ರಾಕೇಶ್‌ ಝುಂಝುನ್‌ವಾಲಾರ 'ಆಕಾಶ ಏರ್‌'ಗೆ ಕೇಂದ್ರ ಒಪ್ಪಿಗೆ, 2022ರಲ್ಲಿ ಚಾಲನೆ

ಹೊಸದಿಲ್ಲಿ: ಸಾವಿರಾರು ಕೋಟಿ ರೂ. ಷೇರು ಮಾರುಕಟ್ಟೆ ಹೂಡಿಕೆದಾರ ರಾಕೇಶ್‌ ಝುಂಝುನ್‌ವಾಲಾರ ನೂತನ '' ಸಂಸ್ಥೆಗೆ ಕೇಂದ್ರ ಸರಕಾರ ಒಪ್ಪಿಗೆ ನೀಡಿದೆ. ವಿಮಾನಯಾನ ಸಚಿವಾಲಯ ವಿಮಾನಯಾನ ಸಂಸ್ಥೆ ಆರಂಭಿಸಲು ಅಗತ್ಯವಾಗಿರುವ ನಿರಪೇಕ್ಷಣಾ ಪತ್ರ (ಎನ್‌ಒಸಿ)ವನ್ನು ಸಂಸ್ಥೆಗೆ ನೀಡಿದೆ. ಇದಾದ ಬಳಿಕ ಇದೀಗ ಆಪರೇಟರ್‌ ಪರವಾನಗಿಗಾಗಿ ಡೈರೆಕ್ಟರ್‌ ಜನರಲ್‌ ಆಫ್‌ ಸಿವಿಲ್‌ ಏವಿಯೇಷನ್‌ (ಡಿಜಿಸಿಎ)ಗೆ ಅರ್ಜಿ ಸಲ್ಲಿಸಬೇಕಾಗಿದೆ. ಮುಂದಿನ ಬೇಸಿಗೆ ಹೊತ್ತಿಗೆ ಸಂಸ್ಥೆಯ ಲೋಹದ ಹಕ್ಕಿಗಳು ಹಾರಾಟ ಆರಂಭಿಸುವ ಸಾಧ್ಯತೆ ಇದೆ. ಕಡಿಮೆ ಪ್ರಯಾಣ ಬೆಲೆಯ ವಿಮಾನಯಾನ ಸಂಸ್ಥೆ ಆರಂಭಿಸುವುದು 'ಭಾರತದ ವಾರೆನ್‌ ಬಫೆಟ್‌' ಎಂದೇ ಹೆಸರಾದ ಝುಂಝುನ್‌ವಾಲಾ ಅವರ ಚಿಂತನೆಯಾಗಿದೆ. ಎಸ್‌ಎನ್‌ವಿ ಏವಿಯೇಷನ್‌ ಪ್ರೈ. ಲಿ. ಹೆಸರಿನಲ್ಲಿ ಸಂಸ್ಥೆ ಆರಂಭಿಸಿರುವ ಆಕಾಶ ಏರ್‌ ಬ್ರ್ಯಾಂಡ್‌ನಲ್ಲಿ ವಿಮಾನಗಳ ಹಾರಾಟ ಆರಂಭಿಸಲಿದ್ದಾರೆ. ಈಗಾಗಲೇ ಕಂಪನಿಯ ಸಿಇಒ ಆಗಿ ವಿಮಾನಯಾನ ಕ್ಷೇತ್ರದ ದಿಗ್ಗಜ ವಿನಯ್‌ ದುಬೆ ಅವರನ್ನು ಝುಂಝುನ್‌ವಾಲಾ ನೇಮಕ ಮಾಡಿಕೊಂಡಿದ್ದಾರೆ. ಏರ್‌ಬಸ್‌ನ ಎ320 ವಿಮಾನಗಳಿಗೆ ಆರ್ಡರ್‌ ನೀಡಿದವರು ದೀರ್ಘ ಕಾಲ ಕಾಯಬೇಕಾಗಿರುವುದರಿಂದ, ಸಂಸ್ಥೆಯು 100 ಬೋಯಿಂಗ್‌ 737 ಮ್ಯಾಕ್ಸ್‌ ವಿಮಾನಗಳಿಗೆ ಆರ್ಡರ್‌ ನೀಡುವ ಸಾಧ್ಯತೆ ಇದೆ. ಇತ್ತೀಚೆಗೆ ವಿಮಾನಯಾನ ಸಚಿವಾಲಯ ಕೆಲವು ಬದಲಾವಣೆಗಳನ್ನು ಮಾಡಿದ ಬಿ737 ವಿಮಾನಕ್ಕೆ ದೇಶದಲ್ಲಿ ಹಾರಾಟ ನಡೆಸಲು ಅವಕಾಶ ನೀಡಿತ್ತು. ಸಂಸ್ಥೆಯು ನೀಡಿರುವ ಹೇಳಿಕೆಯಲ್ಲಿ, "2022ರ ಬೇಸಿಗೆಯಲ್ಲಿ ಭಾರತದಾದ್ಯಂತ ವಿಮಾನಯಾನ ಸೇವೆಗಳನ್ನು ನೀಡಲು ಯೋಜಿಸಿದ್ದು, ದೇಶದ ಅತ್ಯಂತ ವಿಶ್ವಾಸಾರ್ಹ, ಕೈಗೆಟುಕುವ ದರ ಮತ್ತು ಹಸಿರು ವಿಮಾನಯಾನ ಸಂಸ್ಥೆ ಇದಾಗಿರಲಿದೆ," ಎಂದು ಹೇಳಿದೆ. "ವಿಮಾನಯಾನ ಸಚಿವಾಲಯದ ಬೆಂಬಲ ಮತ್ತು ಎನ್‌ಒಸಿಗಾಗಿ ನಾವು ಸಂತಸಗೊಂಡಿದ್ದು, ಕೃತಜ್ಞರಾಗಿರುತ್ತೇವೆ. ಅಕಾಶ ಏರ್ ಅನ್ನು ಯಶಸ್ವಿಯಾಗಿ ಆರಂಭಿಸಲು ಅಗತ್ಯವಿರುವ ಹೆಚ್ಚುವರಿ ಕ್ರಮಗಳಿಗಾಗಿ ನಿಯಂತ್ರಕ ಅಧಿಕಾರಿಗಳೊಂದಿಗೆ ಕೆಲಸ ಮಾಡುವುದನ್ನು ಮುಂದುವರಿಸುತ್ತೇವೆ... ನಮ್ಮ ರಾಷ್ಟ್ರದ ಪ್ರಗತಿಗೆ ದೃಢವಾದ ವಾಯು ಸಾರಿಗೆ ವ್ಯವಸ್ಥೆ ಮುಖ್ಯ ಎಂದು ನಾವು ನಂಬುತ್ತೇವೆ," ಎಂದು ಸಿಇಒ ವಿನಯ್‌ ದುಬೆ ಹೇಳಿದ್ದಾರೆ. ಅವರು ಈ ಹಿಂದೆ ಜೆಟ್‌ ಏರ್‌ವೇಸ್‌ ಹಾಗೂ ಗೋಏರ್‌ ಸಂಸ್ಥೆಗಳನ್ನು ಮುನ್ನಡೆಸಿದ್ದರು ಮುಂದಿನ ವರ್ಷ ಭಾರತೀಯ ವಾಯುಯಾನ ಕ್ಷೇತ್ರವು ಇತ್ತೀಚಿನ ಸಮಯದ ವಿಶೇಷ ದಿನಗಳಿಗೆ ಸಾಕ್ಷಿಯಾಗಲಿದೆ. ಒಂದೆಡೆ ಏರ್ ಇಂಡಿಯಾದೊಂದಿಗೆ ಎಐ ಎಕ್ಸ್‌ಪ್ರೆಸ್ ಸಂಸ್ಥೆಯು ಟಾಟಾ ಗ್ರೂಪ್ ಏರ್‌ಲೈನ್ಸ್ ಆಗಿ ಹಾರಾಟ ಆರಂಭಿಸಲಿದ್ದರೆ, ಇನ್ನೊಂದೆಡೆ ಆಕಾಶ ಏರ್‌ ಜನ್ಮ ತಾಳಲಿದೆ. ಜತೆಗೆ ಬಹುಶಃ ಜೆಟ್ ಏರ್‌ವೇಸ್ 2.0 ಪುನರ್ಜನ್ಮ ಪಡೆಯಲೂಬಹುದು. ಆದಾಗ್ಯೂ ಈ ವಿಮಾನಯಾನ ಉದ್ಯಮಗಳು ಬಲವಾದ ಸ್ಪರ್ಧೆಯನ್ನು ಎದುರಿಸಲಿವೆ. ಅಸ್ತಿತ್ವದಲ್ಲಿರುವ ಸಂಸ್ಥೆಗಳ ಜತೆಗೆ ಹೊಸ ಸಂಸ್ಥೆಗಳು ಪೈಪೋಟಿಗೆ ಇಳಿಯಬೇಕಾಗುತ್ತದೆ. ಹೆಚ್ಚುತ್ತಿರುವ ತೈಲ ಬೆಲೆ, ದುರ್ಬಲಗೊಳ್ಳುತ್ತಿರುವ ರೂಪಾಯಿ-ಡಾಲರ್ ವಿನಿಮಯ ದರ ಮತ್ತು ಸಾಂಕ್ರಾಮಿಕದ ಅನಿಶ್ಚಿತತೆಗಳ ಭಾರಿ ಸವಾಲುಗಳನ್ನು ವಿಮಾನವಲಯ ಎದುರಿಸುತ್ತಿರುವುದನ್ನು ಇಲ್ಲಿ ಗಮನಸಬೇಕಾಗುತ್ತದೆ.