ಪಿಎಂ ಕೇರ್ಸ್ ಸರಕಾರದ ನಿಧಿಯಲ್ಲ!: ಇದು ಬೃಹತ್ ಹಗರಣ ಎಂಬ ಆರೋಪಕ್ಕೆ ಗುರಿಯಾದ ಕೇಂದ್ರ

ಹೊಸದಿಲ್ಲಿ: ಕೋವಿಡ್ 19 ಸಾಂಕ್ರಾಮಿಕವನ್ನು ಎದುರಿಸುವ ಚಟುವಟಿಕೆಗಳಿಗಾಗಿ ತೆರೆಯಲಾದ ಫಂಡ್, ಭಾರತ ಸರಕಾರದ ನಿಧಿಯಲ್ಲ. ಮತ್ತು ಅದರಲ್ಲಿ ಸಂಗ್ರಹಿಸಲಾದ ಮೊತ್ತವು ಭಾರತೀಯ ಏಕೀಕೃತ ನಿಧಿಗೆ ಅಥವಾ ಸರಕಾರದ ಬೊಕ್ಕಸಕ್ಕೆ ಹೋಗುವುದಿಲ್ಲ ಎಂದು ದಿಲ್ಲಿ ಹೈಕೋರ್ಟ್‌ಗೆ ಕೇಂದ್ರ ಸರಕಾರ ಹೇಳಿದೆ. ಇದು ಪಿಎಂ ಕೇರ್ಸ್ ಕುರಿತಾದ ಅನುಮಾನಗಳನ್ನು ಮತ್ತಷ್ಟು ಹೆಚ್ಚಿಸಿದ್ದು, ಸಾಮಾಜಿಕ ಜಾಲತಾಣಗಳಲ್ಲಿ ತೀವ್ರ ಚರ್ಚೆಗೆ ಗ್ರಾಸವಾಗಿದೆ. ಪಿಎಂ ಕೇರ್ಸ್ ಟ್ರಸ್ಟ್‌ನಲ್ಲಿ ಕಾರ್ಯನಿರ್ವಹಣೆ ಮಾಡುತ್ತಿರುವ ಪ್ರಧಾನಿ ಕಚೇರಿಯ ಅಧೀನ ಕಾರ್ಯದರ್ಶಿ ಪ್ರದೀಪ್ ಕುಮಾರ್ ಶ್ರೀವಾಸ್ತವ ಅವರು ಸಲ್ಲಿಸಿರುವ ಅಫಿಡವಿಟ್‌ನಲ್ಲಿ ಈ ಹೇಳಿಕೆ ನೀಡಲಾಗಿದೆ. ಟ್ರಸ್ಟ್ ಬಹಳ ಪಾರದರ್ಶಕವಾಗಿ ಕಾರ್ಯನಿರ್ವಹಿಸುತ್ತಿದೆ ಮತ್ತು ಆಡಿಟರ್ ಒಬ್ಬರು ಅದರ ನಿಧಿಗಳ ಲೆಕ್ಕಪರಿಶೋಧನೆ ಮಾಡುತ್ತಿದ್ದಾರೆ. ಕಂಟ್ರೋಲರ್ ಮತ್ತು ಆಡಿಟರ್ ಜನರಲ್ ಸಿದ್ಧಪಡಿಸಿದ ಸಮಿತಿಯ ಚಾರ್ಟರ್ಡ್ ಅಕೌಂಟೆಂಟ್ ಒಬ್ಬರು ಈ ನಿಧಿಯ ವ್ಯವಹಾರಗಳನ್ನು ಗಮನಿಸುತ್ತಿದ್ದಾರೆ ಎಂದು ತಿಳಿಸಿದ್ದಾರೆ. ಪಿಎಂ ಕೇರ್ಸ್‌ನ ಕಾರ್ಯನಿರ್ವಹಣೆಯಲ್ಲಿ ಪಾರದರ್ಶಕತೆ ತರುವ ಸಲುವಾಗಿ ಅದನ್ನು ಸಂವಿಧಾನದ 12ನೇ ವಿಧಿ ಅಡಿಯಲ್ಲಿ ಸರಕಾರಿ ನಿಧಿ ಎಂದು ಘೋಷಣೆ ಮಾಡುವಂತೆ ಕೋರಿ ಸಲ್ಲಿಸಲಾಗಿದ್ದ ಅರ್ಜಿಗೆ ಪ್ರತಿಯಾಗಿ ಈ ಅಫಿಡವಿಟ್ ಸಲ್ಲಿಸಲಾಗಿದೆ. ಪ್ರಧಾನಿ, ಗೃಹ, ರಕ್ಷಣಾ ಮತ್ತು ಹಣಕಾಸು ಸಚಿವರು ಸೇರಿದಂತೆ ವಿವಿಧ ಟ್ರಸ್ಟಿಗಳಿಂದ ಸ್ಥಾಪನೆಯಾಗಿರುವ ನಿಧಿಯನ್ನು ಸರಕಾರದ ನಿಯಂತ್ರಣವಿಲ್ಲದ ನಿಧಿಯಾಗಿ ಘೋಷಣೆ ಮಾಡಲಾಗಿದೆ ಎಂಬ ಅಸಮಾಧಾನ ದೇಶದ ನಾಗರಿಕರಲ್ಲಿದೆ ಎಂದು ಅರ್ಜಿದಾರರು ಹೇಳಿದ್ದರು. ಪಿಎಂ ಕೇರ್ಸ್ ನಿಧಿಯು ಮಾಹಿತಿ ಹಕ್ಕು ಅಧಿನಿಯಮದಡಿ ಬರುವುದಿಲ್ಲ ಎಂದು ಕಳೆದ ವರ್ಷ ಕೇಂದ್ರ ಸರಕಾರ ಹೇಳಿದ್ದು ಸಾಕಷ್ಟು ಚರ್ಚೆಗೆ ಗ್ರಾಸವಾಗಿತ್ತು. ಈಗ ಅದು ಸರಕಾರಕ್ಕೆ ಸಂಬಂಧಿಸಿಲ್ಲ ಎಂದು ಹೇಳಿಕೆ ನೀಡಿರುವುದು ಮತ್ತೊಂದು ವಿವಾದಕ್ಕೆ ಎಡೆಮಾಡಿಕೊಟ್ಟಿದೆ. ಮುಖ್ಯ ನ್ಯಾಯಮೂರ್ತಿ ಡಿಎನ್ ಪಾಟೀಲ್ ಮತ್ತು ನ್ಯಾಯಮೂರ್ತಿ ಅಮಿತ್ ಬನ್ಸಾಲ್ ಅವರನ್ನು ಒಳಗೊಂಡ ನ್ಯಾಯಪೀಠ, ಮುಂದಿನ ವಿಚಾರಣೆಯನ್ನು ಸೆ. 27ಕ್ಕೆ ನಿಗದಿಪಡಿಸಿದೆ. ಕೇಂದ್ರ ಸರಕಾರದ ಹೇಳಿಕೆ ಪಿಎಂ ಕೇರ್ಸ್ ಕುರಿತು ನಡೆಯುತ್ತಿದ್ದ ವಾದ ವಿವಾದಗಳನ್ನು ಮತ್ತೆ ಮುನ್ನೆಲೆಗೆ ತಂದಿದೆ. ಕೆಲವರು ಇದನ್ನು ಸಮರ್ಥಿಸಿಕೊಂಡಿದ್ದರೆ, ಪ್ರಧಾನಿ ಮೋದಿ ಸ್ವತಃ ಪ್ರಚಾರಕ್ಕಿಳಿದು, ಇದು ಸರಕಾರದ್ದೇ ನಿಧಿ ಎಂದು ಬಿಂಬಿಸಿ, ಈಗ ಖಾಸಗಿ ಎಂದು ಹೇಳುತ್ತಿರುವುದು ಭ್ರಷ್ಟಾಚಾರದ ಮತ್ತೊಂದು ವಿಧಾನವಾಗಿದೆ ಎಂದು ಟೀಕಿಸಿದ್ದಾರೆ. ಭ್ರಷ್ಟಾಚಾರ ಮಾಡುತ್ತಿಲ್ಲ ಎನ್ನುವ ಕೇಂದ್ರ ಸರಕಾರ ಹಾಗೂ ಬಿಜೆಪಿ, ಜನರ ಕಣ್ಣೆದುರೇ ಅತಿ ದೊಡ್ಡ ಹಗರಣ ಸೃಷ್ಟಿಸಿದ್ದಾರೆ. ಅದನ್ನು ಕೋರ್ಟ್‌ನಲ್ಲಿ ತಾನೇ ಬಹಿರಂಗವಾಗಿ ಒಪ್ಪಿಕೊಳ್ಳುತ್ತಿದೆ. ಇದು ಸರಕಾರದ ನಿಧಿಯಲ್ಲ ಎಂದಾದರೆ, ಪ್ರಧಾನಿ ಏಕೆ ತಮ್ಮ ಚಿತ್ರ ಹಾಗೂ ಸರಕಾರದ ಚಿಹ್ನೆಗಳೊಂದಿಗೆ ಪ್ರಚಾರ ಮಾಡಬೇಕಿತ್ತು? ಸರಕಾರಿ ಉದ್ಯೋಗಿಗಳಿಂದ ಬಲವಂತವಾಗಿ ವೇತನವನ್ನು ಅದಕ್ಕೆ ಪಡೆದುಕೊಳ್ಳಬೇಕಿತ್ತು? ಎಂದು ಅನೇಕರು ಪ್ರಶ್ನಿಸಿದ್ದಾರೆ. ಈ ಟ್ರಸ್ಟ್‌ನ ಅಧ್ಯಕ್ಷರು ಪ್ರಧಾನಿ ಮೋದಿ. ಇದರಲ್ಲಿ ಗೃಹ ಸಚಿವರು, ರಕ್ಷಣಾ ಸಚಿವರು, ಹಣಕಾಸು ಸಚಿವರು ಟ್ರಸ್ಟಿಗಳು. ಆದರೂ ಇದು ಸರಕಾರದ ಟ್ರಸ್ಟ್ ಅಲ್ಲ. ಇದು ಮೋದಿ ಖಾಸಗಿ ಕಾಯಂ ಠೇವಣಿ ಎಂದು ವ್ಯಂಗ್ಯವಾಡಿದ್ದಾರೆ. ಅಫಿಡವಿಟ್‌ನಲ್ಲಿ ಹೇಳಿರುವುದೇನು?'ಪಾರದರ್ಶಕತೆಯನ್ನು ಖಾತರಿಪಡಿಸಲು ಲೆಕ್ಕಪರಿಶೋಧನೆ ಮಾಡಿದ ವರದಿಯನ್ನು ಟ್ರಸ್ಟ್‌ನ ವೆಬ್‌ಸೈಟ್‌ನಲ್ಲಿ ಪ್ರಕಟಿಸಲಾಗಿದೆ. ಟ್ರಸ್ಟ್ ಸ್ವೀಕರಿಸಿದ ಅನುದಾನದ ಬಳಕೆಯ ವಿವರಗಳನ್ನೂ ನಮೂದಿಸಲಾಗಿದೆ' ಎಂದು ಅಫಿಡವಿಟ್‌ನಲ್ಲಿ ತಿಳಿಸಲಾಗಿದೆ. 'ಎಲ್ಲಾ ದೇಣಿಗೆಗಳನ್ನೂ ಆನ್‌ಲೈನ್ ಪಾವತಿ, ಚೆಕ್ ಅಥವಾ ಡಿಮ್ಯಾಂಡ್ ಡ್ರಾಫ್ಟ್‌ಗಳ ಮೂಲಕವೇ ಟ್ರಸ್ಟ್ ಸ್ವೀಕರಿಸಿದೆ. ಹೀಗೆ ಸ್ವೀಕರಿಸಿದ ಒಟ್ಟು ಮೊತ್ತವನ್ನು ಲೆಕ್ಕಪರಿಶೋಧನೆಯ ವರದಿ ಜತೆ ಪರಿಶೀಲನೆ ಮಾಡಲಾಗುತ್ತದೆ. ಪಾರದರ್ಶಕತೆ ಮತ್ತು ಸಾರ್ವಜನಿಕ ಹಿತಾಸಕ್ತಿ ತತ್ವಗಳ ಮೇಲೆ ಟ್ರಸ್ಟ್ ಕಾರ್ಯನಿರ್ವಹಣೆ ಮಾಡುತ್ತಿದೆ. ಇತರೆ ಯಾವುದೇ ದತ್ತಿ ಟ್ರಸ್ಟ್‌ಗಳಂತೆ ಸಾರ್ವಜನಿಕ ಹಿತಾಸಕ್ತಿಯನ್ನು ಹೊಂದಿದೆ' ಎಂದು ವಿವರಿಸಲಾಗಿದೆ. 'ನಾನು ಕೇಂದ್ರ ಸರಕಾರದ ಅಧಿಕಾರಿಯಾಗಿದ್ದರೂ ಪಿಎಂ ಕೇರ್ಸ್ ಟ್ರಸ್ಟ್‌ನಲ್ಲಿ ಗೌರವಾನ್ವಿತವಾಗಿ ಕಾರ್ಯ ನಿರ್ವಹಣೆ ಮಾಡಲು ನನಗೆ ಅನುಮತಿ ಇದೆ' ಎಂದು ಪ್ರದೀಪ್ ಕುಮಾರ್ ಪ್ರತಿಪಾದಿಸಿದ್ದಾರೆ. ಪಿಎಂ ಕೇರ್ಸ್ ಎನ್ನುವುದು 'ಸರಕಾರಿ' ನಿಧಿಯಾಗಿದ್ದು, ಅದನ್ನು 2020ರ ಮಾರ್ಚ್ 27ರಂದು ಪ್ರಧಾನಿ ರಚಿಸಿದ್ದಾರೆ. ಕೋವಿಡ್ ಸಾಂಕ್ರಾಮಿಕದ ಸಾರ್ವಜನಿಕ ಆರೋಗ್ಯ ತುರ್ತು ಸನ್ನಿವೇಶದ ಹಿನ್ನೆಲೆಯಲ್ಲಿ ಭಾರತದ ನಾಗರಿಕರಿಗೆ ನೆರವಾಗಲು ಇದನ್ನು ವಿಸ್ತರಿಸಲಾಗಿದೆ ಎಂದು ಸಮ್ಯಕ್ ಗಂಗ್ವಾಲ್ ಎಂಬುವವರು ಅರ್ಜಿ ಸಲ್ಲಿಸಿದ್ದರು. ಪಿಎಂ ಕೇರ್ಸ್ ನಿಧಿಯು ಸಂವಿಧಾನದ ಅಡಿಯಲ್ಲಿ ರಚನೆಯಾಗಿರದೆ ಇದ್ದರೆ, ಪ್ರಧಾನಿ ಅವರ ಚಿತ್ರ, 'GOV' ಡೊಮೈನ್ ಬಳಸುವುದು ಮತ್ತು ದೇಶದ ಚಿಹ್ನೆಯನ್ನು ಬಳಸುವುದನ್ನು ನಿಲ್ಲಿಸಬೇಕು ಎಂದು ಅವರು ವಾದಿಸಿದ್ದಾರೆ.