ಚಿನ್ನದ ಹೂಡಿಕೆಯತ್ತ ಹೆಚ್ಚಿದ ಒಲವು, ಬೆಲೆಯಲ್ಲೂಏರಿಕೆ! ಬಿಟ್‌ ಕಾಯಿನ್‌ ಹಗರಣ ಬಳಿಕ ವಹಿವಾಟು ಹೆಚ್ಚಳ

ಪುಣ್ಯವತಿ ಎಚ್‌.ಪಿ. ಬೆಂಗಳೂರು: ರಾಜ್ಯದಲ್ಲಿ ವಜ್ರ, ಚಿನ್ನ ಮತ್ತು ಬೆಳ್ಳಿ ಆಭರಣಗಳ ಮೇಲೆ ಬಂಡವಾಳ ಹೂಡಿಕೆ ಮಾಡುತ್ತಿರುವವರ ಸಂಖ್ಯೆ ದಿಢೀರ್‌ ಹೆಚ್ಚಳವಾಗಿದೆ. ಸಾಮಾನ್ಯ ಅವಧಿಗೆ ಹೋಲಿಸಿದರೆ, ಬಿಟ್‌ ಕಾಯಿನ್‌ ಹಗರಣದ ಬಳಿಕ ಈಗ ಶೇ.20ರಷ್ಟು ಚಿನ್ನಾಭರಣಗಳ ವಹಿವಾಟು ಹೆಚ್ಚಿದೆ. ಹೂಡಿಕೆ ಪ್ರಮಾಣ ಹೆಚ್ಚಾಗಿದ್ದರಿಂದ ಪ್ರತಿ ಗ್ರಾಮ್‌ ಚಿನ್ನದ ಮೇಲೆ 200-300 ರೂ., ಪ್ರತಿ ಕೆ.ಜಿ ಬೆಳ್ಳಿ ಬೆಲೆಯಲ್ಲಿ 5,400 ರೂ. ಏರಿಕೆಯಾಗಿದೆ. ಪ್ರತಿ ಕ್ಯಾರಟ್‌ ವಜ್ರದ ಮೇಲೆ ಸಾವಿರಕ್ಕೂ ಹೆಚ್ಚು ಏರಿಕೆಯಾಗಿದೆ. ದೀಪಾವಳಿ ಸಂದರ್ಭದಲ್ಲಿ ಅಂತಾರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಚಿನ್ನ ಮತ್ತು ಬೆಳ್ಳಿ ಆಭರಣಗಳ ಬೇಡಿಕೆ ಕುಸಿತವಾಗಿತ್ತು. ಇದರ ಪರಿಣಾಮದಿಂದ ಪ್ರತಿ ಗ್ರಾಮ್‌ ಚಿನ್ನದ ಮೇಲೆ 100-200 ರೂ. ಇಳಿಕೆಯಾಗಿತ್ತು. ಕಳೆದ 10 ದಿನಗಳಿಂದ ಅಕ್ರಮವಾಗಿ ಹಣ ಸಂಪಾದಿಸುತ್ತಿರುವವರು, ಶ್ರೀಮಂತರು ಹಾಗೂ ಆರ್ಥಿಕ ಬಲಾಢ್ಯರು ಸೇರಿ ಇನ್ನಿತರರು ಸುರಕ್ಷತಾ ದೃಷ್ಟಿಯಿಂದ ಚಿನ್ನದ ಮೇಲೆ ಕೋಟ್ಯಂತರ ರೂಪಾಯಿ ಬಂಡವಾಳ ಹೂಡಿಕೆ ಮಾಡುತ್ತಿರುವುದು ಮೂಲಗಳಿಂದ ತಿಳಿದು ಬಂದಿದೆ. ಗಟ್ಟಿ ಮೇಲೆ ಹೂಡಿಕೆಈ ಹಿಂದೆ ಶ್ರೀಮಂತರು ಹಾಗೂ ರಾಜಕೀಯ ಮುಖಂಡರು ಚಿನ್ನಾಭರಣಗಳ ಮೇಲೆ ನೂರಾರು ಕೋಟಿ ರೂ. ಕಪ್ಪು ಹಣ ಹೂಡಿಕೆ ಮಾಡುತ್ತಿದ್ದರು. ಚುನಾವಣೆ ಸಂದರ್ಭದಲ್ಲಿ ಅಕ್ರಮವಾಗಿ ಸಾವಿರಾರು ಕೋಟಿ ರೂ. ಚಿನ್ನ ವಹಿವಾಟು ನಡೆಯುತ್ತಿತ್ತು. ಇದನ್ನು ತಡೆಯಲು ಕೇಂದ್ರ ಸರಕಾರ ಈಗಾಗಲೇ ಪ್ರತಿ ಆಭರಣಕ್ಕೂ ಶಾಶ್ವತವಾಗಿ ಯುಐಡಿ(ವಿಶೇಷ) ಸಂಖ್ಯೆ ನೀಡುವ ಯೋಜನೆ ಜಾರಿಗೆ ತಂದಿದೆ. ಅಲ್ಲದೆ, ಚಿನ್ನ ಖರೀದಿ ಸಂದರ್ಭದಲ್ಲಿ ಚಿನ್ನಾಭರಣ ಮಾಲೀಕರು ನಕಲಿ ಬಿಲ್‌ ತಯಾರಿಸಿ ಸರಕಾರಕ್ಕೂ ತೆರಿಗೆ ವಂಚಿಸುತ್ತಿರುವ ಪ್ರಕರಣಗಳು ನಡೆಯುತ್ತಿದ್ದವು. ಅದನ್ನು ತಡೆಯಲು ಹಾಲ್‌ಮಾರ್ಕ್ ಹಾಗೂ ಯುಐಡಿ ಯೋಜನೆ ಜಾರಿಯಾಗಿದೆ. 2 ಲಕ್ಷ ರೂ.ಮೌಲ್ಯಕ್ಕಿಂತ ಹೆಚ್ಚಿನ ಬೆಲೆಯ ಚಿನ್ನ ಖರೀದಿಸಿದರೆ ಬಿಲ್‌ ಹಾಗೂ ಪ್ಯಾನ್‌ ಕಾರ್ಡ್‌ ಕಡ್ಡಾಯವಾಗಿದೆ. ಇಷ್ಟೆಲ್ಲಾ ನಿಯಮಗಳಿದ್ದರೂ ಕಾನೂನು ಬಾಹಿರವಾಗಿ ಹಣ ಸಂಪಾದಿಸುವ ಅಧಿಕಾರಿಗಳು, ರಾಜಕೀಯ ನಾಯಕರು ಮತ್ತು ಉದ್ದಿಮೆದಾರರು ಕೋಟ್ಯಂತರ ರೂಪಾಯಿಗಳನ್ನು ಚಿನ್ನದ ಗಟ್ಟಿಗಳ ಮೇಲೆ ಹೂಡಿಕೆ ಮಾಡುತ್ತಿದ್ದಾರೆ. 200-300 ರೂ. ಏರಿಕೆಅಂತಾರಾಷ್ಟ್ರೀಯ ಮಾರುಕಟ್ಟೆಗಳಲ್ಲಿ ಚಿನ್ನಾಭರಣ ಮಾರಾಟ ಮಾಡುತ್ತಿದ್ದ ಚೀನಾ ಕಂಪನಿಗಳು ವಿವಿಧ ಕಾರಣಗಳಿಂದ ದಿವಾಳಿಯಾಗಿವೆ. ಈ ಕಂಪನಿಗಳು ಸಂಗ್ರಹಿಸಿಟ್ಟಿದ್ದ ಚಿನ್ನಾಭರಣಗಳ ಮಾರಾಟಕ್ಕಾಗಿ ಚೀನಾ ಸರಕಾರವು ಹರಾಜು ಪ್ರಕ್ರಿಯೆ ನಡೆಸಿತ್ತು. ಈ ಕಾರಣದಿಂದಾಗಿ ದೀಪಾವಳಿ ಸಂದರ್ಭದಲ್ಲಿ ಅಂತಾರಾಷ್ಟ್ರೀಯ ಮಾರುಕಟ್ಟೆಗಳಲ್ಲಿ ಚಿನ್ನ ಮತ್ತು ಬೆಳ್ಳಿ ಆಭರಣಗಳ ಬೇಡಿಕೆ ಕುಸಿತವಾಗಿತ್ತು. ಆಗ 22 ಕ್ಯಾರಟ್‌ ಚಿನ್ನ ಪ್ರತಿ ಗ್ರಾಮ್‌ಗೆ 4,450 ರೂ.ಇತ್ತು. ಇದೀಗ 4,650 ರೂ.ಆಗಿದೆ. 24 ಕ್ಯಾರಟ್‌ ಚಿನ್ನ ಪ್ರತಿ ಗ್ರಾಮ್‌ಗಿದ್ದ ಬೆಲೆ 4,785 ರೂ.ನಿಂದ 5,100 ರೂ. ಏರಿಕೆಯಾಗಿದೆ. ಶೇ.80ರಷ್ಟು ಹೆಚ್ಚಳ:2015ರಲ್ಲಿ ಪ್ರತಿ ಗ್ರಾಮ್‌ ಚಿನ್ನಕ್ಕೆ ಸರಾಸರಿ 2,600 ರೂ.ಇತ್ತು. ಈಗ ಪ್ರತಿ ಗ್ರಾಮ್‌ ಚಿನ್ನದ ಬೆಲೆ 4,650 ರೂ.ಇದೆ. 5 ವರ್ಷಗಳಲ್ಲಿ ನಾನಾ ಹಂತದಲ್ಲಿ ಹೂಡಿಕೆ ಮಾಡುತ್ತಿರುವ ಸಂಖ್ಯೆ ಹೆಚ್ಚಳವಾಗಿದೆ. ಈ ಕಾರಣದಿಂದ ವರ್ಷದಿಂದ ವರ್ಷಕ್ಕೆ ಚಿನ್ನ ಖರೀದಿಸುವವರ ಸಂಖ್ಯೆ ಹೆಚ್ಚುತ್ತಿದೆ. 5 ವರ್ಷಗಳಲ್ಲಿ ಮಾಡುತ್ತಿರುವವರ ಸಂಖ್ಯೆ ಶೇ.80 ಏರಿಕೆಯಾಗಿದೆ.