ತನ್ನಿಂದ 610 ಮಿಲಿಯನ್ ಡಾಲರ್ ಕ್ರಿಪ್ಟೋ ಕರೆನ್ಸಿ ಕದ್ದ ಹ್ಯಾಕರ್‌ಗೆ ಉದ್ಯೋಗದ ಆಹ್ವಾನ ನೀಡಿದ ಕಂಪೆನಿ!

ವಿಕೇಂದ್ರೀಕೃತ ಹಣಕಾಸು ವ್ಯವಸ್ಥೆಯ ಇತಿಹಾಸದಲ್ಲಿಯೇ ಅತಿ ದೊಡ್ಡ ಕಳ್ಳತನ ಪ್ರಕರಣ ಎನ್ನಲಾದ ಸಂಸ್ಥೆಯಿಂದ 610 ಮಿಲಿಯನ್ ಡಾಲರ್‌ಗೂ ಹೆಚ್ಚು ಮೊತ್ತದ ಹ್ಯಾಕ್ ಪ್ರಕರಣ ಕುತೂಹಲಕಾರಿ ತಿರುವು ಪಡೆದಿದೆ. ತನ್ನ ವ್ಯವಸ್ಥೆಯನ್ನು ಹ್ಯಾಕ್ ಮಾಡಿ ಕ್ರಿಪ್ಟೋ ಕಳವು ಮಾಡಿದ್ದ ಹ್ಯಾಕರ್‌ಗೆ ನೀಡುವುದಾಗಿ ಪಾಲಿ ನೆಟ್‌ವರ್ಕ್ ಆಹ್ವಾನ ಕೊಟ್ಟಿದೆ. ಬಹು ಬ್ಲಾಕ್‌ಚೈನ್‌ಗಳಲ್ಲಿ ಬಳಕೆದಾರರು ಟೋಕನ್‌ಗಳನ್ನು ವಿನಿಮಯ ಮಾಡಿಕೊಳ್ಳಲು ಅವಕಾಶ ನೀಡುವ ಪಾಲಿ ನೆಟ್‌ವರ್ಕ್ ಪ್ಲಾಟ್‌ಫಾರ್ಮ್ ಮೇಲಿನ ದಾಳಿಯನ್ನು ಸಮರ್ಥಿಸಿಕೊಂಡಿದ್ದ ದಾಳಿಕೋರ, ಯೋಜನೆಯನ್ನು ರಕ್ಷಿಸಲು ನಡೆಸಿದ ಒಳ್ಳೆಯ ಹ್ಯಾಕ್ ಎಂದು ಹೇಳಿಕೊಂಡಿದ್ದ. ತಾನು ಕಳವು ಮಾಡಿದ ಕ್ರಿಪ್ಟೋ ಹಣವನ್ನು ಮರಳಿಸುವ ಭರವಸೆ ನೀಡಿದ್ದ ಆತ, ಅರ್ಧದಷ್ಟು ಪಾಲನ್ನು ವಾಪಸ್ ನೀಡಿದ್ದಾನೆ. ಕಂಪ್ಯೂಟರ್ ಜಾಲಗಳಲ್ಲಿನ ಲೋಪದೋಷಗಳನ್ನು ಪತ್ತೆಹಚ್ಚುವ ಮತ್ತು ಕಂಪೆನಿಗಳು ಹಾಗೂ ಸಂಸ್ಥೆಗಳು ಅದನ್ನು ಸರಿಪಡಿಸುವಂತೆ ಎಚ್ಚರಿಸುವ 'ನೈತಿಕ' ಹ್ಯಾಕರ್‌ಗಳನ್ನು ಸಂಬೋಧಿಸಲು ಬಳಸಲಾಗುವ 'ವೈಟ್ ಹ್ಯಾಟ್' ಪದವನ್ನು ಬಳಸಿರುವ ಪಾಲಿ ನೆಟ್‌ವರ್ಕ್, ಹ್ಯಾಕರ್‌ನನ್ನು ಶ್ಲಾಘಿಸಿದೆ. 'ಮಿ. ವೈಟ್ ಹ್ಯಾಟ್'ಗೆ 'ಮುಖ್ಯ ಭದ್ರತಾ ಸಲಹೆಗಾರ' ಹುದ್ದೆಯ ಉದ್ಯೋಗ ನೀಡುವುದಾಗಿ ಪಾಲಿ ನೆಟ್‌ವರ್ಕ್ ಆಹ್ವಾನಿಸಿದೆ. ತನ್ನ ವ್ಯವಸ್ಥೆಯಲ್ಲಿನ ಲೋಪವನ್ನು ತೋರಿಸಿದ ಕೃತಜ್ಞತೆಗಾಗಿ ಅದು ಉದ್ಯೋಗ ಅವಕಾಶ ನೀಡಲು ಮುಂದಾಗಿದೆ. ಹ್ಯಾಕರ್‌ನ ಪರಿಚಯ ಇನ್ನೂ ಬಹಿರಂಗವಾಗಿಲ್ಲ. ಮಿ. ವೈಟ್ ಹ್ಯಾಟ್ ಏಕಾಂಗಿ ವ್ಯಕ್ತಿಯೇ ಅಥವಾ ಸೈಬರ್ ದಾಳಿಕೋರರ ಗುಂಪಾಗಿರಬಹುದೇ ಎನ್ನುವುದೂ ಸ್ಪಷ್ಟವಾಗಿಲ್ಲ. ಸುಮಾರು 610 ಮಿಲಿಯನ್ ಡಾಲರ್ ಮೊತ್ತದ ಹಣದಲ್ಲಿ 235 ಮಿಲಿಯನ್ ಡಾಲರ್‌ನಷ್ಟು ಮೊತ್ತವನ್ನು ಮರಳಿಸಿದ್ದಾನೆ. ಆದರೆ ಇದು ಜಂಟಿ ಖಾತೆಯಲ್ಲಿದ್ದು, ನಿಧಿಯನ್ನು ಹೊರತೆಗೆಯಲು ಎರಡು ಕೀಗಳ ಅಗತ್ಯವಿದೆ. ಇದರಲ್ಲಿ ಒಂದು ಕೀಯನ್ನು ಪಾಲಿ ನೆಟ್‌ವರ್ಕ್‌ಗೆ ನೀಡಿದ್ದರೂ, ಇನ್ನೊಂದು ಕೀ ಹ್ಯಾಕರ್ ಬಳಿಯೇ ಇದೆ. ಕಳುವಾದ ಹಣವನ್ನು ಮರಳಿ ಪಡೆದುಕೊಳ್ಳಲು ತನ್ನ ಕೀ ಬಳಸುವಂತೆ ಹ್ಯಾಕರ್‌ಗೆ ಪಾಲಿ ನೆಟ್‌ವರ್ಕ್ ಬೇಡಿಕೊಳ್ಳುತ್ತಿದೆ. ಆದರೆ ಉದ್ಯೋಗದ ಆಫರ್ ಹಾಗೂ 5,00,000 ಡಾಲರ್ ಮೊತ್ತದ ಕ್ರಿಪ್ಟೋವನ್ನು ತಾನೇ ಇರಿಸಿಕೊಳ್ಳುವ ಮತ್ತೊಂದು ಆಫರ್ ಮಧ್ಯೆಯೂ ಆತ ಅದಕ್ಕೆ ಸ್ಪಂದಿಸಿಲ್ಲ. ಹೀಗಾಗಿ ತನ್ನ ಎಲ್ಲ ಗ್ರಾಹಕರ ಹಣವನ್ನು ಹಿಂದಕ್ಕೆ ಪಡೆಯಲು ಪಾಲಿ ನೆಟ್‌ವರ್ಕ್ ಪರದಾಡುತ್ತಿದೆ.