪೆನಿಗಳನ್ನು ಕಾಣುತ್ತೇವೆ ಎಂದು ನಂಬುತ್ತೇನೆ' ಎಂದು ಫ್ರೆಶ್‌ವರ್ಕ್ಸ್ ಸಂಸ್ಥಾಪಕ ಗಿರೀಶ್ ಮಾತೃಭೂತಂ ತಿಳಿಸಿದ್ದಾರೆ.
ಐಪಿಒ ತಮಗೆ ಬಯಕೆ ಈಡೇರಿಕೆಯ ಸಂತಸ ನೀಡಿದೆ. ಶೇ 76ಕ್ಕೂ ಹೆಚ್ಚು ಫ್ರೆಶ್‌ವರ್ಕ್ಸ್ ಉದ್ಯೋಗಿಗಳು ಅದರ ಷೇರುಗಳನ್ನು ಹೊಂದಿದ್ದು, ಅದರ ಲಾಭ ಗಳಿಸಿದ್ದಾರೆ. 'ಭಾರತದಲ್ಲಿನ ನಮ್ಮ 500ಕ್ಕೂ ಹೆಚ್ಚು ಉದ್ಯೋಗಿಗಳು ಈಗ ಕೋಟ್ಯಧಿಪತಿಗಳಾಗಿದ್ದಾರೆ. ಅವರಲ್ಲಿ 70 ಮಂದಿ ಇನ್ನೂ 30 ವರ್ಷಕ್ಕಿಂತ ಕೆಳಗಿನವರು' ಎಂದು ಗಿರೀಶ್ ಖುಷಿ ಹಂಚಿಕೊಂಡಿದ್ದಾರೆ.
2010ರಲ್ಲಿ ಗಿರೀಶ್ ಮಾತೃಭೂತಂ ಮತ್ತು ಶಾನ್ ಕೃಷ್ಣಸ್ವಾಮಿ ಜೋಹೋ ಕಂಪೆನಿಯನ್ನು ತ್ಯಜಿಸಿದ್ದರು. ಜೆನ್‌ಡೆಸ್ಕ್‌ಗೆ ಎದುರಾಳಿಯಾಗಿ ಫ್ರೆಶ್‌ಡೆಸ್ಕ್ ಎಂಬ ಕ್ಲೌಡ್ ಆಧಾರಿತ ಗ್ರಾಹಕ ಸೇವೆಯನ್ನು ಸೃಷ್ಟಿಸುವುದು ಅವರ ಉದ್ದೇಶವಾಗಿತ್ತು. ಇಬ್ಬರೂ ಮೊದಲ ಹಂತದಲ್ಲಿ ವೆಂಚರ್ ಕ್ಯಾಪಿಟಲ್ ಕಂಪೆನಿ ಆಕ್ಸೆಲ್‌ನಿಂದ 1 ಮಿಲಿಯನ್ ಡಾಲರ್ ಸಂಗ್ರಹಿಸಿದರು. ಜತೆಗೆ ಟೈಗರ್ ಗ್ಲೋಬಲ್ ಮ್ಯಾನೇಜ್‌ಮೆಂಟ್‌ನಿಂದ 5 ಮಿಲಿಯನ್ ಡಾಲರ್ ಸಂಗ್ರಹಿಸಿದರು. 2015ರಲ್ಲಿ 1ಕ್ಲಿಕ್ ಡಾಟ್ ಐಒ, ಕೊನಾಟೊರ್ ಮತ್ತು ಫ್ರಿಲ್ಪ್ ಕಂಪೆನಿಗಳನ್ನು ಖರೀದಿಸುವ ಮಟ್ಟಕ್ಕೆ ಬೆಳೆದರು.
ಅಮೆರಿಕಕ್ಕೆ ವರ್ಗಾವಣೆ
2016ರಲ್ಲಿ ಈ ಜೋಡಿ ಫ್ರೆಶ್‌ಸೇಲ್ಸ್ ಎಂಬ ಸಿಆ ರ್‌ಎಂ ಉತ್ಪನ್ನ ಆರಂಭಿಸಿತು. ಬಳಿಕ ಸಂಸ್ಥೆ ಫ್ರೆಶ್‌ವರ್ಕ್ಸ್ ಎಂಬ ಹೆಸರು ಪಡೆದುಕೊಂಡಿತು. 2018ರಲ್ಲಿ ವಾರ್ಷಿಕ 100 ಮಿಲಿಯನ್ ಡಾಲರ್ ಆದಾಯದ ಸಾಧನೆ ತೋರಿಸಿತು. 2019ರಲ್ಲಿ ಗಿರೀಶ್ ಅವರು ಇದನ್ನು ಅಮೆರಿಕ ಐಪಿಒವನ್ನಾಗಿಸಲು ಅಲ್ಲಿಗೆ ಕಂಪೆನಿಯನ್ನು ವರ್ಗಾಯಿಸಿದರು.
ಫ್ರೆಶ್‌ವರ್ಕ್ಸ್‌ನ ಪ್ರಮುಖ ಷೇರುದಾರರಾದ ಟೈಗರ್ ಗ್ಲೋಬಲ್ ಮತ್ತು ಆಕ್ಸೆಲ್ ಇಂಡಿಯಾ ಕ್ರಮವಾಗಿ ಶೇ 26 ಮತ್ತು ಶೇ 25ರಷ್ಟು ಷೇರುಗಳನ್ನು ಹೊಂದಿವೆ. ಫ್ರೆಶ್‌ವರ್ಕ್ಸ್ ಆರಂಭವಾಗುವ ಮುಂಚೆಯಿಂದಲೂ ಅದಕ್ಕೆ ಮೊದಲ ಹೂಡಿಕೆದಾರನಾಗಿರುವ ಆಕ್ಸೆಲ್ ಇಂಡಿಯಾ, ಸತತವಾಗಿ ಬೆಂಬಲ ನೀಡುತ್ತಿದೆ. ವಿಸಿ ಸಂಸ್ಥೆ ಸೀಕ್ವೊಯಾ ಕ್ಯಾಪಿಟಲ್ ಶೇ 12, ಸಂಸ್ಥಾಪಕ ಗಿರೀಶ್ ಶೇ 7 ಮತ್ತು ಗೂಗಲ್ ಶೇ 8ರಷ್ಟು ಷೇರುಗಳನ್ನು ಹೊಂದಿವೆ.
