ಮೈಸೂರಿನಿಂದಲೇ 'ಸಲಗ' ವಿಜಯಯಾತ್ರೆ ಆರಂಭಿಸಿದ್ದೇವೆ‌: ನಟ ದುನಿಯಾ ವಿಜಯ್

ನಟ ನಟಿಸಿ, ನಿರ್ದೇಶಿಸಿರುವ ‘ಸಲಗ’ ಸಿನಿಮಾ ರಾಜ್ಯಾದ್ಯಂತ ಉತ್ತಮ ಪ್ರದರ್ಶನ ಕಾಣುತಿದ್ದು, ‘ಸಲಗ’ ಸಿನಿಮಾಕ್ಕೆ ಅಭಿಮಾನಿಗಳಿಂದ ಭರ್ಜರಿ ಸ್ವಾಗತ ಸಿಕ್ಕಿದೆ. ಸಿನಿಮಾ ಯಶಸ್ಸಿನಿಂದ ದುನಿಯಾ ವಿಜಯ್ ಸಂತಸ ಗೊಂಡಿದ್ದು, ಅಭಿಮಾನಿಗಳಿಗೆ ಧನ್ಯವಾದ ಅರ್ಪಿಸಿದ್ದಾರೆ. ಸಿನಿಮಾ ಯಶಸ್ಸಿನ ಬಗ್ಗೆ ಮೈಸೂರಿನಲ್ಲಿ ಸುದ್ಧಿಗೋಷ್ಠಿ ನಡೆಸಿ ಮಾತನಾಡಿದ ನಟ ದುನಿಯಾ ವಿಜಯ್, "ಸಲಗ ಚಿತ್ರ ನಿರೀಕ್ಷೆಗೂ ಮೀರಿದ ಯಶಸ್ಸು ಕಂಡಿದೆ. ಕೊರೊನಾದಿಂದಾಗಿ ಚಿತ್ರ ತೆರೆಮೇಲೆ ಬರೋದು ತಡವಾಯ್ತು. ಆದರೆ ಜನ ಚಿತ್ರವನ್ನ ಒಪ್ಪಿಕೊಂಡು ಯಶಸ್ವಿಗೊಳಿಸಿದ್ದಾರೆ. ಈ ಹಿನ್ನೆಲೆ ಮೈಸೂರಿನಿಂದಲೇ ವಿಜಯಯಾತ್ರೆ ಆರಂಭಿಸಿದ್ದೇವೆ‌ ಎಂದರು. "ಚಿತ್ರದಲ್ಲಿ ಮೂಲದ ಹಲವು ಯುವಕರು ನಟಿಸಿದ್ದಾರೆ. ಹೀಗಾಗಿ ಅವರನ್ನು ಮೈಸೂರಿನಲ್ಲಿಯೇ ಪರಿಚಯ ಮಾಡುವ ದೃಷ್ಟಿಯಿಂದ ಸುದ್ದಿಗೋಷ್ಠಿ‌ ಮಾಡ್ತಿದ್ದೇವೆ. ನವೆಂಬರ್ 1ರಿಂದ ರಾಜ್ಯಾದ್ಯಂತ ನಮ್ಮ ತಂಡದ ಜೊತೆ ಸಂಚಾರ ಮಾಡಲಾಗುವುದು. ಚಿತ್ರದ ಯಶಸ್ಸಿಗೆ ಧನ್ಯವಾದ ತಿಳಿಸಲು ರಾಜ್ಯ ಪ್ರವಾಸ ಮಾಡಲಾಗುವುದು" ಎಂದು ನಟ ದುನಿಯಾ ವಿಜಯ್ ತಿಳಿಸಿದರು. ನಿರ್ದೇಶಕನಾಗಿ ಗೆದ್ದ ವಿಜಯ್..! ನಿರ್ದೇಶಕನಾಗಿ ಮೊದಲ ಯತ್ನದಲ್ಲಿ ವಿಜಯ್ ಗಮನಸೆಳೆದಿದ್ರು. ರೌಡಿಸಂ ಕಥೆಯಾದ್ದರಿಂದ ಮಾಸ್ ಪ್ರೇಕ್ಷಕರು ಸಿನಿಮಾ ಹೆಚ್ಚಾಗಿ ಇಷ್ಟ ಆಗಿದೆ . ಸಿನಿಮಾ ಸಂಭಾಷಣೆ ಫ್ಯಾಮಿಲಿ ಪ್ರೇಕ್ಷಕರಿಗೆ ಕೊಂಚ ಇರಿಸು ಮುರಿಸು ಉಂಟು ಮಾಡಬಹುದು. 'ಟಗರು' ಸಿನಿಮಾದಿಂದ ಖ್ಯಾತಿ ಪಡೆದಿದ್ದ ಮಾಸ್ತಿ, ಸಂಭಾಷಣೆ ವಿಚಾರದಲ್ಲಿ ಇಲ್ಲಿಯೂ ಸದ್ದು ಮಾಡಿದ್ರು. ಚೊಚ್ಚಲ ಸಿನಿಮಾ ನಿರ್ದೇಶಿಸಿರುವ ವಿಜಯ್ ಮೇಲೆ ಭರವಸೆ ಹೆಚ್ಚಿದೆ. ಸದ್ಯ 400ಕ್ಕೂ ಹೆಚ್ಚು ಥಿಯೇಟರ್‌ಲ್ಲಿ 'ಸಲಗ' ಸಖತ್ ಸೌಂಡ್ ಮಾಡ್ತಿದೆ . ಚಿತ್ರದಲ್ಲಿ ನಾಯಕಿಯಾಗಿ ಸಂಜನಾ ಆನಂದ್ ಅಭಿನಯಿಸಿದ್ದಾರೆ . ಕೆಪಿ ಶ್ರೀಕಾಂತ್ ಚಿತ್ರಕ್ಕೆ ಬಂಡವಾಳ ಹೂಡಿದ್ದು, ಸಲಗಕ್ಕೆ ಚರಣ್ ರಾಜ್ ಸಂಗೀತ ಸಂಯೋಜನೆ ಮಾಡಿದ್ದಾರೆ. 'ಸಲಗ 2' ಮಾಡಿ ಎಂದು ಅಭಿಮಾನಿಗಳು ಕೇಳುತ್ತಿದ್ದಾರೆ. ಕೊರೊನಾ ಎರಡನೇ ಅಲೆ ಬಳಿಕ ಸಿನಿಮಾ ಕ್ಷೇತ್ರ ಸಂಪೂರ್ಣ ಸೊರಗಿತ್ತು . ಇದರ ಮಧ್ಯೆ ಥಿಯೇಟರ್ ಆರಂಭ ಮಾಡಲು ಸರ್ಕಾರ ಹಲವು ನೀತಿ-ನಿಯಮ ಜಾರಿಮಾಡಿತ್ತು. ಶೇ100ರಷ್ಟು ಜನರಿಗೆ ಅವಕಾಶ ಕಲ್ಪಿಸಿದ ಬಳಿಕ 'ಸಲಗ' ಚಿತ್ರ ರಿಲೀಸ್ ಆಗಿದೆ. 'ಸಲಗ' ಸಿನಿಮಾಕ್ಕೆ ಸಿಕ್ಕ ಪ್ರತಿಕ್ರಿಯೆ ನೋಡಿ ಉಳಿದ ಸಿನಿಮಾಗಳು ಚಿತ್ರ ರಿಲೀಸ್ ಮಾಡಲು ಧೈರ್ಯ ಮಾಡುತ್ತಿವೆ. ಸಲಗಕ್ಕೆ ಮಾಸ್ ಪ್ರೇಕ್ಷಕರ ಬಹುಪರಾಕ್..! 'ಸಲಗ' ಹೇಳಿ ಕೇಳಿ ಪಕ್ಕಾ ಮಾಸ್ ಸಿನಿಮಾ . ಅಂಡರ್ವಲ್ಡ್ ಕಥಾಹಂದರ ಹೊಂದಿರೋ ಸಿನಿಮಾಗೆ ಪ್ರೇಕ್ಷಕ ಮಹಾಪ್ರಭು ಜೈ ಅಂದಿದ್ದಾನೆ. ಅದರಲ್ಲೂ ಮಾಸ್ ಪ್ರೇಕ್ಷಕರು ಚಿತ್ರಕ್ಕೆ ಫಿದಾ ಆಗಿದ್ದು ,ಥಿಯೇಟರ್‌ನಲ್ಲಿ ಚಪ್ಪಾಳೆ, ಶಿಳ್ಳೆ ಹೊಡೆಯುತ್ತಿದ್ದಾರೆ . ವಿಜಯ್ ಮ್ಯಾನರಿಸಂಗೆ ಅಭಿಮಾನಿಗಳು ಜೈ ಅಂದಿದ್ದು , 2021ರ ಬಿಗ್ ಹಿಟ್ ಸಿನಿಮಾಗಳ ಸಾಲಿಗೆ 'ಸಲಗ' ಸಿನಿಮಾ ಸೇರ್ಪಡೆಯಾಗಿದೆ.