ಬ್ಯಾಂಕ್‌ ಉದ್ಯೋಗಿಗಳಿಗೆ ವಾರ್ಷಿಕ 10 ದಿನಗಳ ಸರ್ಪ್ರೈಸ್‌ ರಜೆಯ ಗಿಫ್ಟ್‌ ನೀಡಿದ ಆರ್‌ಬಿಐ

ಹೊಸದಿಲ್ಲಿ: ಬ್ಯಾಂಕ್ ಉದ್ಯೋಗಿಗಳಿಗೆ ಭಾರತೀಯ ರಿಸರ್ವ್‌ ಬ್ಯಾಂಕ್ ಶುಭ ಸಮಾಚಾರ ನೀಡಿದೆ. ಆರ್‌ಬಿಐ ಆದೇಶದ ಪ್ರಕಾರ, ಸೂಕ್ಷ್ಮ ಸ್ಥಾನಗಳಲ್ಲಿ ಕೆಲಸ ಮಾಡುವ ಬ್ಯಾಂಕರ್‌ಗಳು, ಪ್ರತಿ ವರ್ಷ ಕನಿಷ್ಠ 10 ದಿನಗಳ ಪಡೆಯಲಿದ್ದಾರೆ. ಈ ನಿಯಮವು ವಾಣಿಜ್ಯ ಬ್ಯಾಂಕುಗಳಷ್ಟೇ ಅಲ್ಲದೆ, ಗ್ರಾಮೀಣ ಅಭಿವೃದ್ಧಿ ಬ್ಯಾಂಕುಗಳು ಮತ್ತು ಸಹಕಾರಿ ಬ್ಯಾಂಕುಗಳಿಗೂ ಅನ್ವಯವಾಗುತ್ತದೆ. 10 ದಿನಗಳ ಅನಿರೀಕ್ಷಿತ ರಜೆ : ಆರ್‌ಬಿಐನ 2015 ರ ಸುತ್ತೋಲೆಯ ಪ್ರಕಾರ, ಟ್ರೆಷರಿ ಆಪರೇಷನ್, ಕರೆನ್ಸಿ, ರಿಸ್ಕ್ ಮಾಡೆಲಿಂಗ್, ಮಾಡೆಲ್ ವಾಲಿಡೆಶನ್ ವಿಭಾಗಗಳೆಂದರೆ, ಅತಿ ಸೂಕ್ಷ್ಮ ವಿಭಾಗಗಳು ಎಂದರ್ಥ. ಈ ವಿಭಾಗಗಳಲ್ಲಿ ಕೆಲಸ ಮಾಡುವವರು ಈ ರಜೆ ಪಡೆಯಲು ಅರ್ಹರಾಗಿರುತ್ತಾರೆ. ಅವರಿಗೆ ಕಡ್ಡಾಯ ರಜೆ (Mandatory Leave) ಅಡಿಯಲ್ಲಿ ಪ್ರತಿ ವರ್ಷ 10 ದಿನಗಳ ರಜೆ ನೀಡಲಾಗುತ್ತದೆ. ಈ ನಿಯಮದ ಪ್ರಕಾರ, ಈ ರಜಾದಿನಗಳ ಬಗ್ಗೆ ಮುಂಚಿತವಾಗಿ ತಿಳಿಸಿರುವುದಿಲ್ಲ. ಆದೇಶ ಹೊರಡಿಸಿದ ಆರ್‌ಬಿಐ : ಗ್ರಾಮೀಣಾಭಿವೃದ್ಧಿ ಬ್ಯಾಂಕ್ ಮತ್ತು ಸಹಕಾರಿ ಬ್ಯಾಂಕ್ ಸೇರಿದಂತೆ ಬ್ಯಾಂಕುಗಳಿಗೆ ಕಳುಹಿಸಿದ ಮಾಹಿತಿಯಲ್ಲಿ, ರಿಸ್ಕ್‌ ಮ್ಯಾನೇಜ್ಮೆಂಟ್‌ ಮಾರ್ಗಸೂಚಿ ಅಡಿಯಲ್ಲಿ ಅನಿರೀಕ್ಷಿತ ರಜಾದಿನಗಳನ್ನು ನೀಡುವ ನೀತಿಯನ್ನು ತಯಾರಿಸಲು ಆರ್‌ಬಿಐ ಕೇಳಿದೆ. ಬ್ಯಾಂಕುಗಳು ತಮ್ಮ ನಿರ್ದೇಶಕರ ಮಂಡಳಿಯ ಅನುಮೋದಿತ ನೀತಿಯ ಪ್ರಕಾರ, ಸೂಕ್ಷ್ಮ ಹುದ್ದೆಗಳ ಪಟ್ಟಿಯನ್ನು ತಯಾರಿಸಲು ಮತ್ತು ಕಾಲಕಾಲಕ್ಕೆ ಪಟ್ಟಿಯನ್ನು ಪರಿಶೀಲಿಸುವಂತೆ ಹೇಳಲಾಗಿದೆ. ಆರು ತಿಂಗಳಲ್ಲಿ ಪರಿಷ್ಕೃತ ಸೂಚನೆಗಳನ್ನು ಪಾಲಿಸುವಂತೆ ಆರ್‌ಬಿಐ ಬ್ಯಾಂಕುಗಳಿಗೆ (Bank) ಸೂಚಿಸಿದೆ. ಈ ರಜೆಯ ಅಡಿಯಲ್ಲಿ, ಬ್ಯಾಂಕ್ ಉದ್ಯೋಗಿ ಆಂತರಿಕ/ ಕಾರ್ಪೊರೇಟ್ ಇಮೇಲ್ ಹೊರತುಪಡಿಸಿ ಯಾವುದೇ ರೀತಿಯ ಕೆಲಸವನ್ನು ಮಾಡಬೇಕಾಗಿಲ್ಲ. ಆಂತರಿಕ/ ಕಾರ್ಪೊರೇಟ್ ಇಮೇಲ್ ಸೌಲಭ್ಯವು ಸಾಮಾನ್ಯ ಉದ್ದೇಶಕ್ಕಾಗಿ ಬ್ಯಾಂಕ್ ಉದ್ಯೋಗಿಗಳಿಗೆ ಲಭ್ಯವಿರುತ್ತದೆ. ಕಡ್ಡಾಯ ರಜೆಯ ನೀತಿ ಅಪ್‌ಗ್ರೇಡ್ : ಆರ್‌ಬಿಐ ಏಪ್ರಿಲ್ 2015 ರಲ್ಲಿ ತನ್ನ ಹಿಂದಿನ ಮಾರ್ಗಸೂಚಿಗಳಲ್ಲಿ ಈ ರಜೆಯ ದಿನಗಳ ಸಂಖ್ಯೆಯನ್ನು ನಿರ್ದಿಷ್ಟಪಡಿಸಿರಲಿಲ್ಲ. ಆದರೂ ಇದು 10 ಕೆಲಸದ ದಿನಗಳಷ್ಟು ಆಗಿರಬಹುದು ಎಂದು ಹೇಳಲಾಗಿದೆ.