ಮಹಿಳೆಯರ ಬಟ್ಟೆಗಳನ್ನು 6 ತಿಂಗಳು ಒಗೆದುಕೊಡಬೇಕು!: ಅತ್ಯಾಚಾರ ಆರೋಪಿಗೆ ಕೋರ್ಟ್ ವಿಚಿತ್ರ ಶಿಕ್ಷೆ!

ಪಟ್ನಾ: ನಡೆಸಲು ಪ್ರಯತ್ನಿಸಿದ ಆರೋಪಿಗೆ ಬಿಹಾರದ ನ್ಯಾಯಾಲಯವೊಂದು ವಿಚಿತ್ರ ಶಿಕ್ಷೆ ವಿಧಿಸಿದೆ. ಬಂಧನದಿಂದ ಜಾಮೀನು ನೀಡುವಾಗ ಕೋರ್ಟ್ ನೀಡಿರುವ ಆದೇಶ ಸಾಕಷ್ಟು ಚರ್ಚೆಯನ್ನು ಹುಟ್ಟುಹಾಕಿದೆ. ಗ್ರಾಮದಲ್ಲಿ ಮಹಿಳೆಯೊಬ್ಬರ ಮೇಲೆ ಅತ್ಯಾಚಾರ ನಡೆಸಲು ಪ್ರಯತ್ನಿಸಿದ್ದ ಆರೋಪಿಗೆ ಜಾಮೀನು ನೀಡುವ ಸಂದರ್ಭದಲ್ಲಿ ಬಿಹಾರದ ಮಧುಬನಿ ನ್ಯಾಯಾಲಯವು, ಆತನ ಅಪರಾಧಕ್ಕೆ ಶಿಕ್ಷೆಯಾಗಿ ಮುಂದಿನ ಆರು ತಿಂಗಳ ಕಾಲ ಗ್ರಾಮದ ಎಲ್ಲ ಮಹಿಳೆಯರ ಬಟ್ಟೆಗಳನ್ನು ಒಗೆದು, ಇಸ್ತ್ರಿ ಮಾಡಬೇಕು ಎಂದು ಆದೇಶಿಸಿದೆ. ಸಂತ್ರಸ್ತೆ ಸೇರಿದಂತೆ ಗ್ರಾಮದ ಎಲ್ಲ ಮಹಿಳೆಯ ಬಟ್ಟೆಗಳನ್ನು ಯಾವುದೇ ಹಣ ತೆಗೆದುಕೊಳ್ಳದೆ ಆರು ತಿಂಗಳ ಕಾಲ ಚೆನ್ನಾಗಿ ಒಗೆದು ಇಸ್ತ್ರಿ ಮಾಡಿಕೊಡಬೇಕು ಎಂದು ಆರೋಪಿ ಲಲನ್ ಕುಮಾರ್ ಸಫಿ ಎಂಬಾತನಿಗೆ ಜಂಜಾರ್ಪುರ ನ್ಯಾಯಾಲಯದ ನ್ಯಾಯಾಧೀಶ ಅವಿನಾಶ್ ಕುಮಾರ್ ಷರತ್ತು ವಿಧಿಸಿದ್ದಾರೆ. ವೃತ್ತಿ ಮಾಡುವ 20 ವರ್ಷದ ಆರೋಪಿಯನ್ನು ಅತ್ಯಾಚಾರ ಪ್ರಯತ್ನದ ಆರೋಪದಲ್ಲಿ ಏಪ್ರಿಲ್‌ನಲ್ಲಿ ಬಂಧಿಸಲಾಗಿತ್ತು. ಆತನಿಗೆ ಇನ್ನೂ ಕೇವಲ 20 ವರ್ಷವಾಗಿದ್ದು, ಆತನಿಗೆ ಕ್ಷಮಾದಾನ ನೀಡಬೇಕು ಎಂದು ಆರೋಪಿ ಪರ ವಕೀಲರು ಮನವಿ ಮಾಡಿದ್ದರು. ತನ್ನ ವೃತ್ತಿಪರ ಸಾಮರ್ಥ್ಯಕ್ಕೆ ಅನುಗುಣವಾಗಿ ಆತ ಸಮಾಜಕ್ಕೆ ಸೇವೆ ಸಲ್ಲಿಸಲು ಬಯಸಿದ್ದಾನೆ ಎಂದು ಹೇಳಿದ್ದರು. ಅದನ್ನು ಪರಿಗಣಿಸಿದ ಕೋರ್ಟ್, ಆರೋಪಿಗೆ ಮಂಗಳವಾರ ಜಾಮೀನು ಮಂಜೂರು ಮಾಡಿದೆ. ಆತನ ವೃತ್ತಿಗೆ ಸಂಬಂಧಿಸಿದ ಶಿಕ್ಷೆಯನ್ನು ಜಾಮೀನಿಗೆ ಷರತ್ತಾಗಿ ವಿಧಿಸಲಾಗಿದೆ. ಬಟ್ಟೆ ಒಗೆಯುವುದು ಮತ್ತು ಇಸ್ತ್ರಿ ಮಾಡುವುದರ ಜತೆಗೆ ತಲಾ 10,000 ರೂ ಮೌಲ್ಯದ ಎರಡು ಶ್ಯೂರಿಟಿಗಳನ್ನು ಸಲ್ಲಿಸುವಂತೆಯೂ ಕೋರ್ಟ್ ಸೂಚಿಸಿದೆ. ಈ ಪ್ರಕರಣದ ತನಿಖೆ ಪೂರ್ಣಗೊಳಿಸಿರುವ ಪೊಲೀಸರು ಆರೋಪಪಟ್ಟಿ ಸಲ್ಲಿಸಿದ್ದಾರೆ. ಎರಡೂ ಕಡೆಯವರ ನಡುವೆ ರಾಜಿ ಸಂಧಾನ ಮಾಡುವ ಅರ್ಜಿಯನ್ನು ಕೂಡ ಸಲ್ಲಿಸಲಾಗಿದೆ. ಆರು ತಿಂಗಳ ಸೇವೆಯ ಬಳಿಕ, ಆರೋಪಿಗೆ ಗ್ರಾಮದ ಮುಖ್ಯಸ್ಥರು ಅಥವಾ ಸರಕಾರದ ಯಾವುದೇ ಅಧಿಕಾರಿಯು ಆತನ ಉಚಿತ ಸೇವೆಯ ಬಗ್ಗೆ ಪ್ರಮಾಣಪತ್ರವನ್ನು ಹಸ್ತಾಂತರ ಮಾಡಬೇಕು ಎಂದು ನಿರ್ದೇಶಿಸಲಾಗಿದೆ. ಗ್ರಾಮದಲ್ಲಿ ಸುಮಾರು 2,000 ಮಹಿಳೆಯರಿದ್ದು, ಕೋರ್ಟ್ ಆದೇಶ ಸರಿಯಾಗಿ ಜಾರಿಯಾಗುತ್ತಿದೆಯೇ ಎಂಬುದನ್ನು ಖುದ್ದು ಗ್ರಾಮದ ಮುಖ್ಯಸ್ಥ ಪ್ರತಿ ದಿನ ಪರಿಶೀಲನೆ ನಡೆಸಲಿದ್ದಾರೆ. ಜಂಜಾರ್ಪುರ ನ್ಯಾಯಾಲಯದ ಎಡಿಜೆ ಅವಿನಾಶ್ ಕುಮಾರ್ ಅವರು ಈ ಹಿಂದೆಯೂ ಅನೇಕ ವಿಚಿತ್ರ ತೀರ್ಪುಗಳನ್ನು ನೀಡಿದ್ದರು. ಲಾಕ್‌ಡೌನ್ ಸಂದರ್ಭದಲ್ಲಿ ಶಾಲೆಗಳನ್ನು ತೆರೆಯುವುದರ ಕುರಿತಾದ ಪ್ರಕರಣವೊಂದರಲ್ಲಿ ಶಿಕ್ಷಕರೊಬ್ಬರಿಗೆ ಗ್ರಾಮದ ಮಕ್ಕಳಿಗೆ ಉಚಿತವಾಗಿ ಬೋಧನೆ ಮಾಡುವಂತೆ ಆದೇಶಿಸಿದ್ದರು.