ಬಿತ್ತನೆ ಆಲೂಗೆ ಬೆಲೆ ಏರಿಕೆ ಬರೆ: ಹಿಂಗಾರು ಹಂಗಾಮಿನ ಬಿತ್ತನೆಗೆ ಭಾರಿ ಹೊಡೆತ

ಕಣಿತಹಳ್ಳಿ ಎನ್‌.ಚಂದ್ರೇಗೌಡ, ಮುಂಗಾರು ಅವಧಿಯಲ್ಲಿ ಬೆಳೆದ ರೈತರು ಬೆಲೆ ಸಿಗದೆ ತೋಟಗಳಲ್ಲೇ ಸಂಗ್ರಹಿಸಿದ್ದ ಆಲೂಗಡ್ಡೆ ಕೊಳೆತು ಹೋಗಿತ್ತು. ಅಳಿದುಳಿದ ಬೆಳೆಯನ್ನು ಸಿಕ್ಕ ಬೆಲೆಗೆ ಮಾರಾಟ ಮಾಡಿ ಕೈಸುಟ್ಟುಕೊಂಡಿದ್ದರು. ಈಗ ಮತ್ತೆ ಬಿತ್ತನೆ ಮಾಡಲು ಹೋದರೆ ಬೆಲೆ ದಿಢೀರ್‌ ಏರಿಕೆಯಾಗಿದ್ದು, ರೈತರಿಗೆ ದಿಕ್ಕೇ ತೋಚದಂತಾಗಿದೆ. ಮುಂಗಾರು ಹಂಗಾಮಿನಲ್ಲಿ ಬೆಳೆದ ಆಲೂಗಡ್ಡೆ ಬೆಳೆ ಭಾರಿ ಮಳೆ ಮತ್ತು ಬೆಲೆ ಸಿಗದೆ ಕೈಕೊಟ್ಟಿತ್ತು. ಹಿಂಗಾರು ಅವಧಿಯಲ್ಲಾದರೂ ಬಿತ್ತನೆ ಮಾಡಿ ಆದಾಯ ಗಳಿಸುವ ಕನಸಿನಲ್ಲಿದ್ದ ರೈತರಿಗೆ ಬೆಲೆ ಏರಿಕೆ ಬಿಸಿ ಜೋರಾಗೇ ತಟ್ಟಿದೆ. ಮುಂಗಾರು ಅವಧಿಯಲ್ಲಿಮೂಟೆಗೆ 5 ಸಾವಿರ ರೂ. ಕೊಟ್ಟು ಬಿತ್ತನೆ ಮಾಡಿದ್ದರು. ಆದರೆ ನಿರೀಕ್ಷಿತ ಬೆಲೆ ಸಿಗದೆ ನಷ್ಟ ಅನುಭವಿಸಿದ್ದಾರೆ. ಈಗ ಮತ್ತೆ ಬಿತ್ತನೆ ಆಲೂಗಡ್ಡೆ ಬೆಲೆ ಹೆಚ್ಚಾಗಿದ್ದು ರೈತರನ್ನು ಚಿಂತೆಗೀಡುಮಾಡಿದೆ. ದಿಢೀರ್‌ ಬೆಲೆ ಏರಿಕೆ: ಕಳೆದ ನಾಲ್ಕೈದು ದಿನಗಳ ಹಿಂದೆ ಒಂದು ಮೂಟೆ ಬಿತ್ತನೆ ಆಲೂಗಡ್ಡೆ ಬೆಲೆ 1500-2,000 ರೂ. ವರೆಗೆ ಮಾರಾಟವಾಗುತ್ತಿತ್ತು. ಆದರೆ ಈಗ 3,500 ರಿಂದ 4,000 ವರೆಗೆ ಏರಿಕೆಯಾಗಿದೆ. ಕೊರೊನಾ ಮಾತ್ತು ಭಾರಿ ಮಳೆಯ ಹೊಡೆತದಿಂದ ನಿರಂತರವಾಗಿ ನಷ್ಟಕ್ಕೆ ಒಳಗಾಗಿರುವ ರೈತರಿಗೆ ಈ ಬೆಲೆ ಏರಿಕೆ ಗಾಯದ ಮೇಲೆ ಖಾರದ ಪುಡಿ ಎರಚಿದಂತೆ ಆಗಿದೆ. ರೈತರ ಆಸೆಗೆ ತಣ್ಣೀರು: ಹಾಸನ ಬಿಟ್ಟರೆ ರಾಜ್ಯದಲ್ಲಿ ಚಿಕ್ಕಬಳ್ಳಾಪುರ ಎರಡನೇ ಅತಿದೊಡ್ಡ ಆಲೂಗಡ್ಡೆ ಬಿತ್ತನೆಗಡ್ಡೆ ಮಾರುಕಟ್ಟೆ ಹೊಂದಿದೆ. ಜಿಲ್ಲೆಯಲ್ಲಿ ಸುಮಾರು 5 ಸಾವಿರಕ್ಕೂ ಹೆಚ್ಚು ಹೆಕ್ಟೇರ್‌ ಪ್ರದೇಶದಲ್ಲಿ ಆಲೂಗಡ್ಡೆ ಬಿತ್ತನೆ ಮಾಡಲಾಗುತ್ತದೆ. ಹಿಂಗಾರು ಋುತುವಿನಲ್ಲಿ ಸೆಪ್ಟೆಂಬರ್‌ನಿಂದ ಜನವರಿ 15ರ ವರೆಗೆ ಆಲೂಗಡ್ಡೆ ಬಿತ್ತನೆ ಕಾರ್ಯ ನಡೆಯುತ್ತದೆ. ಈ ಬಾರಿ ಸೆಪ್ಟಂಬರ್‌ ಮತ್ತು ನವೆಂಬರ್‌ನಲ್ಲಿ ಭಾರಿ ಮಳೆ ಸುರಿದ ಪರಿಣಾಮ ಎರಡೂ ತಿಂಗಳಲ್ಲಿ ಸರಿಯಾದ ಬಿತ್ತನೆ ನಡೆದಿಲ್ಲ. ಡಿಸೆಂಬರ್‌ ತಿಂಗಳಲ್ಲಿ ಮಳೆ ಬಿಡುವು ಕೊಟ್ಟಿರುವ ಕಾರಣ ಈ ಬಾರಿ ಅತಿ ಹೆಚ್ಚಿನ ಪ್ರದೇಶದಲ್ಲಿ ಆಲೂಗಡ್ಡೆ ಬೆಳೆಯಲು ಸಿದ್ಧತೆ ಕಾರ್ಯ ನಡೆದಿದೆ. ಹಿಂಗಾರು ಹಂಗಾಮಿನಲ್ಲಿ ನೀರಿನ ಕೊರತೆಯಿಂದ ಆಲೂಗಡ್ಡೆ ಬೆಳೆ ಬೆಳೆಯುವವರ ಸಂಖ್ಯೆ ಕಡಿಮೆ ಇರುತ್ತಿತ್ತು. ಆದರೆ ಈ ಬಾರಿ ದಾಖಲೆ ಮಳೆ ಸುರಿದ ಪರಿಣಾಮ ಅಂತರ್ಜಲ ಹೆಚ್ಚಿದೆ. ಹೀಗಾಗಿ ರೈತರು ಹೆಚ್ಚಿನ ಪ್ರದೇಶದಲ್ಲಿ ಬಿತ್ತನೆಗೆ ಮನಸು ಮಾಡಿದ್ದಾರೆ. ಆದರೆ ಬಿತ್ತನೆ ಆಲೂಗಡ್ಡೆ ಬೆಲೆ ದಿಢೀರ್‌ ಏರಿಕೆ ರೈತರ ಆಸೆಗೆ ತಣ್ಣೀರು ಎರಚಿದಂತೆ ಆಗಿದೆ. ಬೆಲೆ ಏರಿಕೆ ದಂಧೆ: ಬಿತ್ತನೆ ಸಮಯಕ್ಕೆ ಪ್ರತಿ ವರ್ಷ ಬಿತ್ತನೆ ಸಮಯಕ್ಕೆ ಆಲೂಗಡ್ಡೆ ಬೆಲೆಯನ್ನು ದಿಢೀರ್‌ ಏರಿಕೆ ಮಾಡುತ್ತಾರೆ. ಬೇರೆ ರಾಜ್ಯಗಳಿಂದ ಆಲೂಗಡ್ಡೆ ಬರಲು ಕೆಲವು ದಿನಗಳೇ ಬೇಕಾಗುತ್ತದೆ. ಆದರೆ ಚಿಕ್ಕಬಳ್ಳಾಪುರ ಮಾರುಕಟ್ಟೆಯಲ್ಲಿ ಒಂದೇ ದಿನ ಶೇ.100ರಷ್ಟು ಬೆಲೆ ಏರಿಕೆಯಾಗಿದ್ದು, ಇದರ ಹಿಂದೆ ಯಾರ ಕೈವಾಡ ಇದೆ ಎನ್ನುವುದನ್ನು ಪತ್ತೆ ಹಚ್ಚಬೇಕಿದೆ. ನ್ಯಾಯಯುತ ಲಾಭ ಪಡೆಯಲು ಯಾರಿಗೂ ಅಭ್ಯಂತರವಿಲ್ಲ. ಆದರೆ ಯಾವುದನ್ನು ಗಣನೆಗೆ ತೆಗೆದುಕೊಳ್ಳದೇ ರೈತರ ಬಿತ್ತನೆ ಸಮಯಕ್ಕೆ ಬೆಲೆ ಏರಿಸಿ ಲಾಭ ಮಾಡಿಕೊಳ್ಳುವ ದಂಧೆಯೇ ಹುಟ್ಟಿಕೊಂಡಿದೆ. ಕೆಲವೊಂದು ಬಾರಿ ಇವರು ಮನಸೋ ಇಚ್ಛೆ ಬೆಲೆ ಏರಿಸುವುದರಿಂದ ಎಷ್ಟೋ ಟನ್‌ ಆಲೂಗಡ್ಡೆ, ಖರೀದಿಸುವವರು ಇಲ್ಲದೆ ಕೊಳೆತು ತಿಪ್ಪೆ ಸೇರಿದ ಉದಾಹರಣೆಯೂ ಇದೆ. ಬೆಲೆ ಏರಿಕೆ ದಂಧೆಗೆ ಆಕ್ರೋಶ: ಜಿಲ್ಲೆಯಲ್ಲಿ ಬಿತ್ತನೆ ಗಡ್ಡೆ ಮಾರಾಟ ಮಾಡುವ 50 ವರ್ತಕರಿದ್ದಾರೆ. ಪ್ರತಿ ವರ್ಷ 800 ರಿಂದ 900 ಟ್ರಕ್‌ ಆಲೂಗಡ್ಡೆ ಮಾರಾಟವಾಗುತ್ತದೆ. ಸ್ಥಳೀಯರಲ್ಲದೆ ಮಂಡ್ಯ, ತುಮಕೂರು, ಆಂಧ್ರಪ್ರದೇಶದ ಅನಂತಪುರ, ಧರ್ಮಾವರಂ, ಗೋರಂಟ್ಲ, ಕದಿರಿ ಕಡೆಗಳಿಂದ ಸಹ ರೈತರು ಜಿಲ್ಲೆಗೆ ಬಂದು ಬಿತ್ತನೆ ಗಡ್ಡೆ ಖರೀದಿಸುತ್ತಾರೆ. ಈ ಬಾರಿ ಹೆಚ್ಚಿನ ರೈತರು ಆಲೂಗಡ್ಡೆ ಬೆಳೆಗೆ ಒಲವು ತೋರಿದ್ದು ಇದನ್ನೇ ವರ್ತಕರು ಹಾಗೂ ಅಧಿಕಾರಿಗಳು ಬಂಡವಾಳ ಮಾಡಿಕೊಂಡು ಬೆಲೆ ಏರಿಕೆ ದಂಧೆ ಶುರು ಮಾಡಿದ್ದಾರೆ ಎಂದು ರೈತರು ಆರೋಪಿಸುತ್ತಾರೆ. ಎಚ್ಚೆತ್ತುಕೊಳ್ಳಲಿ: ಆಲೂಗಡ್ಡೆ ಬಿತ್ತನೆಗೆ ಇದು ಸಕಾಲ. ಇದೇ ಸಮಯವನ್ನು ದುರ್ಬಳಕೆ ಮಾಡಿಕೊಳ್ಳುವ ದಂಧೆಕೋರರಿಗೆ ಬ್ರೇಕ್‌ ಹಾಕಬೇಕಿದೆ. ಈ ನಿಟ್ಟಿನಲ್ಲಿ ಎಪಿಎಂಸಿ ಮತ್ತು ತೋಟಗಾರಿಕೆ ಇಲಾಖೆ ಅಧಿಕಾರಿಗಳು ಗಮನಹರಿಸಬೇಕಿದೆ. ವೈಜ್ಞಾನಿಕವಾಗಿ ಪರಿಶೀಲನೆ ನಡೆಸಿ ಬಿತ್ತನೆ ಆಲೂಗಡ್ಡೆ ಬೆಲೆಯನ್ನು ನಿಗದಿಪಡಿಸಬೇಕಿದೆ. ಇಲ್ಲವಾದಲ್ಲಿ ಹೋರಾಟ ಅನಿವಾರ್ಯ ಎಂದು ರೈತರು ಎಚ್ಚರಿಸಿದ್ದಾರೆ. ಬೆಳೆದ ಬೆಳೆಯನ್ನು ಬೆಲೆ ಸಿಗದೆ ಸಿಕ್ಕಷ್ಟು ಬೆಲೆಗೆ ಮಾರಿ ಕೈಸುಟ್ಟುಕೊಂಡಿದ್ದೇವೆ. ಈಗ ಮತ್ತೆ ಬಿತ್ತನೆ ಮಾಡಲು ಆಲೂಗಡ್ಡೆ ಖರೀದಿಗೆ ಹೋದರೆ ದಿಢೀರ್‌ ಬೆಲೆ ಏರಿಸಿದ್ದಾರೆ. ಎಪಿಎಂಸಿ ಮತ್ತು ತೋಟಗಾರಿಕೆ ಇಲಾಖೆ ಅಧಿಕಾರಿಗಳು ಇದನ್ನು ನಿಯಂತ್ರಿಸಬೇಕು. ಅವರ ಗಮನಕ್ಕೆ ಬಾರದೇ ಇವೆಲ್ಲ ನಡೆಯಲು ಸಾಧ್ಯವಿಲ್ಲ. ಹೀಗಾಗಿ ಸಂಕಷ್ಟಕ್ಕೆ ಸಿಲುಕಿರುವ ರೈತರ ಸ್ಥಿತಿಯನ್ನು ನೋಡಿ ಮಾನವೀಯತೆ ದೃಷ್ಟಿಯಿಂದಲಾದರೂ ಬಿತ್ತನೆ ಆಲೂಗಡ್ಡೆ ಬೆಲೆಯನ್ನು ಇಳಿಸಲು ಮುಂದಾಗಲಿ. ಇಲ್ಲವಾದಲ್ಲಿ ರೈತರ ಶಾಪ ಇವರಿಗೆ ತಟ್ಟದೇ ಇರದು. - ಯಲುವಳ್ಳಿ ಸೊಣ್ಣೇಗೌಡ, ರೈತ ಮುಖಂಡರು ಆಲೂಗಡ್ಡೆ ಬೆಳೆಯಿಂದ ಇತ್ತೀಚೆಗೆ ಲಾಭವೇ ಸಿಗುತ್ತಿಲ್ಲ. ಈ ಬಾರಿ ಭಾರೀ ಮಳೆ ಸುರಿದು ಬೆಳೆಗಳೆಲ್ಲ ಹಾಳಾಗಿವೆ. ಆದರೆ ನೀರಿನ ಸಮಸ್ಯೆ ಇಲ್ಲದ ಕಾರಣ ಹೆಚ್ಚಿನ ಆಲೂಗಡ್ಡೆ ಬೆಳೆ ಬೆಳೆಯಲು ಯೋಚಿಸಿದ್ದೆವು. ಆದರೆ ಕಡಿಮೆ ಇದ್ದ ಬಿತ್ತನೆ ಆಲೂಗಡ್ಡೆ ಬೆಲೆ ದಿಢೀರ್‌ ಏರಿಕೆಯಾಗಿದ್ದು ಅದರ ಸಹವಾಸವೇ ಬೇಡ ಎನ್ನುವಂತಾಗಿದೆ. - ಮಂಜುನಾಥ್‌, ಆಲೂಗಡ್ಡೆ ಬೆಳೆಗಾರರು ಬಿತ್ತನೆ ಆಲೂಗಡ್ಡೆ ದುಬಾರಿ

• ದಿಢೀರ್‌ ಏರಿಕೆಯಾದ ಬಿತ್ತನೆ ಆಲೂಗಡ್ಡೆ ಬೆಲೆ
• 1500 ರಿಂದ 3500 ರೂ. ವರೆಗೂ ಬೆಲೆ ಏರಿಕೆ
• ಹಿಂಗಾರು ಹಂಗಾಮಿನ ಬಿತ್ತನೆಗೆ ಬೆಲೆ ಏರಿಕೆ ಬಿಸಿ
• ಆಲೂಗಡ್ಡೆ ಮಾರುಕಟ್ಟೆಯಲ್ಲಿ ಬೆಲೆ ಏರಿಕೆ ದಂಧೆ!
• ಭಾರೀ ಮಳೆಯಿಂದ ನಷ್ಟಕ್ಕೊಳಗಾದವರಿಗೆ ಶಾಕ್‌
• ಆಲೂಗಡ್ಡೆ ಬೆಳೆಗಾರರ ಉತ್ಸಾಹಕ್ಕೆ ತಣ್ಣೀರು