ಭಣಗುಡುತ್ತಿರುವ ಬ್ಯಾಂಕ್‌ಗಳಲ್ಲಿ ಗ್ರಾಹಕರು ಹೈರಾಣ, ಅಗತ್ಯ ಸೇವೆಗಳು ಸಿಗದೆ ಪರದಾಟ
ಬ್ಯಾಂಕ್‌ಗಳಿಗೆ ಭೇಟಿ ನೀಡುವ ಬಳಕೆದಾರರ ಸಂಖ್ಯೆಯೂ ಕಡಿಮೆಯಾಗಿದ್ದು, ಬ್ಯಾಂಕ್‌ ಸಿಬ್ಬಂದಿಗೆ ಮೊದಲಿನಷ್ಟು ಕೆಲಸವೂ ಈಗಿಲ್ಲ. ಹೀಗಿದ್ದೂ, ಬರುವ ಗ್ರಾಹಕರಿಗೂ ಸರಿಯಾದ ಸೇವಾ ಸೌಲಭ್ಯಗಳು ಸಿಗುತ್ತಿಲ್ಲ ಎಂದು ಗ್ರಾಹಕರು ಅಳಲು ತೋಡಿಕೊಂಡಿದ್ದಾರೆ.
Admin
0
13
ಬೆಂಗಳೂರು: ಕೋವಿಡ್‌ ಬಿಕ್ಕಟ್ಟಿನ ಪರಿಣಾಮ ಬ್ಯಾಂಕ್‌ಗಳಲ್ಲಿ ದೈನಂದಿನ ವಹಿವಾಟು ಅಸ್ತವ್ಯಸ್ತವಾಗಿದೆ. ಬ್ಯಾಂಕ್‌ಗಳಲ್ಲಿ ತಮಗೆ ಅಗತ್ಯ ಸೇವೆಗಳು ಕೂಡ ದೊರಕದಿರುವ ಬಗ್ಗೆ ಗ್ರಾಹಕರು ದೂರುತ್ತಿದ್ದಾರೆ.
ಕೋವಿಡ್‌ ಕೇಸ್‌ಗಳು ಹೆಚ್ಚುತ್ತಿರುವ ಹಿನ್ನೆಲೆಯಲ್ಲಿಇಂಡಿಯನ್‌ ಬ್ಯಾಂಕ್ಸ್‌ ಅಸೋಸಿಯೇಶನ್‌ (ಐಬಿಎ) ಇತ್ತೀಚೆಗೆ ಬ್ಯಾಂಕ್‌ಗಳ ಕೆಲಸದ ಅವಧಿಯನ್ನು ಬೆಳಗ್ಗೆ 10 ರಿಂದ 2 ಗಂಟೆಯ ತನಕ ಮೊಟಕುಗೊಳಿಸಿತ್ತು. ಜತೆಗೆ ಬ್ಯಾಂಕ್‌ಗಳಿಗೆ ಭೇಟಿ ನೀಡುವ ಬಳಕೆದಾರರ ಸಂಖ್ಯೆಯೂ ಕಡಿಮೆಯಾಗಿದೆ. ಇದರ ಪರಿಣಾಮ ಸಿಬ್ಬಂದಿಗೆ ಮೊದಲಿನಷ್ಟು ಕೆಲಸವೂ ಈಗಿಲ್ಲ. ಹೀಗಿದ್ದರೂ, ಬರುವ ಗ್ರಾಹಕರಿಗೂ ಸರಿಯಾದ ಸೇವಾ ಸೌಲಭ್ಯಗಳು ಸಿಗದೆ ಪರದಾಡುವಂತಾಗಿದೆ ಎಂದು ಗ್ರಾಹಕರು ಅಳಲು ತೋಡಿಕೊಂಡಿದ್ದಾರೆ.
ಬ್ಯಾಂಕ್‌ಗಳಲ್ಲಿ ಪಾಸ್‌ಬುಕ್‌ ಎಂಟ್ರಿ ಮಾಡಿಸುವುದು, ಸಾಲದ ಮಾಹಿತಿ ಪಡೆಯುವುದು ಸೇರಿದಂತೆ ನಾನಾ ಸೇವೆಗಳು ಈಗ ಅಲಭ್ಯವಾಗಿವೆ. ಕೆಲ ಬ್ಯಾಂಕ್‌ಗಳಲ್ಲಿ ಚೆಕ್‌ಬುಕ್‌ ಕ್ಲಿಯರೆನ್ಸ್‌, ನಗದು ಹಿಂತೆಗೆತ ಮತ್ತು ಠೇವಣಿ, ಚಿನ್ನದ ಸಾಲ, ಸರಕಾರಿ ಹಣಕಾಸು, ತೆರಿಗೆ ವರ್ಗಾವಣೆಗೆ ಬ್ಯಾಂಕಿಂಗ್‌ ಚಟುವಟಿಕೆ ಸೀಮಿತವಾಗಿವೆ. ಇದರ ಪರಿಣಾಮ ಗ್ರಾಹಕರು ಸಮಸ್ಯೆಗೀಡಾಗುತ್ತಿದ್ದಾರೆ.
ಸಾಲ ವಿತರಣೆಗೆ ಬ್ಯಾಂಕ್‌ಗಳ ನಿರಾಸಕ್ತಿ ಬ್ಯಾಂಕ್‌ಗಳಲ್ಲಿ ಸಾಲ ವಿತರಣೆಗೆ ಭಾರಿ ನಿರಾಸಕ್ತಿ ಕಂಡು ಬಂದಿದೆ. ಗ್ರಾಹಕರಿಗೆ ಸಾಲದ ಬಗ್ಗೆ ವಿವರ ನೀಡುವುದು, ಸಾಲ ಕೊಳ್ಳಲು ವ್ಯವಹರಿಸುವುದರ ಬದಲಿಗೆ, ಸರಕಾರಿ ಬಾಂಡ್‌ಗಳಲ್ಲಿ ಠೇವಣಿಗಳನ್ನು ಹೂಡಿಕೆ ಮಾಡಲು ಬ್ಯಾಂಕ್‌ಗಳು ಬಯಸುತ್ತಿವೆ. ಇದು ಆರ್ಥಿಕ ಬೆಳವಣಿಗೆ, ಉತ್ಪಾದಕ ಚಟುವಟಿಕೆಗಳಿಗೆ ಅಡ್ಡಿಯಾಗಿದೆ.
ರಿಸರ್ವ್‌ ಬ್ಯಾಂಕ್‌ ಆಫ್‌ ಇಂಡಿಯಾದ ಪ್ರಕಾರ, ಬ್ಯಾಂಕ್‌ಗಳು 2020-21ರಲ್ಲಿ ಸರಕಾರಿ ಬಾಂಡ್‌ಗಳಲ್ಲಿ 7.2 ಲಕ್ಷ ಕೋಟಿ ರೂ.ಗಳನ್ನು ಠೇವಣಿ ಇರಿಸಿವೆ. ಆದರೆ ಸಾಲದ ರೂಪದಲ್ಲಿ ವಿತರಿಸಿದ್ದು 5.8 ಲಕ್ಷ ಕೋಟಿ ರೂ. ಮಾತ್ರ. ರಿಸರ್ವ್‌ ಬ್ಯಾಂಕ್‌ ಆರ್ಥಿಕತೆಯೆ ಚೇತರಿಕೆಗೆ, ಜನತೆಗೆ ಮತ್ತು ಉದ್ದಿಮೆಗಳಿಗೆ ಸಾಲ ಸೌಲಭ್ಯ ಸಿಗುವಂತಾಗಲು, ಅರ್ಥಿಕ ಮತ್ತು ಉತ್ಪಾದಕ ಚಟುವಟಿಕೆಗಳನ್ನು ವಿಸ್ತರಿಸಲು ಭಾರಿ ಮೊತ್ತದಲ್ಲಿ ಹಣಕಾಸು ನೆರವು ಒದಗಿಸಿತ್ತು. ಆದರೆ ಬ್ಯಾಂಕ್‌ಗಳು ಅದನ್ನು ಬಳಸಿಕೊಂಡು ಸಾಲದ ವಿತರಣೆಯನ್ನು ಹೆಚ್ಚಿಸುವುದರ ಬದಲಿಗೆ ಸರಕಾರಿ ಬಾಂಡ್‌ಗಳಲ್ಲಿ ಹೂಡಿಕೆ ಮಾಡುವುದರ ಮೂಲಕ ಉದಾಸೀನ ಪ್ರವೃತ್ತಿಯನ್ನು ತೋರಿವೆ.
ಸಾಲ ವಿತರಿಸುವುದಾದರೆ ಅದರ ನಿರ್ವಹಣೆಯ ಜವಾಬ್ದಾರಿ ಹೆಗಲೇರುತ್ತದೆ. ಅದರ ಬದಲು ಸರಕಾರಿ ಬಾಂಡ್‌ಗಳಲ್ಲಿ ಹೂಡಿಕೆ ಮಾಡಿದರೆ ಸುಲಭವಾಗಿ ಬಡ್ಡಿ ಆದಾಯ ಪಡೆಯಬಹುದು ಎಂಬ ಲೆಕ್ಕಾಚಾರ ಬ್ಯಾಂಕ್‌ಗಳದ್ದಾಗಿದೆ. ಆದರೆ ಇದರಿಂದ ಆರ್ಥಿಕ ಬೆಳವಣಿಗೆಗೆ, ಗ್ರಾಹಕರಿಗೆ ಪ್ರಯೋಜನವಾಗುವುದಿಲ್ಲ ಎನ್ನುತ್ತಾರೆ ತಜ್ಞರು.
