Diganth: 'ಎಡಗೈಯೇ ಅಪಘಾತಕ್ಕೆ ಕಾರಣ' ಅಂತ ನಟ ದಿಗಂತ್‌ ಹೇಳುತ್ತಿರುವುದೇಕೆ?
ವಿಭಿನ್ನ ಕಥೆಗಳು, ನಿರೂಪಣೆಗಳಿರುವ ಸಿನಿಮಾ ಮಾಡುವವರ ಸಂಖ್ಯೆ ಹೆಚ್ಚಾಗುತ್ತಿದೆ. ಆ ನಿಟ್ಟಿನಲ್ಲಿ ಸಮರ್ಥ್ ಕಡಕೋಳ್ ಎಂಬ ಯುವ ನಿರ್ದೇಶಕ ವಿಶಿಷ್ಟ ಸಿನಿಮಾವೊಂದನ್ನು ಮಾಡುತ್ತಿದ್ದು ಅದರ ವಿವರ ಇಲ್ಲಿದೆ.
Admin
0
9
ಹರೀಶ್‌ ಬಸವರಾಜ್‌
ಜಗತ್ತಿನಲ್ಲಿ ಎಲ್ಲ ಕೆಲಸಕ್ಕೂ ಬಲಗೈಯನ್ನೇ ಪ್ರಧಾನವಾಗಿ ಬಳಕೆ ಮಾಡುವವರು ಹೆಚ್ಚು. ಹೀಗಾಗಿ ಬಹುತೇಕ ವಸ್ತುಗಳು ಮತ್ತು ಎಲ್ಲಕ್ರಿಯೆಗಳು ಬಲಗೈ ಕೇಂದ್ರಿತವಾಗಿರುವುದು ಸಾಮಾನ್ಯ. ಆದರೆ, ಇದರಿಂದ ಎಡಗೈ ಅನ್ನು ಹೆಚ್ಚಾಗಿ ಬಳಸುವವರಿಗೆ ತುಂಬಾ ಸಮಸ್ಯೆಯಾಗಿದೆ. ಈ ಸಮಸ್ಯೆ ಇಟ್ಟುಕೊಂಡು ಸಮರ್ಥ್ ಕಡಕೋಳ್ ಎಂಬ ಹೊಸ ನಿರ್ದೇಶಕ ವಿಭಿನ್ನ ಕಥೆಯ ಸಿನಿಮಾ ಮಾಡುತ್ತಿದ್ದು, ಅದಕ್ಕೆ '' ಎಂಬ ಟೈಟಲ್‌ ಇಟ್ಟಿದ್ದಾರೆ.
'ನನ್ನ ಸಹಾಯಕ ನಿರ್ದೇಶಕನೊಬ್ಬ ಎಡಚ. ಒಂದು ದಿನ ಸಂಜೆ, 'ಇಡೀ ಜಗತ್ತು ಬಲಗೈಯವರನ್ನೇ ದೃಷ್ಟಿಯಲ್ಲಿಟ್ಟುಕೊಂಡು ತಯಾರಾಗಿದೆ ಸರ್‌' ಎಂದು ಹೇಳಿ ಹೋದ. ನಾನು ಅದನ್ನೇ ತಲೆಯಲ್ಲಿಟ್ಟುಕೊಂಡು ಬಹಳ ಯೋಚನೆ ಮಾಡಿದೆ. ಬೆಳಗಾಗುವಷ್ಟರಲ್ಲಿಈ ಕಥೆ ನನಗೆ ಹೊಳೆಯಿತು. ಈ ಕಥೆಗಾಗಿ ರೀಸರ್ಚ್ ಮಾಡಿದಾಗ ಪ್ರತಿವರ್ಷ 2500 ಜನ ಎಡಗೈದಾರರು ಅಪಘಾತಕ್ಕೀಡಾಗಿದ್ದಾರೆ. ಜತೆಗೆ ಬಹಳಷ್ಟು ಸಮಸ್ಯೆಯೂ ಆಗಿದೆ ಎಂದು ತಿಳಿಯಿತು. ಅದನ್ನೆಲ್ಲಾ ತಿಳಿದುಕೊಂಡು ನಮ್ಮ ಸಿನಿಮಾದ ಕಥಾನಾಯಕನನ್ನು ಎಡಚನನ್ನಾಗಿಸಿ, ಅದರಿಂದ ಆತನಿಗೆ ಉಂಟಾಗುವ ಸಮಸ್ಯೆಯನ್ನು ತೆರೆಯ ಮೇಲೆ ತರುವ ಪ್ರಯತ್ನ ಮಾಡುತ್ತಿದ್ದೇವೆ' ಎನ್ನುತ್ತಾರೆ ಸಮರ್ಥ್.
'ಈ ಸಿನಿಮಾದಲ್ಲಿಎಡಗೈಚರ ಸಮಸ್ಯೆಯನ್ನು ಡಾರ್ಕ್ ಕಾಮಿಡಿಯ ಮೂಲಕ ಹೇಳುತ್ತಿದ್ದೇವೆ. ದಿಗಂತ್‌ ಸಿನಿಮಾದ ನಾಯಕರಾಗಿ ನಟಿಸುತ್ತಿದ್ದಾರೆ. ನಿರ್ದೇಶಕ ಗುರುದತ್‌ ಗಾಣಿಗ ಸಹ ನಮ್ಮ ಜತೆ ಕ್ರಿಯೇಟಿವ್‌ ತಂಡದಲ್ಲಿದ್ದಾರೆ ಮತ್ತು ಸಹ ನಿರ್ಮಾಪಕರಾಗಿದ್ದಾರೆ. ಮೋಹನ್‌ ಹೀರೇಗೌಡರ್‌ ಎಂಬವರು ನಮ್ಮ ಕಥೆ ಕೇಳಿ ಖುಷಿಯಿಂದ ಸಿನಿಮಾಗೆ ಬಂಡವಾಳ ಹೂಡುತ್ತಿದ್ದಾರೆ' ಎಂದು ಮಾಹಿತಿ ನೀಡಿದರು ಸಮರ್ಥ್. ಇಂದು 'ವಿಶ್ವ ಎಡಚರ ದಿನ'ವಾದ್ದರಿಂದ ಚಿತ್ರತಂಡ ಸಿನಿಮಾದ ಟೈಟಲ್‌ ಮತ್ತು ಫಸ್ಟ್‌ ಲುಕ್‌ ವಿಡಿಯೋವೊಂದನ್ನು ಬಿಡುಗಡೆ ಮಾಡುತ್ತಿದೆ. ಈ ಸಿನಿಮಾಗೆ ಅಭಿಮನ್ಯು ಸದಾನಂದ್‌ ಸಿನಿಮಾಟೋಗ್ರಾಫರ್‌ ಆಗಿದ್ದಾರೆ. ಅಜನೀಶ್‌ ಲೋಕನಾಥ್‌ ಸಂಗೀತ ಸಂಯೋಜನೆ ಮಾಡುತ್ತಿದ್ದಾರೆ. ರಾಹುಲ್‌ ವಿ. ಮತ್ತು ಶ್ರೀಪಾದ್‌ ಜೋಷಿ ಸಂಭಾಷಣೆ ಬರೆದಿದ್ದಾರೆ. ನವೆಂಬರ್‌ನಿಂದ ಚಿತ್ರೀಕರಣ ಆರಂಭಿಸಲು ನಿರ್ದೇಶಕರು ಪ್ಲಾನ್‌ ಮಾಡಿಕೊಂಡಿದ್ದಾರೆ.
ನಿರ್ದೇಶಕ ಸಮರ್ಥ್ ಮುಂಬೈನ ಸಿದ್ಧಾರ್ಥ್‌ ರಾಯ್‌ ಕಪೂರ್‌ ಫಿಲಂ ಪ್ರೊಡಕ್ಷನ್‌ ಸಂಸ್ಥೆಯಲ್ಲಿ ಕೆಲಸ ಮಾಡಿದ್ದಾರೆ. ಸುಭಾಷ್‌ ಘಾಯ್‌ ಅವರ ಫಿಲಂ ಇನ್‌ಸ್ಟಿಟ್ಯೂಟ್‌ನಲ್ಲಿ ಸ್ನಾತಕೋತ್ತರ ಪದವಿಯನ್ನೂ ಪಡೆದಿದ್ದಾರೆ. 'ಕೋಟಿಗೊಬ್ಬ 3' ಚಿತ್ರದಲ್ಲಿ ಸಹನಿರ್ದೇಶಕರಾಗಿ ಸಿನಿಮಾದಲ್ಲಿ ಕೆಲಸ ಮಾಡಿದ್ದಾರೆ. ಅವರು ರಿಷಬ್ ಶೆಟ್ಟಿಯವರಿಗೆ ಸಿನಿಮಾವೊಂದನ್ನೂ ಅನೌನ್ಸ್‌ ಮಾಡಿದ್ದರು. ಕೋರೊನಾ ಲಾಕ್‌ಡೌನ್‌ನಿಂದಾಗಿ ಆ ಸಿನಿಮಾ ಮುಂದಕ್ಕೆ ಹೋಗಿದೆ. ಸಮಯ ಸಿಕ್ಕ ಕಾರಣ ಎಡಚರ ಸಮಸ್ಯೆ ಇಟ್ಟುಕೊಂಡು ಕಥೆ ಬರೆದಿದ್ದಾರೆ.
ಕೋಟ್:
ಜಗತ್ತಿನಲ್ಲಿ ಸಾಕಷ್ಟು ವಿಷಯಗಳು ಬಲಗೈ ಬಳಕೆದಾರರಿಗೆ ಮಾತ್ರ ಸೀಮಿತವಾಗಿದೆ. ಈ ವಿಚಾರಕ್ಕೆ ಎಡಚರಿಗೆ ಒಂದು ಅಸಹನೆ ಇರುತ್ತದೆ. ಆ ರೀತಿಯ ಒಂದು ಸಬ್ಜೆಕ್ಟ್ ಈ ಸಿನಿಮಾದಲ್ಲಿದೆ. ಡಾರ್ಕ್ ಕಾಮೆಡಿ ಮತ್ತು ಸಸ್ಪೆನ್ಸ್‌ ಥ್ರಿಲ್ಲರ್‌ ಮಾದರಿಯ ಸಿನಿಮಾ ಇದು. ಪ್ರತಿ 15 ನಿಮಿಷಕ್ಕೊಮ್ಮೆ ನೋಡುಗರಿಗೆ ಥ್ರಿಲ್ಲಿಂಗ್‌ ಅಂಶ ಸಿಗುತ್ತದೆ.
-ಸಮರ್ಥ್ ಕಡಕೋಳ್, ನಿರ್ದೇಶಕ
