ಮತ್ತೆ ತೈಲ ದರ ಏರಿಕೆ, 7 ಜಿಲ್ಲೆಗಳಲ್ಲಿ 100 ರೂ. ಗಡಿ ದಾಟಿದ ಪೆಟ್ರೋಲ್‌ ದರ

ಬೆಂಗಳೂರು: ಪೆಟ್ರೋಲ್‌ ಮತ್ತು ಡೀಸೆಲ್‌ ದರ ಬುಧವಾರ ಮತ್ತೆ ಏರಿಕೆಯಾಗಿದೆ. ಈ ಮೂಲಕ ರಾಜ್ಯದ 7 ಜಿಲ್ಲಾ ಕೇಂದ್ರಗಳಲ್ಲಿ ಪೆಟ್ರೋಲ್‌ ದರ 100 ರೂ. ಗಡಿ ದಾಟಿದ್ದು, ರಾಜಧಾನಿ ಬೆಂಗಳೂರು ಸೇರಿದಂತೆ ಹಲವು ನಗರಗಳಲ್ಲಿ ಪೆಟ್ರೋಲ್‌ ದರ 100ರತ್ತ ಮುನ್ನುಗ್ಗುತ್ತಿದೆ.ಬುಧವಾರ ದಿಲ್ಲಿಯಲ್ಲಿ ಲೀಟರ್‌ ಪೆಟ್ರೋಲ್‌ ಬೆಲೆ 25 ಪೈಸೆ ಹೆಚ್ಚಳವಾಗಿದ್ದು 95.56 ರೂ.ಗೆ ತಲುಪಿದೆ. ಇನ್ನು ಡೀಸೆಲ್‌ ದರ ಕೂಡ 25 ಪೈಸೆ ಏರಿಕೆಯಾಗಿದ್ದು, 86.47 ರೂ.ಗೆ ಮುಟ್ಟಿದೆ. ವಾಣಿಜ್ಯ ನಗರಿ ಮುಂಬಯಿಯಲ್ಲಿ ಈಗಾಗಲೇ ಪೆಟ್ರೋಲ್‌ ದರ 100 ರು. ಗಡಿ ದಾಟಿದ್ದು ಇದೀಗ 101.76 ರೂ. ಮುಟ್ಟಿದೆ. ಡೀಸೆಲ್‌ ದರ 93.85 ರೂ. ತಲುಪಿದೆ.ಪ್ರಮುಖ ಮೆಟ್ರೋ ನಗರಗಳ ದರ ಹೀಗಿದೆ,

ನಗರ	ಪೆಟ್ರೋಲ್‌ ದರ (ರೂ.)	ಡೀಸೆಲ್‌ ದರ (ರೂ.)
ದಿಲ್ಲಿ	95.56	86.47
ಮುಂಬಯಿ	101.76	93.85
ಚೆನ್ನೈ	96.94	91.15
ಕೊಲ್ಕತ್ತಾ	95.52	89.32

ಬೆಂಗಳೂರಿನಲ್ಲಿ ಎಷ್ಟಿದೆ ದರ?ಬೆಂಗಳೂರು ನಗರದಲ್ಲಿ ಲೀಟರ್‌ ಪೆಟ್ರೋಲ್‌ ದರ 98.75 ರೂ.ಗೆ ಏರಿಕೆಯಾಗಿದ್ದು, ಶತಕಕ್ಕೆ ಇನ್ನು ಕೇವಲ 1.25 ರೂ. ಬಾಕಿ ಇದೆ. ಡೀಸೆಲ್‌ ದರ 91.67 ರೂ.ಗೆ ಹೆಚ್ಚಳವಾಗಿದೆ. ಈಗಾಗಲೇ ರಾಜ್ಯದ ಬಳ್ಳಾರಿ, ಶಿರಸಿಯಲ್ಲಿ ಪೆಟ್ರೋಲ್‌ ದರ 100 ರೂ. ಗಡಿ ದಾಟಿತ್ತು. ಇದೀಗ ಇದೇ ಪಟ್ಟಿಗೆ ಇನ್ನಷ್ಟು ನಗರಗಳು ಸೇರ್ಪಡೆಯಾಗಿವೆ.100 ರೂ. ಗಡಿ ದಾಟಿದ ನಗರಗಳು ಇಂತಿವೆ

• ಕಾರವಾರ - 100.40 ರೂ.
• ಶಿರಸಿ - 100.77 ರೂ.
• ಶಿವಮೊಗ್ಗ - 100.08 ರೂ.
• ಚಿಕ್ಕಮಗಳೂರು 100.10 ರೂ.
• ಬಳ್ಳಾರಿ 100.63 ರೂ.
• ಚಿತ್ರದುರ್ಗ 100.38 ರೂ.
• ದಾವಣಗೆರೆ 100.43 ರೂ.

ಕಚ್ಚಾ ತೈಲ ದರ ಏರಿಕೆಇನ್ನು ಅಂತಾರಾಷ್ಟ್ರೀಯ ಮಾರುಕಟ್ಟೆಯಲ್ಲಿಯೂ ಕಚ್ಚಾ ತೈಲ ದರಗಳು ಮಂಗಳವಾರ ಏರಿಕೆಯಾಗಿದ್ದು, ಕಳೆದ ಎರಡು ವರ್ಷಗಳಲ್ಲೇ ಗರಿಷ್ಠ ಮಟ್ಟವನ್ನು ತಲುಪಿವೆ.ಬ್ರೆಂಟ್‌ ಮಾದರಿಯ ಕಚ್ಚಾ ತೈಲದ ದರ ಬ್ಯಾರೆಲ್‌ಗೆ 73 ಸೆಂಟ್‌ ಹೆಚ್ಚಳವಾಗಿದ್ದು 72.22 ಡಾಲರ್‌ಗೆ ಏರಿಕೆಯಾಗಿದೆ. ಇದು 2019ರ ಮೇ ನಂತರದ ಗರಿಷ್ಠ ದರವಾಗಿದೆ. ಇನ್ನು ಡಬ್ಲ್ಯೂಟಿಐ ಮಾದರಿಯ ತೈಲ ದರ 82 ಸೆಂಟ್‌ ಏರಿಕೆಯಾಗಿದ್ದು ಬ್ಯಾರಲ್‌ಗೆ 70.05 ಡಾಲರ್‌ ಮುಟ್ಟಿದೆ. 2018ರ ಅಕ್ಟೋಬರ್‌ ಬಳಿಕದ ಗರಿಷ್ಠ ದರವಾಗಿದೆ.